དེབ་གསར«རང་བྱུང་སྐད་བརྡ་སྒྲིག་གཅོད་ལ་བརྟེན་ནས་བོད་སྐད་ཚིག་ཕྲད་ལ་དཔྱད་པ་ཆ་འཕྲིན་དུས་ཀྱི་རང་སྒྲ»པར་དུ་བསྐྲུན།

       སྤྱིར་ན་ཆེད་རྩོམ་འདི་ཉིད་ནི་རིག་ཚན་བྱེ་བྲག་པ་སྟེ་རྩིས་འཁོར་སྐད་བརྡ་རིག་པ་དང་། བོད་ཡིག་ཆ་འཕྲིན་ལག་རྩལ་ལ་དམིགས་ནས་དེའི་རྨང་གཞིའི་ཞིབ་འཇུག་གི་གྲས་སུ་གཏོགས་པ་དང་། བོད་ཀྱི་བརྡ་སྤྲོད་ལས་ཚིག་ཕྲད་དང་རྩིས་འཁོར་རིག་པ་གཉིས་སྣོལ་རེས་བྱས་ཏེ་ཞིབ་འཇུག་གི་ཐབས་ལམ་གསར་བ། གློག་རྡུལ་ཡིག་མཛོད་ལ་བརྟེན་ནས་དངོས་བཤེར་གྱི་ལམ་ནས་བྲིས་པ་དང་། ལེའུ་བརྒྱད་ཀྱི་བདག་ཉིད་ཅན་གྱིས་རིག་ཚན་གསར་བ་འདིའི་མ་ལག་འཐུས་ཚང་དུ་གཏོང་བར་ཕྱར་བ་གྲུ་འདེགས་ཀྱི་ནུས་པ་བཏོན་ཡོད།
       ཀུན་གྱིས་མཁྱེན་གསལ་ལྟར། དེང་གི་དུས་ནི་ཆ་འཕྲིན་ལག་རྩལ་འཕེལ་རྒྱས་ཆེས་མགྱོགས་པའི་དུས་རབས་ཤིག་ཡིན་ལ། སྔོན་ཐོན་གྱི་མི་རིགས་དང་སྔོན་ཐོན་གྱི་རྒྱལ་ཁབ་གང་མང་ཞིག་གིས་ཆ་འཕྲིན་ལག་རྩལ་ཕྱོགས་སུ་འབད་པ་ལྷུར་ལེན་བྱེད་བཞིན་འདུག སྔོན་ཐོན་དང་རྗེས་ལུས་ཀྱི་ཚད་གཞི་དེའང་ཆ་འཕྲིན་ལག་རྩལ་གྱི་སྟེང་ནས་འཇོག་གིན་འདུག་པས། ང་ཚོས་ཀྱང་བོད་ཀྱི་སྐད་དང་ཡི་གེ་འདི་ཉིད་ཆ་འཕྲིན་དུས་རབས་ཀྱི་རྗེས་སུ་ལུས་པར་མི་འཇུག་པར། རང་གི་སྐད་དང་ཡི་གེ་འདི་ཉིད་འཕྲུལ་ཆས་ཅན་དང་། ཨང་རྩིས་ཅན། བློ་ལྡན་ཅན། རང་ས་ཅན་ཏུ་གཏོང་བར་འབད་པ་ལྷུར་ལེན་བྱ་རྒྱུ་ནི་དུས་རབས་གསར་བའི་མི་རབས་གསར་བ་དག་གི་ཕྲག་སྟེང་གི་འོས་འགན་ལྡོག་མེད་ཅིག་ཡིན་པ་བཤད་མ་དགོས་པ་དང་། སྔོན་ཐོན་གྱི་རྒྱལ་ཁབ་དང་སྔོན་ཐོན་གྱི་མི་རིགས་ཁག་ཏུ་སྨྲ་མི་ཤེས་ཤིང་དོན་མི་གོ་བའི་སེམས་མེད་ཀྱི་རྩིས་འཁོར་དེ་ཉིད་ལ་ཡི་གེ་བསླབས་ཏེ་ཡི་གེ་ཀློག་ནུས་པ་དང་། ཡི་གེ་འདོན་ནུས་པའི་བློ་ལྡན་ཅན་གྱི་འཕྲུལ་ཆས་ཤིག་ཏུ་གྱུར་ཡོད་པ་ནི་མིག་མཐོང་ལག་ཟིན་ཡིན་པས། ང་ཚོས་ཀྱང་འདིའི་ཕྱོགས་ལ་འབད་པ་ལྷུར་བླངས་ཏེ་བོད་ཀྱི་རིག་གནས་འདི་ཉིད་མི་རིགས་རང་ས་ཅན་དང་། དེང་རབས་ཅན། འཕྲུལ་ཆས་ཅན་དུ་བསྒྱུར་བར་སྐུལ་བ་ལ། འདིར་གུས་པོས་བོད་སྔ་རབས་ཀྱི་བརྡ་སྤྲོད་པའི་བསྟན་བཅོས་དག་དང་། རི་བོའི་གཏོས་དང་མཉམ་པའི་བོད་རང་གི་རིག་གནས་དག་གཞིར་བཅོལ་ཏེ་རྒྱལ་ཁབ་ཕྱི་ནང་གི་རྩིས་འཁོར་སྐད་བརྡ་རིག་པའི་དཔྱད་འབྲས་གསར་བས་ཟུར་བརྒྱན། གནའ་དེང་གི་བོད་ཡིག་དཔེར་བརྗོད་དག་ཁུངས་སུ་བསྟེན་ཏེ་མི་དང་རྩིས་འཁོར་བར་གྱི་འབྲེལ་འདྲིས་སྐད་ཆར་དབྱེ་ཞིབ་བྱས་པའི་བོད་སྐད་ཚིག་ཕྲད་ལ་དཔྱད་པ་གཏོང་ཁུལ་བྱས་པ་ཡིན།
       བོད་སྐད་ཚིག་ཕྲད་ནི་བརྡ་སྤྲོད་ཀྱི་སྦྱོར་བའི་ནང་དུ་སྣེ་མང་རྙོག་འཛིང་ཆེ་བ་ཞིག་ཡིན་པ་དང་། བོད་ཀྱི་བརྡ་སྤྲོད་ཀྱི་བསྟན་བཅོས་ནང་དུ་ཚིག་ཕྲད་ཀྱི་སྦྱོར་ཚུལ་བསྟན་པ་མང་ནའང་། ཚིག་ཕྲད་ལ་མིང་སྔ་ཕྱི་སྦྲེལ་བ་ལ་དབྱེ་ཞིབ་དང་སྒྲིག་གཞི། ཚིག་ཕྲད་ཀྱི་བརྡ་སྤྲོད་བྱེད་ནུས་སོགས་ལ་དཔྱད་པ་ནན་ཞིབ་བཏང་བའི་བསྟན་བཅོས་ནི་ད་སྔ་མ་མཐོང་བ་དང་། ལྷག་པར་དུ་རྩིས་འཁོར་ལ་བརྟེན་ནས་བོད་སྐད་ཚིག་ཕྲད་ལ་དཔྱད་པའི་སྟོང་ཆ་བསྐང་བར་དཔྱད་གཞི་འདི་འདྲ་ཞིག་བདམས་པ་ལ། གཅིག་ཏུ་བོད་སྐད་ཚིག་ཕྲད་སྤྱིའི་གནས་བབ་མཚོན་ཐུབ་པ་དང་། གཉིས་སུ་བོད་སྐད་ཡིག་ཞིབ་འཇུག་བྱ་བར་རྒྱུས་ལོན་དང་དཔྱད་གཞིའི་རྒྱུ་ཆ་ལེགས་པོ་ཞིག་མཁོ་འདོན་བྱ་ཐུབ་པ། གསུམ་དུ་གནའ་དེང་གི་བོད་སྐད་ཀྱི་སྐད་ཆའི་སྦྱོར་བའི་ཆོས་ཉིད་ངོས་ཟིན་པར་བྱ་བ། བཞི་རུ་བོད་ཡིག་དེང་རབས་ཅན་དང་། འཕྲུལ་ཆས་ཅན་དུ་བསྒྱུར་བར་ཕན་ཐོགས་པ། ལྔ་རུ་ཞིབ་འཇུག་གི་ཐབས་ལམ་མི་འདྲ་བ་སྣ་ཚོགས་བཀོལ་ཏེ་བོད་སྐད་ཡིག་བྱ་བར་རམ་འདེགས་བྱ་བའི་དོན་སྙིང་གལ་ཆེན་ལྡན། དེབ་འདི་ལས་བརྡ་ཆད་གསར་བའི་འགྱུར་སྐྱོན་དང་། དོན་ལ་ཟློས་སྐྱོན་ཡོད་པ་བཅས་ཀྱི་སྐྱོན་མཆིས་སྲིད་པས་གཟུར་གནས་དཔྱོད་ལྡན་དག་གིས་སྐྱོན་བརྗོད་ཀྱི་དགོངས་འཆར་འདོན་པར་གལ། དེབ་འདི་ཉིད་བོད་ཀྱི་རིག་གནས་དང་། ལྷག་ཏུ་བོད་ཡིག་ཆ་འཕྲིན་དང་དེང་རབས་སྐད་བརྡ་རིག་པའི་རིག་གནས་འཕེལ་རྒྱས་ཀྱི་གསོས་སུ་འགྱུར་བར་སྨོན།