སྒོ་མེ་སེང་བྷེ་ལགས་ཀྱི«སྐད་ཡིག་སློབ་ཁྲིད་ལ་འཇུག་པའི་སྒོ་བློ་གསལ་མྱུར་ལམ་ཞེས་བྱ་བ་བཞུགས་སོ།།»ཞེས་པའི་དེབ་པར་སྐྲུན་འགྲེམ་སྤེལ་བྱས།

        དགེ་རྒན་གསང་བདག་ལྷུན་གྲུབ་འདི་ལ་ཁོ་བོས་ནི་ཡར་ཀླུངས་ཁོག་གི་སྒོ་མེ་བ་ཞེས་གསོལ་བར་བྱེད་དོ། །ཡར་ཀླུངས་ཁོག་ན་སྒོ་མེ་བ་ནི་ཁོ་རང་གཅིག་པུ་ཙམ་ནི་མིན་ལས་ཆེ་མོད། ཁོ་རང་ནི་ཡར་ཀླུངས་ཁོག་ཏུ་ཡོད་པའི་སྒོ་མེ་བའི་འཐུས་ཚབ་ཏུ་རུང་བའི་སྐྱེས་བུ་ཞིག་ཡིན་པ་ལ་འཁུ་འཕྲིག་ཅི་ཡང་མི་དགོས་སྙམ།
        ཁོ་དང་ལྷན་དུ་འཕྲོས་མོལ་གྱི་སྐབས་འདྲ་བྱུང་ཚེ། ཁོ་བོ་རྟག་པར་རྣ་བ་བླགས་པར་སྤྲོ་བ་ནི་ཁོ་རང་དང་པོ་སློབ་ཆེན་ནས་མཐར་ཕྱིན་མ་ཐག་པའི་སྐབས་སུ་ཨ་སྐྱོ་པ་ལྟ་བུ་ཞིག་གི་ཚུལ་གྱིས་དབུས་གཙང་དུ་འོངས་ཤིང་། དེ་ནས་རིམ་གྱིས་འབད་འབུངས་དུ་མ་བརྒྱུད་ནས་བུ་ཕ་ཁྱིམ་དུ་ལོག་པ་དང་བུ་མོ་མ་ཁྱིམ་དུ་ལོག་པ་ལྟར་སྔར་གྱི་མཚེར་ཤུལ་བསྙེགས་ནས་ཡར་ཀླུངས་ཀྱི་པང་དུ་སླར་ལོག་པའི་ཚུལ་གེ་སར་གྱི་སྒྲུང་ལྟ་བུ་ཞིག་བཤད་རྒྱུ་ཡོད་པ་དེ་ཡིན། ཁོའི་མི་ཚེའི་བརྒྱུད་རིམ་ལས་ཁོ་རང་ནི་དཀའ་སྡུག་ལ་བཟོད་བསྲན་ཆེ་ཞིང་བླ་སྲོག་ལ་དང་དོད་ཅན་གྱི་མི་ཞིག་ཡིན་པ་ངང་གིས་ཤེས་འོང་། དེ་ནི་རང་རིགས་ལ་མཁོ་ཆེ་ཡང་འབྱུང་བ་དཀོན་པའི་གཤིས་རྒྱུད་རིན་ཐང་ཤིན་ཏུ་ཆེ་བ་ཞིག་གོ། །
        ཡང་ཁོ་རང་ནི་ཡར་ཀླུངས་ཁོག་ནས་བསྡད་ན་ཡར་ལྷ་ཤམ་པོ་བསྟེན་དགོས་པའི་གནས་ལུགས་ལ་ཁ་མིན་སེམས་ཀྱི་ངེས་ཤེས་འདྲོངས་པའི་རྣམ་དཔྱོད་ཅན་ཞིག་ཡིན་པར་སྣང་སྟེ། ཁོ་རང་ནི་ཡར་ཀླུངས་ལྟ་ཅི་སྨོས། སྤྱིར་དབུས་གཙང་གི་ཡུལ་ལ་ངོས་འཛིན་ཡང་དག་པ་ཡོད་མཁན་ཞིག་རེད་པས། དབུས་གཙང་གི་ཟས་ཟ་ཞོར་དང་ཇ་འཐུང་ཞོར་དུ་དབུས་གཙང་གི་སྐྱོན་ཁོ་ན་ལ་བརྟགས་ནས་ངན་སྨྲས་ཤུབ་བུར་ཟློ་མཁན་དེ་འདྲའི་རིགས་གཏན་ནས་མ་རེད་དོ། །འདི་ཡང་རང་རེ་རྣམས་ཀྱིས་ནན་ཏན་ཏུ་བསམ་