ཞོན་ཧྭ་བོད་ཡིག་སློབ་འབྲིང་བཙུགས་ནས་ལོ་འཁོར་སུམ་ཅུ་ལོན་པར་རྟེན་འབྲེལ་ཞུ་བའི་མཛད་སྒོ་བསྡུས།

ཕྱོགས་སོ་སོ་ནས་ཕེབས་པའི་འགོ་ཁྲིད་དང་སྐུ་མགྲོན་ལྷན་རྒྱས།

ཞོན་ཧྭ་བོད་ཡིག་སློབ་འབྲིང་གི་དུས་རིམ་སོ་སོའི་སློབ་གཙོ་ལྷན་རྒྱས།

ཟློས་གར་འཁྲབ་སྟོན་རུ་ཁག

ལག་རྩེད་སྤོ་ལོ་རུ་ཁག

མཛད་སྒོའི་ཡུལ་དངོས།

     སྤྱི་ཟླ9བའི་ཚེས25དང26ཉིན་ལ། ཞོན་ཧྭ་བོད་ཡིག་སློབ་འབྲིང་བཙུགས་ནས་ལོ་འཁོར30ལོན་པར་རྟེན་འབྲེལ་ཞུ་བའི་མཛད་སྒོ་ཞུན་ཧྭ་བོད་ཡིག་སློབ་འབྲིང་དུ་བསྡུས་ཤིང་།  ཞོན་ཧྭ་རྫོང་གི་འབྲེལ་ཡོད་འགོ་ཁྲིད་མི་སྣ་དང་། མི་རིགས་སློབ་ཆེན་ཁག་གི་ཚབ་བྱེད་མི་སྣ། ཞོན་ཧྭ་བོད་ཡིག་སློབ་འབྲིང་གི་སྔོན་ཆད་ཀྱི་སློབ་གཙོ་རིམ་པ། འབྲེལ་ཡོད་ཐེབས་རྩ་ཚོགས་པ། དེ་མིན་ད་དུང་ས་ཆ་སོ་སོའི་སློབ་འབྲིང་ཁག་མང་པོ་བཅས་ཀྱི་འཐུས་ཚབ་མི་སྣ་སོགས་ཁྱོན་བསྡོམས་སྐུ་མགྲོན100ལྷག་མཛད་སྒོར་ཞུགས།
     ཐེངས་འདིར་ཞོན་ཧྭ་བོད་ཡིག་སློབ་འབྲིང་གིས་སློབ་གྲྭ་བཙུགས་ནས་ལོ་འཁོར་སུམ་ཅུ་ལོན་པའི་རྟེན་འབྲེལ་མཛད་སྒོ་དང་འབྲེལ་ནས་གྱ་ནོམ་པའི་རིག་རྩལ་འཁྲབ་སྟོན་བཀོད་སྒྲིག་གནང་བ་མ་ཟད། ཞོན་ཧྭ་བོད་ཡིག་སློབ་འབྲིང་ནས་མཐར་ཕྱིན་ཅིང་འབུམ་རམས་པའི་བསླབ་གནས་བླངས་ཡོད་པའི་སློབ་མ་དག་དང་སློབ་གྲྭའི་འབྲེལ་ཡོད་འགོ་ཁྲིད་ཀྱིས་གནས་བབ་དང་བསམ་གཞིག་ཅེས་པ་བརྗོད་གཞི་བྱས་ཏེ་བཞུགས་མོལ་བགྲོ་གླེང་ཚོགས་འདུ་བསྡུས་ཤིང་ཞོན་ཧྭ་བོད་ཡིག་སློབ་འབྲིང་གི་སློབ་གསོའི་གནས་བབ་དང་མ་འོངས་འཕེལ་རྒྱས་ཀྱི་ཐབས་ལམ་སོགས་དང་འབྲེལ་ནས་བགྲོ་གླེང་བྱས།
     ཞོན་ཧྭ་བོད་ཡིག་སློབ་འབྲིང་ནི་སྤྱི་ལོ1985ལོར་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་བ་ཆོས་ཀྱི་རྒྱལ་མཚན་མཆོག་གི་རླབས་ཆེན་གྱི་ཐུགས་བཀོད་ལྟར། ཞིང་ཆེན་དང་ས་ཁུལ། རྫོང་རིམ་པ་གསུམ་གྱི་ཏང་དང་མི་དམངས་སྲིད་གཞུང་གི་རྒྱབ་སྐྱོར་འོག་བཙུགས་པ་ཞིག་ཡིན་ལ། ཞོན་ཧྭ་བོད་ཡིག་སློབ་འབྲིང་ཅེས་པའི་མིང་འདི་ཡང་པཎ་ཆེན་བཅུ་བ་མཆོག་གིས་གསོལ་ཞིང་། པཎ་ཆེན་བཅུ་གཅིག་པ་ཆོས་ཀྱི་རྒྱལ་པོ་དང་ང་ཕོད་རྣམ་གཉིས་ཀྱིས་དངོས་སུ་ཕྱག་བྲིས་གནང་བ་ཡིན་འདུག
     ལོ་ངོ30ལྷག་གི་རིང་ལ་ཞོན་ཧྭ་བོད་ཡིག་སློབ་འབྲིང་གིས་སློབ་གྲྭ་ཆེ་འབྲིང་ཁག་ཏུ་ཚད་ལྡན་གྱི་སློབ་མ3600ལྷག་བསྐྱལ་བ་དང་། དེའི་ཁྲོད་དུ་རབ་འབྱམས་པའི་བསླབ་གནས་བླངས་དང་ལེན་བཞིན་པའི་སློབ་མ200ལྷག་དང་། འབུམ་རམས་པའི་བསླབ་གནས་གཉེར་དང་གཉེར་ཟིན་པའི་སློབ་མ22ཡོད་པ་རེད།
     ཐེངས་འདིའི་མཛད་སྒོ་བརྒྱུད་ནས་ཞོན་ཧྭ་བོད་ཡིག་སློབ་འབྲིང་གིས་པཎ་ཆེན་བཅུ་བ་ཆེན་མོའི་བླ་མེད་ཀྱི་མཛད་རྗེས་དང་། ཏང་དང་རྒྱལ་ཁབ་ཀྱི་གལ་ཆེའི་མཛུབ་སྟོན་དང་རྒྱབ་སྐྱོར། ལོ་ངོ་སུམ་ཅུའི་རིང་གི་ཕུལ་དུ་བྱུང་བའི་སློབ་གསོའི་གྲུབ་འབྲས་བཅས་ལ་ཕྱིར་དྲན་བྱས་ཤིང་། གོམ་གང་མདུན་སྤོས་ཀྱིས་སློབ་གསོ་ལེགས་བཅོས་དང་སློབ་ཁྲིད་ཀྱི་སྤུས་ཚད་མཐོར་འདེགས་གཏོང་བར་ཡིད་ཆེས་གསར་བ་བསྣན།
     ཉིན་གཉིས་ཀྱི་རིང་ལ། མཛད་སྒོའི་རིམ་པ་དང་། རིག་རྩལ་འཁྲབ་སྟོན་གྱི་རིམ་པ། བགྲོ་གླེང་གི་རིམ་པ། སློབ་རའི་ནང་ཁུལ་གྱི་བྱ་འགུལ་རིམ་པ་བཅས་རིམ་པ་རེ་རེ་བདེ་ལེགས་ངང་སྤེལ་བ་དང་། ཚེས26ཉིན་གྱི་ཕྱི་དྲོར་ཡོངས་སུ་མཇུག་རྫོགས།