མཚོ་ལྷོ་ཁུལ་མི་རིགས་མཐོ་འབྲིང་གསུམ་པའི་དཔེ་ཆ་འདོར་བ་ནི་ཤེས་ཡོན་འདོར་བ་ཡིན་ཞེས་པའི་གར་ཆུང་།

དཔེ་ཆ་འདོར་བ་ནི་ཤེས་ཡོན་འདོར་བ་ཡིན།

                             2016ལོའི་འཛམ་གླིང་དཔེ་ཀློག་ཉིན་མོའི་དཔེ་ཀློག་ནི་འཚོ་བ་ཡིན་ཞེས་པའི་བྱ་འགུལ་གྱི་བརྗོད་སྙིང་གར་ཆུང་།

འཁྲབ་ཚིག  ཨོ་རྒྱན་ཚེ་རིང་།

སློབ་གྲྭ མཚོ་ལྷོ་ཁུལ་མི་རིགས་མཐོ་འབྲིང་གསུམ་པ།
འཁྲབ་མཁན། དབང་ལྷ། སྙིང་དཀར་འབུམ། ཚེ་རིང་རྡོ་རྗེ།
བར་བཅུག་གསལ་བཤད་པ། ཕྱུག་སྐྱོང་ཐར།
མི་སྣ་གཙོ་བོ།
     དགེ་རྒན་ཚེ་ལོ། སློབ་གྲོགས་དོན་གྲུབ་དང་བཀྲ་ཤིས་གཉིས་ཀྱི་དགེ་རྒན།
     སློབ་གྲོགས་བཀྲ་ཤིས། དོན་གྲུབ་ཀྱི་གྲོགས་པོ། དགེ་རྒན་ཚེ་ལོའི་སློབ་མ།
     སློབ་གྲོགས་དོན་གྲུབ། བཀྲ་ཤིས་ཀྱི་སློབ་གྲོགས། དགེ་རྒན་ཚེ་ལོའི་སློབ་མ།

སློབ་གྲོགས་བཀྲ་ཤིས།  (མགོ་བོ་ཡར་དགྱེ་སྟེ་འགྲུལ་སྒམ་དྲུད་ནས་འགྲོ་ཞོར། དང་པོ་ཁྱེད་རང་ང་ཡིས་མཐོང་དུས། ངའི་སེམས་པ་དེ་་་་་་་་ཞེས་དེང་གཞས་ཤིག་བླངས་ནས་ཡོང) ཡ་་་སློབ་གྲོགས་དོན་གྲུབ། ཁྱོད་བདེ་མོ།

སློབ་གྲོགས་དོན་གྲུབ། (སྤྲོ་སྣང་གིས་ཡོངས་སུ་ཁེངས་པའི་ངང)འོ། བདེ་མོ་བདེ་མོ། སློབ་གྲོགས་བཀྲ་ཤིས་ཁྱོད་བདེ་མོ་ཡིན་ན།
སློབ་གྲོགས་བཀྲ་ཤིས། (མགོ་བོ་དགྱེ་དགྱེ་ངང)ང་ད་མི་བདེ་རྒྱུ་ཞིག་ཡོད་དམ། དགུན་གནང་ཧྲིལ་བོར་བདེ་མོ་སྐྱིད་པོ་བྱས་ནས་བསྡད་པ་ཡིན། ཨ་ཨ་ཨ། དགུན་གནང་ཡིན་ན་འདི་ངོ་མས་ཅིག་སྐྱིད་ཀི
སློབ་གྲོགས་དོན་གྲུབ། ཡ། དེ་ན་ཁྱོས་རང་གི་བདེ་མོ་སྐྱིད་པོ་ཡིན་པའི་དགུན་གནང་གི་འཚོ་བ་ང་ཅིག་ཤོད་དང་།
སློབ་གྲོགས་བཀྲ་ཤིས། འོ། ཡུམ་ད་ངེས་ངེས་ཅིག་གསོ་ནིར་ཡ། རང་གི་བཟང་ས་རྒྱན་ས་མང་བོར་འགྲོགས་ཏེ་ཡང་མིན་ན་དྲ་ཁང་དུ་རོལ་རྩེད་རྩེ་རུ་སོང་། ཡང་མིན་ན་ཝུ་ཆང་འཐུང་ནས་བསྡད་པ་ཡིན། ཨ་ཨ། ཅིག་གསོ་དང་ནོ་ད།
