བོད་ཀྱི་སྐད་ཡིག་མྱུར་དུ་ཉམས་གསོ་དགོས་པའི་བསམ་ཚུལ་བརྗོད་པ།

དབྱངས་གསལ་སོ་བཞིའི་རིགས་འཕྲུལ་རྨད་པོ་ཆེས། ། ཇི་སྙེད་ཤེས་བྱའི་རྣམ་གྲངས་མ་ལུས་པ། །

བདེ་བླག་སྟོན་པའི་ཤིང་རྟ་སམ་བྷོཊའི། ། འཁོར་མེད་བཀའ་དྲིན་དྲན་བཞིན་སྙིང་ནས་འདུད། །

    དེ་ཡང་བོད་གངས་ཅན་གྱི་ལྗོངས་འདིར་ལོ་སྟོང་ཕྲག་དུ་མའི་ཡར་སྔོན་ནས་ཤེས་ཡོན་དང་ལྡན་པའི་མི་རིགས་གནས་ཤིང༌། ཁྱད་པར་དུ་ཐོན་མི་སམ་བྷོ་ཊས་བོད་ཡིག་ཁྱབ་གདལ་དུ་སྲོལ་བཏོད་དེ། ཕྱིའི་རིག་གཞུང་དུ་མ་ནང་དུ་དྲངས། དེའི་ཚེ་ན་བོད་མིའི་འཚོ་བ་དང་རིག་གནས་དཔལ་འབྱོར་ཆབ་སྲིད་གང་ཐད་ནས་དར་རྒྱས་ཕུན་སུམ་ཚོགས་པ་བྱུང་སྟེ། ཀུན་གྱིས་སྨོན་གནས་སུ་གྱུར། རྒྱལ་བོ་གླང་དར་མས་བསྟན་པ་བསྣུབས་པ་ནས་བཟུང་བོད་ཀྱི་རྒྱལ་རབས་སིལ་བུར་འཐོར་ཡང་རྒྱ་ཆེ་ཞིང་གཏིང་ཟབ་པའི་རིག་གནས་འདི་ཉིད་ཀྱིས་ཆོལ་ཁ་གསུམ་པོ་རྩྭའི་བམ་པོ་བཞིན་དུ་འཆངས་ཐག་གཅིག་གིས་བཅིངས་ཏེ་གནས། དུས་རབས་ཉི་ཤུ་བའི་ནང་དུ་ཡོ་རོབ་དང་ཨ་རི་སོགས་ཡུལ་གྲུ་མང་བོ་ལ་ཁྱབ་སྟེ། ད་ལྟ་འཛམ་གླིང་གི་མཁས་བློན་བགྲང་གིས་མི་ལངས་པ་ཞིག་གིས་བོད་ཀྱི་རིག་གཞུང་ཞེས་གཙིགས་ཆེན་བྱེད་པའི་གནས་སུ་གྱུར། དེའང་དུས་རབས་གསར་བ་འདིར་འཛམ་གླིང་གི་ལག་རྩལ་ཡར་རྒྱས་སུ་སོང་ཡང༌། དེ་ཙམ་གྱིས་ནང་གི་ཞི་བདེ་བག་ཡངས་ཀྱི་འཚོ་བ་སྐྲུན་མ་ནུས་པར་མ་ཟད་འཇིགས་སུ་རུང་བའི་བྱ་བ་མང་བོ་ཇེ་མང་དུ་བཏང་བའི་གནས་སྐབས་འདི་ན། སྐྱེ་བོ་དུ་མ་ཚུལ་དེ་དག་ལ་ཡི་ཆད་ཅིང༌། བོད་ཀྱི་རིག་གཞུང་འདིའི་ནང་ན་འགྲོ་མ་མིའི་རིགས་ལ་ངེས་པ་དོན་གྱི་བདེ་སྐྱིད་འདྲེན་པའི་ཐབས་ཚུལ་ཡང་དག་པ་ཞིག་རྙེད་པ་རེ་བའི་འོད་སྣང་ཞིག་འདུག་སྙམ་པ་ཡིན་གྱི། ཁོང་ཅག་གི་རིག་གཞུང་དང་ཟེར་སྒྲོས་མི་འདྲ་བ་ཙམ་ལ་ཡ་མཚན་སྐྱེས་ཏེ་དོ་གལ་ཆེན་པོ་བྱེད་པ་ནི་མ་ཡིན་ནོ། ། དེས་ན་ཉེ་བའི་ཆར་སྐྱེ་བོ་འགའ་རེས་ནུབ་ཕྱོགས་ཀྱི་རིག་པ་གསར་བ་དག་གང་དང་གང་དུ་དར་བའི་གནས་དེ་དང་དེར་ནང་རིག་པ་གཙོ་བོར་བྱེད་པའི་བོད་ཀྱི་རིག་གཞུང་ལྟ་བུ་དག་ནུབ་པར་འགྱུར་རོ་སྙམ་ནི་ནོར་བ་ཁོ་ནར་ཟད་དེ། དངོས་ཡོད་ཀྱི་བདེན་དཔང་མངོན་སུམ་པ་འདི་དག་གིས་གསལ་བར་མཚོན་པར་བྱས་པའི་ཕྱིར་རོ། །

