༄༅།།《བོད་ལུགས་གསོ་རིག་གི་ངོས་བཟུང་རྟགས་ལས་ལྕེའི་བརྟག་ཐབས》ཞེས་པ་དཔེ་སྐྲུན་འགྲེམ་སྤེལ་བྱས།

     དེབ་འདིའི་ནང་དོན་གཙོ་བོ་ནི་བོད་ལུགས་གསོ་རིག་གི་རྩ་བའི་བརྟག་ཐབས་གསུམ་གྱི་ཡ་གྱལ་ལྕེའི་བརྟག་ཐབས་འདི་ཉིད་ཉམས་པ་སོར་ཆུད་དང་མ་ཉམས་གོང་འཕེལ་བྱེད་པའི་ཆེད་དུ་ཉམས་ཡིག་དང་ཕྱི་འགྲེལ་སོགས་ལས་ལྕེ་བརྟག་རིག་པའི་འབྲེལ་ཡོད་ཡིག་ཆ་སྔོག་འདོན་དང་ལེགས་སྒྲིག་བྱས་པའི་རྨང་གཞིའི་ཐོག་ནད་ཐོག་བརྒྱུད་དེ་ལྕེ་རྟགས་དཔེ་མཚོན་པར་རིས་འཚོལ་སྡུད་བྱས་ཏེ་བོད་ལུགས་གསོ་རིག་གི་ལྕེ་བརྟག་རིག་པ་མདོར་བསྡུས་ཙམ་གླེང་བ་ཞིག་སྟེ། ལྕེ་བརྟག་རིག་པའི་ཞིབ་འཇུག་གི་གནས་བབས་དང་དགོས་མཁོ། དབང་རྟེན་ལྕེའི་གྲུབ་ལུགས། ལྕེའི་དབྱེ་བ་དང་བྱེད་ལས། ལྕེའི་འབྲེལ་འབྱོར། ནད་མེད་ཀྱི་ལྕེ་རྟགས། ནད་ཅན་གྱི་ལྕེ་རྟགས་སྟེ་ལྕེ་མདོག ལྕེ་གཟུགས། ལྕེ་དྲེག ལྕེ་རྩ་སོགས་ལ་བརྟག་ཐབས། ལྕེ་རྟགས་ལས་ནད་ཀྱི་ལྕི་ཡང་དང་། ནད་པའི་འཚོ་འཆི།  ནད་ཀྱི་འཕེལ་འགྲིབ།   ནད་ཀྱི་གནས་དང་འཚོ་བཅུད་སོགས་ལ་བརྟག་ཐབས་བཅས་གླེང་ཡོད་དོ།།

རྩོམ་པ་པོ་ངོ་སྤྲོད།

      རྣམ་ཐར་འཚོ། སྨན་པ་འབུམ་རམས་གཞོན་པ། སི་ཁྲོན་ཞིང་ཆེན་སྐབས་གསུམ་པའི་ན་གཞོན་རྩེར་སོན་ཕུལ་བྱུང་སྨན་པ། སྤྱི་ལོ་༡༩༧༧ལོའི་ཟླ༥པར་མཚོ་སྔོན་ཞིང་ཆེན་མཚོ་ལྷོ་ཁུལ་ཁྲི་ཀ་རྫོང་དུ་སྐྱེས།  ༡༩༨༤ལོ་ནས་བཟུང་རིམ་བཞིན་སློབ་གྲྭ་ཆེ་འབྲིང་ཆུང་གསུམ་འགྲིམས་པའི་སྐལ་བ་ལྡན།  ༢༠༡༡ལོར་མཚོ་སྔོན་སློབ་ཆེན་གསོ་རིག་སློབ་གླིང་དུ་རམས་འབྱམས་པའི་བསླབ་གནས་བླངས། ད་ལྟ་སི་ཁྲོན་ཞིང་ཆེན་དཀར་མཛེས་ཁུལ་བོད་ལུགས་སྨན་ཁང་དཔྱད་བཅོས་ཚན་ཁང་དུ་ལས་གཉེར་བྱེད་བཞིན་ཡོད།