དཔེ་ཀློག་ནི་མིང་ཚིག་སྦྱོར་ལུགས་ལ་སོགས་པའི་ཤེས་བྱ་ཉར་བའི་གོ་རིམ་ཁྲོད་རིམ་གྱིས་འཇུག་དགོས་པའི་ལས་ཤིག་ཡིན་པས་ན།དང་ཐོག་ངེད་རྩོམ་སྒྲིག་ཁང་གིས་ཀློག་ལ་འཇུག་བཞིན་པའི་སློབ་ཆུང་ལོ་རིམ་དང་པོ་ནས་གསུམ་པའི་བར་གྱི་སློབ་བུ་རྣམས་ལ་དམིགས་ཏེ།«བོད་ཀྱི་ན་ཆུང་བྱིས་པའི་བློ་འབྱེད་དེབ་ཕྲེང»ཁག་དང་པོ་ཞེས་མི་རིགས་རང་གི་ཕ་མེས་ཡང་མེས་ནས་བརྒྱུད་པའི་གཏམ་རྒྱུད་གཙོ་བོར་ཡིན་པའི་དེབ་བཅུའི་བདག་ཉིད་ཅན་གྱི་དེབ་ཕྲེང་དེ་པར་སྐྲུན་འགྲེམ་སྤེལ་བྱས་ཤིང་།དགེ་རྒན་དང་ཕ་མའི་རམ་འདེགས་འོག་གནས་སྐབས་དེའི་སློབ་བུ་རྣམས་དཔེ་ཀློག་ལ་ཐོག་མར་འཇུག་པ་ལ་མཐུན་རྐྱེན་དུ་རེ་བ་ན།ཐེངས་འདིར་ཀློག་ལ་བྱང་ཞིང་སྐབས་བབ་བརྗོད་དོན་ལ་གོ་བ་ལོན་པར་འབད་པའི་དུས་ལ་སླེབས་པའི་སློབ་ཆུང་མཐོ་རིམ་འཛིན་གྲྭའི་སློབ་བུ་རྣམས་ཡི་གེའི་ལམ་ནས་སྐད་ཆའི་སྒྱུ་རྩལ་གྱི་ཞིང་ཁམས་སུ་འདྲེན་པའི་ལྷག་བསམ་དང་བཅས།ང་ཚོས་ནུས་ཚོད་ལྟར«སྦྲང་ཆར»སོགས་ཚད་ལྡན་གྱི་དུས་དེབ་དང་ཚགས་པར་སྟེང་བཀོད་ཟིན་པའི་སྒྲུང་ཐུང་དང་ལྷུག་རྩོམ།སྙན་ངགཁ་མཚར་སོགས་བམ་གྲངས་མང་བོ་ཞིབ་མོར་བཀླགས་ཤིང་བརྟགས་མཐར།སློབ་ཆུང་གི་མཐོ་རིམ་འཛིན་གྲྭའི་སློབ་མ་རྣམས་ཀྱི་མྱོང་བྱར་འཚམ་པར་སྙམ་པ་དགརྩོམ་ལུས་ཀྱི་རིགས་དབྱེ་ལྟར་རེ་རེ་བཞིན་ཕྱོགས་གཅིག་ཏུ་བསྒྲིགས་ཏེ་དེབ་གཟུགས་སུ་བཀོད་པ་འདི་ལགས།...

«ཅོ་ནེའི་སྲིད་པ་ཆགས་གླུ་བཤད་པ་དང་ཨ་རྒྱ་ཞེས་བྱ་བའི་གླུ་རིགས་ཀུན་གསལ་མེ་ལོང»ཞེས་པའི་སྟོད་སྨད་གཉིས་སུ་གྲུབ་པའི་དཔེ་དེབ་འདིར་བོད་རྒྱ་ཡིག་རིགས་གཉིས་ཀྱི་ལམ་ནས་སྔ་རབས་བོན་གྱི་ལུགས་བཤད་པ།ནང་ཆོས་དང་འབྲེལ་བའི་འཇིག་རྟེན་ཆགས་ཚུལ་བཤད་པ།བོད་ཀྱི་ལོ་རྒྱུས་ལྷག་པར་དུ་ཅོ་ནེའི་ཐུན་མོང་མ་ཡིན་པའི་ཡུལ་སྲོལ་གོམས་གཤིས་ཁྲོད་ཀྱི་གཉེན་སྒྲིག་དང་འབྲེལ་བའི་གླུ་དབྱངས།དམངས་ཁྲོད་ཀྱི་གཏམ་རྒྱུད།སྤྱན་འདྲེན།སྨོན་ལམ་སོགས་བཀོད་ཡོད་དོ།།...

ས་དམར་གྲགས་པའི་དབྱི་ཐ་ལིའི་སྐད་ཀྱི་སྙན་དེབ«སྐྱེ་བ་བོད»ཅེས་པ་དབྱི་ཐ་ལིའི་ཧྥ་ཏ་ཞི་ཡ(Fiorid’AsiaEditrice)དཔེ་སྐྲུན་ཁང་གིས་དཔེ་སྐྲུན་འགྲེམ་སྤེལ་བྱས།སྙན་དེབ་འདིའི་ནང་དུ་སྙན་ངག་པ་ཁོང་གི་རྒྱ་ཡིག་གི་སྙན་དེབ«འོད་ཀྱི་སྒྲོག་གུ»དང«ཕོར་ནང་དུ་ཟགས་པའི་ཟླ་བ་ན་རེ»གཉིས་ལས་སྙན་ངག་ལྔ་བཅུ་བདམས་བསྒྱུར་བྱས་ཡོད་པ་མ་ཟད།ད་དུང་ཁོང་གི་ད་སྔའི་བར་གྱི་མི་ཚེའི་གཏམ་རྒྱུད་ཀྱིས་གྲུབ་པའི་ཡིག་འབྲུ་ཁྲི་ཅན་གྱི«སྐྱེ་བ་གཅིག་ལ་མི་ལུས་གཉིས»ཞེས་པའི་ལྷུག་རྩོམ་རིང་མོ་ཞིག་ཀྱང་བཀོད་ཡོད་དོ།།...

