གཅན་ཚ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་གྱི་བྱེད་སྒོ་བསྡུས་པ།

གཅན་ཚ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་གྱི་བྱེད་སྒོ་བསྡུས་པ།

གཅན་ཚ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་གྱི་བྱེད་སྒོ་བསྡུས།

མདའ་འཕེན་པ།

གཅན་ཚ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་གྱི་བྱེད་སྒོ་སྤེལ་བའི་ཡུལ་དངོས།

    ཉེ་སྔོན། གཅན་ཚ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་དུས་ཆེན་དེ་དུས་ཡུན་ཉིན་ལྔ་ལྷག་རིང་གི་ཆོ་ག་དང་བྱ་འགུལ་སྣ་ཚོགས་ཁྲོད་ནས་བདེ་བླག་ངང་མཇུག་སྒྲིལ།
     སྤྱིར་དྲུག་པའི་ཀླུ་རོལ་ནི་མདོ་སྨད་མཚོ་སྔོན་རོང་ཕྱོགས་ས་ཆར་རྒྱུག་ཆེ་བའི་དམངས་སྲོལ་རིག་གནས་དུས་ཆེན་གལ་ཆེན་གྲས་ཀྱི་གཅིག་ཡིན་ལ། གཙོ་བོ་རེབ་གོང་དང་ཁྲི་ཀ  གཅན་ཚ། ཞོན་ཧྭ་སོགས་ས་ཆས་དུས་ཆེན་འདིར་མཐོང་ཆེན་བྱེད་པ་ཞིག་ཡིན་ཞིང་། ཡུལ་གྲུ་སོ་སོས་དམངས་སྲོལ་དུས་ཆེན་འདི་རོལ་བའི་ཐུན་མོང་གི་དུས་ཚིགས་ནི་ལོ་རེའི་ཧོར་ཟླ་དྲུག་པའི་ཟླ་དཀྱིལ་ནས་མགོ་རྩོམ་པ་ཞིག་ཡིན་ལ། མང་ཆེ་བ་དྲུག་པའི་ཚེས་ཉི་ཤུ་ནས་ཚེས་ཉེར་ལྔ་ཉིན་སྟེ་དུས་ཡུན་ཉིན་ལྔ་ལྷག་རིང་ལ་ལྷ་ཀླུ་གཉན་གསུམ་ལ་ཆོ་ག་རྒྱ་ཆེན་གཏོང་བའི་དུས་ཆེན་ཁྱད་པར་བ་ཞིག་ཡིན།
     མཚོ་སྔོན་གྱི་ས་ཆ་སོ་སོའི་དྲུག་པའི་ཀླུ་རོལ་ལའང་རང་ས་གནས་ཀྱི་དམངས་སྲོལ་ལྟར་དུས་ཆེན་གྱི་ཆོ་ག་བྱེད་སྟངས་མི་འདྲ་བ་ཡོད་པ་སྟེ། མདོ་སྨད་གཅན་ཚ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་ལ་མཚོན་ན་དྲུག་པའི་ལྷ་སྐར་ཆེན་མོའི་དུས་ཚིགས་གཙོར་བཟུང་ནས་ཆོས་ལུགས་ཀྱི་རིམ་གྲོ་བསྒྲུབ་ཏེ་ལྷ་འབེབས་པ་གཙོ་བོར་བྱེད་པའི་ཆོ་ག་ཞིག་ཡིན་ལ། ཆོས་ལུགས་ཆོ་གའི་ཞོར་དུ་མང་ཚོགས་རྣམས་ཀྱིས་ཁམས་གསེང་གཏོང་ཞིང་དམངས་ཁྲོད་གླུ་གར་ལ་རོལ་བ་དང་མང་ཚོགས་ཕན་ཚུན་གྱི་བསམ་བློ་བརྗེ་རེས་བྱེད་པའི་དུས་ཚིགས་སྤྲོ་བག་ལྡན་པ་ཞིག་ཡིན།
     དྲུག་པའི་ཀླུ་རོལ་ཞེས་པ་ནི་བོད་བཙན་པོའི་རྒྱལ་རབས་ཀྱི་ཡར་སྔོན་ནས་བཟུང་ལུགས་སྲོལ་ཡོད་པར་བརྗོད་ཅིང་། གཙོ་བོ་དམར་མཆོད་བྱེད་པ་དང་ལྷ་བསང་གཏོང་བ། ལྷ་འབེབས་པ། འགྱོགས་བྱམས་ཁུར་བ་སོགས་བྱེད་པའི་བོད་ཀྱི་དམངས་སྲོལ་བྱེད་སྒོ་ཞིག་ཡིན། རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་ཡང་ལུགས་སྲོལ་བྱེད་སྟངས་དེ་དག་གི་རྨང་གཞིའི་སྟེང་ལོ་རྒྱུས་ཀྱི་ཆུ་རྒྱུན་རིང་བ་ཞིག་ཡིན་མོད། ཡིན་ཡང་སྤྱི་ཚོགས་འཕེལ་རྒྱས་ཀྱི་བརྒྱུད་རིམ་ཁྲོད་ནས་སྲོལ་རྒྱུན་རིག་གནས་མི་ཉུང་བ་ཞིག་དེར་བསྟུན་གྱིས་ཉམས་དམས་སུ་འགྲོ་བཞིན་ཡོད་པ་ནི་ཆོས་ཉིད་དུ་གྱུར་བའི་དབང་གིས། རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་ཡང་ཉེ་བའི་ལོ་ངོ་བཅུའི་ནང་དུ་རིམ་བཞིན་སྲོལ་ལུགས་རྣམས་ཉམས་པར་གྱུར་ཞིང་། དུས་ཆེན་སྐབས་སུ་མང་ཚོགས་མི་འདུས་ཤིང་ཚོང་ཟོང་མེད་པ། ཉིན་རེའི་ལྷ་རྩེད་དང་ལྷ་འབེབས་པའི་སྲོལ་ལུགས་སྟབས་བདེར་བསྒྱུར་བ་སོགས་བྱས་ཏེ། དྲུག་པའི་ཀླུ་རོལ་ནི་ལྷ་བསང་ཁོ་ན་གཏོང་བའི་དུས་ཚིགས་ཤིག་ཏུ་གྱུར་ཡོད་པ་རེད།
     ཉེ་བའི་ལོ་འགའི་ཚུན་ལ། རྒྱལ་ཁབ་ཀྱིས་དྲུག་པའི་ཀླུ་རོལ་ལམ་ལྷ་རྩེད་ནི་གཟུགས་འདས་ཤུལ་བཞག་རིག་གནས་སྲུང་སྐྱོབ་གྲས་སུ་བཞག་པ་ནས་བཟུང་། ས་གནས་རིམ་པ་སོ་སོའི་སྲིད་གཞུང་གིས་ཐུགས་ཁུར་དང་རྒྱབ་སྐྱོར། ས་གནས་མང་ཚོགས་དང་སྡེ་བའི་འགན་ཁུར་མི་སྣ་དག་གིས་འབད་བརྩོན་འོག  རྐ་ཕུག་དྲུག་པའི་ཀླུ་རོལ་གྱི་རྣམ་པ་རིམ་གྱིས་སླར་གསོ་བྱས་ཤིང་། ན་ནིང་ནས་བཟུང་སྟེ་དྲུག་པའི་ཀླུ་རོལ་གྱི་སྲོལ་རྒྱུན་ཆོས་ལུགས་ཆོ་གའི་རིམ་གྲོ་སླར་གསོ་བྱས་པའི་ཁར། ད་དུང་དུས་ཆེན་སྐབས་སུ་མང་ཚོགས་ཀྱི་རིག་གནས་འཚོ་བའི་དགོས་མཁོ་བསྐང་ཆེད། རིག་རྩེད་ལེ་ཚན་གང་མང་འཁྲབ་སྟོན་བྱས་པ་དང་། མདའ་རྩེད་འགྲན་སྡུར་གྱི་བྱ་འགུལ་ཡང་སྤེལ་ཏེ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་ལ་སླར་ཡང་དུས་ཆེན་གྱི་གསོན་ཤུགས་རྒྱས།
     གསར་འགོད་པས་རྐ་ཕུག་དྲུག་པའི་ཀླུ་རོལ་འཚོགས་གནས་སུ་མཐོང་བ་ལྟར་ན། ཚང་ཚིང་གཡུ་ལོས་འཁྲིགས་པའི་རྐ་ཕུག་གྲོམ་གཞོང་ན་མི་ཚོགས་ཀྱི་འདུ་ལོང་དགོད་ཅིང་། ཞིང་ཆེན་དང་རྫོང་གི་རིག་རྩལ་འཁྲབ་སྟོན་པས་རིག་རྩལ་ལེ་ཚན་སྣ་ཚོགས་ཀྱི་ལེགས་སྐྱེས་ཕུལ་བ་དང་། གླུ་བ་གླུ་མའི་གླུ་ངག་གི་དབྱངས་རྟ་རྐ་ཕུག་གྲམ་གཞོང་རིང་མོར་ཁྱབ་འདུག  ཨེར་ལང་ལྷ་ཁང་གི་ཁོ་ར་ཁོར་ཡུག་ཏུ་ལྷ་བསང་གི་དྲི་མས་ཁྱབ་ཅིང་། ཆོས་ལུགས་རིམ་གྲོའི་ཆོ་ག་ཁ་ཚང་སྤེལ་ཏེ། དམངས་སྲོལ་རིག་གནས་ཀྱི་ཤུགས་ན་འཚེར་བའི་ཐུན་མིན་ཁྱད་ཆོས་ཤིག་མངོན་པར་མཚོན་འདུག    
     མདའ་རྩེད་ར་བ་རུ་མཚོ་ལྷོ་དང་དཔའ་ལུང་སོགས་ནས་ཡོང་བའི་མདའ་འཕེན་འགྲན་ཞུགས་པ་ཚོས་མཛའ་བརྩེ་དང་པོ་དང་འགྲན་སྡུར་གཉིས་པ་བྱས་ཏེ་མདའ་མོ་གཞུ་རྒྱུད་ལ་དྲངས་ཤིང་། མཛའ་གཅུགས་ཀྱི་ཀི་བསོ་དང་ལག་རྡང་བར་ནས་དུས་ཆེན་ལ་བསུ་མ་བྱེད་ཅིང་སྤྲོ་བག་བསྣན།
     རྒྱུས་ལོན་པ་ལྟར་ན། ད་ལོའི་གཅན་ཚ་རྐ་ཕུག་ཡ་མཁར་ཚོ་བའི་དྲུག་པའི་ཀླུ་རོལ་ནི་ན་ནིང་ལས་ལྡབ་འགྱུར་གྱིས་ཇེ་ལེགས་ཇེ་རྒྱས་སུ་སོང་ཡོད་ལ། སྲོལ་རྒྱུན་ལྷ་འབེབས་རིམ་གྲོ་ཁ་ཚང་ཡོད་པའི་ཁར། རིག་རྩལ་རྣམ་གྲངས་མང་ཞིང་། ཞིང་ཆེན་དང་རྫོང་གི་འཁྲབ་སྟོན་དཔུང་རྒྱ་ཆེ་བ་དང་། མདའ་འཕེན་རུ་ཁག་མང་ལ། གླུ་བ་གླུ་མ་རྣམས་སོ་སོར་མཚོ་ལྷོ་དང་མཚོ་བྱང་། རྨ་ལྷོ་སོགས་ནས་གདན་ཞུ་བྱས་ཡོད། མདའ་འཕེན་རུ་ཁག་ལའང་གཅན་ཚ་རྫོང་གི་འཐུས་ཚབ་ཚོགས་པ་དང་། དཔའ་ལུང་རྫོང་དཀར་པོ་ཐང་མདའ་འཕེན་ཚོགས་པ། གདོང་ལ་ཁ། རུ་ལམ། བསིལ་ལུང་ནང་། ཁོ་ཚེ་གོང་མ་མདའ་འཕེན་ཚོགས་པ་སོགས་ཡོད་ལ། མཚོ་ལྷོ་ཐང་སྐར་མ་མདའ་འཕེན་ཚོགས་པ་དང་། གཅན་ཚ་དོ་རྒྱ་དང་བྱ་ཚང་། རྐ་ཕུག  རུ་མཚེར་མདའ་འཕེན་ཚོགས་པ་སོགས་འགྲན་ཞུགས་རུ་ཁག་བཅུ་བཞི་ཞུགས་ཡོད། བྱ་དགའི་རྣམ་གྲངས་ལ་ཨང་དང་པོར་བྱ་དགའི་དངུལ་སྒོར4000དང་། ཨང་གཉིས་པར་བྱ་དགའི་དངུལ་སྒོར3000། ཨང་གསུམ་པར་བྱ་དགའི་དངུལ་སྒོར2000། ཨང་བཞི་པར་བྱ་དགའི་དངུལ་སྒོར1000བཅས་དང་། གཞན་མདའ་འཕེན་འགྲན་ཞུགས་རུ་ཁག་སོ་སོར་སྟིང་སྐུལ་བྱ་དགའ་སྒོར500རེ་བྱིན་ཏེ་མི་རིགས་མཐུན་སྒྲིལ་ལ་ཤུགས་སྣོན་དང་མི་རིགས་རིག་གནས་སྲུང་སྐྱོབ་དང་རྒྱུན་འཛིན་དར་སྤེལ་ཐད་ཡར་སྐུལ་གྱི་ནུས་པ་བཏོན།