གྲོང་ཁྱེར་གྱི་དཔེ་ཀློག་འཆར་གཞི”ལྷ་ས་ནས་ལག་བསྟར་བྱེད་འགོ་ཚུགས་པ།

     སྤྱི་ཟླ4བའི་ཚེས22ཉིན་གྱི་ཕྱི་དྲོ། སྐྱུ་རུ་ར་ཀུང་ཧྲེའི་གྲོང་ཁྱེར་གྱི་དཔེ་ཀློག་འཆར་གཞི་མགོ་ཚུགས་པ་དང་། བོད་ལྗོངས་རྩོམ་པ་པོའི་མཐུན་ཚོགས་ཀྱི་གསར་རྩོམ་རྟེན་གཞིའི་སྒོ་བྱང་འགེལ་བའི་མཛད་སྒོ་ལྷ་སར་ཚོགས་ཤིང་། ཤེས་རྟོགས་བྱུང་བར་གཞིགས་ན། གྲོང་ཁྱེར་གྱི་དཔེ་ཀློག་འཆར་གཞིའི་ས་ཚུགས་དང་པོ་ཡིན་པའི་སྐྱུ་རུ་ར་ཀུང་ཧྲེས་ལོ་འཁོར་ནང་ལྷ་སར་གྲོང་ཁྱེར་གྱི་དཔེ་ཀློག་ས་ཚིགས་བཞི་ནས་ལྔ་བར་བཙུགས་ཏེ་དཔེ་དེབ་ཚང་མ་ཕར་འགྲོ་ཚུར་འོང་བྱེད་མཁན་དང་གྲོང་མིར་རིན་མེད་ངང་གཡར་རྒྱུ་ཡིན་པ་རེད།
     ཤེས་རྟོགས་བྱུང་བར་གཞིགས་ན། སྐྱུ་རུ་རའི་ཀུང་ཧྲེའི་རིག་གནས་སྤྱི་ཕན་རྩ་འཛུགས་ནི2014ལོའི་ཟླ་དྲུག་པར་སྐུལ་སློང་བྱས་པའི་ཁེ་བཟང་མེད་པའི་རིག་གནས་སྤྱི་ཕན་རྩ་འཛུགས་ཤིག་ཡིན་ཞིང་། མིག་སྔར་རྩ་འཛུགས་དེས་རྒྱལ་ཡོངས་ཀྱི་གྲོང་ཁྱེར50ལྷག་ལ་སྤྱི་ཕན་ས་ཚིགས་བཙུགས་ཡོད། མིག་སྔར་སྐྱུ་རུ་ར་ཀུང་ཧྲེའི་གྲོང་ཁྱེར་གྱི་དཔེ་ཀློག་འཆར་གཞིའི་ཁག་དང་པོའི་དཔེ་ཀློག་ས་ཚིགས་པེ་ཅིང་དང་། ཧྲང་ཧའེ། ཀོང་ཀྲོའུ། ཤིས་ཨན། ཀྲེང་ཀྲོའུ། ཁུན་མིང་། ཁྲེང་ཏུའུ། ཅི་ནན། ཁྲང་ཧྲ། ཟི་ལིང་། ལྷ་ས་བཅས་གྲོང་ཁྱེར11ལ་ཕྱོགས་ནས་སྒོ་དབྱེ་རྒྱུའི་འདུན་ཞུ་བྱེད་བཞིན་ཡོད། དེ་མིན་རིག་རྩལ་ཤེས་ལྡན་མི་སྣར་སྔར་བས་རོགས་སྐྱོར་བྱས་ཏེ་རིག་རྩལ་གསར་རྩོམ་བྱ་གཞག་དར་རྒྱས་ཡོང་བ་བྱ་ཆེད་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱིས་སྐྱུ་རུ་ར་ཀུང་ཧྲེའི་རིག་གནས་སྤྱི་ཕན་རྩ་འཛུགས་ལ་བོད་ལྗོངས་རྩོམ་པ་པོའི་མཐུན་ཚོགས་གསར་རྩོམ་རྟེན་གཞི་ཞེས་པའི་སྒོ་བྱང་དངོས་སུ་བཀལ་ཡོད།
     བོད་ལྗོངས་རྩོམ་པ་པོའི་མཐུན་ཚོགས་གསར་རྩོམ་རྟེན་གཞིས་བོད་རང་སྐྱོང་ལྗོངས་ཀྱི་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་དང་དེ་བཞིན་སྐྱུ་ར་ར་ཀུང་ཧྲེའི་རིག་གནས་སྤྱི་ཕན་རྩ་འཛུགས་ཀྱི་ལེགས་ཆ་ལྡན་པའི་ཐོན་ཁུངས་ཕྱོགས་ཡོངས་ནས་སྐོང་འཐེན་བྱས་ཏེ་རིག་རྩལ་ཤེས་ལྡན་མི་སྣས་གསར་རྩོམ་བྱ་ཆེད་དམིགས་བསལ་གཟིགས་སྐྱོང་སྲིད་ཇུས་རབ་དང་རིམ་པ་མཁོ་འདོན་བྱ་རྒྱུ་རེད།