ཐེམ་ཆེན་རྫོང་མི་རིགས་སློབ་ཆུང་གཉིས་པས་མི་རིགས་མཐུན་སྒྲིལ་རྟགས་མའི་སྙན་ངག་གྱེར་འདོན་གྱི་བྱ་འགུལ་སྤེལ།

 

     སྐད་ཡིག་ནི་མི་དང་མི་ཕན་ཚུན་བར་འབྲེལ་འདྲིས་བྱེད་པའི་ལག་ཆ་གཙོ་བོ་དང་མིའི་རིགས་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པའི་ཆ་ནས། ཉེ་ཆར།  ཐེམ་ཆེན་རྫོང་མི་རིགས་སློབ་ཆུང་གཉིས་པའི་བོད་ཡིག་སྡེ་ཁག་གིས་སློབ་རའི་བྱ་འགུལ་ལྟེ་གནས་སུ་སྐབས་དང་པོའི༼མི་རིགས་མཐུན་སྒྲིལ་རྟགས་མའི༽སྙན་ངག་གྱེར་འདོན་གྱི་བྱ་འགུལ་སྤེལ།

སྙན་ངག་གྱེར་འདོན་བྱེད་བཞིན་པ།

     ཐེངས་འདིིའི་བྱ་འགུལ་ལ་ཁྱོན་བསྡོམས་སློབ་མ16ཞུགས་ལ། དེ་དག་ནི་ལོ་རིམ་གསུམ་པ་ནས་དྲུག་པའི་བར་གྱི་འཛིན་གྲྭ་སོ་སོ་ནས་བདམས་ཐོན་བྱུང་བ་དག་ལས་གྲུབ། འགྲན་ཞུགས་སློབ་མ་རྣམས་ཀྱིས་སྙན་འཇེབས་རོལ་མོའི་འགྲོས་དང་བསྟུན་ནས་དགེ་རྒན་དང་ཕ་མ། སློབ་ར་དང་སྤྱི་ཚོགས། ཏང་དང་རྒྱལ་ཁབ་ལ་ཕུལ་བའི་བསྟོད་བསྔགས་དང་དྲིན་གཟོ་ཡི་ཚིག་འབྲི་རེ་རེ་ཁ་གསལ་ཞིང་སྨྲ་དག་པའི་སྒོ་ནས་གྱེར་འདོན་བྱས་པ་བརྒྱུད།མཇུག་མཐར་དྲུག་གཅིག་འཛིན་གྲྭའི་སློབ་གྲོགས་ཟླ་སྒྲོན་དབང་མོ་དང་གཉིས་གསུམ་འཛིན་གྲྭའི་སློབ་གྲོགས་ནོར་བུ་དོན་གྲུབ། བཞི་གཅིག་འཛིན་གྲྭའི་སློབ་གྲོགས་ཡིད་བཞིན་རྡོ་རྗེ་སོགས་མི་དྲུག་ལ་བྱ་དགའ་ཨང་དང་པོ་དང་གཉིས་པ། གསུམ་པ་སོགས་ཐོབ་ལ།གསུམ་གཅིག་འཛིན་གྲྭའི་སློབ་གྲོགས་རིག་མཆོག་དཔལ་ལྡན་བཅས་མི་བཞི་ལ་རྟིང་སྐུལ་བྱ་དགའ་ཐོབ་པར་མ་ཟད། སློབ་ར་ཡོངས་ནས་་དགའ་བསུ་གང་ལེགས་ཐོབ།

དགའ་རྟགས་ཐོབ་པའི་སློབ་མ་དག་གི་མཉམ་པར།

     མཇུག་མཐར་སློབ་གཙོ་ཐུབ་བསྟན་ཚེ་རིང་ནས་བྱ་འགུལ་འདི་ལས་འཕྲོས་པའི་མི་རིགས་ཀྱི་རིག་གནས་ལྟ་བ་དང་རིག་གནས་ཀྱི་གལ་ཆེན་རང་བཞིན། འབྱུང་འགྱུར་གྱི་འོས་འགན་སོགས་གཅིག་གཅིག་གཉིས་གཉིས་སྒོས་གླེང་བ་དང་ཆབས་ཅིག་བོད་སྐད་ཡིག་སྡེ་ཁག་གི་དགེ་རྒན་ཡོངས་ལ་འདི་ལྟ་བུའི་བྱ་འགུལ་མུ་མཐུད་དུ་སྤེལ་བའི་རེ་བ་བཏོན།

སློབ་གཙོ་ཐུབ་བསྟན་ཚེ་རིང་ནས་བྱ་འགུལ་སྤྱི་བསྡོམས་བྱེད་བཞིན་པ།

     བྱ་འགུལ་འདི་བརྒྱུད་ནས།སློབ་མ་དག་གི་བོད་སྐད་ཡིག་ལ་སློབ་སྦྱོང་བྱེད་པའི་འདུན་པ་དང་གྱེར་ཀློག་བྱེད་པའི་ནུས་པ་སོགས་ཕྱོགས་ཡོངས་ནས་གོང་འཕེལ་གཏོང་བར་ཕན་འབྲས་གང་ལེགས་ཐོབ་ཡོད།