༄༅།།རྔ་བའི་འཕྲོད་བསྟེན་སློབ་གྲྭའི་བོད་སྨན་ནད་སྐྱོང་བསླབ་གཞི་པར་དུ་བསྐྲུན།

ཉེ་ལམ། སི་ཁྲོན་མི་རིགས་དཔེ་སྐྲུན་ཁང་གིས་དཔར་དུ་བསྐྲུན་ཞིང་སི་ཁྲོན་ཞིང་ཆེན་རྔ་བའི་འཕྲོད་བསྟེན་སློབ་གྲྭའི་བོད་སྨན་བསླབ་གཞི་རྩོམ་སྒྲིག་ཚན་ཆུང་གིས་གསར་དུ་བསྒྲིགས་པའི་བོད་སྨན་ནད་སྐྱོང་བསླབ་གཞི་ལ་བོད་སྨན་རྨང་གཞིའི་ནད་སྐྱོང་དང་། བོད་སྨན་བདེ་སྲུང་ནད་སྐྱོང་། བོད་སྨན་ནད་སྐྱོང་བརྟག་ཐབས། བོད་སྨན་ནད་ཐོག་ནད་སྐྱོང་། བོད་སྨན་སྨན་སྦྱོར་ནད་སྐྱོང་བཅས་ཚན་པ་ལྔ་དང་། དེའི་སྟེང་དུ་དགེ་བའི་བཤེས་གཉེན་ཆེན་མོ་བསྟན་འཛིན་དོན་གྲུབ་མཆོག་གིས་རྩོམ་སྒྲིག་གནང་བའི་གསོ་རིག་གསར་སློབ་རྣམས་ལ་ཉེར་མཁོའི་སློབ་དེབ་ཕྱོགས་བསྒྲིགས་བློ་ཆུང་བྱིས་པའི་འབབ་སྟེགས་ལས་དཔྱད་བཅོས་སྐོར་གྱི་ཁྲིད་ཡིག་ཁ་སྣོན་བྱས་ནས་གྲུབ་ཡོད་པ་དང་། བསླབ་གཞི་འདི་ནི་གཙོ་བོ་སློབ་གྲྭ་དེ་གའི་ཕྱི་ལུགས་གསོ་རིག་གི་ནད་སྐྱོང་ཆེད་གཉེར་འཛིན་གྲྭ་ལ་དམིགས་ནས་ཆེད་བསྒྲིགས་བྱས་པ་ཞིག་ཡིན་ཞིང་། མ་འོངས་པར་རང་རེའི་བོད་ཁུལ་དུ་བོད་ཕྱི་གཉིས་ལྡན་གྱི་ནད་སྐྱོང་ཆེད་གཉེར་མི་སྣ་གསོ་སྐྱོང་བྱས་ནས་བོད་རིགས་ཀྱི་ཉམ་ཐག་ནད་པ་དང་ནད་གཡོག་བར་སྐད་ཐོག་གི་དཀའ་ངལ་སེལ་ཏེ་ཕྱོགས་གཉིས་ལ་ཞབས་འདེགས་ཡག་པོ་ཞུ་ཐུབ་པ་དང་། ལྷག་དོན་བོད་ཀྱི་གསོ་རིག་གི་ནད་སྐྱོང་ལག་རྩལ་སྔར་ལས་ཇེ་ལེགས་ཇེ་བཟང་དུ་འགྲོ་བར་སྐུལ་འདེད་གཏོང་རྒྱུ་དེའོ།།