༄༅། །ཨལ་ཐན་རྒྱལ་པོའི་རྟོགས་བརྗོད་བསྒྱུར་འགྲེལ་དཔེ་དེབ་ཀྱི་འགྲེམ་སྤེལ་དཔྱད་གླེང་ཚོགས་འདུ་ཟི་ལིང་དུ་བསྡུས།

      དཔྱད་གླེང་ཚོགས་འདུའི་སྟེང་ཨལ་ཐན་རྒྱལ་པོའི་རྟོགས་བརྗོད་བསྒྱུར་འགྲེལ་གྱི་རྩོམ་པ་པོ་མགར་རྩེ་གནམ་འབྲུག་རྒྱལ་གྱིས་ཁ་བྱང་ལ་བྱང་ཕྱོགས་ཧོར་ཡུལ་ལ་སློབ་སྦྱོང་དུ་ཕྱིན་པའི་མཐོང་ཐོས་དྲན་རེག་ཅེས་པའི་གཏམ་བཤད་སྤེལ་ཞིང་། དེ་འབྲེལ་ཨལ་ཐན་རྒྱལ་པོའི་རྟོགས་བརྗོད་ཇི་ལྟར་བསྒྱུར་བའི་བརྒྱུད་རིམ་དང་ཉམས་མྱོང་གི་ཐད་ནས་ཚོགས་ཞུགས་མི་སྣ་རྣམས་ལ་བསམ་བློ་བརྗེ་རེས་བྱས། དགེ་རྒན་ཆེན་མོ་རྒྱ་ཡེ་བཀྲ་བྷོ་དང་ཨ་ལགས་ཨོའུ་རྒྱ་ཚང་། དགེ་རྒན་ཆེན་མོ་ལྕགས་ཐར་རྒྱལ། དགེ་རྒན་ཆེན་མོ་ལྷུན་གྲུབ་རྡོ་རྗེ། སྒྲུང་གཏམ་རྩོམ་པ་པོ་ཚེ་རིང་དོན་གྲུབ་སོགས་ཀྱིས་སྔ་གཞུག་ཏུ་གནམ་འབྲུག་རྒྱལ་གྱི་བརྩམས་ཆོས་དང་འབྲེལ་བའི་གཏམ་བཤད་སྤེལ་ཏེ། ཨལ་ཐན་རྒྱལ་པོའི་རྟོགས་བརྗོད་བསྒྱུར་འགྲེལ་འདི་ནི་བོད་སོག་གི་འབྲེལ་བ་སྤྱི་དང་ལྷག་པར་བོད་དང་སོག་པོའི་རིག་གནས་ཀྱི་འབྲེལ་བར་བརྟག་གཞིག་བྱེད་པ་ལ་ཉེ་བར་མཁོ་བའི་ཡིག་ཆ་རྩ་ཆེན་ཞིག་ཏུ་སྣང་བས་ཁོས་འདི་འདྲའི་ལས་སྐལ་ཞིག་དཀའ་བས་དང་དུ་བླངས་ཏེ་རེ་བའི་འབྲས་བུ་སྨིན་པ་འདི་ལ་བོད་ཀྱི་ན་གཞོན་ཞིག་སོག་ཡུལ་ལ་སློབ་གཉེར་དུ་མངགས་པའི་དོན་གོ་ཆོད་ཡོད་པར་གདེང་འཇོག་བཟང་པོ་བྱས།
      ལོ་རྒྱུས་ལ་ཕྱིར་མིག་ཐེངས་ཤིག་བྱས་ན། བོད་དང་སོག་པོ་གཉིས་ནི་ཆབ་སྲིད་འགྲོ་འོང་དང་རིག་གནས་བརྗེ་རེས། ཆོས་ལུགས་ལོ་རྒྱུས་ཀྱི་འབྲེལ་བ་ཧ་ཅང་དམ་ཟབ་ཡོད་པའི་མི་རིགས་གཉིས་ཡིན་པས་ཕན་ཚུན་བར་རིག་གནས་རྒྱུ་འགྲུལ་གྱི་འགྲོ་འོང་ཆད་མ་མྱོང་ལ། མ་མཐའ་ཡང་ལོ་ངོ་བདུན་བརྒྱ་ལྷག་གི་རིང་ལ་ཆོས་ལུགས་དང་། རིག་གནས། ཆབ་སྲིད་བཅས་ལ་བློས་དཔག་པར་དཀའ་བའི་ཤུགས་རྐྱེན་ཐེབས་འདུག   