དེབ་གསར་འོས་སྦྱོར། ནུབ་ཕྱོགས་དེང་རབས་སྒྱུ་རྩལ།

       འཛམ་གླིང་ཡུལ་གྲུ་ཁག་གི་སྒྱུ་རྩལ་རིགས་སྤྱི་དང་། སྒོས་སུ་ནུབ་ཕྱོགས་དེང་རབས་སྒྱུ་རྩལ་ཏེ། དབྱི་ཐ་ལའི་རིག་རྩལ་སྐྱར་དར་ནས་བརྒྱུད་པའི་དེང་རབས་སྒྱུ་རྩལ་གྱི་འཕེལ་འགྲོས་དང་། རིང་ལུགས་གཙོ་བོ་ཁག བཟོ་བོ་མཁས་ཅན་དང་ཁོང་ཅག་གི་བརྩམས་ཆོས་སོགས་ལ་ཤེས་རྟོགས་ཡོང་ཐབས་བྱ་རྒྱུ་ནི་མཐོ་སློབ་མཛེས་རྩལ་ཆེད་ལས་སློབ་གཉེར་བ་དག་གི་བསླབ་ཚན་གཙོ་བོའི་གྲས་ཤིག་ཡིན་ལ། སྒྱུ་རྩལ་ལ་དགའ་མོས་བྱེད་མཁན་ཀློག་པ་པོ་བྱིངས་ནས་དོ་སྣང་སྤྲོད་འོས་པ་ཞིག་ཡིན། དེབ་འདི་ནི་རང་རེའི་ཀློག་པ་པོ་རྣམས་ཀྱི་སྒྱུ་རྩལ་གྱི་བློ་སྦྱོང་གོང་འཕེལ་ཡོང་རྒྱུར་དམིགས་ཏེ། བརྗོད་བྱ་ཅུང་འཐུས་ཚང་ལ་རྗོད་བྱེད་གོ་སླ་བའི་སྒོ་ནས་ནུབ་ཕྱོགས་དེང་རབས་སྒྱུ་རྩལ་གྱི་བྱུང་འཕེལ་དང་འབྲེལ། བག་ཆགས་རིང་ལུགས་ཕྱི་མ་ནས་དེང་རབས་ཕྱི་མའི་རིང་ལུགས་བར་གྱི་སྔོན་སྐྱོད་སྒྱུ་རྩལ་པ་དག་གི་དགོངས་བཞེད་དང་འཐུས་ཚབ་བརྩམས་ཆོས་དག་པར་ཡིག་སྦྲགས་མའི་ལམ་ནས་རིམ་ཅན་དུ་བཀོད་ཡོད་པས། དེབ་འདིས་ཁྱེད་རང་མཛེས་རྩལ་རྟེན་མཛོད་ཁང་ཞིག་ཏུ་ཕྱིན་པ་ལྟ་བུའི་ཉམས་སྣང་སྦྱིན་ངེས་སོ།།