པར་འོས་པའི་གནས་ཤིག་སྟེ། ཡུལ་དབུས་ལ་ཡུལ་དབུས་ཀྱི་འདུ་ཤེས་ཀྱིས་ཕོངས་ཤིང་། ཡུལ་དབུས་ནས་ཡུལ་དབུས་ཀྱི་ཡོན་ཏན་མ་མཐོང་ན། ལུས་ནི་རེ་ཞིག་ལས་ཀྱིས་དེར་འཕངས་ཀྱང་དོན་དུ་ཁ་ལ་མེ་འབར་གྱི་སྐྱེ་བ་བླངས་པ་དང་གཉིས་སུ་མ་མཆིས་ལ། ད་ཆ་དེ་ལྟ་བུའི་སྐྱེ་བ་བླངས་ནས་ཡི་ཕྱ་དུང་ངེ་བར་བྱེད་པ་དེ་འདྲའང་མི་ཉུང་བར་གདའ་འོ། །
        ལྷག་པར་ཁོ་རང་ནི་ལོ་རྒྱུས་དང་། རིག་གནས། སློབ་གསོ་བཅས་ལ་ཞེན་ཁོག་ཆེ་ཞིང་། དེ་དག་ལ་བརྩོན་པས་འཇུག་པ་མི་ལྷོད་པ་དང་། ཞུགས་ནས་ཀྱང་གྲུབ་འབྲས་མི་དམན་པ་ལོན་དང་ལེན་བཞིན་པའི་ལག་རྗེས་ཅན་ཞིག་སྟེ། སྤྱིར་དབུས་གཙང་དང་ལྷག་པར་ཡར་ཀླུངས་ཕྱོགས་ཀྱི་ལོ་རྒྱུས་ལ་ཡུན་རིང་པོར་དཔེ་ཀློག་དང་། དྲི་གཏུགས་ཞིབ་ཚགས་ཅན་དང་། མནོ་བསམ་མང་དུ་བགྱིས་པས། བྱེ་བྲག་ཏུ་དེའི་ཕྱོགས་ལ་ངེས་ཆ་ཤིན་ཏུ་ཆེ་ལ། ཡུལ་ཀླུངས་ཀྱི་སྔོན་གྱི་བྱུང་རབས་དང་རིག་གནས་ལ་ནི་ཐོགས་པ་མེད་ཅིང་ལོ་རྒྱུས་ཀྱིས་དགེ་ཐོན་པ་ཞིག་གོ། །
        ཁོ་རང་གིས་ལོ་ངོ་མང་པོར་དགེ་རྒན་གྱི་ལས་ཁུར་ཕྲག་ཏུ་བླངས་པའི་རིང་ལ། སློབ་བུའི་ཚོགས་དོན་ལྡན་གྱི་ཤེས་ཡོན་གྱིས་བསྐྱངས་པ་ཙམ་དུ་མ་ཟད། ད་དུང་དེ་དག་བདུད་རྩིའི་རྫིང་བུ་རུ་འཁྱིལ་བའི་རིག་པའི་ཐིགས་ཕྲན་ཅུང་ཟད་རེ་ཁ་ལ་རེག་ཅིང་ཁོག་ཏུ་སིམ་པའི་སྐལ་བ་ཅན་དུ་བྱས་ནས། སྒོ་གསུམ་གྱི་ཀུན་ཏུ་སྤྱོད་པ་ལེགས་པའི་ལམ་དུ་བཀྲི་བའི་ཐབས་ལ་འབད། སློབ་གསོ་ཅུ་རུ་ལས་གནས་སྤོས་པའི་རྗེས་སུ། ས་ཁུལ་གྱི་སློབ་གསོའི་ལས་ཀ་ཆ་ཡོང་ནས་ཡར་དར་ཡོང་བའི་དོན་ལ་ལུས་སེམས་ཀུན་ནས་གཞོལ། སློབ་གསོ་དང་སློབ་ཁྲིད་ཀྱི་སྤུས་ཀ་ཇེ་ལེགས་སུ་གཏོང་ཐུབ་མིན་ནི་དགེ་རྒན་གྱི་དཔུང་སྡེ་འཛུགས་སྐྲུན་དང་སློབ་ཁྲིད་ཀྱི་ཐབས་ལམ་གནད་དུ་འགྲོ་མིན་ལ་རག་ལས་པར་དགོངས་ནས་དེ་དག་ལེགས་བཅོས་ཀྱི་ཐབས་ལ་རྟོག་འཇུག་ནན་མོ་བགྱིས། དེ་ལྟར་རིམ་གྱིས