    འོན་ཀྱང་ཆེས་བློ་ཕམ་པ་ཞིག་ནི་རང་རེའི་རིག་གཞུང་འདི་དག་ད་ལྟ་རང་ཡུལ་ནས་ཉམས་རྒུད་དུ་འགྲོ་བཞིན་པ་ཡིན་ཏེ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨྲོས་ན་ཆོས་རྗེ་དམ་པ་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་དཔལ་བཟང་བོའི་ཞལ་སྔ་ནས་ཀྱི་སྙིང་གཏམ་སྤྲིན་གྱི་རོལ་མོ་ལས། བོད་རིགས་དག་མ་ཞིག་ཡིན་ཕྱིན་བོད་ཀྱི་སྐད་ཡིག་དག་མ་ཞིག་ངེས་པར་དུ་ཤེས་དགོས། ཤེས་པ་དེ་སྤྱད་དགོས། གལ་ཏེ་བོད་རང་གི་ཆས་གོས་ཀྱང་མི་བྱེད། སྐད་ཡིག་དག་ཀྱང་མི་སྤྱོད་ན་དེའི་ཚེ་བོད་ཅེས་པའི་མིང་བོར་ཚར་བ་རེད། ད་ལྟ་བོད་ན་རྫོང་དང་གྲོང་ཁྱེར་ཆེ་ཆུང་སྣ་ཚོགས་པར་གནས་པའི་ཕ་མ་ཐམས་ཅད་བོད་རིགས་གཤའ་མ་ཡིན་ངེས་ཀྱི་བོད་ཕྲུག་ཚོས་བོད་ཀྱི་སྐད་ཡིག་གཏན་ནས་མི་ཤེས་པའི་གནས་ཚུལ་ཚབས་པོ་ཆེ་ཞིག་འོང་གི་འདུག དེ་ཚོ་ཕལ་ཆེ་བས་བོད་ཀྱི་གཤིས་ཀའང་དོར་ཚར་འདུག་པས་ཧ་ཅང་བློ་ཕམ་པའི་གནས་ཤིག་རེད། དེར་མ་ཟད་བོད་རིགས་ལས་བྱེད་པ་སོགས་བོད་ཀྱི་ཆེན་པོར་རློན་པ་ཚོས་ཀྱང་བོད་སྐད་དག་མ་ཞིག་ཤོད་ཐུབ་ཀྱིན་མི་འདུག་སྟེ་གཏམ་གྱི་ལྔ་ཆ་གཅིག་གམ་གཉིས་ཙམ་ཞིག་རྒྱ་སྐད་ཡིན་པས་རྒྱ་སྐད་མི་ཤེས་མཁན་གྱིས་ད་ལྟ་བོད་ན་གཏམ་མགོ་མཇུག་ཚང་བ་ཞིག་མཉན་རྒྱུ་རྙེད་དཀའ་མོ་རེད།　ཅེས་གསུངས་པ་བཞིན་ནོ། །

    འོ་ན་དེའི་རྒྱུ་མཚན་ཅི་ཞེ་ན། 　གོང་གི་འཕྲོ་ལས། དེའི་རྒྱུ་མཚན་ཡང་ཕལ་མོ་ཆེ་ཞིག་དོན་མེད་ལད་མོ་ཁོ་ན་དང༌། ཉུང་ཤས་ཤིག་ནི་དེང་དུས་གསར་དུ་བྱུང་བའི་འཕྲུལ་ཆས་སོགས་དངོས་པོ་མང་བོ་ཞིག་ལ་བོད་ཀྱི་སྐད་ཐོག་ནས་མིང་ལེགས་པོ་ཞིག་ད་དུང་ཆགས་མི་འདུག་པས་གཞན་དག་གིས་བཏགས་པའི་མིང་རྣམས་གཡར་དགོས་བྱུང་བ་རེད། དེའི་རྩ་བ་བོད་རང་གི་སྐད་ཡིག་ལ་རྩིས་ཆེན་མ་བྱས་པས་ལན་གྱི་བོད་སྐད་ཀྱིས་དེ་དག་ལ་མིང་གདགས་མི་ནུས་པ་གཏན་ནས་མ་རེད། དེས་ན་འདི་རིགས་ལ་བོད་གཅིག་གྱུར་གྱི་མིང་ཞིག་གདགས་རྒྱུ་གལ་ཆེ་སྟེ་བོད་ཀྱི་ཕ་སྐད་ཤེས་པ་གཞིར་བཞག་གིས་སྐད་རིགས་གཞན་ཤེས་ན་ཡོན་ཏན་ཡིན་གྱི།བོད་ཀྱིས་བོད་སྐད་མི་ཤེས་བཞིན་སྐད་རིགས་གཞན་ཞིག་སྨྲ་ཁུལ་བྱས་ན་ཁྲེལ་དགོད་བྱེད་མཁན་མ་གཏོགས་བསྔགས་བརྗོད་བྱེད་མཁན་ཞིག་འཛམ་གླིང་གི་ཁྱོན་ན་ཡོད་ཚོད་མི་འདུག་པའི་ཕྱིར་རོ། ། ཡང་བོད་ཀྱི་རྩོམ་པ་བོ་དང་དཔེ་སྐྲུན་ཁང་འགའ་རེས་བོད་ཡིག་ནང་རྒྱ་ཡིག་གི་བརྡ་མཚོན་རྟགས་ཤད་ཅེས་པ་དེ་བསྲེས་ཏེ་རྒྱ་མིན་བོད་མིན་ཁྲ་ཧྲིལ་ལེ་བ་ཞིག་བྱས་འདུག  རྒྱ་ཡིག་ལ་སྔོན་འདི་དག་མེད་ཀྱང་གཅོད་མཚམས་དཀའ་བ་དང་དོན་ནོར་ཉེན་བྱུང་བས་སུང་རྒྱལ་རབས་ཚུན་ཆད་ནས་རིམ་བཞིན་དར་བར་གྱུར་མོད།བོད་ཀྱི་ཡི་གེ་ལ་མི་འཁྲུགས་པའི་རྒྱ་རིམ་པ་བདུན་དང་རྣམ་དབྱེ་ཚིག་ཕྲད་དེ་སྙེད་ཅིག་ཡོད་པས་གཅོད་མཚམས་དང་དོན་ནོར་ཉེན་ཅི་ཡང་མེད་པས་དགོས་པ་མི་འདུག་གོ ། ཞེས་གསུངས་པ་བཞིན་དུ་འདི་ལ་རྒྱུ་མཚན་འགའ་ཞིག་འདུག་སྟེ།

    དང་བོ་ནི།