སློབ་གསོའི་ངོས་འཛིན་དང་ལག་ལེན་མྱོང་བཤད་ཀྱི་འགོ་བརྗོད།

       མི་རྣམས་ཀྱིས་སློབ་གསོ་ནི་རྙོག་འཛིང་དེ་འདྲ་མིན་པའི་ལས་ཀ་སླ་བོ་ཅིག་སྟེ། སློབ་གྲྭ་རུ་སློབ་མར་བདག་དམ་བཟང་པོ་བྱ་བ་དང་། སློབ་མའི་རྒྱུགས་འབྲས་ཇེ་མཐོར་བཏང་སྟེ། ཐབས་བརྒྱ་ཇུས་སྟོང་གི་སློབ་རིམ་འཕར་བར་འབད་ཅིང་། སློབ་མ་གཞན་པས་ཡིད་སྨོན་སྐྱེས་པའི་ནང་ལོགས་ཀྱི་སློབ་གྲྭ་ཞིག་ཏུ་རྒྱུགས་འཕྲོད་ན། ད་གཟོད་མ་འོངས་པར་ལས་ཚེགས་ཆུང་ཞིང་ཡོང་འབབ་མཐོ་བའི་ལས་ཀ་བཟང་པོ་ཞིག་རེག་པ་འདོད་པར་མ་ཟད། དེ་འདྲ་ཞིག་བྱུང་ན་མི་གཞན་པས་རང་ལ་ཡིད་སྨོན་སྐྱེ་ཞིང་། གཞན་པར་རང་གི་འདོད་པ་ལྟར་ལས་དོན་བསྒྲུབ་ཏུ་བཅུག་ན་ཆོག་པའི་ཐོབ་ཐང་ཡོད་པར་འདོད། མདོར་ན། རང་ཉིད་མི་གཞན་གྱི་མགོན་དུ་འགྱུར་ན་འདོད་པས་འདོད་སྲེད་ཀྱིས་སྐུལ་པ་རེད། ང་ཚོས་གོང་གི་གནས་ཚུལ་དེ་ལ་བརྟེན་ནས་རིགས་འདེད་ཅིག་བྱས་ན། ཐབས་བརྒྱ་ཇུས་སྟོང་དང་ཤི་འཐབ་རོ་འཐབ་ཀྱིས་རྒྱུགས་འབྲས་ཁོ་ནར་འབད་མཁན་ཞིག་རང་གི་ཉེ་འཁོར་གྱི་མི་དང་མཐུན་པ་ཕར་ཞོག ཐ་ན་རང་གི་ཁྱིམ་མི་ལ་ཡང་འགྲོགས་བདེ་འདུག་སྐྱིད་ཅིག་བྱ་མི་ཐུབ། མི་དེས་སློབ་ཆེན་རྩེ་གྲས་ལ་རྒྱུགས་འཕྲོད། མཐར་ཕྱིན་རྗེས་ལས་ཀ་བཟང་པོ་ཞིག་ལོན་ངེས་ནའང་། རང་གི་ཉེ་འཁོར་གྱི་མི་དང་འདྲ་མཉམ་གྱི་འབྲེལ་བ་ཞིག་འཛུགས་ཐུབ་བམ། ཁོས་མི་དཀྱུས་མ་ཞིག་ལ་སེམས་གཏིང་ནས་བརྩི་བཀུར་བྱ་ཐུབ་བམ། མི་འདི་འདྲ་བ་ཚོས་དབང་པོ་སྐྱོན་ཅན་དང་དབུལ་ཕོངས་ཀྱིས་མནར་པའི་མི་ལ་ཇི་ལྟར་རྩིས་ཐང་འཐོབ་ཏུ་འཇུག་དགོས་པ་ཤེས་སམ། ཁོས་རང་ཉིད་ཀྱི་ཚེ་སྲོག་གི་སྐར་ཆ་རེ་རེའི་བདེ་སྐྱིད་མྱོང་ཐུབ་བམ། མི་འདི་འདྲ་བ་ཚོས་བཙུགས་པའི་མིའི་འབྲེལ་བ་འཆམ་མཐུན་ཞིག་ཡིན་ནམ། མ་གཞི་མི་དང་མིའི་བར་གྱི་འབྲེལ་བ་གྲུབ་ཚུལ་ལ་སྤྱི་ཚོགས་ཟེར་བ་རེད། དེས་ན། མི་འདི་འདྲ་བ་ཚོ་ལ་ང་ཚོའི་མ་འོངས་སྤྱི་ཚོགས་བསྐྲུན་པའི་འགན་ཁུར་བཞག་ན་ལུགས་དང་མཐུན་པ་ཞིག་ཡིན་ནམ། ཧོ་པེ་ཞིང་ཆེན་དུ་སློབ་རིམ་འཕར་ཚད་ཧ་ཅང་མཐོ་བའི་ཧེང་ཧྲུའེ་སློབ་འབྲིང་ཞེས་པ་ཞིག་ཡོད། སློབ་འབྲིང་འདིའི་སློབ་མ་ཚོས་ཉིན་རེ་བཞིན་སློབ་ཆེན་རྩེ་གྲ་ལ་རྒྱུགས་འཕྲོད་པར་དམ་བཅའ་འབུལ་དགོས་ཤིང་། སློབ་ཆེན་རྩེ་གྲ་ཞིག་ལ་རྒྱུགས་འཕྲོད་པའི་ཆེད་ཟས་བཅག་གཉིད་བརྗེད་ནི་རྒྱུན་ལྡན་གྱི་འཚོ་བ་ཞིག་ལ་བརྩི་བ་རེད། སློབ་མ་འདི་ཚོས་འགྲན་རྩོད་འཇིགས་སུ་རུང་བ་བྱེད་པ་ལས། གཞན་ཅི་ལ་ཡང་བསམ་བློ་མི་གཏོང་། འདང་ཞིག་རྒྱོབས་དང་། མ་འོངས་སྤྱི་ཚོགས་མི་འདི་འདྲ་བས་ཁེངས་ན། སྤྱི་ཚོགས་ནི་ཅི་འདྲ་ཞིག་ཡིན་ནམ།
       སློབ་གསོ་ལ་ངོས་འཛིན་དེ་འདྲ་ཡོད་པ་ནི་མི་རྣམས་ཀྱི་བསམ་བློ་གཏོང་ཚུལ་འཐུས་ཚང་མ་ཡིན་པའམ། ཡང་ན་བློ་རྒྱ་ཆུང་བའི་བླུན་རྟགས་མངོན་པས་རེད། ངོས་འཛིན་དེ་ནི་ང་ཚོའི་སྲོལ་རྒྱུན་རིག་གནས་ཀྱིས་བསྐྱེད་པའི་མེས་པོ་རྣམས་ཀྱི་བསམ་བློ་གཏོང་ཚུལ་དང་བསྡུར་ན་གནམ་སའི་ཁྱད་པར་འདུག་ལ། དེས་ང་ཚོའི་བསམ་བློ་གཏོང་ཚུལ་ཡར་རྒྱས་སོང་ཡོད་པ་ཕར་ཞོག སྔར་ལས་ཀྱང་ཉམས་རྒུད་ཆེན་པོ་སོང་ཡོད་པ་མཚོན། དེ་བཤད་ན་ངོ་ཚ་དགོས་པ་ཞིག་ཀྱང་རེད། ཡིན་ནའང་། མེས་པོ་ཚོས་རང་ཉིད་ཀྱི་གཏིང་ཟབ་པའི་བསམ་བློ་སྐབས་ཐོག་དེར་དར་ཁྱབ་གཏོང་མ་ཐུབ་ལ། སྤྱི་ཚོགས་ཀྱི་མི་ཕལ་བ་རྣམས་ཀྱི་བསམ་བློ་ཡང་མ་སྨིན་པའི་མཚམས་སུ་གནས་ཡོད། འདི་ནི་མེས་པོ་ཚོས་འགན་མ་འགྲུབ་པའི་ཆ་ཞིག་རེད་ཟེར་ན་མི་ཆོག་པ་མེད་མོད། ཡིན་ནའང་། མི་རྣམས་ཀྱི་བསམ་བློ་དབུལ་ཞིང་མ་སྨིན་པ་ནི། མེས་པོར་ལེ་བདའ་བྱ་རྒྱུ་དང་། ཡང་ན་ང་ཚོས་མེས་པོའི་རིག་གནས་བོར་སོང་བ་གཅིག་པུས་མ་ཡིན་པར། ང་ཚོར་ལེ་ལོ་ཆེ་ཞིང་བསམ་གཞིགས་མི་བྱེད་པའི་གཤིས་ཀ་ངན་པ་ཞིག་ཡོད་པ་དང་འབྲེལ་བ་ཡོད་པ་ཤེས་དགོས་སོ། །
       སློབ་གསོ་ཞེས་པ་མིའི་རིགས་ཀྱི་ཚེ་སྲོག་ལ་མེད་དུ་མི་རུང་བའི་བྱ་དངོས་ཞིག་ཡིན་ལ། དེ་ཚེ་སྲོག་དང་དུས་མཉམ་དུ་བྱུང་ཞིང་། ཚེ་སྲོག་ཡོད་པ་ནས་བཟུང་སློབ་གསོ་ཞེས་པ་ཡོད། ལུས་རྟེན་འཇིག་ནའང་སློབ་གསོ་ལ་འཇིག་པ་མེད། སློབ་གསོ་ཞེས་པ་མཐོང་བ་མངོན་འགྱུར་གྱི་དགེ་རྒན་དང་སློབ་མ། སློབ་དེབ་དང་སློབ་ཁང་། ཡི་གེ་འབྲི་ཀློག ལས་བྱ་འབྲི་བ་དང་རྒྱུགས་སྤྲོད་པ་ཁོ་ནར་གོ་བ་ཙམ་ཞིག་མ་ཡིན་ནོ། ། བྱ་བ་དེ་དག་གིས་བསྐྱེད་པར་བྱ་བའི་བསམ་བློ་དང་། ནང་དོན། དམིགས་ཡུལ་སོགས་དང་འབྲེལ་བ་ཡོད་པར་མ་ཟད། ཆེས་གཏིང་ཟབ་པའི་བསམ་བློ་དང་ཆེས་མངོན་གསལ་གྱི་བྱ་སྤྱོད་སོགས་དང་འབྲེལ་བ་ཡོད་དོ། །མ་གཞི་སློབ་གསོ་ཞེས་པ་ཅི་ཞིག་ཡིན་པར་ངོས་ཟིན་གསལ་པོ་དགོས་ན་མིའི་བསམ་བློ་ནས་གླེང་དགོས། ཅིའི་ཕྱིར་ཞེ་ན། མིག་མཐོང་ལག་ཟིན་གྱི་སློབ་གསོའི་བྱ་སྤྱོད་གང་ཡིན་ཡོད་ཚད་བསམ་བློའི་གཏིང་གི་འདུ་ཤེས་དང་། ལྟ་བ། རྣམ་འགྱུར་བཅས་ཀྱི་འབྲས་བུ་ལས་མ་བྱུང་བ་ཞིག་མེད་དོ། །        བསམ་བློའི་གྲུབ་ཚུལ་ལ་དབྱེ་ན་རིམ་པ་གསུམ་ཡོད་དེ། ཆེས་ནང་རིམ་ལ་འདུ་ཤེས་ཟེར། དེས་བྱ་དངོས་ཅི་ཞིག་ཡིན་པར་ལན་འདེབས་དགོས། ཅི་ཞིག་ཞེས་པས་བསམ་གཞིགས་པའི་འཚོ་གནས་ཀྱི་དགོས་མཁོ་ཐག་གཅད་སྲིད་དོ། །བར་རིམ་ནི་འདུ་ཤེས་ལས་བྱུང་བའི་ཐག་གཅོད་ཡིན་ཞིང་། ཐག་གཅོད་ཅེས་པའི་ཚད་གཞི་རིན་ཐང་གིས་འཇལ་དགོས་ལ། རིན་ཐང་ཞེ་ན། དགོས་མཁོ་ཚིམ་པའམ་ཚིམ་ཉེ་བ། ཡང་ན་གཅིག་མཐུན་ཞིག་ལ་ཟེར་ཞིང་། ཕྱིའི་བྱ་དངོས་ཀྱིས་བསམ་བློ་བའི་དགོས་མཁོ་བསྐོང་ཐུབ་མིན་མངོན་ནོ། །བསམ་བློའི་རིམ་པ་ཕྱི་མ་ནི་ཐག་གཅོད་ལས་བྱུང་བའི་མིག་མཐོང་ལག་ཟིན་གྱི་བྱ་བ་དང་། ཐབས་ཇུས། ཐབས་ཤེས། རྣམ་འགྱུར་སོགས་ཡིན་ནོ། ། རིགས་ལམ་འདི་ནི་ལྟ་སྒོམ་སྤྱོད་གསུམ་གྱི་རིགས་པས་འགྲེལ་ནའང་ཆོག་པ་རེད།
       སྤྱི་ཚོགས་ཤིག་ལ་སློབ་གསོའི་བྱ་བ་དང་། དཔལ་འབྱོར་བྱ་བ། ཁྲིམས་ལུགས་བྱ་བ། ཆབ་སྲིད་བྱ་བ། ཆོས་ལུགས་བྱ་བ། སྒྱུ་རྩལ་བྱ་བ། འཚོ་བའི་བྱ་བ་སོགས་རྣམ་པ་སྣ་ཚོགས་ཤིག་ཡོད། བྱ་བ་དེ་དག་ཚང་མ་ནི་སོ་སོའི་རྒྱབ་ཀྱི་རིན་ཐང་ལས་བྱུང་ཞིང་། རིན་ཐང་ནི་འདུ་ཤེས་དང་ལྟ་བ་ལས་བྱུང་བ་ཡིན། དེའི་ཕྱིར། བསམ་བློའི་ཆེས་གཏིང་མ་ནི་འདུ་ཤེས་ཡིན་ཞིང་། འདུ་ཤེས་གཙོ་བོ་ཡིན་ནོ། །དེས་ན། འདུ་ཤེས་ཇི་ལྟར་བྱུང་བ་རེད་ཅེ་ན། དཔྱད་གཞི་འདི་ལ་ལན་མི་འདྲ་བ་སྣ་ཚོགས་ཡོད་ལ། དེ་ནི་མི་རིགས་སོ་སོའི་བསམ་བློ་ལས་བྱུང་བའི་རིགས་གཞུང་གི་ཟབ་ཚད་དང་འབྲེལ་བ་ཡོད་པར་མ་ཟད། མི་བུ་སྒེར་བ་རེ་རེའི་བློ་སྦྱོང་དང་བསམ་བློའི་གཏིང་ལ་ཟབ་ཚད་ཅི་ཡོད་སོགས་དང་འབྲེལ་བ་ཡོད་དོ། །
       མི་རིགས་སུ་ཞིག་ཡིན་ན་རང་ཉིད་ཀྱི་བསམ་བློ་བསྐྲུན་དུས་སྤྱི་ཚོགས་དངོས་ཀྱི་གནད་དོན་ལ་གཞི་བཅོལ་ནས་ལམ་དུ་འབུད་དགོས་ལ། གོམ་པ་རེ་རེས་ཞིབ་འཇུག་ཇེ་ཟབ་ནས་ཇེ་ཟབ་ཏུ་བཏང་སྟེ། གནད་དོན་གྱི་རྩ་བ་དང་། རྩ་བའི་རྩ་བར་རྩད་ཞིབ་བྱ་བ་རེད། གནད་དོན་ཇི་ལྟར་རྩད་ཞིབ་གསལ་པོ་བྱས་ན། དེ་ལྟར་བསམ་བློ་བཙུགས་པ་ཇེ་གསལ་དུ་འགྲོ་ཞིང་། སྤྱི་ཚོགས་འཚོ་བའི་ནང་གི་སྤྱོད་པ་ཡང་ལུགས་དང་མཐུན་པར་འགྱུར་སྲིད་དོ། །མིའི་རིགས་ཀྱི་ཤེས་རབ་འཕེལ་པའི་བརྒྱུད་རིམ་ནང་། དྲི་བ་དང་པོ་ཞིག་ལ་ངེས་པར་འཕྲད་སྲིད། དྲི་བ་དང་པོ་དེ་ནི་རང་གི་ཚེ་སྲོག་ཅི་ཞིག་རེད་ཅེས་པའི་དྲི་བ་ལས་ཀྱང་རྩ་བའི་རྩ་བ་ཡིན་ཞིང་། དེ་ནི་འཇིན་རྟེན་གྱི་བྱ་དངོས་ཐམས་ཅད་ཇི་ལྟར་བྱུང་བ་རེད། བྱ་དངོས་ཐམས་ཅད་ཀྱི་རྩ་བ་གང་ནས་ཡོད། བྱ་དངོས་ཐམས་ཅད་ཇི་ལྟར་ཕན་ཚུན་མཉམ་ལས་དང་མཉམ་གནས་བྱས་པ་རེད། དཔྱད་གཞི་དེ་རྩ་བར་བཟུང་ནས་མི་རྣམས་ཀྱིས་ལན་མི་འདྲ་བ་སྣ་ཚོགས་བཙལ་ལ། དེ་ལས་མིའི་རིགས་ཀྱི་ཚེ་སྲོག་གི་འཁོར་ལོ་དང་སྤྱི་ཚོགས་མདུན་སྐྱོད་ཀྱི་འདེད་ཤུགས་བྱུང་བ་ཡིན་ནོ། ། དྲི་བ་དང་པོ་རྩད་ཞིབ་བྱས་པ་ལས་ཐོག་མར་བྱུང་བ་ནི་བསམ་བློ་ཡིན་ལ། མི་རིགས་མི་འདྲ་བ་ལ་རྩད་ཞིབ་ཀྱི་ཟབ་ཚད་ཀྱང་མི་འདྲ་རེ་ཡོད། རྩད་ཞིབ་ལས་བྱུང་བའི་ལན་ཡང་མི་འདྲ། དེའི་ཕྱིར། རིག་གནས་མི་འདྲ་བ་བྱུང་བ་རེད། དཔེར་ན། མི་རིགས་ལ་ལའི་དྲི་བ་དང་པོ་མི་ཇི་ལྟར་བྱུང་བ་ཡིན་ནམ་ཞེས་པའི་ཚད་དུ་ལུས་ཡོད། ཡང་མི་རིགས་ལ་ལའི་དྲི་བ་དང་པོ་གནམ་ས་ཇི་ལྟར་གྲུབ་པ་ཡིན་པའི་རྩད་ཞིབ་ཀྱི་ཚད་དུ་ལུས་ཡོད། མི་རིགས་ལ་ལས་དྲི་བ་དང་པོ་སྲོག་ལྡན་ཐམས་ཅད་ཇི་ལྟ་བུ་ཞིག་ཡིན་པར་རྩད་ཞིབ་བྱེད་པའི་ཚད་དུ་ཡོད་དོ། ། དཔྱད་གཞི་ལ་རྩད་ཞིབ་ཇི་ལྟར་ཟབ་ན་དེ་ལྟར་དཔྱད་པའི་འབྲས་བུ་ལྐོག་གྱུར་ཡིན་སྲིད། ལྐོག་གྱུར་གྱི་ཚད་ཇི་ལྟར་ཟབ་ན་མིའི་བསམ་བློའི་ནང་དོན་དེ་ལྟར་ཕུན་སུམ་ཚོགས་པ་ཡིན་ཞིང་། བསམ་བློའི་ཡུལ་དུས་རྒྱ་ཆེ་ཞིང་མཐའ་མེད་པ་ཞིག་ཀྱང་ཡིན་ནོ། །མི་རིགས་ལ་ལས་དྲི་བ་དང་པོའི་རྩད་ཞིབ་ཀྱི་དྲིས་ལན་ནི་འཇིག་རྟེན་གྱི་བྱ་དངོས་ཡོད་ཚད་དང་འབྲེལ་བའི་ལྷ་རེ་ཡང་ཡོད་པར་འདོད་ལ། མི་རིགས་ལ་ལས་དྲི་བ་དང་པོའི་རྩད་ཞིབ་ཀྱི་དྲིས་ལན་ལས་མི་ནི་ལྷ་ཆེན་གང་ཡང་རུང་བ་ཞིག་གིས་བསྐྲུན་པ་ཞིག་ཡིན་པར་འདོད། ཡང་མི་རིགས་ལ་ལས་དྲི་བ་དང་པོའི་རྩད་ཞིབ་ལས་མི་ནི་རང་བྱུང་ཁམས་ཀྱི་རྣམ་རིག་ཅན་གྱི་སྒོང་བ་ཞིག་ལས་བསྐྱེད་པ་ཡིན་པར་འདོད། ཡང་མི་རིགས་ལ་ལས་བྱ་དངོས་ཡོད་དོ་ཅོག་སྟེ། རི་ཆུ་དང་། ནམ་མཁའ། རྒྱུ་སྐར། ཐ་ན་ཚེ་སྲོག་ཚུན་ཆད་ལྷ་ཆེན་པོ་ཞིག་གིས་བསྐྲུན་པ་ཡིན་པར་འདོད། མདོར་ན། ས་ཁུལ་མི་འདྲ་བར་འཚོ་བ་རོལ་པའི་མི་རྣམས་ལ་དྲིས་ལན་མི་གཅིག་པ་སྣ་ཚོགས་ཡོད་མོད། ཡིན་ནའང་། ལོ་རྒྱུས་སུ་དྲིས་ལན་མི་གཅིག་པ་དེ་དག་ཕན་ཚུན་ལ་ཤན་ཤུགས་ཐེབས་ཤིང་མཉམ་འདྲེས་བྱུང་བའི་གནས་ཚུལ་ཡང་ཡོད། དེ་དང་ལྡོག་པའི་གནས་ཚུལ་ཞིག་ནི། དངོས་ཡོད་སྤྱི་ཚོགས་ནང་རྒྱུ་རྐྱེན་གཙོ་བོ་དང་། མི་རིགས་མི་གཅིག་པ། ལས་རིགས་སྣ་ཚོགས་གཉེར་མཁན་དག་ཕན་ཚུན་ལ་མཁོ་བའི་འབྲེལ་འདྲིས་དང་། མཉམ་ལས་ཀྱི་རིན་ཐང་ཚད་གཞི་བཅས་ལ་དྲིས་ལན་མི་འདྲ་བ་དག་གིས་ཤུགས་རྐྱེན་ཐེབས་པར་མ་ཟད། དེས་རྙོག་འཛིང་ཆེ་བའི་སྤྱི་ཚོགས་བསམ་བློ་གྲུབ་པ་རེད།(རིག་གནས་རིན་ཐང་མ་ལག) མི་སུ་ཡིན་ན་དེ་འདྲ་བའི་སྤྱི་ཚོགས་བསམ་བློའི་ཤུགས་རྐྱེན་དང་སློབ་གསོ་ལས་རང་ཉིད་ལ་དབང་བའི་བསམ་བློའི་འཇིག་རྟེན་གྲུབ་པ་རེད། དེ་ལ་མི་བུ་སྒེར་གྱི་བསམ་བློ་ཞེས་ན་ཡང་ཆོག་པ་རེད། བསམ་བློ་སྨིན་པའི་ཚད་དང་སྐད་ཆའི་དག་ཆའི་ཚད་གཉིས་ལ་འབྲེལ་བ་ཡོད། གལ་སྲིད་སྐད་ཆས་བརྗོད་བྱ་ཟབ་མོའི་དོན་གསལ་པོ་སྟོན་མི་ཐུབ་དང་། ཡང་དག་པའི་སྒྲིག་གཞི་ཞིག་འཆར་འགོད་བྱ་མི་ཐུབ་ཞིང་། དོན་སྙིང་མི་གཅིག་པའི་ཆོས་ཕན་ཚུན་བར་གྱི་འབྲེལ་བ་གསལ་ཐག་ཆོད་པར་སྟོན་མི་ནུས་ན། བསམ་བློ་གཟབ་ནན་ཡིན་མི་སྲིད་དོ། །
       མིའི་རིགས་བྱུང་ནས་དེང་གི་བར། མི་རིགས་སོ་སོས་ཕན་ཚུན་གྱི་དྲིས་ལན་ཅི་ཞིག་ཡིན་པར་རྒྱུས་ལོན་ཅུང་ཟད་ཡོད་ལ། དྲིས་ལན་དེ་དག་ལ་བརྟེན་ནས་ང་ཚོས་བསམ་བློའི་རྨང་གཞི་དང་གསར་བསྐྲུན་བྱས་པའི་སྤྱི་ཚོགས་ལ་རིགས་ཅི་ཡོད་རྟོགས་ཐུབ་པ་རེད། དེའི་ཕྱིར། ང་ཚོས་རང་མི་རིགས་ཚུད་པའི་རིགས་སོ་སོའི་བསམ་བློའི་འབྱུང་ཁུངས་ལ་ཞིབ་འཇུག་བྱ་དགོས་པར་མ་ཟད། དྲི་བ་དང་དྲིས་ལན་མི་འདྲ་བ་སྣ་ཚོགས་ལ་དབྱེ་ཞིབ་དང་། བསྡུར་པ། རང་ལ་ཕྱིར་རྟོག་བཅས་བྱ་དགོས་ལ། དེའི་དམིགས་ཡུལ་ནི་རང་གི་མེས་པོའི་དྲིས་ལན་དང་པོའི་རྨང་གཞིའི་སྟེང་ཕྱི་རབས་པ་ཚོའི་མི་ཚེ་མུ་མཐུད་དུ་བདེ་སྐྱིད་ཡོང་བར་བདེན་བརྩེ་མཛེས་གསུམ་དང་། རྫུན་ངན་བཙོག་གསུམ་སོགས་རིག་གནས་ཀྱི་རིན་ཐང་མ་ལག་དང་མཐུན་ཞིང་། རང་བྱུང་ཁམས་དང་། ཚེ་སྲོག མིའི་གནད་དོན་སོགས་དང་འཕྲོད་པའི་དྲིས་ལན་གསར་པ་ཞིག་འཚོལ་དགོས་པ་ཡིན་ནོ། །
       སློབ་གསོ་ཞེས་པ་ཅི་ཞིག་ཡིན་པ་རྩད་འདྲི་བྱ་དུས། རང་ལ་མེས་པོའི་དྲི་བ་དང་པོའི་དྲིས་ལན་གྱིས་ཤུགས་རྐྱེན་ཐེབས་ཡོད་ལ། ཁྱིམ་མཚེས་རིག་གནས་ཀྱིས་ཀྱང་ང་ཚོར་ཤུགས་རྐྱེན་ཆེན་པོ་ཐེབས་ཡོད། ཡིན་ནའང་། ཤུགས་རྐྱེན་དེ་དག་གཟབ་ནན་དང་མ་ལག་ལྡན་པའི་བསམ་བློའི་རྣམ་པར་གྲུབ་ཐུབ་པ་ཕར་ཞོག