དུས་སྐབས་གསར་བའི་བོད་སོག་རིག་གནས་ཀྱི་འབྲེལ་བ་དེའང་རྒྱུན་མི་ཆད་པར་མཚོ་སྔོན་དགེ་འོས་སློབ་ཆེན་དང་། ནང་སོག་སློབ་གྲྭ་ཆེན་མོ། ནང་སོག་སྤྱི་ཚོགས་ཚན་རིག་ཁང་སོགས་ཀྱིས་རིག་གཞུང་བརྗེ་རེས་ཀྱི་ལས་ཀ་མུ་མཐུད་དུ་སྤེལ་བཞིན་ཡོད་པ་རེད།       ཐེངས་འདིའི་དཔྱད་གླེང་ཚོགས་འདུའི་སྟེང་ད་དུང་ནང་སོག་སྤྱི་ཚོགས་ཚན་རིག་ཁང་གི་རྩོམ་རིག་ཞིབ་འཇུག་སའོ་ཡི་སོའོ་ཀྲང་། ནང་སོག་སློབ་གྲྭ་ཆེན་མོ་དང་ནང་སོག་དགེ་འོས་སློབ་གྲྭ་ཆེན་མོའི་རབ་འབྱམས་པའི་མཛུབ་སྟོན་དགེ་རྒན། དགེ་རྒན་ཆེན་མོ་ཧྲུའུ་ལེན་དང་།  ནང་སོག་དགེ་འོས་སློབ་གྲྭ་ཆེན་མོའི་སོག་པོའི་རིག་གནས་སློབ་གླིང་སོག་ཡིག་སྡེ་ཁག་གི་ཀྲུའུ་རིན། རབ་འབྱམས་པའི་མཛུབ་སྟོན་དགེ་རྒན།  དགེ་རྒན་ཆེན་མོ་ཡོན་ཁྲིན།  ནང་སོག་སློབ་ཆེན་དུ་སློབ་སྦྱོང་ལ་ཕྱིན་མྱོང་བའི་བོད་ཀྱི་རབ་འབྱམས་ཞིབ་འཇུག་སློབ་མ་གདུགས་དཀར་ཚེ་རིང་བཅས་ཀྱིས་དྲ་ལམ་གྱི་ཡུལ་དངོས་ཐད་གཏོང་ཚོགས་འདུར་ཞུགས་ནས་དཔེ་དེབ་འགྲེམ་སྤེལ་དཔྱད་གླེང་ཚོགས་འདུ་འཚོགས་པར་རྟེན་འབྲེལ་ཞུས་པ་དང་ཨལ་ཐན་རྒྱལ་པོའི་རྟོགས་བརྗོད་ཆ་ཚང་ལོ་ཙཱ་བྱས་ཡོད་པ་འདིས་བོད་རིགས་ཀློག་པ་པོ་དང་བོད་རིག་པའི་སྡེ་ལ་སོག་རིགས་ཀྱི་རྩ་ཆེ་བའི་ལོ་རྒྱུས་ཡིག་ཆ་བོད་འགྱུར་མ་ཞིག་ལེགས་སྐྱེས་སུ་ཕུལ་བ་སོགས་ཀྱི་ཐད་ནས་རིག་གཞུང་བརྗེ་རེས་ཀྱི་གཏམ་བཤད།
      བོད་རིགས་ན་གཞོན་ཞིབ་འཇུག་པ་མགར་རྩེ་གནམ་འབྲུག་རྒྱལ་གྱིས་བརྩམས་པའི་ཨལ་ཐན་རྒྱལ་པོའི་རྟོགས་བརྗོད་བསྒྱུར་འགྲེལ་ཞེས་པའི་བརྩམས་ཆོས་འདིས་བོད་སོག་མི་རིགས་གཉིས་ཀྱི་རིག་གཞུང་བརྗེ་རེས་ཐད་ལ་སྐུལ་འདེད་ཀྱི་ནུས་པ་ཐོན་ཡོད་པ་དང་། རིགས་སོ་སོའི་མི་དམངས་ཀྱིས་ཕན་ཚུན་བར་ལ་སློབ་སྦྱོང་དང་བརྗེ་རེས། འགྲོ་འོང་བྱེད་པར་སྐུལ་འདེད་གཏོང་དགོས་པའི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་དོན་དོན་འཁྱོལ་བྱས་པ་ཞིག་ཀྱང་ཡིན་པ་མ་ཟད། དུས་སྐབས་གསར་བའི་བོད་སོག་རིག་གནས་འབྲེལ་བ་མུ་མཐུད་དུ་ཞིབ་འཇུག་དང་དོ་སྣང་བྱེད་པར་ཤུགས་རྐྱེན་བཟང་པོ་ཞིག་ཐེབས་ཡོད་པ་རེད།