གངས་རྒྱན་རྟགས་མའི་རྩོམ་རིག་བྱ་དགའ་སྤྲོད་པའི་མཛད་སྒོ་སྤེལ།

གངས་རྒྱན་རྟགས་མའི་བོད་ཡིག་རྩོམ་རིག་གསར་རྩོམ་བྱ་དགའ་སྐབས་བཞི་པའི་གཟེངས་བསྟོད་མཛད་སྒོ་ལྷ་ས་རུ་སྤེལ།
 

       སྟོན་གསུམ་ལོ་ལེགས་ཀྱི་འབྲས་བཟང་བང་མཛོད་དུ་ལེགས་པར་བསྡུས་ཟིན་ནས་སྤྱི་ལ་དགུན་ཚུགས་པའི་དུས་ཚིགས་ཁྱད་པར་བ་སྟེ། ཟླ་བ༡༡པའི་ཚེས༨ཉིན། གྲོང་ཁྱེར་ལྷ་སའི་ཀྲོའུ་ཅི་གསོལ་མགྲོན་ཁང་དུ་གངས་རྒྱན་རྟགས་མའི་བོད་ཡིག་རྩོམ་རིག་གསར་རྩོམ་བྱ་དགའ་སྐབས་བཞི་པ་སྤྲོད་པའི་མཛད་སྒོ་འཚོགས་པ་རེད། ཞོགས་པའི་ཉི་གཞོན་ཤར་རིའི་ཕྲག་པ་ནས་གང་ཙམ་འཕག་མཚམས་སུ། དྲི་ལྡན་མེ་ཏོག་རྒྱང་རིང་ཡང་། བུང་བ་སྤྲིན་གྱི་ཚོགས་བཞིན་འཁོར་ཞེས་པ་ལྟར། ཕྱོགས་ཁག་ནས་ཕེབས་པའི་སྐུ་མགྲོན་རྣམས་གཟབ་མཆོར་ལེགས་པར་སྤྲས་ནས་འཆར་ཁའི་ཉི་གཞོན་འདྲ་བའི་འཛུམ་མདངས་ཕྱུང་བཞིན་རྩོམ་རིག་གི་དགའ་སྟོན་འདིར་ལྷན་དུ་འཛོམས།

       གངས་རྒྱན་རྟགས་མའི་བོད་ཡིག་རྩོམ་རིག་གསར་རྩོམ་བྱ་དགའ་ནི་རང་རྒྱལ་གྱི་བོད་ཡིག་རྩོམ་རིག་ཁྱབ་ཁོངས་སུ་ཤུགས་རྐྱེན་ཆེན་པོ་ལྡན་པའི་ཆེད་ལས་བྱ་དགའ་ཞིག་ཡིན་པ་དང་། བྱ་དགའ་འདིས་བོད་ཡིག་རྩོམ་རིག་གི་ཕུལ་བྱུང་བརྩམས་ཆོས་སྔོག་འདོན་དང་། མི་རིགས་ཀྱི་རྩོམ་རིག་ཤེས་ལྡན་པ་སྐྱེད་སྲིང་བྱ་རྒྱུ་དམིགས་ཡུལ་དུ་བཟུང་ཡོད།

       སྐབས་འདིའི་གངས་རྒྱན་རྟགས་མ་ནི་མི་རིགས་རྩོམ་རིག་དུས་དེབ་ཁང་གིས་རིག་གཞུང་མཛུབ་སྟོན་བྱས་པ་དང་། བོད་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་སོགས་ལས་ཁུངས་མང་པོས་གཙོ་སྒྲུབ་དང་སྒྲུབ་འགན་འཁུར་བ་རེད། སྐབས་འདིའི་དཔྱད་བརྗོད་ཨུ་ལྷན་གྱིས་རྒྱལ་ཡོངས་སུ་ཁ་ཕྱོགས་ནས༢༠༡༥ལོ་ནས༢༠༢༥ལོའི་བར་ཡོང་བསྒྲགས་དཔར་སྐྲུན་བྱས་པའི་བོད་ཀྱི་རྩོམ་རིག་བརྩམས་ཆོས་གཞིར་བཟུང་ནས། གཟབ་ནན་གྱིས་གདམ་གསེས་བྱས་རྗེས་མཐར་བརྩམས་ཆོས་བདུན་བདམས་ཡོད།

       རྩོམ་རིག་གི་རྒྱུ་ཆར་རྫོགས་མཐའ་མེད་པས། གསར་རྩོམ་ལ་ཚར་དུས་ཤིག་ག་ལ་ཡོད། “དེང་སང་གི་སྤྱི་ཚོགས་བཟང་པོ་དང་དུས་སྐབས་ཡག་པོའི་ནང་། ལོ་ཆུང་ཚོས་རྩོམ་ཡིག་མང་པོ་འབྲི་བ་དང་། བསམ་གཞིག་གང་མང་བཏང་ན། འབྲས་བུ་གང་ལ་གང་འཚམ་ཐོབ་ཤག་ཤག་རེད”ཅེས་བྱ་དགའ་ཐོབ་མཁན་གངས་དབང་བཀྲ་ཤིས་ཀྱིས་གསུངས་པ་ལྟར། རྩོམ་རིག་གསར་རྩོམ་ལ་དགའ་ཞེན་ཆེ་ཞིང་། གསར་རྩོམ་གྱི་ལམ་བུར་འཇུག་བཞིན་པའི་བློ་གསར་ཚོས་བྱ་དགའ་ཐོབ་མཁན་གྱི་རྩོམ་པ་པོ་རྣམས་ཀྱི་བརྩམས་ཆོས་ལ་སློབ་སྦྱོང་དང་། ཁོང་ཚོ་མིག་དཔེར་བཟུང་ནས་རྩོམ་རིག་གསར་རྩོམ་ལས་ལ་རྟག་གུས་བརྩོན་པ་མ་ལྷོད་ན། སླད་མར་རེ་བའི་འབྲས་བཟང་སྨིན་པར་གདོན་མི་ཟའོ། །