སྙན་ངག འཁྱག་ཐག་ཆོད་པའི་དགུན་ཟླ།

སེམས་པ་ཡང་སེམས་པས་སྐྱོར་མི་ཐུབ་དུས་ཤིག་ཡོང་རྒྱུ་འདུག
ན་ཟུག་དང་སྐྱོ་སྡུག་ལ་ཡང་སྙིང་བོས་མི་ཁྱོགས་རྒྱུ་ཞིག་ཡོང་རྒྱུ་འདུག
ཡོད་ཚད་གངས་རི་ལྟར་དཀར་ཡང་དེ་ཙམ་གྱིས་ཀྱང་མི་ནུས་རྒྱུ་ཞིག་ཡོང་རྒྱུ་འདུག
སྐད་ཆ་མང་པོ་ངག་ལས་ཁྲོལ་ཡང་སེམས་ཀྱི་ཁ་ཞེང་སྦྲེལ་མི་ཐུབ་རྒྱུ་ཞིག་ཡོང་རྒྱུ་འདུག
ཚེ་སྲོག་གི་གཏིང་ལ་ཤིན་ཏུ་འཁྱག་པའི་དགུན་ཟླ་ཟེར་བ་ཞིག་ཡོང་རྒྱུ་འདུག
ཤ་རུས་དང་རྣམ་ཤེས་ལ་ཡང་འཁྱག་ཐག་ཆོད་པ་ཞིག་ཡོང་རྒྱུ་འདུག
སྐྱིད་སྡུག་གི་ཉིན་སྲིབ་སེམས་ཀྱིས་མི་ཁོར་རྒྱུ་ཞིག་ཡོང་རྒྱུ་འདུག
འདི་ཕྱིའི་ཁ་ཐག་ཆོས་ཀྱིས་ཀྱང་མི་ཟིན་རྒྱུ་ཞིག་ཡོང་རྒྱུ་འདུག

ང་ཚོ་རྩྭ་སྐྱ་བཞིན་གང་སར་ཁུར་འགྲོ་བ་ཞིག་ཡོང་རྒྱུ་འདུག
ང་ཚོ་ཁ་བ་བཞིན་ལྷན་དུ་བབས་ཡོང་བ་ཞིག་ཀྱང་ཡོང་རྒྱུ་འདུག
ཆགས་སྡང་མི་གཅིག་ཀྱང་སྙིང་རྗེ་གཅིག་པ་ཞིག་ཡོང་རྒྱུ་འདུག
མིག་ཟུང་མི་གཅིག་ཀྱང་མཆི་མ་གཅིག་པ་ཞིག་ཡོང་རྒྱུ་འདུག

“གཏན་གྱི་སྐྱིད་སྡུག་གཅིག་ཡིན”ཟེར་དུས་སྙིང་ཁམས་ཚ་ལམ་ལམ་ཞིག་བྱུང
“རྒྱབ་ཏུ་ང་ཅག་འགྲེངས་ཡོད”ལབ་དུས་སེམས་རྩ་དྲོད་ལྷུག་ལྷུག་ཅིག་བྱུང
འབྱུང་བཞིའི་གོད་ཆགས་བྱུང་བས་གྲང་ཤ་བརྒྱབ་མོད
གཅིག་རྒྱབ་གཅིག་ལ་གཏད་པས་རྣམ་ཤེས་དྲོས་བྱུང

དིང་རིའི་ཕྱོགས་སུ་གཟིགས་པས་འཁྱག་པ་རྙེད་བྱུང
དིང་རི་བརྒྱ་རྩ་བཏོན་པས་དྲོད་ཅིག་ཟིན་སོང