མང་རྫོང་གི《མང་ཆུ》འདོན་ཐེངས་གཉིས་པ་འགྲེམ་སྤེལ་བྱས་པ།

     ཉེ་སྔོན། མང་རྫོང་བོད་སྐད་ཡིག་བྱ་བའི་ཨུ་ཡོན་ལྷན་ཁང་གིས་གཙོ་གཉེར་དང་རྩོམ་སྒྲིག་གནང་བའི《མང་ཆུ》འདོན་ཐེངས་གཉིས་པ་འགྲེམ་སྤེལ་བྱས།
     《མང་ཆུ》རྩོམ་རིག་དུས་དེབ་ནི་མང་རྫོང་མི་དམངས་སྲིད་གཞུང་གིས་གཙོ་འགན་བཞེས་ཤིང་། མང་རྫོང་བོད་སྐད་ཡིག་བྱ་བའི་ཨུ་ཡོན་ལྷན་ཁང་གིས་གཙོ་གཉེར་དང་རྩོམ་སྒྲིག་བྱས་པའི་རྩོམ་རིག་སྒྱུ་རྩལ་གྱི་ལོ་དེབ་ཅིག་ཡིན་ལ། འདི་ནི་མང་རྫོང་གི་ལོ་རྒྱུས་སྟེང་གི་གཞུང་གཉེར་རྩོམ་རིག་སྒྱུ་རྩལ་དེབ་ཐོག་མ་དང་། མང་རྫོང་གི་རྩོམ་པ་པོ་རྒན་དར་གཞོན་གསུམ་གཙོ་བྱས་བོད་ཁུལ་ཡོངས་སུ་ཁ་གཏད་དེ། སྒྲུང་གཏམ་དང་སྙན་ངག ལྷུག་རྩོམ། དཔྱད་རྩོམ། བསྒྱུར་རྩོམ་མ་ཟད། ད་དུང་རི་མོ་དང་ཡིག་གཟུགས། པར་རིས་ལ་སོགས་སྒྱུ་རྩལ་སྣ་འདུས་ཀྱི་བརྩམས་ཆོས་འགོད་ཀྱིན་ཡོད་པ་དང་། དེབ་ཀྱི་རྒྱུ་སྤུས་དང་རྩོམ་ཡོན་ལ་སོགས་རྒྱལ་ནང་གི་ཚད་ལྡན་དུས་དེབ་ཀྱི་ཚད་གཞིར་སླེབས་ཡོད་པས། འདོན་ཐེངས་དང་པོར་དེབ་གྲངས4000དཔར་ནས་བོད་ཁུལ་ཡོངས་སུ་བཀྲམ་པའི་རྗེས་སུ། ཀློག་པ་པོའི་དགའ་བསུ་ཆེན་པོ་ཐོབ།
      《མང་ཆུ》འདོན་ཐེངས་གཉིས་པར་ཆེད་དུ་མང་རྫོང་གི་རྩོམ་པ་པོ་གཙོས་སྤྱི་ཚོགས་སྟེང་དུའང་རྩོམ་བརྡ་བཏང་ནས་བོད་ཡུལ་ཡོངས་སུ་རྩོམ་བསྡུ་དང་འགྲེམ་སྤེལ་གྱི་ནུས་པ་བརྩོན་ལེན་བྱས་པ་ཡིན་ཏེ། 《མང་ཆུ》ལོ་དེབ་ཀྱི་གློག་རྡུལ་ཡིག་སྒམ་དུ་ཁྱོན་བསྡོམས་རྩོམ་ཡིག100ལྷག་འབྱོར་བ་དང་། དེ་དག་ལས་རྩོམ་པ་པོའི་བསམ་བློའི་ལྟ་བ་དང་རྩོམ་པའི་བྱང་ཆ། བརྩམས་ཆོས་ཀྱི་བསམ་བློའི་ནང་དོན་ལ་སོགས་པར་བལྟས་ནས། རྩོམ་པ་པོ33གྱི་བརྩམས་ཆོས་འདེམ་པ་དང་དེའི་སྟེང་ལ་མང་རྫོང་གི་རྩོམ་པ་པོ་གྲགས་ཅན་རྒྱ་གྲོལ་དང་གངས་འཚོ། ནག་པོ་ལ་སོགས་མི6དང་བུད་མེད་རྩོམ་པ་པོ4ལ་རྩོམ་སྐུལ་བྱས་ནས་ཁྱོན་བསྡོམས་རྩོམ་པ་པོ43གྱི་བརྩམས་ཆོས་བཀོད་ཡོད། གཞན་ཡང་། འདོན་ཐེངས་གཉིས་པ་ནས་རྩོམ་རིག་རྐྱང་བའི་རྣམ་པ་ནས་ཐོལ་རྒལ་གྱིས་ཡིག་གཟུགས་དང་རི་མོ། པར་རིས་སོགས་སྒྱུ་རྩལ་སྣ་མང་ཅན་དུ་བསྒྱུར་ཡོད་པས། ཐེངས་འདིའི《མང་ཆུ》རྩོམ་རིག་ལོ་དེབ་ཏུ། རང་རྫོང་གི་བྲིས་པ་མིང་གྲགས་ཅན་དང་རི་མོ་བ་གྲགས་ཅན། པར་བ་གྲགས་ཅན4ལ་བརྩམས་ཆོས་ཆེད་སྒྲིག་པར་ངོས་བཟོས་ཡོད་པ་སྟེ། དེ་དག་གི་པར་བ་ཟི་ཁྲང་ཆིན་དང་ཚེ་བརྟན་དོན་གྲུབ། བྲིས་པ་ལྕང་སྐྱེས་རྟ་མགྲིན་དང་རི་མོ་བ་ཀླུ་ཚང་བསོད་ནམས་འབུམ་བཅས་ཡིན་པ་དང་། ཆེད་སྒྲིག་འདི་མུ་མཐུད་དུ་སྤེལ་ནས《མང་ཆུ》ནི་རྩོམ་རིག་བརྩམས་ཆོས་མ་ཟད། ད་དུང་རི་མོ་དང་ཡིག་གཟུགས། པར་རིས་སྒྱུ་རྩལ་འགོད་སའི་སྟེགས་བུ་ཆེན་པོ་ཞིག་ཏུ་བརྩོན་མུས་ཡོད། གཞན་ཡང་། 《མང་ཆུ》ལོ་དེབ་ལ་མང་རྫོང་ས་ཁུལ་གྱི་རྩོམ་པ་པོ་གདན་འདྲེན་ཞུས་ནས་རྩོམ་སྒྲིག་བྱ་བ་གཉེར་དུ་འཇུག་གིན་ཡོད་པ་སྟེ། སྒྲུང་གཏམ་ལེ་ཚན་གྱི་རྩོམ་སྒྲིག་པར་དགེ་རྒན་སྟག་འབུམ་རྒྱལ་དང་། ཚིགས་བཅད་སྙན་ངག་གི་རྩོམ་སྒྲིག་པར་དགེ་རྒན་སྒྲོམ་བརྟན། རང་མོས་སྙན་ངག་གི་རྩོམ་སྒྲིག་པར་གངས་བུ་འབྲུག་ལྗང་། ལྷུག་རྩོམ་སྙན་ངག་དང་ལྷུག་རྩོམ་གྱི་རྩོམ་སྒྲིག་པར་ལྡོང་ལུག་རྫི་དང་ཚེ་བྱམས་ཡག དཔྱད་རྩོམ་གྱི་རྩོམ་སྒྲིག་པར་ལོ་རྒྱུས་ཉམས་ཞིབ་པ་གངས་འཚོ་སོགས་གདན་འདྲེན་ཞུས་ཡོད།
     མདོར་ན། 《མང་ཆུ》ལོ་དེབ་ནི་རྩོམ་རིག་སྒྱུ་རྩལ་དེབ་ཅིག་ཡིན་པའི་ཆ་ནས། རྩོམ་རིག་སྒྱུ་རྩལ་གྱི་ཁྱད་ཆོས་ལ་ཤུགས་སྣོན་དང་རང་གཤིས་འབུར་ཐོན་བྱས་ཐོག  ཐོག་མཐའ་བར་གསུམ་དུ་སྲོལ་རྒྱུན་དང་དེང་རབས། དུས་རབས་ཀྱི་སྙིང་སྟོབས་དང་མི་རིགས་ཀྱི་ཁྱད་ཆོས་དམ་པོར་སྦྲེལ་བ་བརྒྱུད། འཆམ་མཐུན་དང་གཅིག་གྱུར་གྱི་དམིགས་ཚད་དུ་བསླེབས་པར་འབད་པ་རྒྱུན་འཁྱོངས་བྱས་པའི་དུས་མཚུངས་སུ། རང་འགུལ་སྒོས་བོད་ཀྱི་ཕུལ་བྱུང་རྩོམ་རིག་སྲོལ་རྒྱུན་རྒྱུད་འཛིན་བྱེད་པ་དང་། གཞན་རིགས་ཀྱི་ཁྱད་དུ་འཕགས་པའི་རྩོམ་རིག་གསར་རྩོམ་གྱི་བྱེད་ཐབས་ལ་སློབ་སྦྱོང་དང་མཐོང་ཆེན་བྱེད་པ། དུས་དེབ་ཀྱི་གཞི་རྩའི་ཁྱད་ཆོས་བརྟན་བརླིང་གི་རང་བཞིན་རྒྱུན་འཁྱོངས་བྱས་ཏེ། དུས་དང་རྣམ་པ་ཀུན་ཏུ་དུས་དེབ་ལ་ལེགས་བཅོས་དང་གསར་གཏོད་བྱེད་པའི་མོས་འདུན་མི་ཀློད་པའོ། །