《བོད་བཙན་པོའི་དུས་སྐབས་ཀྱི་བརྡ་རྙིང་ཡིག་ཆ་དཔྱད་གླེང》པར་བསྐྲུན་འགྲེམ་སྤེལ་གནང་བ།

《བོད་བཙན་པོའི་དུས་སྐབས་ཀྱི་བརྡ་རྙིང་ཡིག་ཆ་དཔྱད་གླེང》 །

     ཉེ་སྔོན། སྟོབས་ལྡན་གྱིས་བརྩམས་པའི《བོད་བཙན་པོའི་དུས་སྐབས་ཀྱི་བརྡ་རྙིང་ཡིག་ཆ་དཔྱད་གླེང》ཞེས་པའི་དཔེ་དེབ་འདི་བོད་ལྗོངས་མི་དམངས་དཔེ་སྐྲུན་ཁང་གིས་པར་བསྐྲུན་འགྲེམ་སྤེལ་བྱས་ཤིང་། མིག་སྔར་བོད་ཀྱི་ཡིག་རྙིང་ཁག་ལ་དཔྱད་པ་གནང་བའི་གྲུབ་འབྲས་གལ་ཆེན་ཞིག་ཡིན།
     དེབ་འདིའི་ནང་དུ་ཤོག་དྲིལ་ཡིག་རྙིང་ལས་འཕྲོས་ཏེ་བོད་ཀྱི་དབུ་ཅན་དབུ་མེད་ཀྱི་བྲིས་གཟུགས་བྱུང་འཕེལ་སྐོར་དང་། བོད་ཀྱི་ཡི་གེའི་སྒྲའི་སྦྱོར་ཚུལ་སྐོར། ཡི་གེའི་སྒྲའི་འབྱིན་སྟངས་སྐོར། བོད་བཙན་པོའི་དུས་ཀྱི་མགོ་འདོགས་ཡི་གེའི་སྐོར།  ཏུན་ཧོང་ཡིག་རྙིང་ལས་འཕྲོས་ཏེ་མགོ་འདོགས་དང་འཕུལ་རྟེན་ཡི་གེའི་བྱུང་རིམ་གྱི་སྐོར། ཞྭ་ལྷ་ཁང་གི་བྱང་ངོས་ནས་རྙེད་པའི་ལྡོང་གི་བང་སོའི་རྡོ་རིང་ཡི་གེའི་ཁྱད་ཆོས་སོགས་ཕྱོགས་དུ་མ་ནས་ཞིབ་འཇུག་བྱེད་ཐབས་སྤྱད་དེ་བོད་བཙན་པོའི་དུས་ཀྱི་ཡི་གེའི་ཁྱད་ཆོས་ཇི་ལྟ་བུ་ཡིན་ཚུལ་ལུང་རིགས་ཁུངས་བཙུན་པའི་སྒོ་ནས་བརྗོད་ཡོད་པ་དང་། དེབ་འདིས་བརྡ་རྙིང་ཡིག་ཆ་ཞིབ་འཇུག་དང་རྒྱུས་ལོན་བྱེད་པའི་ཐད་ཕན་ཐོགས་མི་དམན་པ་བསྐྲུན་ཡོད།