གངས་རྒྱན་མེ་ཏོག་རྩོམ་རིག་བྱ་དགའ་སྐབས་བཞི་བའི་མཛད་སྒོ་མཚོ་ནུབ་ཁུལ་དུ་བསྡུས།

གངས་རྒྱན་མེ་ཏོག་རྩོམ་རིག་བྱ་དགའ་སྐབས་བཞི་བའི་མཛད་སྒོ་མཚོ་ནུབ་ཁུལ་དུ་བསྡུས།

མཚོ་སྔོན་ཞིང་ཆེན་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་རྩོམ་པ་པོ་མཐུན་ཚོགས་ཀྱི་ཀྲུའུ་ཞི་མེ་སྒྲོན་གྱིས་གངས་རྒྱན་མེ་ཏོག་
རྩོམ་རིག་བྱ་དགའ་ལ་རོགས་སྐྱོར་གནང་མཁན་སྐུ་ཞབས་མགོན་པོ་ལ་བྱ་དགའ་གནང་བཞིན་པ།

གངས་རྒྱན་མེ་ཏོག་རྩོམ་སྒྲིག་ཁང་གི་གཙོ་སྒྲིག་ཀླུ་འབུམ་རྒྱལ་གྱིས་གཏམ་བཤད་གནང་བཞིན་པ།

མཛད་སྒོའི་སྟེང་ཕེབས་ཡོད་པའི་སྐུ་མགྲོན་དག

ཐེངས་འདིའི་རྩོམ་རིག་བྱ་དགའ་ཐོབ་མཁན་གྱི་རྩོམ་པ་པོ་དག

གངས་རྒྱན་མེ་ཏོག་རྩོམ་རིག་བྱ་དགའ་སྐབས་བཞི་བའི་མཛད་སྒོའི་སྟེང་ཕེབས་ཡོད་པའི་སྐུ་མགྲོན་དང་རྩོམ་པ་པོ་ཡོངས་ཀྱི་མཉམ་པར།

     སྤྱི་ཟླ9བའི་ཚེས28ཉིན། མཚོ་སྔོན་ཞིང་ཆེན་རྩོམ་པ་པོའི་མཐུན་ཚོགས་དང་། མཚོ་ནུབ་སོག་རིགས་བོད་རིགས་རང་སྐྱོང་ཁུལ་རྩོམ་རིག་སྒྱུ་རྩལ་ལྷན་ཚོགས་གཉིས་ཀྱིས་གཙོ་སྒྲུབ་དང་། མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རྒྱང་སྒྲོག་དང་མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། མཚོ་ནུབ་ཁུལ་བོད་སྐད་རྒྱང་སྒྲོག མཚོ་ནུབ་སོག་རིགས་བོད་རིགས་རང་སྐྱོང་ཁུལ་མི་རིགས་རྩོམ་རིག་དུས་དེབ་ཁང་། གངས་རྒྱན་མེ་ཏོག་རྩོམ་སྒྲིག་ཁང་བཅས་ཀྱིས་འགན་སྒྲུབ་གནང་བའི་གངས་རྒྱན་མེ་ཏོག་རྩོམ་རིག་བྱ་དགའ་སྐབས་བཞི་བའི་མཛད་སྒོ་དེ་མཚོ་ནུབ་ཁུལ་གཏེར་ལེན་ཁ་གྲོང་ཁྱེར་དུ་བསྡུས།
     ཐེངས་འདིའི་རྩོམ་རིག་བྱ་དགའི་བྱ་འགུལ་ཁྲོད་སྔར་མུས་བཞིན་གཟབ་ནན་དང་དྲང་བདེན། དྲང་བཞག་བཅས་ཀྱི་གཞི་རྩའི་སྟེང་ནས་བསྡོམས་པས་བརྩམས་ཆོས5ལ་ཐེངས་འདིའི་གངས་རྒྱན་མེ་ཏོག་རྩོམ་རིག་བྱ་དགའ་ཐོབ། དེ་དག་ནི་རྩོམ་པ་པོ་རྡོ་རྗེ་རིན་ཆེན་ནམ་པིར་མིང་ལ་ཨ་རྡོར་འབོད་པའི་དཔྱད་རྩོམ《བོད་ཀྱི་སྙན་ངག་གསར་བའི་བསམ་བློའི་ཐད་ཀྱི་བསམ་གཞིག་ཁ་ཤས》དང་སྙན་ངག་པ་དགའ་བདེ་ཚེ་རིང་ངམ་པིར་མིང་ལ་ནག་པོར་འབོད་པའི་སྙན་ངག་རིང་མོ《ཝུ་བ་སོབ་སོབ》། སྙན་ངག་པ་ཤ་བོ་ཚེ་བརྟན་ནམ་པིར་མིང་ལ་ན་རོ་འབོད་པའི་རང་མོས་སྙན་ངག《དྲན་པ་ཉེར་བཞག》། སྙན་ངག་པ་ལྷ་ཆེན་རྒྱལ་ལམ་པིར་མིང་ལ་འབྲོང་ཕྲུག་ཏུ་འབོད་པའི་རང་མོས་སྙན་ངག《མང་རྫོང་གི་རབ་བྱེད》། བུད་མེད་སྙན་ངག་པ་མེ་ཏོག་སྐྱིད་དམ་པིར་མིང་ལ་ཁ་བ་ལྷ་མོར་འབོད་པའི་རང་མོས་སྙན་ངག《ཆར་བ་ཤག་ཤག་འབབ་དོན》བཅས་ཡིན།
     གཞན་གངས་རྒྱན་མེ་ཏོག་རྩོམ་རིག་བྱ་དགའ་སྐབས་བཞི་བར་རོགས་སྐྱོར་གནང་མཁན་དང་རྒྱལ་ཡོངས་སྐབས་གཉིས་པའི་གངས་རྒྱན་མེ་ཏོག་རྟགས་མའི་བོད་ཀྱི་སློབ་ཆེན་སློབ་མའི་གསར་རྩོམ་སྙན་ངག་གྱེར་འདོན་འགྲན་སྡུར་ལ་ཞུགས་པའི་འགྲན་ཞུགས་པ། དཔྱད་འདེམས་པ། རྩོམ་རིག་ཆེད་མཁས་པ། རྩོམ་པ་པོ། སྙན་ངག་པ། རྩོམ་སྒྲིག་པ་བཅས་བྱ་དགའ་གནང་བའི་མཛད་སྒོར་ཞུགས་ཡོད།