སློབ་གྲོགས་དོན་གྲུབ། (ཤིན་ཏུ་ཧ་ལས་པར་གྱུར་ཏེ)བཀྲ་ཤིས། བཀྲ་ཤིས། ཁྱོད་འདིར་ངོ་མ་གོ་བ་ཞིག་མེད་དམ། དགེ་རྒན་གྱིས་དེ་འདྲའི་ལས་གཏན་ནས་བྱེད་མི་རུང་ཟེར་བ་མིན་ནམ།
སློབ་གྲོགས་བཀྲ་ཤིས། ཨ་རོ། མྱི་ཚེ་ཐུང་ཐུང་ཡིན་པས་སྐྱིད་རྒྱག་ན་རྒྱག་རན་ཡིན་ནི་རེད། ཡ་ཁྱོས་ཅི་བྱས་པ་ཡིན།
སློབ་གྲོགས་དོན་གྲུབ། འོ། ངས་ལས་བྱ་བྲིས་ཚར་རྗེས་ལྟ་ཀློག་དཔེ་ཆར་བལྟས་པ་ཡིན།
སློབ་གྲོགས་བཀྲ་ཤིས། ཧེ་་་། ཁྱོད་འདི་ད། གནའ་དེང་མ་མྱི་ཚེ་གཏོང་ཟད་དུ་གཏང་ན་གེ་སར་རྒྱལ་བོའི་སྒྲུང་ལ་ལྟོས་ཟེར་བ་རེད། དུས་དེང་སང་ཡང་མྱི་ཚེ་སྟོང་ཟད་དུ་གཏང་འདོད་ན་དཔེ་ཆར་བལྟས་ཆོག་པ་མིན་ནམ། དེའི་རྐྱེན་གྱིས་དཔེ་ཆར་བལྟས་ན་རང་གི་མྱི་ཚེ་སྟོང་ཟད་དུ་བཏང་ནི་རེད། ད་ཁྱོས་ཀྱང་འདང་ཞིག་རྒྱོབས་དང་།  ཐོབ་བྱ་གཅིག་ཀྱང་མེད་ལ། ཡོད་ན་ཤོད་དང་། ཁྱོད་ལ་སྒོར་མོ་གཅིག་གི་ཐོབ་བྱའང་མེད་ལ།
སློབ་གྲོགས་དོན་གྲུབ། ཨ་ཙི། སློབ་གྲོགས་བཀྲ་ཤིས། ཁྱོད་འདིས་ཅི་ཟེར། དཔེ་ཆར་བལྟས་ཏེ་རང་གི་རྒྱུད་ལ་ཡོན་ཏན་འབྱོར་སོང་ན་རང་ལ་རྟག་བརྟན་གྱི་རྒྱུ་ནོར་ཡོད་སོང་བ་མིན་ནམ།
སློབ་གྲོགས་བཀྲ་ཤིས། ད་དེ་མོ་དེ་བཤད་ནས་ཅི་བྱ། ཡང་གཅིག་བཤད་ན་ཁྱོས་ཕ་མའི་སྒོར་མོ་རང་ང་རང་ང་དཔེ་ཆོག་གཟིག་གི་ཐོག་ལ་བསྟིམས་རག་ཁར་རང་གིས་རང་ལ་གོན་རྒྱུ流行རེ་གཟོ་ཉོས་ན་མི་ཧྲ་ནིར།
སློབ་གྲོགས་དོན་གྲུབ། སློབ་གྲོགས་བཀྲ་ཤིས། གོན་རྒྱུ་གཟིག་གིས་མྱིའི་རིན་ཐང་མངོན་ཐུབ་ནི་མ་རེད་ཡ། ཡོན་ཏན་ཡོད་ན་ད་གཟོད་རང་གི་རིན་ཐང་མངོན་ཐུབ་ནི་རེད།
སློབ་གྲོགས་བཀྲ་ཤིས། ད་གང་ལྟར་བརྒྱ་བཤད་ན་སྟོང་བཤད་ན་ཁྱོའི་མགོ་འཐོམས་འདུག  དེ་འདྲ་བྱེད་རག་ཁར་གོན་རྒྱུ་ཡག་པོ་རེ་གོན་ནས个性ཙ་ཡ་གཟིག་བསྟན་ན་ད་སློབ་གྲྭའི་ནང་ན་ཁྱོད་ལ表白བྱེད་པའི་བུ་མོ་མང་ནི་རེད། དེ་དུས་ད་རང་གིས约会ཏག་ཏག་བྱས་བསྡད་ན་ཆོག་ནི་རེད།
སློབ་གྲོགས་དོན་གྲུབ། སློབ་གྲོགས་བཀྲ་ཤིས། ངས་བལྟས་ན་ཁྱོད་ད་དངོས་ནས་མགོ་འཐོམས་འདུག དེང་སང་ཡོན་ཏན་མེད་ན་མ་འོངས་པའི་སྤྱི་ཚོགས་ཐོག་འཚོ་གནས་ཀྱང་བྱེད་དཀའ་ཞེས་ཆེད་ལས་མཁས་པ་ཚོས་བཤད་གི་ཡོད་ལ།
