དེབ་གསར«སྙན་ངག་གི་རྣམ་གཞག་གཡུང་དྲུང་ལག་འཁྱུད»དང་དཔྱད་གཏམ་གསུམ།

༡ ནུབ་བྱང་མི་རིགས་སློབ་ཆེན་གྱི་རྒན་བདུད་ལྷ་རྒྱལ་ལགས་ཀྱི་དཔྱད་གཏམ།
       དུས་རབས་ཉི་ཤུ་བའི་ནང་བོད་དང་འཛམ་གླིང་མི་རིགས་བར་དུ་འབྲེལ་འདྲིས་རྒྱ་ཁྱབ་ཏུ་བྱུང་བ་དང་བསྡེབས་ནས། བོད་ཀྱི་སྙན་ངག་དང་བཅས་པའི་རྩོམ་རིག་ལའང་འཕོ་འགྱུར་ཆེན་པོ་བྱུང་སྟེ། སྙན་ངག་ལ་ལྕང་མ་བརྒྱ་བོར་ལྕང་ཐིག་གཅིག་གི་ཚུལ་གྱི་གཞུང་ལུགས་མཛད་རྒྱུ་ནི་ཤིན་ཏུ་དཀའ་བའི་གནས་སུ་གྱུར་ཡོད། དེ་བས་གཞུང་ལུགས་སྨྲ་བ་སོ་སོས་ཟུར་མི་འདྲ་བ་ནས་སྙན་ངག་གི་རང་མདངས་ལ་ཉེ་བར་གཅར་བ་ནི་སོ་སོའི་ཚུལ་མཐུན་གྱི་བགྱི་བ་ཉག་གཅིག་ཏུ་གྱུར་ནས་ཡོད། དབྱངས་བྷ་ནི་ཀུན་གྱི་མཐོང་སྣང་དུ་སྙན་ངག་སྨྲ་བ་ཞིག་ཡིན་ཏེ། སྙན་ངག་མང་དུ་བརྩམས་ཡོད། དུས་མཚུངས་སུ་རྩོམ་རིག་གཞུང་ལུགས་ཐད་ལ་བསམ་གཞིགས་མཛད་མཁན་ཞིག་ཀྱང་ཡིན། དེའི་རྟགས་སུ་སྔོན«རྩོམ་རིག་དང་མི»ཞེས་པའི་ཆེད་དེབ་མཛད་མྱོང་། མུ་མཐུད་སྙན་ངག་གི་གཞུང་ལུགས་ཐད་ལ་བསམ་གཞིགས་བྱས་པའི་འབྲས་བུ་ལ་ད་ཐེངས«སྙན་ངག་གི་རྣམ་གཞག་གཡུང་དྲུང་ལག་འཁྱུད»མཛད་དེ། བོད་ཀྱི་སྙན་གཞུང་གི་འཕེལ་རྒྱས་ཐད་མཛད་རྗེས་མི་དམན་པ་བཞག་ཡོད།
       གསུང་རྩོམ་འདིས་རབ་བྱེད་གསུམ་གྱི་བདག་ཉིད་ཀྱིས་སྙན་ངག་གི་རྣམ་གཞག་གི་ཁོག་དབུབས་པ་ནི་སྔར་མེད་ཀྱི་ལུས་སམ་སྒྲོམ་གསར་པ་ཞིག་ཡིན་པས། སྙན་ངག་གི་རྣམ་གཞག་ལ་འགྲེལ་བཤད་གསར་པ་ཐོབ་འདུག རྩོམ་པ་པོ་རང་ཉིད་སྙན་ངག་སྨྲ་བ་ཞིག་ཡིན་པས། རབ་བྱེད་གཉིས་པ་རྩོམ་པའི་རྣམ་གཞག་ལ་རང་གི་མྱོང་རྟོགས་ཀྱིས་བརྒྱན་པས་གཞུང་བཤད་རྐྱང་བ་མིན་པར་མྱོང་བཤད་ཀྱི་དགེ་མཚན་ཆེ་ལ། རང་བྱེད་དང་པོ་ལ«མེ་ལོང་མའི»གཞུང་སྲོལ་ལ་ཤེས་བཞིན་རྒྱུན་འཛིན་བྱས་པའི་རྨང་གཞིའི་སྟེང་། སྙན་ངག་གི་ཤེས་བྱ་དང་རྣམ་གཞག་གསར་པས་ཟུར་བརྒྱན་ཏེ། མི་རིགས་ཀྱི་སྙན་གཞུང་ལ་འཛིན་སྐྱོང་མ་ཟད་པའི་ངེས་པ་དོན་གྱི་གོང་སྤེལ་ཐད་འཚོལ་དཔྱོད་རྒྱ་ཆེན་བྱས་འདུག ༡ བོད་ལྗོངས་སློབ་ཆེན་གྱི་རྒན་ལྷག་པ་ཆོས་འཕེལ་ལགས་ཀྱི་དཔྱད་གཏམ།
       རྒན་དབྱངས་བྷ་ལགས་ཀྱིས་བརྩམས་གནང་བའི«སྙན་ངག་གི་རྣམ་གཞག་གཡུང་དྲུང་ལག་འཁྱུད»ཅེས་པའི་རབ་བྱེད་གསུམ་གྱི་བདག་ཉིད་ཅན་གྱི་སྙན་གཞུང་དེ་ནི«སྙན་ངག་མེ་ལོང»གི་ཡང་དག་དགོངས་པ་རྒྱུན་འཛིན་གྱི་རྨང་གཞིའི་ཐོག་ནུབ་ཕྱོགས་ཀྱིས་གཙོས་པའི་སྙན་ངག་གསར་པའི་གཞུང་ལུགས་ཀྱིས་ཁ་སྣོན་ལས་གྲུབ་པ་གཞིར་བཅས་བོད་ཀྱི་དེང་རབས་སྙན་ངག་གི་ལག་ལེན་དངོས་ཕྱོགས་བསྡོམས་བྱས་པའི་སྙན་གཞུང་ཆ་ཚང་ཞིག་ཡིན་པ་དང་། དེས་བོད་ཀྱི་སྙན་གཞུང་གསར་པ་འཛུགས་སྐྲུན་ལ་རྨང་གཞི་ལེགས་པོ་ཞིག་བཏིངས་ཡོད་པས། སྙན་ངག་གི་གཞུང་ལུགས་སྦྱོང་བའི་བསླབ་གཞི་ལེགས་པོ་ཞིག་ཡིན་པ་མ་ཟད། སྙན་ངག་གསར་རྩོམ་ལ་ཞེན་པའི་སྐྱེ་བོ་ཚང་མར་མཛུབ་ཁྲིད་ཀྱི་ནུས་པ་ཆེན་པོ་ཐོན་ངེས་ན། བོད་ཀྱི་སྙན་གཞུང་འཛུགས་སྐྲུན་ཐད་ལག་རྗེས་གལ་ཆེན་ཞིག་ཡིན་པར་སེམས།

---

བོད་ལྗོངས་སློབ་ཆེན་གྱི་རྒན་ན་རོ་ལགས་ཀྱི་དཔྱད་གཏམ།
       ཕྲན་གྱི་བསམ་པ་ལ། དེབ་འདིའི་རྩོམ་མཁན་ལ་ཀུན་སློང་བཟང་པོས་བསྐྱེད་པའི་རྣམ་འགྱུར་མངོན་དུ་གསལ་བ་གསུམ་མཆིས་པར་འདོད་དེ། རྩོམ་རིག་གི་སློབ་གསོ་རྒྱས་ན་སྙམ་པའི་བློས་ཐོག་དྲངས་ཏེ་སྐྱེ་བོ་གསོ་བ་ལ་སྙན་ངག་གི་རིག་པ་འདི་ཡིས་ཀྱང་ལྟག་ཤ་མཇིང་གཉེར་བཏུབ་པས་ཅི་ལས་ཀྱང་གནད་དུ་ཆེ་བར་བརྩིས་པ་དང་། ལས་དང་པོ་བ་རྣམས་དགའ་བ་བསྐྱེད་དེ་རིག་པ་འདི་ཉིད་ལ་འཇུག་པར་བསྡུས་ཀྱང་མ་ཚང་བ་མེད་པའི་ཁར་ཤ་ཁུ་ཤ་འཐིམ་ཡོང་བ་ལ་དམིགས་ཏེ། གང་འཆད་པར་བྱ་བའི་དོན་རྣམས་ཀྱི་ཁུངས་དང་རྒྱུན་ཅི་ནུས་ཀྱིས་གཏིང་ཚུགས་པར་བྱས་པ་དང་། རིག་པ་འདི་ཉིད་སྤེལ་པའི་གནས་སྐབས་མི་འདྲ་བའི་ནང་དུ་ཅུང་ཟད་སྣང་ཆུང་དུ་ལུས་པའམ། ཞིབ་ཆ་མ་ཐོན་པའམ། གསལ་ཁ་མ་བཏོད་པའི་ཆ་རྣམས་ལ་བློ་ཞིབ་མོས་གཞལ་ཏེ་གངས་རྡོག་རྦབ་འགྲིལ་གྱི་ཉམས་ལ་གཞུག་འདོད་དང་བཅས་པ་སུམ་སྒྲིལ་དུ་གོ་བར་བྱས་ན། དེབ་འདིའི་བྱུང་བ་ལ་དགེ་མཚན་ཆེ་བར་སེམས་སོ། །དར་ལྕེ་ཁྲ་ཁྲ་ཡིས་ཀུན་ནས་འབྲིད་པའི་དུས་འདིར་དར་ཤིང་དྲང་རྐྱང་གི་མཛེས་སྡུག་ཀྱང་ངེས་པར་དུ་མཐོང་ན་ལེགས་པའི་ཕྱིར་རོ། །