«སྦྲང་ཆར་རྩོམ་རིག་བྱ་དགའི་བརྩམས་ཆོས་ཕྱོགས་བསྒྲིགས»དངོས་སུ་དཔེ་སྐྲུན་འགྲེམས་སྤེལ་བྱས་པ།

        བོད་ཀྱི་རྩོམ་རིག་དུས་དེབ་ཆེ་གྲས«སྦྲང་ཆར»སྤེལ་ནས་ལོ་འཁོར40ལོན་པར་དགའ་སྟོན་རྟེན་འབྲེལ་ཞུ་བའི་སྐྱེས་སུ། མཚོ་སྔོན་མི་རིགས་དཔེ་སྐྲུན་ཁང«སྦྲང་ཆར»རྩོམ་སྒྲིག་ཁང་གིས«སྦྲང་ཆར་རྩོམ་རིག་བྱ་དགའི་བརྩམས་ཆོས་ཕྱོགས་བསྒྲིགས»ཞེས་པའི་ཁྱོན་པོད་དྲུག་ཅན་གྱི་དཔེ་ཚོགས་དེ་ཉེ་ལམ་པར་དུ་བསྐྲུན་ནས་རྒྱལ་ཡོངས་སུ་འགྲེམས་སྤེལ་བྱས།

        “སྦྲང་ཆར་རྩོམ་རིག་བྱ་དགའ”ནི་བོད་ཀྱི་རྩོམ་རིག་གསར་རྩོམ་གྱི་བྱ་བཞག་སྔར་ལས་འཕེལ་རྒྱས་སུ་འགྲོ་སླད་དང་། རྩོམ་རིག་སྒྱུ་རྩལ་གྱི་རྣམ་པར་བརྟེན་ནས་བོད་འབྲེལ་ས་ཁུལ་གྱི་གནམ་ས་བླ་འོག་བརྗེས་འདྲའི་འགྱུར་ལྡོག་མཚོན་པ། མི་དམངས་ཀྱི་བསམ་པའི་དཔལ་ཡོན་མངོན་པ། རྩོམ་མཁན་དག་སྤྱི་ཚོགས་འཚོ་བར་ཟབ་ཞུགས་དང་མི་དམངས་ཀྱི་ཁྲོད་དུ་རྐང་ཚུགས་པར་སྐུལ་འདེད་གཏོང་བ། རྩོམ་རིག་གསར་རྩོམ་གྱི་གྲུབ་འབྲས་ལ་གཟེངས་སུ་བསྟོད་པ་བཅས་ལ་དམིགས་ནས1994ལོར་སྤེལ་མགོ་བརྩམས་པ་ཡིན། རྩོམ་རིག་བྱ་དགའ་འདི་ནི་ལོ་གསུམ་རེར་ཐེངས་རེ་སྤེལ་ཞིང་། དུས་ད་ལྟའི་བར་དུ་ཆག་མེད་ངང་ཐེངས་བཅུ་ལ་སྤེལ་མྱོང་། ཐེངས་འདིར་པར་དུ་བསྐྲུན་པའི«སྦྲང་ཆར་རྩོམ་རིག་བྱ་དགའི་བརྩམས་ཆོས་ཕྱོགས་བསྒྲིགས»དེར་རྩོམ་པ་པོ44ཡི་སྒྲུང་གཏམ29དང་སྙན་ངག17 ལྷུག་རྩོམ7 དཔྱད་བརྗོད5བཅས་བསྡོམས་པས་བརྩམས་ཆོས58འདུས་ཡོད། བརྩམས་ཆོས་འདི་དག་ནི«སྦྲང་ཆར»གྱི་འཚར་ལོངས་དང་། རྩོམ་པ་པོ་རྒན་དར་གཞོན་གསུམ་གྱི་རྩོལ་བ། ཀློག་པ་པོ་ཁྲི་མ་འབུམ་གྱི་རེ་ལྟོས་དང་བསྡོངས་ཏེ། བོད་ཀྱི་དེང་རབས་རྩོམ་རིག་ལ་སྣེ་ཁྲིད་ཀྱི་ཟོལ་དང་བྱས་འབྲས་ཀྱི་ཚུལ་དུ། རྒྱ་ཆེའི་ཀློག་མཁན་ཀུན་གྱི་བགོ་སྐལ་དུ་མངོན་པར་བཀྲམ་པ་ལགས།