སློབ་གྲོགས་བཀྲ་ཤིས། འོ། ཆེད་ལས་མཁས་པ་རྡོག་གོ་ཁ་ཁོམ་སོང་ན་ཆི་མི་བཤད་གི་ནེ། གང་ལྟར། རང་ཉིད་སྐྱིད་དང་ན་ཆོག
སློབ་གྲོགས་དོན་གྲུབ། ཁྱོད་ལ་ཤེས་ཡོན་མེད་ན་སྐྱིད་ཀྱང་རྒྱག་ཐུབ་རྒྱུ་མ་རེད། ཁྱོད་ད་སྐབས་སྐྱིད་ནོ་འདི་ཁྱོའི་ཕ་མ་གཉིས་ཀའི་དྲིན་ཡིན་ནི་རེད། ཡིན་ཡང་ཁྱོའི་ཕ་མ་ལྷ་ཚེ་རིང་ཡིན་ནི་མ་རེད་ཨ་རོ། ཡང་གཅིག་བཤད་ན། ཁ་དཔེ་ལ། སྔ་དྲོ་འདུག་མང་ན། ཕྱི་དྲོ་འདུར་མི་ཆད་ཟེར་ནི་ཡིན་ན།
སློབ་གྲོགས་བཀྲ་ཤིས། (ཁོང་ཁྲོ་སྐྱེས་ཞོར)ཨ་ཕ་ལེ་ལེ། ད་ཁྱོས་ང་སློབ་གསོ་བཏང་ཁུལ་མ་བྱེད། ང་རང་ཉིད་ཕ་མའི་ཁ་ལ་མ་སོང་། སྐྱ་མོའི་ལམ་ལ་མ་ཞུགས་པར་བསྡད་ཡོད་པས་ཁྱོད་འདྲ་མ་གཟིག་གིས་ཁ་ལ་བྱེད་དགོས་དོན་ཡང་མེད།
སློབ་གྲོགས་དོན་གྲུབ། ཡ་ཡ་ཡ། འུ་གཉིས་ཀས་རྩོད་པ་མཚམས་འཇོག་རྒྱུ་བྱེད། འོ་་། ཁྱོས་དགུན་གནང་གི་ལས་བྱ་ཡོངས་འགྲུབ་བྱས་ཨེ་ཡོད།
སློབ་གྲོགས་བཀྲ་ཤིས། ཧེ་་་་། ལས་བྱའི་རོ་ཕར་ཞོགས་དང་། རང་ག་སྐྱིད་པོ་བདེ་མོ་བྱས་ནས་བསྡད་དང་ན། ད་དགུན་གནང་གི་འཚོ་བ་རོལ་དང་ནུར།
སློབ་གྲོགས་དོན་གྲུབ། འོ། ཡིན་ན་ཁྱོས་ལྟ་ཀློག་དཔེ་ཆར་ཨེ་བལྟས།
སློབ་གྲོགས་བཀྲ་ཤིས། (ཅུང་མི་འཐད་པའི་རྣམ་འགྱུར་གྱིས)དཔེ་ཆ་གཟོ་བལྟས། ང་ཁོམ་སོང་ནི་མ་རེད་དམ། སྐྱིད་ལ་རོལ་དང་ན་ད་ཆོག་ནི་རེད།
སློབ་གྲོགས་དོན་གྲུབ། སློབ་གྲོགས་བཀྲ་ཤིས། དགེ་རྒན་ཚེ་ལོས་ད་སྐབས་འུ་ཚོས་སྡུག་མྱངས་ན་གཞུག་ཕྱོགས་བདེ་སྐྱིད་ལྡན་ཟེར་བ་མིན་ནམ། ཁྱོས་ད་སྐབས་སྐྱིད་བརྒྱབ་པས་གཞུག་ཕྱོགས་སྐྱིད་ཅིག་ཡོད་དམ།
སློབ་གྲོགས་བཀྲ་ཤིས། ཧེ་་་་། དགེ་རྒན་ཚེ་ལོའི་རོ་ཕར་ཞོགས། ཁོ་ཁོམ་སོང་ན་ཁྱི་ཁ་གཟའ་ཁ་ཅི་འདྲ་མི་གླ་གི་ནེ། སློབ་མ་ཚོར་རྒྱུན་དུ་སྤྱང་སྟུག脸盘འདྲ་བོ་འཕང་ངེ་བསྡད་ན་ད་ཁོ་སྐྱིད་ནི་རེད།