་ཁོ་རང་ནི་སློབ་གསོ་དང་སློབ་ཁྲིད་ཀྱི་ཉམས་མྱོང་གྱ་ནོམ་པ་ཡོད་ལ། དེ་དག་གི་ཕྱོགས་ལ་གཞུང་ལུགས་དང་འབྲེལ་བའི་བསམ་གཞིག་ཀྱང་མངའ་བའི་ཡུལ་གྱི་སློབ་གསོའི་བྱ་བའི་སྣེ་མོ་འཁྲིད་མཁན་གྱི་སློབ་གསོའི་རྐང་འཛིན་པ་དང་། དབུས་གཙང་མངའ་རིས་དང་བཅས་པའི་ཡུལ་གྲུ་སོ་སོར་བསྐྱོད་ནས་གཞུང་ལུགས་ཀྱི་འཆད་འཁྲིད་དང་སྦྲགས་ཏེ་སློབ་གསོ་དང་སློབ་ཁྲིད་ཀྱི་ལས་ཀར་མཛུབ་སྟོན་དང་དོ་དམ་བྱེད་མཁན་གྱི་སློབ་གསོ་པ་གལ་ཆེན་ཞིག་ཏུ་གྱུར་འདུག །
        ལོ་རྒྱུས་དང་། རིག་གནས། སློབ་གསོ་བཅས་ཀྱི་དོན་ལ་ཡུན་རིང་པོར་རྟོག་འཇུག་བགྱིས་པའི་འབྲས་བུར་ཁོས་སྔ་ཕྱིར«བོད་ཀྱི་ལོ་རྒྱུས་དང་འབྲེལ་བའི་སྒོ་མེ་ཟེགས་སྒང་ཚོ་པའི་ཁྱིམ་རྒྱུད་གཡུ་ཡི་མགུལ་རྒྱན»ཞེས་པ་དང་། «བོད་ཀྱི་དངོས་མིན་རིག་གནས་ཤུལ་བཞག་གི་དཔེ་རིས།» «སེམས་གཏམ་སོག་མའི་ཕོན་ཐག» «བོད་ཀྱི་སློབ་གྲྭ་ཆུང་འབྲིང་གི་སློབ་མའི་མི་ཆོས་ཀུན་སྤྱོད་སློབ་གསོའི་སྐོར་གླེང་བ།» «བོད་ཀྱི་གནའ་རབས་མི་ཆོས་ཀུན་སྤྱོད་ཀྱི་འཕེལ་འགྱུར་ལ་དཔྱད་པ»ཞེས་པ་སོགས་བརྩམས་ཆོས་མང་པོ་བརྩམས་ནས་དཔེ་སྐྲུན་བྱས་པས། རིག་གཞུང་དང་སློབ་གསོའི་བྱ་བ་ཡར་སྐུལ་བྱེད་པར་ཕན་རླབས་ཆེ་བ་བྱུང་། 
        ཁོས་ཉེ་བའི་ཆ་འདིར་ཡང་སྐད་ཡིག་གི་སློབ་ཁྲིད་གྲ་སྒྲིག་དང་། སློབ་ཁྲིད་དངོས་གཞི། སློབ་ཁྲིད་མཉན་ཚུལ། སློབ་ཁྲིད་གླེང་བརྗོད །སློབ་ཁྲིད་དཔྱད་འཇོག་བཅས་ལ་འཇུག་པའི་སྒོ་བློ་གསལ་མྱུར་ལམ་བྱ་བ་ལེའུ་དགུའི་བདག་ཉིད་ཅན་ཞིག་གསར་དུ་བརྩམས་གྲུབ་ནས་ད་ཆ་དཔེ་སྐྲུན་བྱ་ལ་ཉེ་ཞིང་། བརྩམས་ཆོས་འདི་རུ་སྐད་ཡིག་སློབ་ཁྲིད་ལ་ཆ་ཡོངས་ནས་རྟོག་འཇུག་བགྱིས་ཏེ། དེང་སྐབས་ཀྱི་སྐད་ཡིག་སློབ་ཁྲིད་བྱེད་སྟངས་གསར་བའི་ཆ་ལག་རྣམས་ཡོངས་སུ་ཚང་བར་བགྱིས་པའི་ཁར་རང་གིས་ལོ་ངོ་དུ་མར་བསགས་པའི་ཉམས་མྱོང་རྣམས་ཀྱིས་ཟུར་བརྒྱན་པས། གཞུང་ལུགས་དང་ལག་ལེན་གཉིས་ཀའི་ཆ་ནས་དགེ་མཚན་དུ་མ་དང་བཅས་པའི་བརྩམས་ཆོས་ལེགས་པོ་ཞིག་ཏུ་སྣང་། དེ་བས་བརྩམས་ཆོས་འདི་ཉིད་ཀུན་གྱི་སྤྱན་ལམ་དུ་བཀྲམ་པའི་ཉེར་ལེན་ལ་བརྟེན་ནས། རང་རེའི་སྐད་ཡིག་སློབ་ཁྲིད་ཡར་སྐུལ་གྱི་ཕྱོགས་ལ་ཕན་པའི་འབྲས་བུ་ངེས་པར་སྨིན་པའི་རེ་ལྟོས་ཀྱང་འཆའ་བར་རུང་ངོ་སྙམ། །  
        དགེ་རྒན་གསང་བདག་ལྷུན་གྲུབ་ནི་ཉིན་གུང་གི་ཉི་མ་བཞིན་གསལ་ཞིང་འཚེར་བའི་དུས་སྐབས་སུ་ཁེལ་འདུག་པས། སྐབས་འདི་དང་བསྟུན་ནས་བདག་གིས་ཁོ་རང་རིག་གནས་དང་སློབ་གསོ་གོང་སྤེལ་གྱི་དོན་ལ་སྔར་བཞིན་གཡེལ་བ་མེད་ཅིང་། དགེ་བའི་བྱ་གཞག་མཐའ་དག་ད་དུང་མུ་ནས་མུར་ཡར་ལྡན་དུ་འགྲོ་བ་ལ། རེ་བའི་སྨོན་ལམ་ལེགས་པོའང་གདབ་པར་བྱའོ། །
        ཞེས་པ་འདི་ནི་དགེ་རྒན་གསང་བདག་ལྷུན་གྲུབ་ཀྱི་བརྩམས་ཆོས་གསར་པ་དཔེ་སྐྲུན་བྱེད་ལ་ཉེ་བའི་སྐབས་སུ་སྔོན་འགྲོའི་གཏམ་ཞིག་བྲི་རོགས་ཞེས་བསྐུལ་བའི་ངོ་མ་བཟློག་པར་མཚོ་ཁ་པ་རྒྱ་ཡེ་བཀྲ་བྷོ་རུ་འབོད་པས་དུས་ཚེས་ཁྱད་པར་དུ་འཕགས་པ་སྤྱི་ལོ༢༠༢༡ལོའི་ཧོར་ཟླ༩ཚེས༢༢ཏེ་ལྷ་བབས་དུས་ཆེན་ལ་གཡར་ཁྲལ་ཙམ་དུ་སྦྱར་བ་དགེ་བར་གྱུར་ཅིག །         སློབ་གསོ་པུའུ་ཡི་པུའུ་ཀྲང་ཁྲིན་པོ་ཧྲིན་གྱིས“སློབ་གསོ་བཅོས་སྒྱུར་ནི་སློབ་ཁང་སློབ་ཁྲིད་ཀྱི་བཅོས་སྒྱུར་ཡིན་ལ། སློབ་ཁང་སློབ་ཁྲིད་ལ་བཅོས་སྒྱུར་མེད་ན་སློབ་གསོ་ལ་བཅོས་བསྒྱུར་མེད།”ཅེས་པ་བཞིན། ང་ཚོ་དགེ་རྒན་རྣམ་པས་སློབ་ཁང་སློབ་ཁྲིད་ལ་བཅོས་བསྒྱུར་བྱ་དགོས་ན་སློབ་ཁྲིད་ཞིབ་འཇུག་ལ་གཞུག་དགོས། སློབ་ཁྲིད་ཞིབ་འཇུག་ཅེས་པ་དེའང་སློབ་ཁྲིད་དང་སློབ་ཁྲིད་གྲ་སྒྲིག་ལ་བསྟུན་ནས་སློབ་གསོའི་ཐབས་ལམ་དང་། ཁྲིད་ཐབས། སྦྱོང་ཐབས་བཅས་འཚོལ་རྒྱུ་དེ་ཡིན། དེ་ནི་བསླབ་གཞི་བཅོས་བསྒྱུར་གསར་པའི་དགོངས་དོན་ལག་བསྟར་དོན་འཁྱོལ་བྱས་པ་ཡིན། དགེ་རྒན་ལ་ལས་སློབ་ཁྲིད་མང་དྲགས་པ་