ཁྲི་གཡུང་དྲུང་གི《མར་ནང་ཚང་དྲུང་མུའི་དཔེ་ཚོགས》ཅེས་པའི་དཔེ་དེབ་གསུམ་ངོ་སྤྲོད་རགས་བསྡུས།

ཁྲི་གཡུང་དྲུང་གི《མར་ནང་ཚང་དྲུང་མུའི་དཔེ་ཚོགས》འགྲེམ་སྤེལ་བྱས།

　　བོད་ཤིང་རྟ་ལོའི་གནམ་ལོ་གསར་ཚེས་ཀྱི་ཞོགས་པར་ཕྲན་ཁྲི་གཡུང་དྲུང་གིས་བརྩམས་པའི《མར་ནང་ཚང་དྲུང་མུའི་དཔེ་ཚོགས》ཞེས་པའི་དེབ་འཕྲེང་གསུམ་དཔར་བསྐྲུན་ལེགས་གྲུབ་བྱུང་ནས་སྒོ་འབྱེད་དང་འགྲེམ་སྤེལ་ཞུ་བཞིན་ཡོད་པ་ལགས་ན་གཤམ་དུ་དཔེ་ཚོགས་འདིར་ཐུགས་སྣང་ཡོད་མཁན་རྣམས་ལ་ངོ་སྤྲོད་རགས་བསྡུས་ཙམ་ཞུ་རྒྱུ་ཡིན།
　　དཔེ་ཚོགས་སྤྱིའི་ངོ་སྤྲོད།
　　དེ་ཡང《མར་ནང་ཚང་དྲུང་མུའི་དཔེ་ཚོགས》ཞེས་པའི་རྩོམ་རིག་དེབ་འཕྲེང་དང་པོ《གདུང་ཚོར་ནག་པོ》ཞེས་པ་དེ་ཡིན། དེ་ནི་ཕྱི་ལོ1998ལོ་ནས2007ལོའི་བར་གྱི་སྙན་ངག་ཕྱོགས་བསྒྲིགས་ཤིག་ཡིན།
རྩོམ་རིག་དེབ་འཕྲེང་གཉིས་པ《ས་མཐའི་སེམས་པ་དམར་པོ》ཞེས་པ་དེ་ཡིན། དེ་ནི་ཕྱི་ལོ2007ལོ་ནས2014ལོའི་བར་གྱི་སྙན་ངག་ཕྱོགས་བསྒྲིགས་ཀྱི་དེབ་ཅིག་ཡིན།
དེབ་འཕྲེང་གསུམ་པ《ཁྱུང་མོ་དགོན་པའི་སྔར་བྱུང་གི་ལོ་རྒྱུས་དང་ད་ལྟའི་གནས་བབ》ཅེས་པ་དེ་ཡིན། དེ་ནི་ཕྱི་ལོ2003ལོ་ནས་དབུ་འཛུགས་གནང་ནས2009ལོར་ཡོངས་སུ་བརྩམས་གྲུབ་ཡོད་པའི་ལོ་རྒྱུས་ཀྱི་དཔེ་དེབ་ཅིག་ཡིན།
　　དཔེ་ཚོགས་ཀྱི་ནང་དོན་གནད་བསྡུས།
　　དེབ་འཕྲེང་དང་པོ།
　　《གདུང་ཚོར་ནག་པོ》སྙན་ངག་ཕྱོགས་བསྒྲིགས་ཤོག་ངོས150ཙམ་ཡོད། དེ་ནི་བོད་ཕྱི་ནང་གཉིས་སུ་བྲིས་པའི་སྙན་ངག་དྲུག་ཅུ་ཙམ་གྱིས་གྲུབ་པར་བྱས་ཡོད་པའི་དེབ་ཆུང་ཞིག་ཡིན།
དེབ་འཕྲེང་གཉིས་པ།

དེབ་འཕྲེང《ས་མཐའི་སེམས་པ་དམར་པོ》

　　《ས་མཐའི་སེམས་པ་དམར་པོ》སྙན་ངག་ཕྱོགས་བསྒྲིགས་ཤོག་ངོས200ཙམ་ཡོད། དེ་ནི་ས་མཐར་འཁྱམས་པའི་ཚོར་སྣང་གཙོ་བོར་བྱས་པའི་ཚིགས་བཅད་སྙན་ངག་ལྔ་བཅུ་ཙམ་གྱིས་གྲུབ་པར་བྱས་ཡོད་པའི་དེབ་ཆུང་ཞིག་ཡིན།
དེབ་འཕྲེང་གསུམ་པ།

དེབ་འཕྲེང《ཁྱུང་མོ་དགོན་པའི་སྔར་བྱུང་གི་ལོ་རྒྱུས་དང་ད་ལྟའི་གནས་བབ》།

　　《ཁྱུང་མོ་དགོན་པའི་སྔར་བྱུང་གི་ལོ་རྒྱུས་དང་ད་ལྟའི་གནས་བབ》ཅེས་པ་ཡུལ་མདོ་སྨད་ཀྱི་བོན་དགོན་ཞིག་གི་ལོ་རྒྱུས་ཤོག་ངོས300ཙམ་ཡོད། དེར་ཁྱུང་མོ་ཞེས་པའི་མཚན་དོན་སོགས་ལ་དཔྱད་པ་བྱས་ནས་དགོན་དེའི་ལོ་ཚིགས་བཅས་ལ་ལོ་རྒྱུས་ཁུངས་གཏུགས་ཞུས་ཁུལ་གྱིས་དེང་རབས་དཔྱད་རྩོམ་འབྲི་སྟངས་ལ་ལད་འབྲི་བྱས་ཁུལ་བྱས་ཡོད་པའི་དེབ་ཆུང་ཞིག་ཡིན་པ་བཅས།
　　རྩོམ་པ་པོའི་ངོ་སྤྲོད་མདོར་བསྡུས།
　　ཁོ་བོ་ཁྲི་གཡུང་དྲུང་ནི་ཡུལ་མདོ་སྨད་མཚོ་ཆེན་ཁྲི་གཤོག་རྒྱལ་མོའི་ལྷོ་ཕྱོགས་སུ་སྐྱེས་ཤིང་ཕྱིས་སུ་བོད་དུ་སློབ་གྲྭར་འགྲིམས་ཤིང་ཕྱི་ལོ2003ལོ་ཙམ་ལ་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་འབྱོར་ནས་གཡུང་དྲུང་བོན་གྱི་བཤད་སྒྲུབ་འདུས་སྡེར་འཛུལ་ཞུགས་ཀྱིས་ད་ཆར་གཡུང་དྲུང་བོན་གྱི་མདོ་སྔགས་སེམས་གསུམ་གྱི་གཞུང་ལུགས་ཁག་དང་ཐུན་མོང་རིག་གནས་ཁག་ལ་སྦྱངས་བློ་མ་བོར་ཙམ་དུ་མཆིས།