ཐ་ན་དོན་དག་མང་པོ་ཞིག་གཟབ་ནན་གྱི་ཐ་སྙད་ཀྱིས་ཚད་ལྡན་དུ་བཏང་མེད་ལ། ཚད་ངེས་ཅན་ཞིག་གི་སྟེང་ནས་མི་རྣམས་ད་རུང་འདོད་སྲེད་ཚིམ་མིན་དང་བསམ་ཚུལ་ལ་འགྲེལ་བཤད་ཙམ་དང་། ལྷག་པར་དུ་ཚེ་སྲོག་གི་སྐྱེ་འཆི་ཞེས་པ་ཅི་ཞིག་ཡིན་པ་ཞེས་པའི་ཚད་ན་ལུས་ཡོད། ཁྱིམ་མཚེས་གཞན་པ་དེས་དྲི་བ་དང་པོ་འདྲི་ཙམ་ཡང་ཐུབ་མེད་ལ། དཔྱད་གཞི་བཞག་པ་ཡོད་ཚད་ལུས་ཀྱི་ཁེ་ཕན་གྱི་ཚད་ཙམ་ན་ལུས་ཡོད། དེའི་ཕྱིར། བསམ་བློའི་ཤེས་རབ་ལ་ཇི་ལྟར་མི་ཞིག་བྱ་བའི་སྤྱོད་པའི་བསླབ་བྱ་རྐྱང་རྐྱང་ལས་གཞན་ཅི་ཡང་མེད་ལ། སྤྱོད་པའི་བསླབ་བྱ་དེ་དག་སྤྱི་ཚོགས་ཡོངས་ལ་ཁྱབ་པའི་ཁྲིམས་ལུགས་ཀྱི་རིམ་པ་ལ་དེ་ལས་ཀྱང་འཕར་ཐུབ་མེད། རིག་གནས་དེ་ནི་རྒྱལ་པོ་བརྩི་ཞིང་རྒན་རབས་བཀུར་བ་སོགས་སྤྱི་ཚོགས་སྒྲིག་གཞི་ཙམ་གྱི་ཚད་དུ་ལུས་ཡོད། དེས་ན་སྤྱི་ཚོགས་དེ་ནི་གྲལ་རིམ་གྱི་ཚད་དུ་གནས་པ་ལས། མི་ཚང་མས་ཤེས་དགོས་ལ་བརྩི་ངེས་པའི་འདྲ་མཉམ་དང་། རང་དབང་། དམངས་གཙོ་སོགས་སྤྱི་ཚོགས་རིང་ལུགས་ཀྱི་རྩ་བའི་རིན་ཐང་རྩ་བར་བཞག་སྟེ་བཙུགས་པའི་སྤྱི་ཚོགས་ཕྱོགས་སུ་འགྱུར་ཐུབ་མེད། དེའི་འབྲས་བུ་ནི། ཐུན་མོང་ཞེས་པ་མི་སྒེར་བ་རེ་རེའི་འཚོ་གནས་ཀྱི་གཞི་འཛིན་སར་གྱུར་པ་ལས། དོན་དམ་པའི་མི་བུ་སྒེར་བ་དང་། མིའི་རྩིས་ཐང་། སྤྱི་ཚོགས་ཀྱི་ཐོབ་ཐང་དང་གོ་བབ་ཟེར་བ་ཞིག་མེད་དོ། །ཞིབ་འདང་བརྒྱབ་ན་མི་དེ་འདྲས་གྲུབ་པའི་སྤྱི་ཚོགས་ང་ཚོའི་སེམས་ནང་གི་མི་ཐམས་ཅད་འདྲ་མཉམ་དང་ཁོར་ཡུག་ཞི་བདེ་ཡིན་པའི་ཤམ་བྷ་ལའི་སྤྱི་ཚོགས་སུ་ནམ་ཞིག་ལ་བསླེབ་སྲིད་དམ།
       ང་ཚོས་ཁས་མི་ལེན་རང་ལེན་ཞིག་ལ་ང་ཚོའི་སྲོལ་རྒྱུན་རིག་གནས་ནང་བདག་ཅེས་པ་བསམ་བློ་ཁོ་ནའི་འདུ་ཤེས་ཀྱི་ཚད་ཙམ་ཡིན། ཡང་ན་རང་གི་བསམ་བློར་དབྱེ་ཞིབ་དང་། ཐག་གཅོད་པ། ད་རུང་མུ་མཐུད་དུ་རང་ལ་འགྱུར་པ་གཏོང་བར་མཐའ་དཔྱོད་བྱེད་འཆར་ཡོད་པའི་འདུན་པ་དྲག་པོ་ཡོད། ཡིན་ནའང་། ང་ཚོས་བསམ་བློར་ངོས་འཛིན་བྱས་པ་ཡང་གཏིང་ཟབ་མོ་ཞིག་ལ་འགྲོ་ཐུབ་མེད་པར་ད་དུང་བསམ་བློའི་སྣང་ཚུལ་ངོས་འཛིན་ཙམ་གྱི་ཚད་དུ་ལུས་ཡོད་དོ། ། ང་ཚོས་བསམ་གཞིགས་རང་ཉིད་ལ་ཁ་གཏད་དུས། སེམས་ཀྱི་ཆེས་ཟབ་ས་རུ་གནས་པའི་འདང་བརྩེ་དང་། སེམས་བྱུང་། རེ་འདུན། འདུ་ཤེས་སོགས་ལ་མཚན་ཉིད(སྐད་ཆས་བརྗོད་བྱ་གང་དེ་གསལ་པོ་ཞིག་སྟོན་དགོས།)བཞག་སྟེ་རིགས་བརྒལ་ཐུབ་མེད་ལ། རིགས་གསལ་པོ་བརྒལ་མ་ཐུབ་ན། ང་ཚོས་གཏན་ཚིགས་ཀྱི་སྒོ་ནས་དབྱེ་ཞིབ་བྱ་མི་ཐུབ། དཔེར་ན། སྐད་ཆས་མི་ཞེས་པ་ཅི་ཞིག་ཡིན་པ་ཇི་ལྟར་གསལ་ཐག་ཆོད་པ་སྟོན་ཐུབ། དེ་མཚུངས་རང་བྱུང་དང་། ཚེ་སྲོག