སློབ་གྲོགས་དོན་གྲུབ། སློབ་གྲོགས་བཀྲ་ཤིས། ཁྱོས་དགེ་རྒན་ལ་དེ་ལྟར་བཤད་སྲོལ་ཡོད་དམ།
སློབ་གྲོགས་བཀྲ་ཤིས། ཨ་ལ་མིན་ནམ། ཁོ་དགེ་རྒན་ཞིག་ཡིན་པས་ད་ཅི་ཞིག་བྱས་ཀྱང་ཆོག་ནི་རེད། རྒྱུན་དུ་གནས་ལུགས་རྡོག་གོ་བཤད་ནས་གཟེ། ཁོའི་ཁ་མི་ན་ཡང་ངའི་རྣ་ན་གིན་འདུག
སློབ་གྲོགས་དོན་གྲུབ། སློབ་གྲོགས་བཀྲ་ཤིས། སྐད་ཆ་འདི་འདྲ་ཞིག་ཁྱོད་ཀྱི་སེམས་ལ་དྲན་ཕོད་ཀྱང་ཁ་ནས་བཤད་ཐུབ་བམ།
སློབ་གྲོགས་བཀྲ་ཤིས། (ཅུང་མི་འཐད་པའི་ཉམས་ཀྱིས་ཁ་ཕར་འཁོར་ནས) ད་གང་ལྟར་སྐྱིད་རྒྱག་དགོས་ནི་རེད། འཇིག་རྟེན་གྱི་ཁ་དཔེར་ཡང་། སྐྱིད་པོ་རང་གིས་མ་བཅོས་ན་སྐྱིད་པོ་རང་དགར་མི་ཡོང་ཟེར་བ་མིན་ནམ། (སྐད་མགོ་མཐོན་པོའི་ངང)འོ་ལེ། དེ་ལྟར་ད་ངས་སྐྱིད་བརྒྱབ་ནི་ཡིན་ཡ། ད་ཁྱོད་ཀྱིས་ཧ་གོའམ།
སློབ་གྲོགས་དོན་གྲུབ། (སློབ་གྲོགས་བཀྲ་ཤིས་ཀྱི་རྒྱབ་ཏུ་དཔེ་ཁུག་མེད་པ་མཐོང་བས། ཧ་ལས་པའི་སྒོ་ནས)སློབ་གྲོགས་བཀྲ་ཤིས། ཁྱོའི་དཔེ་ཁུག་་་་་་་་་་།
སློབ་གྲོགས་བཀྲ་ཤིས། ཧེ་་་་་་་། དེའི་རོ་ཤར་ཞིག་ལ་ཕོངས་ང་དོངས། དགུན་གནང་གྲོལ་ཁར་སློབ་གྲྭ་ནས་བསྐྱུར་བཞག ད་དེ་མེད་ལ་གང་ལ་འགྲོ་རྒྱུ། དེང་སང་སྒོར་མོ་དགོ་ནི་མང་ནོ་མ་གཏོགས། དཔེ་ཁུག་དགོ་ནི་སུ་ཞིག་ཡོད།
སློབ་གྲོགས་དོན་གྲུབ། (ཡིད་ལ་ཅི་ཞིག་དྲན་པའི་ཚུལ་གྱིས་མགྱོགས་མྱུར་ངང)སློབ་གྲོགས་བཀྲ་ཤིས། ཁྱོས་མིང་ཐོ་བཀོད་ཨེ་ཡོད།
སློབ་གྲོགས་བཀྲ་ཤིས། མེད། ངས་མ་ཐ་མིང་ཐོ་གཟོ་ཅང་བཀོད་མེད། ད་གང་ལྟར་སློབ་གྲྭའི་ནང་ལ་ཐོན་དང་ན་གཅིག་ར་གཅིག་མིན་ནམ།
སྐབས་དེར་ཏག་ཏག་མདུན་ཕྱོགས་ནས་སློབ་གྲོགས་བུ་མོ་གཉིས་ཡོང་བཞིན་པ་མཐོང་།
སློབ་གྲོགས་བཀྲ་ཤིས། ཡ་སློབ་གྲོགས་དོན་གྲུབ། ཁྱོས་ལྟོས་དང་། མཛེས་མ་གཉིས་ཡོང་གོ་ནོ་ཨེ་རིག་གི
སློབ་གྲོགས་དོན་གྲུབ། འོ་གན་གཉིས་ཀ་ངོ་མི་ཤེས་གི  གང་ལྟར་སློབ་ལྭར་བལྟས་ན་ང་ཚོའི་མཐོ་གཅིག་གི་རེད།
སློབ་གྲོགས་བཀྲ་ཤིས། ཕེ་་་་། ན་ནིང་ངས谈བྱས་པའི་ཁ་གཟོ་ལྷམ་ཆད་འདྲ་བོ་དེ་དང་ཨོང་ཤ་གཟོ་སྒྱོ་ལོག་འདྲ་མོ་དེ་གཉིས་ཀར་བལྟས་ན་ད་གན་གཉིས་ཀ་ངོ་མ་ཅིག་ཡག་གི ཡ་གཟུགས་རིང་བོ་ཁྱོས追བྱོས་དང་། གཟུགས་ཐུང་བོ་ངས追བྱེད། འུ་གཉིས་ཀའི་སུའི口才ཧྲ་གི་བལྟ།
     སློབ་གྲོགས་བཀྲ་ཤིས་དེ་མ་ཐག་བུ་མོ་དེ་གཉིས་ཀར་ཅི་ཞིག་བཤད་བརྩིས་ཀྱིས་སོང་།
སློབ་གྲོགས་དོན་གྲུབ། (སློབ་གྲོགས་བཀྲ་ཤིས་འཛིན་ཞོར)སློབ་གྲོགས་བཀྲ་ཤིས། ཁྱོད་ཀྱིས་དེ་ལྟར་བྱེད་སྲོལ་ཡོད་དམ། འདི་སློབ་གྲྭ་རེད་ཡ། ཡང་གཅིག་བཤད་ན་དགེ་རྒན་གྱིས་རྒྱུན་དུ་སློབ་གྲྭ་ནས་སློབ་གྲོགས་ཕན་ཚུན་བར་སློབ་སྦྱོང་དང་མཐུན་སྒྲིལ། བརྩི་བཀུར་བཅས་བྱེད་དགོས་པ་ལས་འབྲེལ་བ་གཞན་འཛུགས་མི་རུང་ཟེར་བ་མིན་ནམ།
སློབ་གྲོགས་བཀྲ་ཤིས། ད་ཁྱོད་སྡོད་ལ་དོངས། ཁ་ཡར་གྲགས་ན་དགེ་རྒན། ཁ་མར་གྲགས་ན་དགེ་རྒན། ཁྱོས་འདང་ཞིག་རྒྱོབས་དང་། ད་འུ་གཉིས་ཀ་ར་མི་ཆེ་ན་མི་ཆུང་ཀི སྟག་ཤ་ར་ཁེར་འགྲོ་ཁེར་འདུག་བྱེད་རག་ཁར་སྨན་བུ་མོ་འཁྲིད་དེ་སོང་ན་མི་བཟང་ངམ། (བུ་མོ་གཉིས་ཀ་བུད་སོང་བ་མཐོང་བས་སེམས་འཚབ་སྟེ་སྐད་མགྱོགས་མོའི་ངང)ཨ་ལ་ཨ་ལ། རོ་འབུད་རྒྱོ། ཁྱོས་ང་ཅིག་བཟུང་སོ་ནས་གསར་མོ་རྐང་འདྲ་འདྲ་གཉིས་ཀ་ཤོར་ཐལ། ཧེ་་་་་ད་སྙིང་གཟིག་ལང་གི་ར་ད།
སློབ་གྲོགས་དོན་གྲུབ། ཡ་་་་་ཡ། ད་ཆོག་གི འགྲོ། འུ་གཉིས་ཀ་དགེ་རྒན་གྱི་སར་མིང་ཐོ་འགོད་དུ་འགྲོ།
     སློབ་གྲོགས་དོན་གྲུབ་སྔུན་ལ་ཅུང་བྲེལ་མྱུར་གྱིས་སོང་བ་ན། སློབ་གྲོགས་བཀྲ་ཤིས། དགེ་རྒན་ཨ་ཧ་མོ་དེར་སྒྱུང་རྒྱུ་ཞིག་མེད་ནོ་ད་ཡང་ལས་བྱར་བལྟ་ན་ཐང་། (སློབ་གྲོགས་དོན་གྲུབ་སྔུན་ལ་བྲེལ་མྱུར་གྱིས་འགྲོ་བ་མཐོང་ནས) དོན་གྲུབ་ཁྱོད་དལ་མོ་ཞིག་བྱོས་དང་། ཨ་མའི་བུ་དལ་དགོས། རྒོན་མའི་བུ་བྲེལ་དགོས་ཟེར་ནི་ཡིན་ན།
     སློབ་གྲོགས་བཀྲ་ཤིས་སློབ་གྲོགས་དོན་གྲུབ་ཀྱི་རྗེས་བསྙེགས་ནས་དགེ་རྒན་གྱི་གཞུང་སྒུབ་ཁང་དུ་སོང་ཞིང་། གཞུང་སྒྲུབ་ཁང་གི་སྒོ་ཁར་ཐོན་པ་ན། གཉིས་ཀས་གཅིག་འཕྲོ་གཅིག་ལ(ཡར་ཞུ)(ཡར་ཞུ)ཟེར་ཞིང་། དགེ་རྒན་གྱིས་ནང་དུ་ཡོང་ཆོག་པའི་བརྡ་བྱིན།
