༄༅། །དགེ་རྒན་ཤ་བོ་ཚེ་རིང་གི་བརྩམས་ཆོས་གསར་པ་འགྲེམ་སྤེལ་བྱས།

       སློབ་ཁྲིད་རྒྱས་འབྲིང་བསྡུས་གསུམ་བྱེད་ཚུལ་ལ། འདིར་སྨྲ་བྱེད་ཀྱི་ལྕེ་ཐུང་ནའང་། འདི་གའི་སློབ་གྲྭས་སློབ་སྐབས་གཅིག་གི་ནང་དུ་གཟའ་འཁོར་རེར་སློབ་ཐུན་༤ཙམ་གྱིས་མཇུག་རྫོགས་པར་བལྟས་ན(དུས་ཚོད༨༠ཡས་མས།)སློབ་ཁྲིད་ཆེས་བསྡུས་པ་ཞིག་ལས་བྱེད་མི་ཐུབ། སློབ་ལོ་གཅིག་གི་ནང་དུ་གཟའ་འཁོར་རེར་སློབ་ཐུན༤ཙམ་བྱས་ན(དུས་ཚོད༡༦༠ཡས་མས།)སློབ་ཁྲིད་ཀྱི་འཆད་པ་འབྲིང་ཞིག་ཏུ་འཁེལ་སྙམ། སློབ་ལོ་གཅིག་གི་གཟའ་འཁོར་རེར་སློབ་ཐུན༦བེད་སྤྱད་ན(དུས་ཚོད༢༤༠ཡས་མས།) ཞིབ་འཇུག་དང་དབྱེ་ཞིབ་ཀྱི་ནུས་རྩལ་ཅུང་ལྡན་པའི་དོན་གཉེར་བ་ཞིག་ལ་མཚོན་ན། བློ་གྲོས་ཡངས་པོར་འབྱེད་ཐུབ་ངེས་ཡིན། སྐར་རྩིས་རིག་པ་འདི་སློབ་ཆེན་ལོ་རིམ་གསུམ་པའི་སྨད་དམ་ལོ་རིམ་བཞི་པའི་སྟོད་གང་རུང་ནས་བསླབས་ན་རྒྱུས་ལོན་ཐུབ་བོ། །
       དེང་གི་ཆར་ཡང་མི་རིགས་དཔེ་སྐྲུན་ཁང་གི་ཆེད་མཁས་བློ་མཐུན་རྣམ་པས་ཞུས་དག་གི་དགོངས་འཆར་མང་པོ་གནང་བ་དང་། སྒྲིག་གཞི་དང་ཡིག་སྒྱུར་གྱི་ཐད་ནས་ཀྱང་དག་ཆ་གསལ་འདོན་གྱིས་བཀའ་དྲིན་བསྐྱངས་པ་རེད། དཔེ་སྒྲིག་འགན་ཁུར་པ་སྐུ་ཞབས་གནམ་ལྷ་རྒྱལ་གྱིས་ཕྱོགས་ཡོངས་ནས་ཀུན་སློང་གཙང་མས་རྟོག་དཔྱོད་ཀྱི་གྲོས་གཞི་བཏོན་པ་རེད། ངས་འདི་ནས་ཁོང་རྣམ་པར་ཐུགས་རྗེ་ཆེ་ཞུ་བ་ལགས། དཔེ་གཞུང་འདིའི་སྐབས་དོན་མང་པོ་ཞིག་ཐོར་བསྡུས་བྱས་ནས་ཞིབ་དཔྱད་ཕྲན་བུ་བགྱིས་པ་ཡིན། གཞན་ཡང་ཉེར་མཁོ་དབུགས་སྒང་གི་རི་མོ་བསྒྲུབ་ཚུལ་དང་། འབྲས་རྩིས། ལོ་ཀེག་བརྟག་པ། གྲོགས་སྡེབ་བག་རྩིས་བཅས་ཀྱི་རྒྱུ་ཆ་བདམས་ནས་ཇི་བཞིན་བཀོད་པ་དང་། རྟོག་དཔྱོད་བྱ་བའི་ཚུལ་དུ་མཁས་པའི་སྤྱན་སྔར་བཀྲམ་པ་ཡིན་ཡང་། ཇི་སྐད་དུ། མཛོད་འགྲེལ་རྒྱལ་སྲས་མ་ལས། དོན་དཀའ་བ་ལ་བདག་འདྲའི་བློ། །འཁྲུལ་མི་སྲིད་པ་མ་ཡིན་པས། །གལ་ཏེ་རིགས་པར་ལྟ་ན་བྱ། །ཅི་སྟེ་མིན་ན་གཞན་དུ་གྱིས། །ཞེས་གསུངས་པ་ལྟར་དང་། རྒྱལ་སྲས་ཞི་བ་ལྷས། སྔོན་ཆད་མ་བརྗོད་པ་ནི་འདིར་བརྗོད་མེད། །སྡེབ་སྦྱོར་མཁས་པའང་བདག་ལ་ཡོད་མིན་ཏེ། །ཞེས་གསུངས་ན། ངས་གཙུག་ལག་རྩིས་རིག་གི་གཞུང་དོན་འབྲི་ཁུལ་བྱས་པར་གནོན་ཤུགས་ཆེན་པོ་བྱུང་སོང་ཡང་། དཔྱད་འཇོག་གི་སྤྱན་རས་ཡངས་པའི་གཟུར་གནས་མཁས་པ་རྣམས་ཀྱིས་ལེགས་བཤད་ཀྱི་ཚུལ་དང་ལྡན་པའི་རྩོམ་གྲས་སུ་བགྲང་དུ་རུང་བ་རེ་ཡོད་ན་དེར་ཟད་ཀྱི། དེ་མིན་པའི་མ་རིག་པའམ། གོང་འོག་གི་འདུ་མི་བདེ་བ་དང་ཟློས་སྐྱོན། ལུང་རིགས་དང་འགལ་བའི་ངག་འཆལ། ཁུངས་མེད་ལབ་བརྡོལ་ཅི་རིགས་ཅན་དུ་དགོངས་ན་ནི་དེ་དང་དེའི་དག་བཅོས་ཀྱི་དགོངས་འཆར་རིན་ཐང་གཞལ་དུ་མེད་པ་རེ་འཛེམ་མེད་དུ་གནང་རྒྱུའི་བཀའ་དྲིན་མི་ཆུང་བ་ཞུའོ། །
སྨྲས་པ།        རྒྱལ་ཡོངས་གྲངས་ཉུང་མི་རིགས་སློབ་གསོ་ཞིབ་འཇུག་ཨུ་ཡོན་ལྷན་ཁང་གི་རྒྱུན་ལས་ལས་འཛིན་པ། རྒྱལ་ཡོངས་མི་མཚུངས་ཚུལ་ཞིབ་འཇུག་མཐུན་ཚོགས་ཀྱི་རྒྱུན་ལས་ལས་འཛིན་པ། ཀྲུང་གོའི་གྲངས་ཉུང་མི་རིགས་སྐད་གཉིས་སློབ་ཁྲིད་ཞིབ་འཇུག་ཁང་གི་ཨུ་ཡོན། ཀན་སུའུ་ཞིང་ཆེན་མཐོ་རིམ་སློབ་གྲྭའི་སློབ་ཁྲིད་སློབ་གསོའི་ཞིབ་འཇུག་ཁང་གི་ལས་འཛིན་པ་བཅས་ཡིན། ཁོང་གི་ཞིབ་འཇུག་གི་ཁ་ཕྱོགས་གཙོ་བོ་ནི་གྲངས་རིག་དང་ཉེར་སྤྱོད་གྲངས་རིག གྲངས་རིག་སློབ་གསོ་དང་རྒྱ་བོད་སྐད་གཉིས་སློབ་ཁྲིད། གྲངས་རིག་དང་གནམ་རིག་སྐར་རྩིས་རིག་པའི་གཞུང་ལུགས་དང་ལག་ལེན་སོགས་ཡིན། གཞན་ཁོང་གིས་རྩོམ་རིག་དང་གྲངས་རིག ཚན་རིག་སོགས་ཀྱི་རྩོམ་ཡིག་དང་དེབ་མང་དུ་བསྒྱུར་ཏེ་རྒྱ་བོད་ལོ་ཙཱའི་ཕྱོགས་ལའང་མཛད་རྗེས་མི་དམན་པ་བཞག་ཡོད་ལ། དམིགས་བསལ་དུ་ཁོང་གིས་ཚན་རྩལ་གྱི་སྐོར་བསྒྱུར་སྐབས་སྲུང་དགོས་ཚད་གཞི་བཞི་དང་རྩ་དོན་གསུམ་གྱི་དགོངས་པ་གལ་ཆེན་བཏོན་ཡོད།
