བོད་ཀྱི་ལོང་ཡིག་དང་འཕུར་མཉེད་སློབ་སྦྱོང་འཛིན་གྲྭ་དངོས་སུ་ཚུགས་པ།

མགོན་པོ་དང་ཁོང་གི་སློབ་མ་རྣམས།

     སྤྱི་ཟླ3པའི་ཚེས26ཉིན། མདོ་སྨད་ཁྱུང་མཆུའི་ཟངས་དཀར་ཡུལ་ཚོའི་དེ་སྔོན་བོད་ཀྱི་ལོང་ཡིག་བཟོ་མཁན་ཏེ། དགུང་ལོ་དྲུག་ཅུར་སོན་པའི་བོད་རིགས་ལོང་བ་མགོན་པོ་ལགས་ཀྱིས་རྔ་བ་ཁུལ་དབང་བོ་སྐྱོན་ཅན་གྱི་མཉམ་འབྲེལ་ལྷན་ཚོགས་དང་སྤྱི་ཚོགས་ཐོག་གི་འབྲེལ་ཡོད་མི་སྣའི་རྒྱབ་སྐྱོར་འོག འབར་ཁམས་གྲོང་མཁར་ནས་བོད་ཀྱི་ལོང་ཡིག་དང་འཕུར་མཉེད་ནད་བཅོས་འཛིན་གྲྭའི་སློབ་ཁྲིད་ཀྱི་འགོ་དངོས་སུ་བཙུགས་པ་རེད།
     ཉིན་དེར་རྔ་བ་ཁུལ་དབང་བོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་ལས་འཛིན་འགོ་གཙོ་མཆོག་གནས་ལགས་དང་ལས་འཛིན་འགོ་གཙོ་གཞོན་པ་ཧྥུང་ཕེ་ལིན། འབར་ཁམས་རྫོང་དབང་བོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་ལས་འཛིན་འགོ་གཙོ་གཞོན་པ་ལྷ་སྒྲོན་སོགས་ཡུལ་དངོས་སུ་ཕེབས་ཤིང་། མགོན་པོའི་བོད་ཀྱི་ལོང་བའི་སློབ་གྲྭ་འཛུགས་པའི་ལྷག་བསམ་ལ་བསྟོད་བསྔགས་བྱས་པ་དང་། ཁོང་གིས་བོད་ཀྱི་གཞོན་སྐྱེས་ལོང་བ་རྣམས་ལ་རིག་གནས་དང་ལག་རྩལ་སྦྱང་སྟེ་རང་གི་འཇོན་ནུས་ཡར་བསྐྱེད་པའི་ཁོར་ཡུག་ཅིག་བསྐྲུན་པར་བསྔོད་བསྔགས་ཚད་མེད་གནང་ཞིང་།  ཁོང་གི་རྣམ་དཀར་གྱི་ལས་ཀ་དེར་རྒྱབ་སྐྱོར་གང་ལེགས་གནང་པ་བསྟན།

རྔ་བ་ཁུལ་དབང་བོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་དབུ་ཁྲིད་རྣམས་དང་མཉམ་པར་བསྐྱོན་པ།

     མི་ཚེའི་བར་སྐབས་ཤིག་ནས་མིག་གཉིས་ལོང་པའི་ཁོང་ལ་མཚོན་ན། འདི་ནི་ཁོང་གིས་མི་ལོ་ཉི་ཤུ་ལྷག་གི་རིང་ལ་དཀའ་ལས་མྱངས་པའི་འབྲས་བུ་ཡིན་ཞིང་། རང་དང་ལས་དབང་གཅིག་པའི་བོད་ཀྱི་གཞོན་སྐྱེས་ལོང་བ་རྣམས་ལ་ཕན་པ་བསྒྲུབ་འདོད་ཀྱི་ཀུན་སློང་རྣམ་དག་ཅིག་བཅངས་ནས་བོད་ཀྱི་ལོང་ཡིག་གསར་བཟོ་མཛད་པ་དང་། ཧ་ཅང་ཞིབ་ཚགས་སུ་བཟོས་པའི་བོད་ཀྱི་ལོང་ཡིག་སློབ་ཁྲིད་བྱེད་པ་དང་། རང་གི་ལོ་ངོ་དུ་མའི་འཕུར་མཉེད་སྨན་བཅོས་ཀྱི་ཉམས་མྱོང་དང་ཤེས་བྱ་དག་བོད་ཀྱི་ལོང་བ་གཞན་དག་ལ་སྩོལ་ཆེད་སློབ་ཁྲིད་འཛིན་གྲྭ་གཉེར་མགོ་བརྩམས་པ་རེད།

