འབྲོང་ཕྲུག་ལྷ་ཆེན་རྒྱལ་གྱི་སྒྲུང་གཏམ་ཕྱོགས་བསྒྲིགས་དེབ«རུ་སྡེ་ཁྲ་མོ»ཞེས་པ་པར་དུ་སྐྲུན།

རྩོམ་པ་པོའི་གཏམ།
       «རུ་སྡེ་ཁྲ་མོ»ནི་མཁས་རྒན་གང་ཞིག་གི་ཐོལ་རྩོམ་གྱི་ཁ་བྱང་ཡིན་པ་འདྲ་ལ། ཨ་གསར་སུ་ཞིག་གི་སྙན་ངག་གི་བརྗོད་སྙིང་ཡིན་པའང་འདྲ་མོད། དོན་ལ་ང་རང་ནར་སོན་གྱི་ལོ་དང་ཟླ་བ། ཉིན་དང་ཞག་མ། དུས་ཚོད་དང་སྐར་མ་རེ་རེ་ཡིན་དགོས། དེ་འདྲ་ཡིན་པའི་རྒྱུ་མཚན་གྱིས་ངའི་སྒྲུང་ཐུང་གཅེས་བཏུས་དེབ་འདིའི་གཅེས་མིང་ལའང་དེ་འདྲའི་འབྱོར་མོ་ཞིག་ཡིན་སྣང་ཤར་སོང་།
       སྒྲུང་གཏམ་མིན་པའི་སྒྲུང་གཏམ་གཅེས་བཏུས་དེབ་འདིའི་པར་གཞི་ཡོངས་སུ་གྲུབ་རྗེས། བདག་གིས་གཞི་ནས་དངན་པ་རིང་བོ་ཞིག་འཐེན་དགོས་བྱུང་སོང་ལ། དོན་དུ་སྒྲུང་གཏམ་ནི་ག་འདྲ་ཞིག་ཡིན་མིན་གྱི་དོགས་གཞི་ཞིག་ཀྱང་ཅིག་ཅར་དུ་སྐྱེས་སོང་། དེ་ནི་ད་དུང་སྒྱུ་མ་སྨུག་རྒྱུ་ལྟ་བུའི་རབ་རིབ་མག་མོག་ཅིག་གོ །
       ང་ལ་མཚོན་ན། གྲུབ་འབྲས་ཆེན་པོ་ཞིག་སྟོན་རྒྱུ་མེད་པ་མ་གཏོགས། བོད་ཁུལ་གྱི་རྩོམ་རིག་དུས་དེབ་དང་ཚགས་པར་དག་ཏུ་འཚངས་ཅུང་སྔ་ཞིང་། ང་དང་ན་མཉམ་གྱི་རྩོམ་འབྲི་མཁན་དེ་དག་ནི་ད་ལྟ་རྩོམ་པ་པོ་རྒན་གྲས་ཀྱི་གྲལ་སྔར་ཚུད་ནས་གོ་མིང་དང་ཐོབ་དབང་འདྲ་མིན་རེ་རག་ཡོད་ཚོད་དུ་འདུག ཡིན་ནའང་། ང་ནི་ད་དུང་ན་གཞོན་རྩོམ་དགའ་དག་དང་མཉམ་དུ་དུངས་བརྗོད་སྙན་ངག་གི་ལམ་ཁས་ཐར་ཐུབ་མེད་ཁར་ལུས་སོང་། དེས་ནི་ངས་ཀྱང་རང་ཉིད་ལ་རྩོམ་པ་པོ་ཞེས་པའི་ཆོ་ལོ་སྦྱར་ཆོག་མིན་ལ་ཐེ་ཚོམ་མ་ཆོད་པར་ཡུན་རིང་འགོར།        སྔ་རྗེས་སུ། སྦྲང་ཆར་སྨྱུག་གསར་བྱ་དགའ་དང་གངས་རྒྱན་མེ་ཏོག་རྩོམ་རིག་བྱ་དགའ། མཚོ་སྔོན་ན་གཞོན་རྩོམ་རིག་བྱ་དགའ་སོགས་བླངས་མྱོང་བ་དང་། བརྩམས་ཆོས་ལ། སྙན་དེབ«ཆང་དང་སྙན་ངག་གི་མཚན་མོ»དང«བཞད་འཕྱིས་པའི་མེ་ཏོག» «ང་ནི་ནད་པ་ཞིག་ཡིན» སྒྲུང་གཏམ་དེབ«ལོ་དེའི་དགུན་ཁ»དང«རུ་སྡེ་ཁྲ་མོ» གློག་བརྙན་འཁྲབ་གཞུང་དེབ«དགུན་གྱི་མེ་ཏོག» བྱིས་སྒྲུང་བོད་འགྱུར་མ«ང་དང་ཨ་ཅེ་ཁུ་ལཱ་རཱ»སོགས་པར་དུ་བསྐྲུན་ཟིན་པ་དང་། གཙོ་སྒྲིག་བྱས་པའི་དམངས་ཁྲོད་རྩོམ་རིག་གཅེས་བཏུས་དེབ«ལ་གཞས་འཇོལ་མོའི་གྲེ་འགྱུར»དང«དམངས་གླུ་ཁུ་བྱུག་གསུང་སྙན།» «བཤད་པ་རྣ་ཡི་བུ་རམ»སོགས་ཀྱང་པར་སྐྲུན་འགྲེམ་སྤེལ་བྱས་ཡོད།