«ལྗང་བུའི་རྩོམ་གསར་ཕྱོགས་བསྡུས»དཔེ་སྐྲུན་འགྲེམ་སྤེལ་བྱས།

       ཁོ་བོའི་བསམ་ཚོད་ལ། ད་ལྟའི་ཆར། “ལྗང་བུ་ཞེས་པའི་ཐ་སྙད་འདི་རྩོམ་རིག་སྣང་ཚུལ་རིགས་ཤིག་གི་མཚོན་བྱེད་བརྡ་རྟགས”(མཁར་ཆེན་གྱི་ཚིག)ཙམ་གྱི་བཅད་མཚམས་ལས་ཕལ་ཆེར་བརྒལ་ཡོད་པ་འདྲ་ལ། “གཏོར་བཤིག་པ་དང་གསར་གཏོད་པ”(མགོན་པོ་སྐྱབས་ཀྱི་ཚིག)ཞེས་པའི་ངེས་བརྗོད་ཀྱིས་ཀྱང་ཧ་ལམ་ཚད་ཐིག་བཟོ་ཁག་པོ་ཆགས་འདུག་སྙམ།ལོ་ངོ་སུམ་ཅུའི་སྔོན་དུ། «ལྗང་བུའི་རྩོམ་བཏུས·སྙན་ངག་དེབ»ལས་མངོན་པའི“དམིགས་བསལ་གྱི་ཚོར་བ་དང་། ཁྱད་འཕགས་ཀྱི་རྩོམ་རྩལ། ངོ་མཚར་གྱི་སྙན་ངག”བཅས་ཀྱིས“ཨེ་ཤེ་ཡའི་སྤྱི་གཙུག་ནས་མཆེད་པའི་འོད་ཟེར”ཁྲིད་ནས་མུན་པའི་གྲུ་ཟུར་ཞིག་གསལ་བར་བྱས་ཤིང་། «ལྗང་བུའི་རྩོམ་བཏུས·ལྷུག་རྩོམ་དེབ»ཀྱིས“ཁེར་རྐྱང་གི་འཚོ་བ་དང་། ཁེར་རྐྱང་གི་བསམ་གཞིགས། ད་དུང་ཁེར་རྐྱང་གི་འགྲུལ་སྐྱོད”བཅས་ལྷུག་བརྗོད་ཀྱི་ཚོད་ལྟ་གསར་པ་ཞིག་བསྣམས་ནས་སྙན་ངག་མ་ཡིན་པའི་སྐད་ཆ་ལ་གཟུངས་གཞུག་ཕུལ། ལོ་ངོ་ཉེར་ལྔའི་སྔོན་དུ། «སྙན་རྩོམ་གཟི་མིག་དགུ་པ»ཡིས་སྐད་ཆ་བབ་ཆགས་སྤྲོས་བྲལ་དང་། ཉམས་འགྱུར་བསྟན་བཤིག་ཚ་པོ། སྐྱོན་བརྗོད་ཁ་རུ་ཁ་ཐུག་བཅས་དང་དེ་དག་གི་རྒྱབ་ལོགས་ལ་སྦས་པའི་ལྗིད་ཚད་དང་ལྷད་མེད་དང་དྲང་བདེན་སོགས་མ་བུ་ངོ་སྤྲད་པ་ལྟར་བྱས་ནས། ཡུལ་ལྗོངས་ཀྱི་ཐན་པར་བབས་པའི་ཐ་སྙད་ཀྱི་ཆར་ཐིགས་དེ་དག་ངེད་ཅག་གི་ཚོར་ཤེས་གསོ་བའི་འཚོ་བཅུད་དུ་ཐེངས་གཅིག་དྲངས།        ལོ་ན་རིམ་གྱིས་རྒས་ཀྱང་སྙན་ངག་ལ་ནམ་ཡང་གཞོན་ཤ་དང་། གསར་ཉམས། རང་གཤིས་འཛིན་པའི་སྐུ་ཞབས་ལྗང་བུས་ད་རེས་ཚོད་ལྟ་གཞན་ཞིག་གི་དབུ་བརྩམས་ནས་རྡོག་ཐོན་བྱུང་ཡོད། རྡོག་ཐོན་ཐེངས་འདིས་བསྡུས་བརྗོད་ཀྱི་ནགས་ཚལ་དང་ནུས་ཤུགས་རྩལ་སྤྲུགས་སྒོས་བཏོན་པའི་ཀི་ཅོ་སོགས་འགྲོ་རོགས་རྩུབ་པོ་དག་གང་ལ་གང་འཚམས་སྤངས་ནས། ཁ་གསལ་གོ་བདེ་ཡི་འཇམ་པོ་ཉིད་གྲོགས་སུ་སྦྲན་ཡོད། རྒྱང་ལམ་འགྲིམས་ཐེངས་འདི་ནི་ཁོང་གི་བཞེད་སྟངས་ལྟར“ཐ་སྙད་གྲངས་མེད་ཅིག་གི་སེར་སྦྲེངས”བསྒྲིགས་ཚུལ་ཐེངས་གཅིག་རེད། ཁོང་གིས་རུ་བསྟར་དེའི་དཀྱིལ་དུ་ཚིག་ཕྲེང་དམ་དུམ་གྱི་ཆོས་གོས་མནབས་ནས་ཀློག་མཁན་ཁྱེད་ཅག་ལ་ཕེབས་བསུ་ཞུས་ནས་འདུག