རེ་བའི་མྱུ་གུའི་གསབ་སྦྱོང་འཛིན་གྲྭ་ཞིག་ཁྲི་ཀའི་འཕྲང་དམར་དུ་བསྡུས་པ།

སློབ་ཁྲིད་ཀྱི་ཡུལ་དངོས།

ནན་ཏན་གྱིས་སློབ་ཁྲིད་ལ་ཉན་བཞིན་པ།

ནན་ཏན་གྱིས་སློབ་ཁྲིད་ལ་ཉན་བཞིན་པ།

ཐེངས་འདིའི་གསབ་སྦྱོང་ལ་ཞུགས་པའི་སློབ་མ་ཡོངས།

      སློབ་གྲྭ་ཆུང་འབྲིང་གི་སློབ་མ་རྣམས་དགུན་གནང་བཏང་ན་ཡང་། ཡུལ་ལུང་སོ་སོའི་ཁྱིམ་བདག་ཚོས་རང་གི་བུ་དང་བུ་མོའི་འབྱུང་འགྱུར་གྱི་རིག་གནས་ཤེས་བྱའི་ཡོན་ཚད་ཇེ་མཐོར་གཏོང་ཆེད་ཅི་ནུས་གང་ཐུབ་ཀྱིས་དགོན་སྡེར་བསྐྱལ་བའམ་ཡང་ན་རྫོང་དང་གྲོང་རྡལ་དུ་སློབ་རིན་མཐོན་པོ་བྱིན་ཏེ་མཛུབ་སྟོན་དགེ་རྒན་བཙལ་ནས་གསབ་ཁྲིད་བྱེད་པའི་མཐོ་རླབས་ཤིག་འཕྱུར་བཞིན་ཡོད། འོན་ཀྱང་མིག་རྒྱང་རིང་ཞིང་གཞན་ཕན་གྱི་ལྷག་བསམ་དཀར་པོའི་སློབ་ཆེན་པ་རེ་འགས་གླ་རིན་སྐར་གང་ཡང་མ་བླངས་པར་ཁྲི་ཀ་འཕྲང་དམར་ས་ཆའི་རྒྱ་ཡིག་གི་ཆུ་ཚད་ཞན་པ་གཞི་བཅོལ་ཏེ་སྤྱི་ཟླ་དང་པོའི་ཚེས18ནས་སྤྱི་ཟླ་གཉིས་པའི་ཚེས6ཉིན་བར་དུ་ཁྲི་ཀ་རྫོང་འཕྲང་དམར་གྲོང་རྡལ་སྟག་རིག་སློབ་ཆུང་དུ་རེ་བའི་མྱུ་གུ་ཞེས་པའི་གསབ་སྦྱོང་འཛིན་གྲྭ་ཞིག་བསྡུས། ཐེངས་འདིའི་འཛིན་གྲྭར་ཡུལ་ཚོ་དེ་གའི་སྟག་རིག་སྡེ་བ་དང་སྒྲོམ་སྡེ་བ། ཨ་སྐོང་སྡེ་བ། ཁྱོ་ཀྱྰ་སྡེ་བ་བཅས་ཀྱི་སློབ་ཆུང་ལོ་རིམ་དང་པོ་ནས་དྲུག་པའི་བར་གྱི་སློབ་མ65ལྷག་སྐོར་ཁག་གཉིས་སུ་བགར་ཏེ་རྒྱ་ཡིག་དང་རྩིས་རིག་གི་གསབ་ཁྲིད་བྱས། ཉིན་རེ་རེའི་ནངས་མོའི་དུས་ཚོད་དགུ་ནས་ཕྱི་དྲོའི་དུས་ཚོད་གཉིས་བར་དུ་སློབ་ཐུན་བཀོད་སྒྲིག་སྒོས་བསྟུད་མར་ཉིན་ཉི་ཤུ་ལྷག་ལ་སློབ་ཁྲིད་བགྱིས། སློབ་ཁྲིད་ཀྱི་གོ་རིམ་ཁྲོད་དུ་ལོ་རིམ་དང་པོ་དང་གཉིས་པ། གསུམ་པ་བཅས་ཀྱི་སྐོར་ཁག་དང་པོར་རྒྱ་ཡིག་གི་གསལ་བྱེད་ནས་མགོ་བརྩམས་ཏེ་སློབ་ཁྲིད་བགྱིས་ཤིང་། རྩིས་རིག་ཀྱང་སྣོན་འཐེན་གྱི་ཐོག་མའི་རྨང་གཞི་ནས་ཁྲིད་མགོ་བརྩམས་ལ། སློབ་མ་ཚོའི་ཤེས་ཚད་དང་བསྟུན་ནས་གོ་དཀའ་བའི་གནད་རྣམས་དམིགས་སུ་བཟུང་སྟེ་གསབ་ཁྲིད་བྱས། ལོ་རིམ་བཞི་བ་དང་ལྔ་བ། དྲུག་པ་བཅས་ཀྱི་སྐོར་ཁག་གཉིས་པར་རྒྱ་ཡིག་དང་རྩིས་རིག་གི་རྨང་གཞིའི་སྐོར་གཙོ་གནད་དུ་བཟུང་སྟེ་སློབ་མ་ཚོར་བགྲོ་གླེང་གི་ཚུལ་དུ་ལོ་རིམ་བཞི་བའི་སྟོད་ཆ་ནས་མགོ་བཟུང་སྟེ་དཀའ་གནད་དག་དཀྱུས་སུ་བསྡུས་ནས་གསབ་ཁྲིད་གནང་། མིག་རྡེབ་དབང་ཙམ་གྱིས་ཉིན་ཉི་ཤུ་ལྷག་ཧ་ཅང་ཐུང་ན་ཡང་། སློབ་མ་ཚོའི་མ་འོངས་ཕུགས་བསམ་གྱི་ཆེད་དུ་གླ་རིན་སྐར་གང་ཡང་མ་བླངས་པའི་དཀར་སེམས་དགེ་བའི་ཁར་ཟིན་བྲིས་མདོར་བསྡུས་དང་ལས་བྱ་རགས་ལྟའི་འགན་ཁུར་བགོས་ཏེ་ཧུར་ཐག་སྒོས་ལས་དོན་ཐད་གཟབ་ནན་བྱས་པས་ཁྱིམ་བདག་རྣམས་ཀྱིས་བསྟོད་པའི་མེ་ཏོག་གཏོར་ཞིང་ཡི་རངས་གོང་བཀུར་གྱི་མཆོད་པའི་བསྔགས་པ་བརྗོད། རེབ་འདིའི་གསབ་ཁྲིད་བརྒྱུད་སློབ་མ་སོ་སོའི་ཤེས་བྱའི་ཡོན་ཚད་ལྡབ་འགྱུར་སྒོས་འཕེལ་རྒྱས་སུ་སོང་བའི་མི་ཚད་སློབ་སྐབས་རྗེས་མར་འཇུག་བདེ་བའི་གསེར་ཟམ་ཞིག་ཀྱང་འཕངས་པར་སྨོས་མ་དགོས་སོ། །