རྩིག་ངོས་སུ་ས་མཚོན་སྒྲོན་པའི་སྲོལ།

  བོད་ཀྱི་དགོན་པ་དང༌།ལྷ་ཁང༌།ཁྱིམ་ཚང་བཅས་ཀྱི་རྩིག་ངོས་སུ་ས་དཀར་དམར་སེར་ནག་སོགས་སྒྲོན་པའི་སྲོལ་ཞིག་གང་སར་མཐོང་རྒྱུ་ཡོད།ལྷག་པར་དུ་སྟོད་ཕྱོགས་སུ་དེ་བས་མང་བ་ཡོད།ཁང་བའི་རྩིག་ངོས་ཀྱི་གཞུང་ལ་ས་དཀར་དམར་ནག་གསུམ་དྲང་པོར་གཏོང་བའི་ལུགས་དེ་ནི་ཞི་རྒྱས་དབང་དྲག་དང༌།རིགས་གསུམ་མགོན་པོ་སོགས་ཀྱི་མཚོན་ཚུལ་ཐུན་མོང་མིན་པ་ཞིག་ཡིན།ས་དཀར་ནི་ནད་གདོན་བར་ཆད་ཞི་བར་བྱེད་པའི་རྟགས་དང༌།ས་དམར་ནི་ཁམས་གསུམ་དབང་དུ་འདུ་བའི་རྟགས།ས་སེར་པོ་ནི་ཚེ་དང་བསོད་ནམས་རྒྱས་བར་བྱེད་པའི་རྟགས།ས་ནག་པོ་ནི་དགྲ་བགགས་ཕྱེ་མར་བརླགས་པའི་རྟགས་བཅས་ཡིན།དེ་ནི་གྲོགས་པོ་ཕྱི་གླིང་བ་ཚོས་ལས་ཀ་ཚང་མ་ལམ་ལྷོང་དང་འཇིགས་པ་ཀུན་ལས་ཐར་བར་བྱ་ཆེད་ལྷ་ཚངས་བར་སྐྱབས་འཇུག་ཞུ་བའི་ངང་ཚུལ་དང་གཉིས་སུ་མ་མཆིས་བའི་གནའ་སྔ་མོའི་གནས་ཚུལ་ཁྱད་པར་ཅན་ཞིག་རེད།ད་དུང་བོད་པ་རྣམས་ཀྱིས་འདས་བའི་ལོ་རྒྱུས་ནང་རང་གི་ཡུལ་བབ་ལ་བསྟུན་ནས་སོག་པོ་སྟག་ཁྲིད་དང་གེ་སར་རྒྱལ་པོ་སོགས་རིགས་གསུམ་མགོན་པོའི་ལུལ་དུ་བཀུར་ནས་སྐྱབས་བཅོལ་ཞུ་བའི་ལམ་སྲོལ་ཡང་དར་ཡོད།འོན་ཀྱང་ད་ལྟའི་དུས་སུ་མཚོན་དང་རི་མོ་དེ་རིགས་མི་རིགས་རང་གི་ཁང་བའི་མཛེས་རྒྱན་ཙམ་ལ་གྱུར་ནས།བསྟན་བྱའི་དོན་གྱི་སྙིང་བོ་གང་ཡིན་ལ་དོ་སྣང་མཛད་མཁན་དེ་ཙམ་མང་པོ་མེད།

  བོད་ཡུལ་དུ་མཆོད་རྟེན་དར་ཚུལ།ད་ནི་བོད་གངས་ཅན་གྱི་ལྗོངས་སུ་ཇི་ལྟར་བྱུང་བ་མདོ་ཙམ་བཤད་པར་བྱ་སྟེ། རང་རེ་བོད་དུ་དམ་པ་ཆོས་ཀྱི་དབུ་མ་བརྙེས་གོང་ནས་མཆོད་རྟེན་ཡོད་པར་སེམས་ཏེ། གནའ་རབས་སུ་བོན་གྱི་ཆོས་ལུགས་དར་བ་ནས་བཟུང༌། བཙན་དང༌། ཡུལ་ལྷ་གཞི་བདག་གི་མཆོད་ཡུལ་གྱི་རྟེན་མཁར་ཞེས་པ། དེང་སང་ཡང་དེ་ཡི་རྒྱུན་མ་ནུབ་པར་བོད་ཁམས་ཀུན་ཏུ་མཐོང་རