༄༅།།མཚོ་ལྷོ་ཁུལ་མི་རིགས་མཐོ་འབྲིང་དང་པོས་ཀུན་སྤྱོད་སློབ་གསོ་སྐོར་གྱི་འཆད་ཁྲིད་སྤེལ་བ།

དེ་ཡང་ཇི་སྐད་དུ། ཀུན་སྤྱོད་གཙང་བས་གཞན་གྱི་ཡིད་དུ་འཐད། ། སྨྲ་བ་ཉུང་བས་ཕོག་ཐུག་གཡེང་བ་མེད། ། དད་བརྩོན་དྲན་ཤེས་བརྟན་པོས་ཉིན་རེ་བཞིན། ། ཡོན་ཏན་ཡར་ངོའི་ཟླ་ལྟར་འཕེལ་འགྱུར་བས། ། སྒོ་གསུམ་བག་དང་ལྡན་པར་གྱིས་ཤིག་ཨང་། ། ཞེས་གསུངས་པ་ལྟར། སློབ་གྲྭའི་སློབ་གསོ་དེ་ཆེ་བ་རྒྱལ་ཁབ་དང་མི་རིགས་ཀྱི་འབྱུང་འགྱུར་དང་། ཆུང་བ་དུད་ཁྱིམ་ཁྲི་སྟོང་མང་པོར་འབྲེལ་བ་དམ་ཟབ་ཡོད་ལ། ལྷག་པར་དུ་ཀུན་སྤྱོད་སློབ་གསོ་ནི་དེ་ལས་ཀྱང་གལ་འགངས་ཆེ་བ་ཞིག་ཡིན་པར་དམིགས་ནས། ཉེ་ལམ་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོའི་ཀུན་སྤྱོད་སློབ་གསོ་ཁང་གིས་སློབ་གྲྭའི་ཏང་ཨུའི་ཧྲུའུ་ཅི། སློབ་གཙོ་དབང་ཆེན་ཚེ་རིང་ལགས་གདན་དྲངས་ནས་སློབ་གྲྭའི་ལུས་རྩལ་གླིང་དུ་མཐོ་གཉིས་རིམ་པའི་དགེ་སློབ་ཡོངས་ལ༼དུས་རབས་གསར་བའི་མཐོ་འབྲིང་སློབ་མའི་བྱང་ཚད་དང་འགན་འཁྲིའི་སྐོར་གླེང་བ༽ཞེས་པ་བརྗོད་གཞིར་བྱས་པའི་ཀུན་སྤྱོད་སློབ་གསོ་སྐོར་གྱི་འཆད་ཁྲིད་ཀྱི་བྱ་འགུལ་སྤེལ། སློབ་གཙོ་ཁོང་གིས་འཆད་ཁྲིད་ཀྱི་ཐོག་མཐའ་བར་གསུམ་དུ་རྒྱལ་ཁབ་སློབ་གསོ་པུའུ་ཡིས་བཏོན་པའི་ཚན་རིག་རང་བཞིན་དང་དུས་རབས་རང་བཞིན། མི་རིགས་རང་བཞིན་ལྡན་པའི་ལྟེ་བའི་བྱང་ཚད་ཆེན་པོ་དྲུག་ལ་གཞི་བྱས། མི་རིགས་རང་གི་མི་གཞི་ཀུན་སྤྱོད་དང་བསམ་བློ་བློ་སྦྱོང་གི་གཞུང་ལུགས་ཀྱིས་མཚམས་སྦྱར། རང་རེའི་སློབ་གྲྭའི་སློབ་མའི་ཀུན་སྤྱོད་གནས་ཚུལ་དངོས་ཀྱིས་ཟུར་བརྒྱན་ཏེ་དུས་རབས་གསར་བའི་མཐོ་འབྲིང་སློབ་མ་ཞིག་མཚོན་ན་བྱང་ཚད་གང་དག་ལྡན་དགོས་པ་དང་དེའི་འགན་འཁྲི་ཅི་ཞིག་ཡིན་པ་བརྗོད་སྙིང་དུ་བཟུང་ནས་གནའ་དེང་དང་ཀྲུང་ཕྱིའི་མཁས་པའི་ལུང་ཚིག་མང་དུ་དྲངས་ཤིང་། དོན་དངོས་ཀྱི་དཔེར་མཚོན་རང་བཞིན་ལྡན་པའི་དཔེ་གཞི་མང་དུ་བཀོལ་ནས་རྒྱས་པར་སྤྲོས་ཤིང་། གནད་དུ་ཐོན་པའི་བརྗོད་བྱའི་དོན་དང་གོ་སླ་བའི་དཔེ་སྣ་ཚོགས་བཀོད་ནས་བྱ་འགུལ་དུ་ཞུགས་པའི་དགེ་སློབ་ཀུན་གྱི་ཡིད་ཀྱི་དབང་བོ་ཅིག་ཅར་དུ་བཀུགས། མཇུག་མཐར་སློབ་གཙོ་ཁོང་གིས་སློབ་གྲོགས་རྣམས་ལ། དལ་འབྱོར་གྱི་མི་ལུས་རིན་པོ་ཆེ་འདི་འཐོབ་དཀའ་ལ། ཐོབ་ན་དོན་སྙིང་དང་ལྡན་པར་བྱ་དགོས་པས་ལུས་སེམས་བདེ་ཐང་ཡིན་དགོས་པ་དང་གཅིག སེམས་བཟང་པོ་དང་ངག་བཙུན་པོ། སྤྱོད་པ་ཡག་པོ་བཅས་ཀྱི་ཀུན་སྤྱོད་ཡག་པོ་བྱེད་དགོས་པ་དང་གཉིས། ཡོན་ཏན་མ་ལུས་བརྩོན་པའི་རྗེས་སུ་འགྲོ་ཞེས་པ་ལྟར་བསླབ་ལ་བརྩོན་འགྲུས་བསྐྱེད་དགོས་པ་དང་གསུམ། རྒན་བཀུར་ཆུང་བྱམས་ནི་མིའི་ཆེས་མཛེས་པའི་སྤྱོད་པ་དེ་ཡིན་པས་ཡ་རབས་གུས་ཞབས་ལྡན་དགོས་པ་དང་བཞི། དུས་རབས་གསར་བའི་ན་གཞོན་དག་གིས་རང་གི་འགན་འཁྲི་ཅི་ཡིན་པ་ཤེས་དགོས་པ་དང་དེ་ཁུར་ཕོད་པའི་སྤོབས་སེམས་ལྡན་དགོས་པ་དང་ལྔ། སློབ་གཉེར་བ་ཞིག་ལ་མཚོན་ན་བསླབ་པ་དོན་གཉེར་གྱི་བྱེད་ཐབས་ཡང་དག་ཡིན་དགོས་པ་དྲུག་བཅས་ཀྱི་རེ་བ་ནན་མོ་བཏོན་ནས་ཆུ་ཚོད་གཉིས་ལྷག་གི་འཆད་ཁྲིད་དགེ་སློབ་ཡོངས་ཀྱི་ཐལ་མོ་རྡེབ་སྒྲའི་ཁྲོད་མཇུག་བསྡུས་སོ། །