དགེ་རྒན། ཡ་སློབ་གྲོགས་གཉིས་ཀ་བདེ་མོ། ལོ་སྐྱིད་པོ་ཞིག་སར་དང་ངམ།
གཉིས་ཀས་མཉམ་དུ། སར་དང་།
དགེ་རྒན། འོ། བཟང་གི  དེ་ན་དགུན་གནང་ལ་བྲིས་པའི་ལས་བྱ་སྤྲོད་རོགས།
     སློབ་གྲོགས་དོན་གྲུབ་ཀྱིས་དགུན་གནང་གི་ལས་བྱ་སྤྲད་པའི་ཚེ། སློབ་གྲོགས་བཀྲ་ཤིས་ལ་ལས་བྱ་ཅི་ཡང་སྤྲོད་རྒྱུ་མེད་པར་ངོ་ཚ་ནས། ཁོ་གཅིག་པུ་དགེ་རྒན་གྱི་མདུན་ཅོག་སྔུན་ནས་མགོ་བོ་སྒུར་ཏེ་བསྡད། སློབ་གྲོགས་དོན་གྲུབ་ཀྱིས་བྲི་བྱའི་ལས་བྱ་སྤྲད་ཚར་བ་མ་ཟད། དགེ་རྒན་གྱིས་གསུངས་པ་ལྟར་དགུན་གནང་ལ་བཀླགས་རྒྱུའི་དཔེ་ཆའི་ནང་དོན་དང་རང་རང་གི་མྱོང་བ་ལྷུག་པོར་བརྗོད་ཚར་བ་ན། སློབ་གྲོགས་བཀྲ་ཤིས་ལ་ཅི་བྱ་འདི་བྱ་མེད་པར་གྱུར་ཅིང་། སྔར་བཞིན་ངོ་མདོག་དམར་བོར་གྱུར་ཏེ་མགོ་བོ་ཅུང་སྒུར་ཉམས་ཀྱིས་འོག་མིག་ལང་གྱིན་བལྟས།
དགེ་རྒན། (སློབ་གྲོགས་བཀྲ་ཤིས་ཀྱི་སར་ལྟ་ཞོར)སློབ་གྲོགས་བཀྲ་ཤིས། ཁྱེད་ཀྱིས་ལས་བྱ་སྤྲོད་རོགས། ད་དུང་དགུན་གནང་ལ་བལྟས་པའི་དཔེ་ཆའི་ནང་དོན་དང་རང་གི་མྱོང་བ་ཤོད་ཅིག
     སློབ་གྲོགས་བཀྲ་ཤིས་ཁ་མི་གྲག་པར་མགོ་བོ་སྒུར་ཏེ་བསྡད།
དགེ་རྒན།(སློབ་གྲོགས་དོན་གྲུབ་ཀྱི་སྔུན་ནས་ཁོ་ལ་སྡིགས་མོལ་སོགས་མ་བྱས་པར) སློབ་གྲོགས་དོན་གྲུབ། ཁྱོད་གནས་སྐབས་སོང་དང་། ང་སློབ་གྲོགས་བཀྲ་ཤིས་ལ་ཁ་བརྡ་ཞིག་ཡོད་གི
དགེ་རྒན། ཡ་སློབ་གྲོགས་བཀྲ་ཤིས། ཁྱེད་ཀྱིས་སློབ་ལྭ་མི་གྱོན་དོན་ཅི་ཡིན།
     སློབ་གྲོགས་བཀྲ་ཤིས་ཀྱིས་བྲང་སྟོད་སྒུར་སྒུར་གྱིས་ལག་པས་མགོ་ལ་རེག་ཙམ་རེག་ཙམ་བྱེད་ཞོར། ཤབ་ཤུབ་ཙམ་ལས་སྐད་ཆ་གསལ་བོ་ཞིག་མ་བཤད།
དགེ་རྒན། སློབ་གྲོགས་བཀྲ་ཤིས། ཁྱོད་ཀྱིས་དྲང་མོར་ཤོད་དང་། ཁྱོད་ཀྱི་ལས་བྱ་ག་རེ། ལས་བྱ་བྲིས་ཨེ་ཡོད།
སློབ་གྲོགས་བཀྲ་ཤིས། (སྐྲག་སྣང་ཅུང་ཟད་སྐྱེ་ཞོར)ལས་་་་་་ལས་་་་་་་ལས་བྱ་བྲིས་་་་་་མེད་་་།