       ལས་གཞིའི་ཐད་ནས། རྒྱལ་ཁབ་ཀྱི་སྤྱི་ཚོགས་ཚན་རིག་ཐེབས་རྩའི་རྣམ་གྲངས(ཆོག་མཆན་ཨང་གྲངས12BMZ011)དང་། རྒྱལ་ཁབ་ཀྱི་རང་བྱུང་ཚན་རིག་གི་ཐེབས་རྩའི་རྣམ་གྲངས(ཆོག་མཆན་ཨང་གྲངས11361050)དང་། རྒྱལ་ཁབ་ཀྱི་སྤྱི་ཚོགས་ཚན་རིག་གི་ཐེབས་རྩའི་ཉམས་རྒུད་རིག་པའི་རྣམ་གྲངས(19VJX139)དང་། རྒྱལ་ཁབ་སློབ་གསོ་པུའུ་ཡི་སྤྱི་ཚོགས་ཙན་རིག་གི་ཐེབས་རྩའི་ལས་གཞི་བཅས་སོ། །གཙོ་སྐྱོང་རྣམ་གྲངས་ལེགས་འགྲུབ་བྱུང་བའི་ཐད་ནས། 1.བོད་ཀྱི་སྐར་རྩིས་རིག་པའི་ཁྱབ་ཁོངས་སུ་རྩིས་རྒྱག་གི་ལུགས་དང་ལོ་རེའི་ལོ་ཐོའི་མ་ལག་དཔེ་དབྱིབས་ཞིབ་འཇུག(2013ལོའི་རྒྱལ་ཁབ་ཀྱི་རང་བྱུང་ཐེབས་རྩའི་རྣམ་གྲངས་གཙོ་སྐྱོང་གནང་། 1361050) 2.བོད་ཀྱི་སྲོལ་རྒྱུན་གྲངས་རིག་རིག་གནས་ཁྲོད་ཀྱི་རྒྱ་བོད་རིག་གནས་སྤེལ་རེས་ཞིབ་འཇུག(2012ལོའི་རྒྱལ་ཁབ་སྤྱི་ཚོགས་ཚན་རིག་གི་ཐེབས་རྩའི་རྣམ་གྲངས་གཙོ་སྐྱོང་གནང་། ཆོག་མཆན་ཨང་གྲངས12BZ011དང་དཔང་ཡིག་ཨང་གྲངས20191390) 3. རྒྱལ་ཁབ་སློབ་གསོ་པུའུ་ཡི་སྤྱི་ཚོགས་ཙན་རིག་གི་ཐེབས་རྩའི་ལས་གཞི་བཅས་སོ། །ད་ལྟ་རྒྱལ་ཁབ་ཀྱི་སྤྱི་ཚོགས་ཚན་རིག་གི་ཐེབས་རྩའི་“ཉམས་རྒུད་རིག་པ་”རྒྱལ་ཁབ་ཀྱི་ལོ་རྒྱུས་ཞིབ་འཇུག་གི་རྣམ་གྲངས(གྲངས་གཞི་ཆེན་པོ་ཟིན་པའི་བོད་ཀྱི་གནམ་རིག་སྐར་རྩིས་གྱི་ཚད་ལྡན་ཡིག་ཆ་ལེགས་སྒྲིག་དང་ཕྱོགས་བསྡུས་ཞིབ་འཇུག་བྱེད་པར་གཙོ་སྐྱོང་གནང་བ་དང་། ཆོག་མཆན་ཨང་གྲངས19VJX139)ལ་མགོ་འཛིན་དངགཙོ་སྐྱོང་གནང་མུས། མཛད་རྗེས་དང་བྱ་དགའི་ཐད་ནས། གསུང་རྩོམ20པར་དུ་བསྐྲུན། དཔེ་ཆ་བཞི་མཐོ་རིམ་མི་རིགས་སློབ་ཆེན་གྱི་བསླབ་གཞི་རུ་བཀོལ་བཞིན་ཡོད། «བུ་སྟོན་གྱི་སྐར་རྩིས»དང«སྐར་རྩིས་རྣམ་གཞག» «ཉེར་མཁོ་རྩིས་བཞག་པད་དཀར་ཆུན་པོ»ལ་ནུབ་ལྷོ་ནུབ་བྱང་གི་མཆོག་གྱུར་ཚན་རྩལ་གྱི་བྱ་དགའ་ཨང་གཉིས་པ་ཐོབ། «བོད་ཡིག་བརྡ་འཕྲིན་མ་ལག»ལ་རྒྱལ་ཁབ་ཀྱི་དམངས་ཨུའི་ཚན་རྩལ་བྱ་དགའ་ཨང་དང་པོ་ཐོབ། «སྐད་གཉིས་དགེ་རྒན་གསོ་སྐྱོང»དང«མཐོ་རིམ་ཚབ་རྩིས»གཉིས་ལ་ཞིང་ཆེན་སློབ་ཁྲིད་གྲུབ་འབྲས་ཀྱི་བྱ་དགའ་ཨང་གཉིས་པ་ཐོབ། «བོད་ཡིག་བརྡ་འཕྲིན་ཚེག་རྟགས་མ་ལག»དང«སྐད་གཉིས་གྲངས་རིག»ལ་ཞིང་ཆེན་ཚན་རྩལ་བྱ་དགའ་ཨང་དང་པོ་དང་ཨང་གཉིས་པ་ཐོབ། རྒྱལ་ཁབ་རིམ་པའི་ལས་གཞི་ཚན་བྱང་གསུམ་དང་ཞིང་ཆེན་རིམ་པའི་ལས་གཞི་ཚན་བྱང་གཉིས་ལ་མགོ་འཛིན་བྱས་ཏེ་མཇུག་སྒྲིལ། 2002ལོའི་ཟླ9བའི་ཚེས30ཉིན་ཚན་རིག་པ་ཆེན་མོ་ནོ་པེ་ཨར་བྱ་དགའ་ཐོབ་པ་ལིས་ཀྲིན་ཏོ་སྐུ་དངོས་ཀྱིས་ལིས་ཀྲིན་ཏོའི་བྱ་དགའི་རྟགས་མ་གནང་། ད་ལྟ་རྒྱལ་ཁབ་རིམ་པའི་ལས་གཞི་ཚན་བྱང་གཉིས་མགོ་འཛིན་གནང་ནས་ཞིབ་འཇུག་ཟབ་རྒྱས་སུ་བསྟར་མུས་ཡོད།
       ཁོང་གི་འགྱུར་དེབ་ཀྱི་སྐོར་ལ«སའི་གོ་ལའི་ནང་སྙིང་།»དང་། «མཐོ་རིམ་ཚབ་རྩིས་བོད་ཡིག་མ།» «མཐོ་རིམ་ཚབ་རྩིས་བོད་རྒྱ་ཤན་སྦྱར་མ།» «མཐོ་རིམ་ཚབ་རྩིས་ཀྱི་བསྐྱར་སྦྱོང་ལྷན་ཐབས།» «ཆ་འགྲིག་རིག་པ།» «ཉེ་རབས་ཚབ་རྩིས་བོད་རྒྱ་ཤན་སྦྱར་མ།» «གྲངས་རིག་བསམ་བློའི་ཐབས་ལམ་རྣམ་བཤད།» «གྲངས་རིག་མཐོ་རྒྱུགས་དབྱེ་ཞིབ།» «གྲངས་རིག་གི་སྦྱང་གཞི་ལྷན་ཐབས།» «དངོས་ལུགས་ཀྱི་སྦྱང་གཞི་ལྷན་ཐབས།» «རྫས་འགྱུར་གྱི་སྦྱང་གཞི་ལྷན་ཐབས།» «སྐྱེ་དངོས་ཀྱི་སྦྱང་གཞི་ལྷན་ཐབས།» «ས་རྒྱུས་ཀྱི་སྦྱང་གཞི་ལྷན་ཐབས།»སོགས་དང་། གཞན«དེང་རབས་ཀྱི་བརྡ་ཆད་རིག་པ།»ཞེས་པས་མཚོན་པའི་དེབ་སྐོར་ཞིག་མཉམ་སྒྱུར་དང་“ན་གཞོན་གྱི་གྲོགས་པོ་རྣམས་ལྷན་འཛོམས་བྱེད་པ།”ཞེས་པས་མཚོན་པའི་རྩོམ་ཡིག་སྐོར་ཞིག་བསྒྱུར་ཡོད་དོ། །

ནང་དོན་ཡོང་ཁུངས། ཙོང་ཁ་དཔེ་ཁང་གི་འཕྲིན་སྟེགས།