ངོས་དང་པོ > སྐབས་དོན། > རིག་གནས་སློབ་གསོ། > དཔལ་དོན་གྲུབ་རྒྱལ་སྐུ་གཤེགས་ནས་ལོ་འཁོར༣༡ལོན་པའི་རྗེས་དྲན་གྱི་སྙན་ངག་གྱེར་འདོན་འགྲན་ཚོགས་སྤེལ་བ།

དཔལ་དོན་གྲུབ་རྒྱལ་སྐུ་གཤེགས་ནས་ལོ་འཁོར༣༡ལོན་པའི་རྗེས་དྲན་གྱི་སྙན་ངག་གྱེར་འདོན་འགྲན་ཚོགས་སྤེལ་བ།

རྩོམ་པ་པོ།：སྟག་རིག་འབྲུག་ཐར། ཡོང་ཁུངས།：མཚོ་སྔོན་པོ་དྲ་བ། དུས་ཚོད།：2016-12-02 08:34:00 ཀློག་གྲངས།：

སྤྱི་ཟླ11པའི་ཚེས29ཉིན་གྱི་ཕྱི་དྲོར། ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ལོ་རབས་བརྒྱད་ཅུ་བའི་ན་གཞོན་བློ་འབྱེད་ཤེས་ཡོན་ཅན། བསམ་བློ་བ་དང་རྩོམ་པ་པོ། དཔལ་དོན་གྲུབ་རྒྱལ་སྐུ་གཤེགས་ནས་ལོ་འཁོར་སོ་གཅིག་ལོན་པའི་རྗེས་དྲན་ཞུ་བ་གཙོ་བྱས། སློབ་གསེང་གི་འཚོ་བར་གསོན་ཤུགས་སྣོན་པ་དང་སློབ་མ་ཡོངས་ཀྱི་སློབ་སྦྱོང་གི་སྤྲོ་བ་འཕེལ་བ། སློབ་མ་རང་ཉིད་ཀྱི་སྤོབས་པ་དང་ནུས་པ་སྦྱོང་བརྡར་བྱེད་པ་སོགས་ཕྱོགས་ཡོངས་དམིགས་སུ་བཟུང་སྟེ་སྙན་ངག་གྱེར་འདོན་འགྲན་ཚོགས་ཤིག་བསྡུས།

