ད་ལོར་བོད་ལྗོངས་ཀྱིས་བྱིས་གཉོར་ཁང་ཉིས་བརྒྱ་དང་སོ་བདུན་གསར་འཛུགས་བྱ་རྒྱུ་ཡིན་པ།

     ཉེ་ལམ། 《བོད་རང་སྐྱོང་ལྗོངས་ཀྱི་སློབ་གྲྭ་འབྲིང་ཆུང་དཀྱུས་མ་དང་བྱིས་གཉོར་ཁང་འཛུགས་པའི་ཆ་རྐྱེན་དང་ཚད་གཞིའི》བླང་བྱ་ལྟར། བོད་ལྗོངས་ཀྱི་སློབ་རའི་རྣམ་གྲངས་འཛུགས་སྐྲུན་གྱི་དམིགས་བྱ་གཙོ་བོ་དེ་འོས་འགན་སློབ་གསོ་ནས་སློབ་སྔོན་སློབ་གསོ་ལ་ཁ་ཕྱོགས་བཞིན་ཡོད་དེ། གྲོང་ཚོའི་བྱིས་གཉོར་ཁང་གི་འཛུགས་སྐྲུན་བྱ་བ་ཇེ་མགྱོགས་སུ་བཏང་བར་བརྟེན་ནས། རོང་འབྲོག་ཁུལ་གྱི་སློབ་སྔོན་སློབ་གསོའི་ཐད་སྟེགས་བུ་ལེགས་པོ་བསྐྲུན་རྒྱུ་ཡིན་པར་མ་ཟད། ལྗོངས་ཡོངས་ཀྱི་སློབ་གཉེར་ཆ་རྐྱེན་ཕྱོགས་ཡོངས་ནས་ཇེ་ལེགས་སུ་གཏོང་རྒྱུ་རེད།
     འབྲེལ་ཡོད་གཞི་གྲངས་ལྟར་ན། བོད་ལྗོངས་སུ་རིམ་པ་སོ་སོ་དང་རིགས་སོ་སོའི་སློབ་གྲྭ1696ཡོད་པ་དང་། སློབ་ཁྲིད་ས་ཚིགས་སུམ་བརྒྱ་དང་གྱ་བརྒྱད་ཡོད། དེའི་ཁྲོད་བྱིས་གཉོར་ཁང722ཡོད་ལ། བྱིས་གཉོར་ཁང་དུ་བསྡོམས་པས་བྱིས་པ81112ཡོད། ལྗོངས་ཡོངས་ཀྱི་སློབ་སྔོན་སློབ་གསོའི་སློབ་གྲྭར་ཞུགས་ཚད59%ལྷག་ཟིན།
     བོད་ལྗོངས་སློབ་གསོ་ཐིན་ནས་རྒྱུས་ལོན་བྱུང་བ་ལྟར་ན། ད་ལོར་བོད་ལྗོངས་ཀྱིས་རོང་འབྲོག་ཁུལ་དུ་སྐད་གཉིས་བྱིས་གཉོར་ཁང་དང་མཁར་གྲོང་གི་བྱིས་གཉོར་ཁང237གསར་འཛུགས་བྱ་རྒྱུ་ཡིན་ཞིང་། ད་ལྟ་ཇུས་གཞི་དེ་རྒྱལ་ཁབ་ལ་སྙན་ཞུ་ཕུལ་ཡོད་ལ། ཚོད་དཔག་བྱས་པ་ལྟར་ན། ད་ལོའི་ཟླ3པར་རྒྱལ་ཁབ་ཀྱིས་ཐོག་མའི་འཆར་གཞི་ལ་ཆོག་མཆན་གནང་རྩིས་ཡོད།