དང་། ཡིག་རྒྱུགས་ཀྱི་འགན་ཁུར་ལྕི་དྲགས་པ་སོགས་ཀྱིས་ཞིབ་འཇུག་བག་ལ་ཞ་འགྲོ་བར་བཤད། དེ་ལའང་ཁག་མེད་མོད་ཀྱི། རང་གི་དཀའ་སྡུག་རང་གིས་ཁུར་དུ་ལེན་མི་ཐུབ་པ་ནི་མིའི་ཆོས་ཉིད་ལས་ལོག་པས། བརྩོན་པ་བསྐྱེད་དགོས་པ་ལས་ཐབས་གཞན་མེད། རིག་ཚན་གཞན་ལ་མཚོན་ན་རྒྱལ་ཁབ་རིམ་པ་དང་། ཞིང་ཆེན་རིམ་པའི་སློབ་ཁྲིད་ཐབས་ལམ་གསོ་སྦྱོང་འཛིན་གྲྭ་སོགས་བསྡུ་གྲངས་མང་ཞིང་། སློབ་སྦྱོང་འགྲོ་ཡུལ་ཕུན་སུམ་ཚོགས་ལ། དཔེ་བལྟ་སའི་ཁྲིད་ཐབས་ཀྱི་དཔེ་དེབ་ཀྱང་རིགས་མང་པོ་ཡོད། རང་རེའི་བོད་ཡིག་དགེ་རྒན་ལ་མཚོན་ན། རིགས་གཅིག་བསླབ་གཞིའི་གསོ་སྦྱོང་ལ་འགྲོ་བའི་གོ་སྐབས་ཉུང་ཞིང་། དྲྭ་སྟེང་རྒྱང་བརྟེན་སློབ་ཁྲིད་ལ་ཉན་ས་མེད་པ། རིགས་མཐུན་བར་དཔེ་བལྟ་སའི་སློབ་དཔྱོད་བྱ་ཐབས་དང་། ཁྲིད་ཐབས་མེད་པ། རིག་ཚན་གཞན་གང་དེའི་ཆོས་ཉིད་ལ་དམིགས་པས་ཐད་ཀར་ལེན་དཀའ་བ། ལེན་བསམ་ཡང་ཐ་སྙད་གཅིག་གྱུར་མ་བྱུང་བས་གོ་དཀའ་བ་བཅས་ལ་བསམས་ནའང་རང་ཉིད་རང་གི་མགོན་ཏེ། རང་ཉིད་ཀྱིས་ཞིབ་འཇུག་ལ་མ་བརྟེན་པར་ཡོང་མི་སྲིད་སྙམ་ནས་དགེ་རྒན་རྣམ་པས་སློབ་ཁང་སློབ་ཁྲིད་ཞིབ་འཇུག་ལ་མཐོང་ཆེན་དགོས་པ་ཀུན་ལ་གྲོས་འདེབས་པའི་སེམས་འདུན་དེ་གསུམ་པ་ཡིན། 
        གཞན་ཡང་། དགེ་རྒན་ལ་ལས་དགེ་རྒན་གྱི་ལས་དོན་འདི་ལ་དགའ་མོས་མི་བྱེད་མོད། མིག་སྔའི་འཚོ་ཚིས་དབང་དུ་བྱས་ན། དགེ་རྒན་ནི་གཞུང་ཞབས་པ་རྒྱུ་དབང་ཉིས་ལྡན་གྱི་མདུན་སར་ཉམས་དམའ་ཞིང་། སྔ་ལངས་འཕྱི་ཉལ་མང་བ། སྐད་ཡིག་འདིས་ལས་ཀ་མཁན་འཇོན་མེད་དུ་བརྩི་མོད། དེ་ནི་ཡུལ་དུས་དབང་གིས་བྱས་པའི་ཉི་ཚེ་བ་ལས་ཏང་དང་རྒྱལ་ཁབ་ཀྱི་སྲིད་ཇུས་ཀྱིས་མིན། དེ་བས། དགའ་མོས་དང་བརྩོན་འགྲུས་ཀྱིས་སློབ་གསོར་འཇུག་པར་བྱ་བ་ནི་རིག་པའི་དཔའ་བོ་རྣམས་ཀྱིས་ནམ་ཡང་འབོར་ཏུ་མི་རུང་བའི་གོ་ཆ་ཉག་གཅིག་ཡིན་པའི་སེམས་འདུན་དགོས་པའི་འབོད་སྐུལ་དང་བཞིའོ།།