༄༅། །གཡུ་ཐོག་གསར་རྙིང་གི་རྣམ་ཐར་དང་དེའི་སྐོར་གྱི་དཔྱད་པ་དྲང་གཏམ་རྣ་བའི་བུ་རམ།

        གཡུ་ཐོག་གསར་རྙིང་གི་རྣམ་ཐར་དང་དེའི་སྐོར་གྱི་དཔྱད་པ་དྲང་གཏམ་རྣ་བའི་བུ་རམ་ཞེས་པ་འདི་ནི་ཁོ་བོས་བོད་ཀྱི་གསོ་བ་རིག་པའི་ལོ་རྒྱུས་སུ་གྲགས་པའི་སྨན་པ་ཆེ་མོ་གཡུ་ཐོག་རྙིང་མ་ཡོན་ཏན་མགོན་པོ་དང་གཡུ་ཐོག་གསར་མ་ཡོན་ཏན་མགོན་པོ་གཉིས་ཀྱི་ད་ཡོད་རྣམ་ཐར་ཁག་ལ་གཞིགས་ཏེ་གཡུ་ཐོག་རྙིང་མ་ཡོན་ཏན་མགོན་པོའི་རྣམ་ཐར་བཀའ་རྒྱ་མའི་སྐོར་ལ་དཔྱད་པ་བྱས་པ་ཞིག་ཡིན་ཞིང་། དེབ་འདིར་ནང་དོན་ཆེ་བ་གཉིས་ཡོད་པ་ལས་དང་པོ་ནི་གཡུ་ཐོག་རྙིང་མ་ཡོན་ཏན་མགོན་པོའི་རྣམ་ཐར་བཀའ་རྒྱ་མ་གཟི་བརྗིད་རིན་པོ་ཆེའི་གཏེར་མཛོད་ཅེས་པ་འདིའི་བརྩམས་དུས་དང་རྩོམ་པ་པོ། བརྗོད་དོན། རྒྱལ་ཕྱི་རྒྱལ་ནང་དང་གནའ་དེང་མཁས་པ་རྣམས་ཀྱིས་རྣམ་ཐར་འདི་ལ་འཛིན་པའི་ལྟ་བ། ཁྱད་པར་དུ་རྣམ་ཐར་འདིའི་ཁྲོད་ཀྱི་འགལ་འདུ་ཅན་གྱི་ལོ་རྒྱུས་དོན་ཚན་བཅུ་གསུམ་ལ་ཞིབ་ཏུ་བརྟགས་ནས་ཞིབ་འཇུག་རྣལ་མ་ཞིག་ཡོང་ཆེད་དུ་རྣམ་ཐར་དེའི་འབྱུང་ཁུངས་དང་། བདེན་རྫུན་སོགས་ལ་གྲུབ་མཐའི་འཐེན་ཁྱེར་དང་། ཕྱོགས་ལྷུང་གི་ལྟ་བ་སྤངས་ཏེ་དྲང་པོའི་གཏམ་སྨྲ་བའི་རྩ་དོན་ལ་གཞིགས་ནས་དཔྱད་པ་བྱས་ཡོད།         ངེས་པ་དོན་གྱི་མཁས་པ་ཆེན་པོ་ཁྲོ་རུ་ཚེ་རྣམ་དང་། མཁས་ཤིང་གྲུབ་པ་བརྙེས་པའི་སྐྱེས་མཆོག་ཚུལ་ཁྲིམས་རྒྱལ་མཚན་སོགས་དགེ་རྒན་དུ་བཀུར་ནས། བོད་ཀྱི་བཅུ་ཕྲག་རིག་པའི་གནས་ལ་སློབ་གཉེར་གང་ལེགས་གནང་སྟེ། ༢༠༠༣ལོར་བོད་ཀྱི་གསོ་རིག་རབ་འབྱམས་པའི་སློབ་གནས་ཐོབ། ༢༠༡༠ལོར་ཨ་མེ་རི་ཀའི་ཧཱ་ཝེར་དྷི་སློབ་གྲྭ་ཆེན་མོ་རུ་འབུམ་རམས་པའི་སློབ་གནས་ཐོབ།
        སྔ་རྗེས་སུ་ཨ་མེ་རི་ཀའི་ཧཱ་ཝེར་དྷི་སློབ་གྲྭ་ཆེན་མོའི་གདན་ཞུས་མཁས་དབང་དང་། འཆད་ཁྲིད་དགེ་རྒན། མཛུབ་ཁྲིད་སློབ་དཔོན། ཨ་མེ་རི་ཀའི་མིས་ཤིས་ཀན་སློབ་ཆེན་གྱི་བཤད་ཁྲིད་སློབ་དཔོན་སོགས་གནང་མྱོང་། ༢༠༡༧ལོར་མཉམ་འབྲེལ་རྒྱལ་ཚོགས་འགྲོ་བ་མིའི་དངོས་མིན་རིག་གནས་ཤུལ་བཞག་གི་གྲས་སུ་བོད་ཀྱི་གསོ་བ་རིག་པ་སྙན་ཞུ་འབུལ་བའི་ལས་ཀར་ཞུགས་པ་དང་། རྒྱལ་ཁབ་རང་བྱུང་ཐེབས་རྩ་ཡིས་གཙོས་པའི་ཚད་མཐོའི་ཚན་ཞིབ་རྣམ་གྲངས་དུ་མ་ལེགས་གྲུབ་བྱུང་།
        ཁོང་གིས་བོད་ཀྱི་རིག་གནས་སྤྱི་དང་། ལྷག་པར་བོད་ཀྱི་གསོ་བ་རིག་པ་དང་། གསོ་རིག་ལོ་རྒྱུས། གསོ་རིག་དཔེ་རྙིང་སོགས་ལ་ལོ་མང་རིང་ཉམས་ཞིབ་གནང་སྟེ་གཡུར་དུ་ཟ་བའི་གྲུབ་འབྲས་བླངས་ཡོད།