འགྲན་ཞུགས་སློབ་མས་གྱེར་འདོན་བྱེད་བཞིན་པ།

འགྲན་ཞུགས་སློབ་མས་གྱེར་འདོན་བྱེད་བཞིན་པ།

འགྲན་ཞུགས་དགེ་རྒན་གྱིས་གྱེར་འདོན་བྱེད་བཞིན་པ།

ཐེངས་འདིའི་འགྲན་སྡུར་ལ་འཛིན་གྲྭ་སོ་གཉིས་དང་ལོ་རིམ་སོ་སོའི་དགེ་རྒན་འཐུས་ཚབ། ཤེས་རིག་ཡར་སྐུལ་ཚོགས་པ་བཅས་ཁྱོན་སྡོམ་འགྲན་ཞུགས་རུ་ཁག་སོ་དྲུག་རེབ་འདིའི་འགྲན་ཚོགས་ལ་ཞུགས། དྲང་བདེན་དང་འདྲ་མཉམ་གྱི་ཨང་རིམ་ཞིག་འབྱུང་ཆེད། དཔྱད་འཇོག་པས་སྙན་ངག་གྱེར་འདོན་གྱི་ནང་དོན་དང་ཉམས་འགྱུར། བྱང་ཚད། སྤོབས་སེམས། གྱོན་ཆས་བཅས་ཕྱོགས་འགའ་གཞིར་བཟུང་ནས་དཔྱད་འཇོག་བྱས། འཛིན་གྲྭ་སོ་སོའི་ཐུན་མོང་མ་ཡིན་པའི་ཇུས་འགོད་དང་རྒྱབ་ལྗོངས་རོལ་དབྱངས། གྱོན་གོས་གསར་བ། འདོན་ལུགས་སྣ་ཚོགས། ཉམས་འགྱུར་འཁྲུག་ཆ་ཅན་སོགས་ཀྱིས་དགུན་ཁའི་ནམ་ཟླ་ཧ་ཅང་འཁྱག་ནའང་། ལྟ་མཁན་ཚོའི་ཡིད་དབང་ཅིག་ཅར་དུ་བཀུག་པ་མ་ཟད། ལོ་རིམ་སོ་སོའི་དགེ་རྒན་རྣམས་ཀྱིས་ཀྱང་བོད་ལྭ་གྲ་དག་གྱོན་ཞིང་ཕ་སྐད་གཙང་མའི་ལམ་ནས་ཚོར་འདུ་དྲག་པོས་གྱེར་འདོན་བྱས་པ་ན། ལྟ་མཁན་ཡོད་དོ་ཅོག་གིས་དགའ་བའི་ཐལ་མོ་ལྷང་ལྷང་དུ་རྡེབ་ཅིང་ཡིད་སེམས་སྐྱོམ་པའི་ཀི་འབོད་གསང་མཐོར་བསྒྲགས་པས། སྙན་ངག་གྱེར་འདོན་ནི་སེམས་ཀྱི་ཚོར་བ་དངོས་མ་ལས་བྱུང་བའི་ཉིང་བཅུད་ཡིན་པ་ར་སྤྲོད་བྱས། འཛིན་གྲྭ་སོ་སོའི་གཅིག་ལས་གཅིག་ལྷག་གི་ཡིད་འཕྲོག་འགྲན་བསྡུར་བརྒྱུད། དམའ་འབྲིང་དང་པོའི་སྐོར་ལས་དམའ་གཅིག་འཛིན་བདུན་དང་། དམའ་འབྲིང་གཉིས་པའི་སྐོར་ལས་དམའ་གཉིས་འཛིན་བརྒྱད། དམའ་འབྲིང་གསུམ་པའི་སྐོར་ལས་དམའ་གསུམ་འཛིན་དྲུག་བཅས་ལ་ཨང་དང་པོའི་བྱ་དགའ་ཐོབ་པ་དང་། དམའ་གཅིག་འཛིན་བརྒྱད། དམའ་གཅིག་འཛིན་དགུ། དམའ་གཉིས་འཛིན་གཅིག དམའ་གཉིས་འཛིན་བཞི། དམའ་གསུམ་འཛིན་གཉིས། དམའ་གསུམ་འཛིན་བཅུ་བཅས་ལ་ཨང་གཉིས་པའི་བྱ་དགའ་ཐོབ། དམའ་གཅིག་འཛིན་དྲུག དམའ་གཅིག་འཛིན་བཞི། དམའ་གཅིག་འཛིན་གཅིག དམའ་གཉིས་འཛིན་ལྔ། དམའ་གཉིས་འཛིན་དགུ དམའ་གཉིས་འཛིན་གྲྭ་བཅུ་གཉིས། དམའ་གསུམ་འཛིན་གསུམ།དམའ་གསུམ་འཛིན་བཞི། དམའ་གསུམ་འཛིན་བདུན་བཅས་ལ་ཨང་གསུམ་པའི་བྱ་དགའ་ཐོབ།
ཐེངས་འདིའི་བྱ་འགུལ་གྱིས་སློབ་གྲྭའི་རིག་གནས་མཁའ་དབུགས་ལེགས་སྐྲུན་ཐད་མཐུན་རྐྱེན་བླ་ལྷག་སྦྱར་ཞིང་། དགེ་སློབ་ཀུན་ལའང་འབད་འབུངས་ཧུར་ཐག་གིས་སྐུ་ཞབས་རང་གྲོལ་ཁོང་གི་མི་གཞིའི་སྙིང་སྟོབས་དང་བསམ་བློའི་སྟོབས་ཤུགས། རྩོམ་རིག་ལ་བཅངས་པའི་ལྷད་བྲལ་གྱི་རྣམ་དཔྱོད་ལ་སློབ་སྦྱོང་བྱ་བའི་འདུན་མ་ངང་གིས་བསྐྱེད་པར་མ་ཟད། བརྩོན་པ་ཞུམ་མེད་སྒོས་མི་རིགས་རང་གི་རིག་གནས་འཛིན་སྐྱོང་སྤེལ་གསུམ་ཐད་དུའང་སྐུལ་ལྕག་ཚ་བེར་བ་ཞིག་གནང་ངོ་།།

འབྲེལ་ཡོད་འོས་སྦྱོར།

暂无相关信息roking

འབྲེལ་གཏུག་ཁ་པར།：0974-8512858

འཕྲིན་སྐུར་ཡིག་ཟམ།：amdotibet@163.com