༄༅།།སྐུ་ཞབས་རྟ་མགྲིན་ཐར་གྱིས་ཕྱོགས་བསྒྲིགས་སམ་སྒྲིག་རྩོམ་གནང་པའི《ཞིན་ཧེ་རྫོང་སློབ་གྲྭ་ཆུང་འབྲིང་གི་སློབ་མའི་ཐུན་བར་ཀློག་དེབ་ཁག་བཞི》དཔེ་སྐྲུན་འགྲེམས་སྤེལ་བྱས། 

      ༄༅།།ཞིན་ཧེ་རྫོང་སློབ་གྲྭ་ཆུང་འབྲིང་གི་སློབ་མའི་ཐུན་བར་ཀློག་དེབ་འདི་ནི། རྫོང་མི་དམངས་སྲིད་གཞུང་གི་རྒྱབ་སྐྱོར་དང་སློབ་གསོ་ཅུས་ཀྱི་བཀོད་སྒྲིག་འོག་ལེགས་འགྲུབ་བྱུང་བ་ཞིག་ཡིན།  སྔ་གཞུག་ཏུ་ལོ་ངོ་དྲུག་གི་རིང་དམངས་སྲོལ་རིག་གནས་བརྗོད་བྱ་ཡིན་པའི་དེབ་ཕྲེང་བཅུ་བཞི་ལྷག་དཔེ་བསྐྲུན་བྱས་པ་དང་།དེ་དག་གི་རྨང་གཞིའི་སྟེང་ད་ལོ་ནས་བཟུང་ལེགས་བཤད་དང་བསྟན་བཅོས།བསླབ་བྱ།ས་གནས་ཀྱི་རི་ཆུ་རིག་གནས་བཅས་བརྗོད་བྱ་ཡིན་པའི་དེབ་ཕྲེང་བཞི་དཔར་བསྐྲུན་བྱེད་པའི་གོ་སྐབས་བྱུང་ངོ་།།
        དཔེ་དེབ་འདི་དག་སྒྲིག་རྩོམ་བྱེད་པ་ལ་དམིགས་ཡུལ་ངེས་ཅན་ཞིག་ཡོད་དེ།
       གཅིག རྨང་གཞི་སློབ་གསོས་བྱིས་པ་རྣམས་ཀྱི་བསམ་བློ་ཀུན་སྤྱོད་དང་ཤེས་རིག་ཡོན་ཏན་ཐག་གིས་གཅོད་པ་ཡིན།སྔོན་བྱོན་མཁས་པ་དག་གི་གསུང་རྩོམ་དག་མཇལ་ཐུབ་པར་བྱས་ན་བྱིས་པའི་སྐྱེ་སྟོབས་ཀྱི་དཔལ་འབར་བ་དང་རིག་གནས་ཀྱི་ཁོར་ཡུག་ཡག་པོ་ཞིག་བསྐྲུན་ཡོད་པས། དེ་དག་གིས་བྱིས་པ་ཚོར་ཡང་དག་པའི་བསམ་བློའི་མཛུབ་སྟོན་དང་། སློབ་སྦྱོང་གི་སྤྲོ་བ་བསྐྱེད་པ། མེས་རྒྱལ་དང་མི་རིགས་ལ་ཞབས་ཞུ་བསྒྲུབ་པའི་ཡོན་ཏན་འབྱོར་ཐུབ།
      གཉིས། ཏང་གི་ཚོགས་ཆེན་བཅུ་དགུ་པའི་སྙན་ཞུ་ལས།“ཚད་མཐོའི་རིག་གནས་ཀྱི་རང་རྟོགས་མེད་ཚེ།ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མེད།”ཚད་མཐོའི་རིག་གནས་ཀྱི་རང་རྟོགས་ལྡན་ཚེ་ད་གཟོད་ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་རྒྱུན་ཆད་མེད་པར་རྒྱུན་འཛིན་དར་སྤེལ་གཏོང་ཐུབ།  རིག་གནས་རང་རྟོགས་ཀྱིས་རང་རྒྱལ་གྱི་སྤྱི་ཚོགས་འཛུགས་སྐྲུན་དང་འཕེལ་རྒྱས་ཐད་དོན་སྙིང་གལ་ཆེན་དང་ནུས་པ་བླ་ལྷག་ཐོན་ཡོད།ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་རྒྱུན་འཛིན་བྱེད་པ་ནི་དུས་རབས་ཀྱི་འཕེལ་རྒྱས་དང་སྤྱི་ཚོགས་ཡར་རྒྱས་ཀྱི་གོམ་ཁ་དང་མཐུན།ཕུལ་བྱུང་སྲོལ་རྒྱུན་རིག་གནས་ནི་མི་རིགས་ཀྱི་བསམ་པའི་དཔལ་ཡོན་འཛུགས་སྐྲུན་དང་ཀུན་སྤྱོད་འདུ་ཤེས་མཐོར་འདེགས།སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་འོག་གི་ན་ཆུང་ལོ་གཞོན་དག་གི་འཇིག་རྟེན་ལྟ་ཚུལ།མི་ཚེའི་ལྟ་ཚུལ།རིན་ཐང་གི་ལྟ་ཚུལ་བཅས་ལ་མཛུབ་སྟོན་གྱི་ནུས་པ་ཐོན་ཐུབ་པ་དང་ཀྲུང་ཧྭའི་སྲོལ་རྒྱུན་རིག་གནས་སློབ་རར་འདྲེན་པའི་དགོངས་དོན་ལག་བསྟར་དང་ཁྱབ་གདལ་བྱེད་པར་དོན་སྙིང་གལ་ཆེན་ལྡན།
      གསུམ། བོད་སྐད་ཡིག་བཀོལ་སྤྱོད་ཀྱི་ནུས་ཤུགས་མཐོར་འདེགས་དང་སློབ་མའི་འབྲི་ཀློག་ཉན་གསུམ་གྱི་ནུས་པ་སྐྱེད་སྲིང་བྱེད་པར་དགོས་པ་བླ་ལྷག་ལྡན།བཞི།བོད་ཀྱི་སློབ་གྲྭ་ཆུང་འབྲིང་གི་སློབ་མར་སློབ་དེབ་མ་གཏོགས་བསླབ་ཕྱིའི་ལྟ་ཀློག་གི་དཔེ་ཆ་ལྟོས་བཅས་སུ་ཀློག་རྒྱུ་ཉུང་བ་ལ་བརྟེན་ནས་ཁ་སྐོང་བ་བཅས་དགོས་པ་དུ་མའི་བློས་བསླངས་ནས་བསྒྲིགས་པ་ཞིག་ཡིན།       དཔེ་དེབ་འདི་དག་གི་ནང་དོན་གྱི་ཆ་ནས་བོད་ཀྱི་རིག་གནས་ལ་ནང་བྱན་ཆུད་པའི་སྔ་རབས་མཁས་ཆེན་དག་གིས་ལོ་རྒྱུས་ཀྱི་བསླབ་བྱ་དང་རང་གི་འཚོ་བའི་ཉམས་མྱོང་།འཇིག་རྟེན་གྱི་ཆོས་ཉིད་དང་གནས་ལུགས། མི་ཀུན་གྱི་བསམ་པའི་འཁྱེར་སོ་དང་ཀུན་སྤྱོད་སོགས་ལ་རྣམ་དཔྱོད་ཀྱི་རྩལ་གྱིས་དཔྱད་ཞིབ་ཟབ་མོ་བགྱིས་པ་ལས་ཐོན་པའི་གསུང་རྩོམ་ཚད་མ་དེ་ཡིན་པས། འདི་ལ་ཚིག་གི་སྡེབ་ལེགས་ཤིང་དོན་གྱི་གནད་ཟིན་པ།སློབ་སྟོན་དང་ཀུན་སྤྱོད་ཀྱི་ཚད་གཞི་ལྟ་བུར་གྱུར་པ།རྩོམ་ཡིག་རེ་རེ་ཚིག་ཉུང་ཞིང་གསོན་ཉམས་ལྡན་པ་དང་།བརྗོད་བྱའི་དོན་ཟབ་པ། མི་རིགས་ཀྱི་ཡུལ་སྲོལ་གོམས་གཤིས་དང་མཐུན་ཞིང་།སློབ་མའི་འཚོ་བ་དང་ཐག་ཉེ་བ།གནས་ལུགས་དྲང་ལྡོག་གི་ཆོས་ཉིད་གསལ་བོར་སྟོན་ཐུབ་པ། ཐབས་དང་ཤེས་རབ་ལ་མཁས་པ། བློ་གྲོས་དང་སྤྱང་གྲུང་འཛོམས་པ་སོགས་ལ་ཡར་སྐུལ་གྱི་ནུས་པ་གལ་ཆེན་ཐོན་ཐུབ་པ་དང་། དེ་མ་ཟད་སློབ་མས་ཆུང་དུས་ནས་རྒྱུ་འབྲས་དྲང་བཞག་གི་གནས་ལུགས་ལ་བརྩི་འཇོགལེགས་ཉེས་བླང་དོར་གྱི་ཆ་ལ་མི་རྨོངས་པ། སེམས་ཅན་མཆོག་དམན་བར་ལ་བརྩི་བཀུར།  དྲང་པོ་དྲང་བདེན་གྱི་ལམ་ལ་འཇུག་མཁས་པ་སོགས་མདོར་ན་མི་གཤིས་ལེགས་སྐྱོང་གི་ཐད་ལ་ནུས་པ་བླ་ལྷག་ཐོན་ཐུབ་པ་ཞིག་ཡིན་ནོ།།
 རྩོམ་པ་པོ་ངོ་སྤྲོད་མདོ་ཙམ།