བརྩེ་བ། ཞི་བདེ། འདྲ་མཉམ། འདང་བརྩེ། ངན་པ། འཆི་བ། གསོན་པ། འདུན་པ། རང་དབང་སོགས་ཀྱང་ཇི་ལྟར་སྐད་ཆ་གསལ་ཐག་ཆོག་པ་ཞིག་གིས་སྟོན་རྒྱུ་ལྟ་བུ་རེད། གོང་གི་བརྗོད་བྱ་དེ་དག་གསལ་ཐག་ཆོག་པ་བཤད་པའི་ཚད་དམའ་ན་སྤྱི་ཚོགས་གང་དེའི་མི་རྣམས་རྨོངས་དད་ཆེ་ཞིང་བྲན་གཤིས་ཅན་ཞིག་ཏུ་འགྱུར་སྲིད། སྤྱིར་ན། བསམ་བློར་རང་སྐྱ་ཐུབ་པ་ཞིག་ཆགས་རྒྱུ་མི་ཉུང་ཤས་ཤིག་ལ་མ་གཏོགས་ཡོང་མི་ཐུབ་ཅིང་། མི་ཉུང་ཤས་དེས་ཀྱང་རང་གིས་མྱོང་བ་སྐད་ཆ་གསལ་ཐག་ཆོག་པ་ཞིག་གིས་གཞན་པར་བརྡ་སྟོན་མི་ཐུབ་པའི་དཀའ་ངལ་བྱུང་ན། དེས་རིག་གནས་ནི་ལྐོག་གྱུར་རང་ལུགས་པ་ཞིག་ཡིན་པའི་བག་ཆགས་འཇོག་སྲིད། ཡིན་ནའང་། མི་ཉུང་ཤས་དེ་ཚོར་མི་ཕལ་བས་གོ་དཀའ་བའི་ཆོས་རྟོགས་པའི་ཆ་རྐྱེན་འཛོམས་རྗེས། རང་ཉིད་གཞན་ལས་ཐུན་མོང་མ་ཡིན་པ་ཞིག་ཏུ་འདོད་དེ། མི་ཉུང་ཤས་དེ་ཚོས་མི་ཕལ་བ་དག་སྟངས་འཛིན་བྱེད་ལ། མཐར་མི་ཉུང་ཤས་ཀྱི་ཁ་ཡི་འདྲ་མཉམ་ཞེས་པ་ཡང་མི་གཞན་པ་སྟངས་འཛིན་གནང་བྱེད་ཀྱི་གཏམ་རྫུན་འབའ་ཞིག་ཏུ་གྱུར་པ་རེད། དེ་ལྟར་ནའང་། བརྗོད་བྱ་ཟབ་མོ་རྟོགས་པའི་མི་ཉུང་ཤས་དེ་དག་ནང་། མི་བཟང་པོ་སྐོར་ཞིག་མེད་པ་ཡང་མིན། ཡིན་ནའང་། མི་ཉུང་ཤས་དག་གི་རྟོགས་པ་ཧ་ཅང་མཐོན་པོ་མིན་པས་ངེས་པར་དུ་བརྗོད་བྱ་གསར་པ་མང་པོ་མུ་མཐུད་དུ་རང་གི་བསམ་བློའི་ནང་དུ་འཇུག་དགོས། སྐད་ཡིག་གི་ཆ་ནས་བཤད་ན། དོན་སྤྱི་མང་པོ་ཞིག་གིས་བསམ་བློའི་ནང་དོན་གཏིང་ཟབ་མོ་སྟོན་ཐུབ། དེའི་ཕྱིར། དྲི་བ་དང་པོའི་ནང་གི་ཆེས་གཏིང་ཟབ་པའི་བརྗོད་བྱར་རྩད་ཞིབ་བྱ་དགོས་སོ། །        སློབ་གསོ་ཞེས་པ་མིའི་བསམ་བློ་ཡིན་ཞིང་། དེ་རིམ་པ་གསུམ་གྱིས་གྲུབ་ཡོད། གལ་སྲིད་སློབ་གསོ་ཞེས་པ་ཅི་ཞིག་ཡིན་པར་རྩད་ཞིབ་མེད་ན། སློབ་གསོའི་བྱ་བ་ཇི་ལྟར་ཐག་གཅོད་ལ་ཚད་གཞི་མེད་འགྲོ། དེ་མ་ཡོད་ན་གཞན་གྱི་རྗེས་སུ་འགྲོ་བ་ལས། རང་ལ་བསམ་བློ་ཡོད་མི་སྲིད། སློབ་གསོ་ཞེས་པ་ཅི་ཞིག་ཡིན་པའི་ལན་གསལ་པོ་མ་ཡོད་ན། སློབ་གསོའི་བྱ་བ་སྒྲུབ་དུས་དཔྱད་པ་གཏོང་མི་ཤེས་པར་གཞན་གྱིས་ཅི་བཤད་ཀྱི་རྗེས་སུ་འགྲོ་བ་ལས་ཐབས་མེད་ལ། དེའི་འབྲས་བུ་ནི་སློབ་གསོ་གཞན་གྱི་ལག་ཆ་རུ་འགྱུར་བ་དང་། མི་ཡང་ལག་ཆའི་ཡུལ་དུ་གྱུར་ན། མི་ལ་འཚོ་གནས་ཀྱི་སྙིང་པོ་བྲལ་སོང་བ་རེད།
