བོད་ལྗོངས་ཀྱི་རིག་གནས་བརྗེ་རེས་བྱ་བར་གྲུབ་འབྲས་མངོན་གསལ་ཐོབ་པ།

            བོད་རང་སྐྱོང་ལྗོངས་རིག་གནས་དངོས་རྫས་ཅུའུ་ཡི་ཅུའུ་ཀྲང་གྲོས་ཚོགས་ཚེས་ཉེར་གསུམ་ཉིན་གྱི་སྔ་དྲོར་ལྷ་ས་ནས་ཚོགས་པ་དང་། བོད་རང་སྐྱོང་ལྗོངས་རིག་གནས་ཐིན་གྱི་ཐིན་ཀྲང་ཉི་མ་ཚེ་རིང་གིས་འདས་པའི་ལོ་ལྔ་ནི་བོད་ལྗོངས་ཀྱི་རིག་གནས་ཤན་ཤུགས་ཇེ་མཐོར་སོང་བའི་ལོ་ལྔ་རེད་ཅེས་བཤད། བོད་རང་སྐྱོང་ལྗོངས་ཀྱིས་ནན་ཏན་གྱིས་རིག་གནས་ཐོན་ལས་འཕེལ་རྒྱས་དང་རྒྱལ་ཁབ་ཕྱི་ནང་གི་རིག་གནས་བརྗེ་རེས་ལ་ཤུགས་སྣོན་བྱས་ནས། བོད་ལྗོངས་ཀྱི་རིག་གནས་སྟོབས་ཤུགས་མུ་མཐུད་དུ་ཇེ་ཆེར་བཏང་བ་དང་། རིག་གནས་ཤན་ཤུགས་ཉིན་རེར་ཇེ་མཐོར་སོང་།
             རྒྱུས་ལོན་བྱུང་བའི་གནས་ཚུལ་ལྟར་ན། ལོ་ལྔའི་རིང་ལ་བོད་ལྗོངས་ཀྱིས་སྔ་གཞུག་ཏུ་ཚོགས་པ་སུམ་ཅུ་སོ་དྲུག་མངགས་ནས། ཨ་མེ་རི་ཁ་དང་། སི་ཕེན། ཐེ་ཝན་སོགས་རྒྱལ་ཁབ་དང་ས་ཁུལ་ལ་མཚམས་འདྲི་བྱས་པ་དང་། ཕྱི་རྒྱལ་གྱི་གྲོང་ཁྱེར་བརྒྱ་ཙམ་ལ་སོང་ནས་རིག་གནས་བརྗེ་རེས་བྱ་འགུལ་སྤེལ་ཞིང་། བོད་ལྗོངས་སུ་རིག་གནས་བརྗེ་རེས་བྱེད་པར་ཡོང་བའི་ཚོགས་པ་ཉེར་གསུམ་ལ་སྣེ་ལེན་བྱས། དེས་རྒྱལ་ཁབ་ཕྱི་ནང་གི་རིག་གནས་བརྗེ་རེས་ཀྱི་རྣམ་པ་གསར་བ་ཞིག་འཚོལ་ཞིབ་བྱས་པར་མ་ཟད། བོད་ལྗོངས་ཀྱི་རིག་གནས་ཤན་ཤུགས་ཇེ་མཐོར་བཏང་པ་རེད།