མགོན་པོས་བརྩམས་པའི《བོད་ཀྱི་ལོང་ཡིག་ལ་འཇུག་པའི་དམིགས་བུ》།

     འཛིན་གྲྭ་དེར་ཞུགས་པའི་སློབ་མ་རྣམས་ཀྱིས་སློབ་ཡོན་དང་སྡོད་ཁང་གི་རིན། ཟ་རིན་སོགས་གང་ཡང་སྟེར་མི་དགོས་ཤིང་འགྲོ་སོང་ཚང་མ་ཁོང་གིས་གཏོང་རྒྱུ་ཡིན་ལ།   མིག་སྔར་ཁོང་གི་བོད་ཀྱི་ལོང་ཡིག་དང་འཕུར་མཉེད་ཟབ་སྦྱོང་འཛིན་གྲྭར་བོད་རིགས་གཞོན་སྐྱེས་ལོང་བ4བསླེབས་ཡོད།
     མགོན་པོའི་བོད་ཀྱི་ལོང་ཡིག་དང་འཕུར་མཉེད་འཛིན་གྲྭའི་འཁྲིད་བྱའི་ནང་དོན་ལ་བོད་ཀྱི་ལོང་ཡིག་དང་འཕུར་མཉེད་སྨན་བཅོས་བྱེད་ཐབས་ཡོད་པ་མ་ཟད། གཞན་རྩིས་འཁོར་དང་རྒྱ་ཡིག་རྒྱ་སྐད་སོགས་ཀྱང་ཡོད། འཛིན་གྲྭ་རེའི་ཟབ་སྦྱོང་དུས་ཡུན་སློབ་སྐབས་གཉིས་ཡིན་ལ།  སློབ་སྐབས་རེ་ལ་དུས་ཡུན་ཟླ་བ8ཡོད།  འཁྲིད་བྱའི་ནང་དོན་ལ་བོད་ཀྱི་ལོང་ཡིག་གི་སློབ་ཁྲིད་དང་། འཕུར་མཉེད་སྨན་བཅོས་བྱེད་སྟངས།  ལོང་བའི་རྩིས་འཁོར་ལག་ལེན་བྱེད་སྟངས་བཅས་ཡོད་ཅིང་། ཞོར་དུ་རྒྱ་ཡིག་དང་རྒྱ་སྐད་མི་ཤེས་པའི་ལོང་བ་ཚོར་དམིགས་ནས་ཆེད་དུ་རྒྱ་ཡིག་དང་རྒྱ་སྐད་ཀྱི་སློབ་ཁྲིད་ཀྱང་བཀོད་སྒྲིག་བྱས་ཡོད་པ་རེད།

སློབ་མའི་སྡོད་ཤག

     སློབ་ཁྲིད་བྱེད་དུས་ནི་ལོ་རེའི་སྤྱི་ཟླ3པའི་ཚེས1ནས་སྤྱི་ཟླ10པའི་ཚེས31ཉིན་བར་ཡིན། ལོ་རེའི་སྤྱི་ཟླ11པའི་ཚེས1ནས་ལོ་རྗེས་མའི་སྤྱི་ཟླ2པའི་ཚེས28བར་གུང་གསེང་གཏོང་རྒྱུ་རེད།  སློབ་ཁྲིད་བྱེད་ཡུལ་ནི་འབར་ཁམས་གྲོང་རྡལ་རྐང་ཐང་བགྲོད་ལམ་གྱི་ཁུལ་གློག་བརྙན་ཀུང་སིའི་སྡོད་གནས་ཐོག་ཁང་གི་ཚན་སྐོར་གཉིས་པའི་རྩེག3པའི་སྒོ་རྟགས2པ་ཡིན།