       སློབ་གསོ་ཞེས་པ་ཅི་ཞིག་ཡིན་པའི་ལན་ཇི་ལྟར་འདེབས། སློབ་གསོ་ཇི་ལྟར་བྱ། ཅི་ཞིག་ཁྲིད། ཅི་ཞིག་སློབ། ཇི་ལྟར་ཁྲིད། ཇི་ལྟར་སློབ། དཔྱད་གཞི་དེ་དག་ནི་མིའི་འཕེལ་རྒྱས་ཀྱི་གནད་དོན་རེད་ལ། སློབ་གསོའི་བྱ་བའི་ཁ་ཕྱོགས་དང་དྲི་བ་དང་པོ་སྐུལ་བྱེད་ཀྱི་དངོས་རྒྱུ་ཡིན་པར་མ་ཟད། སྤྱི་ཚོགས་འཕེལ་རྒྱས་ཀྱི་རྩ་བ་ཡང་ཡིན། ལོ་རྒྱུས་ཀྱི་ཆ་ནས་བཤད་ན། གནའ་བོའི་གྷི་རིག་སྐབས་ཀྱི་པི་ལེ་ཐོས་ཕུགས་བསམ་རྒྱལ་ཁབ་བསྐྲུན་ཏེ་མིའི་རྣམ་ཤེས་རང་སྐྱ་ཐུབ་པ་གཙོ་བོ་བཟུང་བ་ནས། དེའི་རྗེས་ཨ་རི་སེ་ཁྲོའོ་ཁྲལ་ལ་ཐུག་དུས་མི་བུ་སྒེར་གྱི་རྣམ་ཤེས་གཙོ་བོར་འཛིན་པའི་ཚད་དུ་སླེབས། དུས་རབས་བར་མའི་སྐབས་ཆོས་ལུགས་སློབ་གསོ་དང་། རིག་རྩལ་བསྐྱར་དར་ནས་དེང་རབས་སློབ་གསོའི་རིམ་པ་བརྒྱུད་པའི་དུས་རབས་སོ་སོའི་རིང་། སློབ་གསོ་ཞེས་པ་ཅི་ཞིག་ཡིན་པའི་དྲིས་ལན་ལོ་རྒྱུས་ཀྱི་བརྒྱུད་རིམ་ནང་མུ་མཐུད་འཐུས་ཚང་དང་ཕུན་སུམ་ཚོགས་པར་གཏོང་བའི་གོ་རིམ་ཞིག་བརྒྱུད་ཡོད་དོ། །སློབ་གསོ་འཕེལ་རྒྱུས་ཀྱི་བརྒྱུད་རིམ་གྱིས་འཛམ་གླིང་གི་རྒྱལ་ཁབ་སོ་སོའི་དཔལ་ཡོན་གྱི་འཕེལ་རིམ་ཐག་བཅད་ཡོད་ལ། མི་རིགས་དང་རྒྱལ་ཁབ་ཀྱི་མི་རེ་རེའི་བདེ་སྐྱིད་ཀྱི་གོ་རིམ་ནི་སློབ་གསོ་འཕེལ་རྒྱས་ཀྱི་འབྲས་བུ་ཡིན། ཀྲུང་གོའི་དེང་རབས་སློབ་གྲྭ་བཙུགས་ནས་ལོ་ངོ་བརྒྱ་ལྷག་ཡིན་ནའང་། ཚེ་སྲོག་གི་དྲི་བ་དང་པོ་ལ་རྩད་ཞིབ་མ་བྱས་པས། སློབ་གསོ་ཅི་ཞིག་ཡིན་པའི་དཔྱོད་ཤེས་ཀྱི་བློ་ཟབ་མོ་མིན། དེའི་ཕྱིར། ང་ཚོས་ཀྱང་སློབ་གསོ་མི་བུ་སྒེར་དང་སྤྱི་ཚོགས་ཡོངས་ཀྱི་དཔལ་ཡོན་དང་འབྲེལ་བ་ཡོད་པར་རིགས་པས་མ་དཔྱད་ན། ང་ཚོ་སློབ་གསོའི་ལས་ཀ་བ་ཚད་ལྡན་ཞིག་ཏུ་འགྱུར་མི་སྲིད་དོ། །
       དགེ་རྒན་བསོད་རྡོ་ལགས་ཀྱི་དེབ་འདིས་ཀློག་མཁན་ཚོ་ལ་སློབ་གསོར་ཇི་ལྟར་དཔྱད་པ་གཏོང་བ་དང་། སློབ་གསོ་ལག་ལེན་བྱེད་དུས་ང་ཚོས་རང་གི་བསམ་བློའི་གནད་དོན་ལ་ཇི་ལྟར་འཚོལ་ཞིབ་བྱ་བ། རང་ཅག་མ་འོངས་འཕེལ་རྒྱས་ཀྱི་ལམ་དུ་གནད་དོན་གང་ཞིག་ལ་འཕྲད་སྲིད་པ་སོགས་ཀྱི་ཐད་དཔྱད་གཞི་ཡག་པོ་ཞིག་གནང་ཡོད། དེའི་ཕྱིར། ངས་སྤུན་ཟླ་ཚོ་ལ་སློབ་གསོའི་ལག་ལེན་ཀྱི་ཉམས་མྱོང་ཕུན་སུམ་ཚོགས་པ་འདུས་པའི་དེབ་འདི་ཞིབ་མོ་ཞིག་ཀློག་པར་རེ་སྐུལ་ཞུས་པ་ཡིན། དེབ་འདི་ཀློག་པ་ལ་བརྟེན་ནས། ང་ཚོའི་དེ་རིང་གི་སློབ་གསོ་ལ་གནད་དོན་ཅི་ཞིག་ཡོད་པ། འུ་ཅག་གི་མ་འོངས་པའི་མི་བུ་སྒེར་བ་རེ་རེ་དང་། སྤྱི་ཚོགས་ཀྱི་དཔལ་ཡོན་ཅི་འདྲ་ཞིག་ཡིན་དགོས་པ། སློབ་གསོ་ཅི་ལྟ་བུ་ཞིག་བསྒྲུབ་དགོས་པ་སོགས་ལ་ཕྱིར་རྟོག་ཐུབ་དགོས་སོ། །