ཐ་སྙད་ཀྱི་སེར་སྦྲེངས་འདིའི་རུ་བསྟར་ཁྲོད་དུ། མི་ལ་རས་པས་གངས་མགུར་རིང་མོ་ངག་ལ་བཞེངས། ཀློང་ཆེན་པས་དབྱངས་ཅན་མའི་བསྟོད་ཚིག་དབྱངས་སུ་གྱེར། འཇུ་མི་ཕམ་དང་། རྡོ་གྲུབ་བསྟན་ཉི། འབྲུག་པ་ཀུན་ལེགས། ཆོས་དཔལ་བཟང་པོ། ཤུག་གསེབ་རྗེ་བཙུན། ད་དུང་རྒྱ་གར་པ་དགེ་བའི་དབང་པོ་དང་། ཉི་དབང་མགོན་པོ། ད་དུང་ཨ་རབ་པ་གཱིབ་རན། ཧྥ་རན་སི་པ་ཨུ་གྷོ་སོགས་རུ་བསྟར་གྱི་མཚམས་དང་མཚམས་སུ་བཞེངས་ནས་གསུང་ངག་ཐན་ཐུན་གྱིས་སེར་སྦྲེངས་ལ་རམ་འདེགས་བྱེད། སློག་ཧྲུལ་གྱོན་པའི་གནའ་མི་རྒན་པ་རེ་འགའི་ངག་ནས་གཏམ་དཔེ་སེམས་ལ་འབབ་ཅིང་ལྗིད་ཏིག་གེ་བ་རེ་བཤད་ཡོང་བ་སྐབས་དང་སྐབས་སུ་བརྗོད་ཐོས་ཐུབ། གླིང་གེ་སར་རྒྱལ་པོའི་སྒྲུང་ལ་མཁས་པའི་སྒྲུང་མཁན་རེ་འགའི་སྒྲུང་ངག་ཐན་ཐུན་རེའང་རྣ་བར་སོན་ཡོང་། དབུས་གཙང་ཕྱོགས་ཀྱི་དམངས་ཁྲོད་དྲུག་ཚིག་གི་གཞས་གདངས་དང་བྲག་ཅ་མཚམས་མེད་རུ་བསྟར་འདིའི་མགོ་རྔ་བར་གསུམ་ཀུན་ན་གྲགས། ཨ་མདོའི་དམངས་ཁྲོད་ཀྱི་བརྒྱད་ཚིག་འགའ་རེའང་སྐབས་དང་སྐབས་སུ་གྲགས་ཡོང་། པྲ་ཆལ་དང་། ཟུར་ཟ། ལྡོག་བཤད། དོགས་འདྲི། ཆིག་ལབ། ཡིག་རྩེད་ཚིག་རྩེད་ལ་དགའ་བའི་བྱིས་པ་དག་སེར་སྦྲེངས་ཀྱི་རུ་བསྟར་འདིའི་བར་གསེང་ཀུན་ཏུ་འུར་ཆིལ་ཆིལ་གབ་སྦེད་རྩེད་མོ་རྩེ། སྐུ་ཞབས་ཁོང་གི་སྔ་རྩོམ་ཚན་པ་རེ་འགས་ཀྱང་སེར་སྦྲེངས་འདིའི་ཕུན་ཚོགས་དང་རྔམ་བརྗིད་ལ་སྐྱོར་ཡ་བྱེད།
       “ཐ་སྙད་ཀྱི་སེར་སྦྲེངས”འདི་ནི་སྒྲ་ཡི་རྣམ་གྲངས་ཅི་རིགས་ཀྱིས་ཁེངས་པའི་རུ་ཁག་ཅིག་རེད། བཟློག་པ་འདོན་པའི་སྒྲ། དབྱངས་བཞི་སོ་སོར་ངེས་པའི་སྒྲ། འདེགས་འཇོག་དང་ལྡེམ་འགྲོས་ལྡན་པའི་འགྱུར་ཁུག་ཅིག་གི་སྒྲ་དང་དེ་ཡོངས་སུ་མ་རྫོགས་གོང་གཏོར་བརླག་བཟོས་ཡོང་བའི་སྒྲ། ཟློས་སྒྲ་དང་ཁ་སྐད་ཀྱི་རྔ་དྲིལ་དུང་གླིང་འབུད་རྡུང་དཀྲོལ་གསུམ་ཡང་ཡང་བྱེད་པའི་སྒྲ། དོགས་འདྲི་དང་ཟུར་ཟ་དང་ཚིག་རྒྱག་བྱེད་པའི་སྒྲ། ཀུ་རེ་དོན་གཏམ་དུ་སྨྲ་བའི་སྒྲ། ད་དུང་ཞིབ་ཏུ་ཉན་ན་ཐོས་ཐུབ་པ། ཁ་བ་ལྷུང་བའི་སྒྲ། མིག་ཆུ་བརྡོལ་བའི་སྒྲ། དྲན་པ་སོས་པའི་སྒྲ། བརྩེ་བ་ཁོལ་བའི་སྒྲ། གངས་རི་སྨྲེང་བའི་སྒྲ། བརྗོད་པ་མེད་པའི་སྒྲ……
       སྒྲ་ཡི་རུ་ཁག་འདི་སྔར་བས་ཕུན་སུམ་ཚོགས་པ་ཞིག་ལེགས་འགྲུབ་ཡོང་རྒྱུར། ཀློག་མཁན་ཁྱེད་ཅག་གི་སྐད་སྒྲ་ནི་ཅིས་ཀྱང་མེད་དུ་མི་རུང་།