དགེ་རྒན། འོ་ན་ལྟ་ཀློག་དཔེ་ཆར་བལྟས་ཨེ་ཡོད།
སློབ་གྲོགས་བཀྲ་ཤིས། (སྔར་བཞིན་སྐྲག་སྣང་ཅུང་ཟད་སྐྱེ་ཞོར། བཤད་ན་འདོད་ལ་མི་འདོད་ཀྱི་ངང་ནས་སྐད་དམའ་མོས)དཔེ་ཆར་་་་་་་་བལྟས་མེད།
དགེ་རྒན། འོ་ན་ཁྱོད་ཀྱིས་དགུན་གནང་ཧྲིལ་བོར་ཅི་ཞིག་བྱས་པ་ཡིན།
     སློབ་གྲོགས་བཀྲ་ཤིས་ཀྱིས་དགེ་རྒན་ལ་གོ་མི་གོ་བའི་སྐད་ཆ་རྡབ་རྡིབ་རེ་འགའ་བཤད།
དགེ་རྒན། ཨ་རོ། ཁྱོད་ད་ལོ་ཡང་ན་ནིང་ལྟར་འགྲོ་ཐབས་འདུག་ཐབས་བྱེད་ན་འདོད་དམ། ད་ལོ་ཁྱོད་ལོ་གཅིག་གི་ཇེ་ཆེར་སོང་བས་བསམ་ཇེ་ཤེས་སུ་སོང་ན་མི་ཆོག་གམ། ཡ་ཤོད་དང་། ཁྱོའི་སེམས་ན་སྡུག་ཅིག་ཡོད་པ་ཡིན་ནམ་ཡང་ན་ཁྱོད་ལ་འཚོ་བའི་ཕྱོགས་སུ་དཀའ་ངལ་འདྲ་ཡོད་པ་ཡིན། ཡོད་ན་དགེ་རྒན་ལ་ཤོད་དང་། དགེ་རྒན་གྱིས་ཁྱོད་ཀྱི་དཀའ་ངལ་སེལ་རོགས་བྱས་ཆོག
སློབ་གྲོགས་བཀྲ་ཤིས། (སྐད་དམའ་མོའི་ངང)དཀའ་ངལ་འདྲ་མེད།
དགེ་རྒན། འོ་ན་ཁྱོད་ཀྱིས་སློབ་སྦྱོང་མི་བྱེད་པ་ཅི་ཡིན། ན་ནིང་ལོ་ཧྲིལ་བོར་ལེ་ལོ་དང་སྒྱིད་ལུག་གི་དབང་དུ་སོང་ནས་ཉི་མ་འཁྱོལ་ཐབས་བྱས། ལྟོས་དང་། སློབ་གྲོགས་དོན་གྲུབ་ན་ནིང་སློབ་གྲྭ་འདིར་ཡོང་དུས་སྦྱངས་འབྲས་ཞན་ཡང་ཁོས་དཔེ་ཀློག་ལ་འབད་བརྩོན་བྱས་པས་ད་ལྟ་འཛིན་གྲྭའི་ནང་གི་རྩེ་མ་རེད། ཁྱོད་གཉིས་སློབ་གྲོགས་བཟང་བོ་མིན་ནམ། ཁྱོས་ཁོར་སློབ་སྦྱོང་བྱས་ན་མི་ཆོག་གམ། ཇེ་སྡུག་ནས་ཇེ་སྡུག་ལ་སོང་ན་ཁྱོད་ལ་འཐོབ་བྱ་ཅི་ཞིག་ཡོད། ད་བར་སློབ་གྲོགས་མང་བོ་ཞིག་ཡར་རྒྱས་སུ་ཡོང་གིན་འདུག  ཁྱོད་ལ་ཁོག་དཔུང་ཞིག་མེད་དམ། བཟང་ན་ངན་ན་གསར་བུ་ཞིག་རེད་ཡ།
སློབ་གྲོགས་བཀྲ་ཤིས། (ཅུང་མནོངས་འགྱོད་སྐྱེས་པའི་ངང)ཡ་ཡ། དགེ་རྒན་ལགས། ངས་ཁྱེད་ཀྱི་ཁར་ཉན་ཏེ་སློབ་སྦྱོང་ལ་ཧུར་བརྩོན་བྱེད།