ཉེ་ལམ།རྩོམ་པ་པོ་འབྲོང་ཕྲུག་ལྷ་ཆེན་རྒྱལ་གྱི་སྒྲུང་གཏམ་ཕྱོགས་བསྒྲིགས་དེབ་གཉིས་པ«རུ་སྡེ་ཁྲ་མོ»ཞེས་པ་དེ་མཚོ་སྔོན་མི་རིགས་དཔེ་སྐྲུན་ཁང་ནས་པར་དུ་བསྐྲུན་པ་དང་།དེབ་འདིའི་ནང་དུ།རྩོམ་པ་པོས་ཉེ་བའི་ལོ་འདི་གའི་རིང་སློབ་གསོ་སློབ་ཁྲིད་ཀྱི་ལས་ཀའི་ཞོར་དུ་བརྩམས་གྲུབ་བྱུང་བའི་སྒྲུང་ཐུང«ལོ་དེའི་དགུན་ཁ»དང«རུ་སྡེ་ཁྲ་མོ»«རི་སིལ་དམར་པོ»«བཞུད་པའི་ལོ་ཟླ»སོགས་བརྩམས་ཆོས་བཅུ་ལྷག་བསྡུས་ཡོད་པ་རེད།...

དེབ་འདི་ནི་བོད་ཡིག་གི་ལམ་ནས་གསར་འགྱུར་རྩོམ་འབྲི་ལ་འཇུག་པའི་ལས་དང་པོ་པ་རྣམས་ཀྱི་བློ་ཚོད་དང་བསྟུན་ནས་བྲིས་པ་ཡིན་པས།མཁས་པས་བརྟགས་ན་དོན་བཟང་བ།བླུན་པོས་ཉན་ན་གོ་སླ་བ།གནད་འདུས་ལ་འཛིན་བདེ།འབྲེལ་ཆགས་ལ་ཚིག་སྙན་པ་སོགས་མཁས་རྨོངས་བར་མའི་སྐྱེ་བོ་མཐའ་དག་གི་ཡིད་འཕྲོགས་ཤིང་།ནམ་ལངས་པ་ལ་ཉི་མ་ཤར་བ་བཞིན་ཐུགས་ལ་ཟིན་པ་ཞིག་འཁྱོངས་པ་ཤིན་ཏུ་དཀའ།དེབ་འདི་རྩོམ་འབྲི་བྱེད་སྐབས་བྱ་བའི་བྲེལ་ཟིང་ཆེ་ཞིང་། ལྷག་པར་དུ་འབྲེལ་ཡོད་ཆེད་ལས་ཀྱི་ཤེས་བྱའི་ཆུ་ཚད་དམན་པས།དེབ་འདིར་ལོག་བཤད་དང་ཉེས་བཤད།ཆད་ལྷག་འཁྲུལ་སོགས་ཀྱི་སྐྱོན་ཅི་རིགས་ཡོད་སྲིད། དེ་བས་རྣམ་དཔྱོད་དང་ལྡན་པའི་མཁས་པ་དག་གིས་དགོངས་འཆར་བསྲི་བ་མེད་པར་འཚལ།...

ཉེ་ཆར་མཚོ་སྔོན་དགེ་འོས་སློབ་ཆེན་མི་རིགས་དགེ་འོས་སློབ་གླིང་གི་དགེ་རྒན་ཆེན་མོ་གཞོན་པ་ས་བགོས་ནོར་བུ་དབང་ལྡན་ལགས་ཀྱི་རིག་གཞུང་ཆེད་དེབ«དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོའི་སྙན་རྩོམ་ཞིབ་འཇུག»ཅེས་པ་མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན།ཆེད་དེབ་འདིར་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོས་མཛད་པའི་སྙན་རྩོམ་གྱི་ལྟ་གྲུབ་དང་།དགོངས་སྤྱོད་སོགས་བརྗོད་བྱ་དོན་གྱི་ཡོན་ཏན།རྫོགས་པ་ཆེན་པོའི་ཆོས་སྐད་འབའ་ཞིག་གིས་གྲུབ་པའི་རྗོད་བྱེད་ཚིག་གི་ཁྱད་ཆོས།རིག་པ་རང་བྱུང་གི་རྩལ་ལས་བརྡོལ་བའི་རྡོ་རྗེའི་ཐོལ་མགུར་གྱི་རྩོམ་སྟངས་བཅས་སྤྱི་ཕྱོགས་ནས་བསྟན་པ་དང་།བྱེ་བྲག་ཏུ་གསང་སྔགས་རྡོ་རྗེ་ཐེག་པའི་ལྟ་སྒོམ་སྤྱོད་འབྲས་ཀྱི་ངང་ཇི་ལྟར་སྐྱོང་ཚུལ།དེ་དག་ཇི་ལྟར་ཉམས་བཞེས་དགོས་ཚུལ།ཉམས་ལེན་དང་མི་མཐུན་པའི་ཚུལ་མིན་གྱི་སྙིགས་སྤྱོད་ཇི་ལྟར་སྤང་བླང་དགོས་ཚུལ་སོགས་ཐར་ཆགས་སུ་བཀོད་ཡོད།...