དགེ་རྒན། ཁྱེད་ཀྱིས་ད་ནས་བཟང་སྟེ་དཔེ་ཆར་ལེགས་པོར་ལྟོས་དང་།ཡོན་ཏན་བཟང་བོ་ཞིག་འབྱོར་སོང་ན་མ་འོངས་པར་རང་གི་མི་ཚེའི་ཁ་ཕྱོགས་ཤིག་རྙེད་ཐུབ་པ་ཁོ་ཐག་ཡིན། དགེ་བཤེས་གསུང་རབ་རྒྱ་མཚོ་ཚང་གིས། ནོར་རིན་ཆེན་ལྟ་བུའི་ཤེས་ཡོན་དེ། ། རྒྱུ་ལོངས་སྤྱོད་གཞན་དང་གཏན་མི་འདྲ། ། མི་བཙན་པོས་དབང་གིས་འཕྲོག་མི་ཐུབ། ། མི་ཆོམ་པོས་འཇབ་ནས་རྐུ་མི་ཐུབ། ། མཐོ་ལ་མགོར་འགྲོ་དུས་འཁུར་མི་དགོས། ། དམའ་ཤུར་ལ་འབབ་དུས་འདྲུད་མི་དགོས། ། རང་གང་ཐོན་ས་ལ་རྗེས་སུ་འབྲངས། ། ས་གང་ཐོན་དེ་ནས་བཀོལ་ན་ཆོག ། དེ་ལྟར་ཤེས་ཡོན་གྱི་རིན་ཐང་མང་བོ་གསུངས་ཡོད་པ་རེད། དེ་བས། ཁྱོད་དུས་རྒྱུན་རྣམ་གཡེང་དང་ལེ་ལོའི་དབང་དུ་གཏན་ནས་འགྲོ་མི་རུང་། སློབ་གྲྭ་ན་ཡོད་ན་ཆོག མེད་ན་ཆོག གང་ལྟར་དཔེ་ཆ་མང་བོར་བལྟ་དགོས། བལྟས་ན་རང་གི་མི་ཚེ་ཡོན་ཏན་དང་ལྡན་པ་ཞིག་བྱ་ཐུབ། འོན་ཀྱང་དེ་ལས་ལྡོག་སྟེ། རང་གི་སློབ་སྦྱོང་གི་འགན་འཁུར་གཡུགས་ནས་ཉི་མ་ལ་ཚེ་མགོ་ནས་ཡལ། གོ་རེ་ཁ་བཟས་རུམ་ནས་ཚར་ན་མ་འོངས་པར་གྱོང་ཆེན་པོ་རེག་རྒྱུ་རེད། དཔེ་ཆ་འདོར་བ་ནི་ཤེས་ཡོན་འདོར་བ་ཡིན། རེ་བ་ཡིན་ན། དཔེ་ཆར་དགའ་བར་གྱིས་དང་། དེས་ཁྱོད་ལ་སྟོབས་ཤུགས་སྩོལ་ངེས་ཡིན། དགེ་རྒན་གྱིས་སེམས་བསམ་པའི་གཏིང་ནས་ནན་ཏན་སྒོས་རེ་བ་དང་བཅས་ཏེ་བཤད་ཞོར་བཀྲ་ཤིས་ཀྱི་ཕྲག་མགོར་ལག་པས་ཡང་ཡང་རྡུང་། སློབ་གྲོགས་བཀྲ་ཤིས་སྔར་གྱི་བྱས་ཉེས་ལ་འགྱོད་གདུང་ཆེན་པོ་ཞིག་སྐྱེས་ཤིང་། ད་ནས་བཟུང་ལེ་ལོ་དང་སྒྱིད་ལུག རྐྱལ་སྟོང་སོགས་ཀྱི་ལས་མི་བྱ་བར་སློབ་སྦྱོང་ལ་འབད་པ་ལྷུར་ལེན་གྱིས་དཔེ་ཆར་ལེགས་པོར་བལྟས་ཏེ། རང་གི་མི་ཚེ་དོན་དང་ལྡན་པ་ཞིག་ཏུ་འགྱུར་བར་ད་ནས་བཟུང་སྟེ་འབད་འབུངས་བྱ་རྒྱུ་ཡིན་ཞེས་དགེ་རྒན་གྱི་མདུན་ནས་དམ་བཅས་པའོ། །
     མཇུག་ཏུ། འཁྲབ་སྟོན་པ་གསུམ་པོས་མགྲིན་གཅིག་ཏུ། དུས་དེ་རིང་མི་རང་ཉིད་ནས་བཟུང་སྟེ། དཔེ་ཀློག་གི་ཁྲོད་ནས་འཇིག་རྟེན་གྱི་བདེན་པ་དང་མི་ཚེ་ཡི་སྙིང་བོ་འཚོལ། དུས་གཏན་དུ།
གསལ་བཤད། འདིར་དགོས་དབང་གིས་ཚིག་གི་ཟུར་དུ་མར་ཨ་མདོའི་ཁ་སྐད་དང་རྒྱ་སྐད་ལ་བསྟུན་ཡོད་པས་དེའི་དོན་མཁྱེན་པར་མཛོད།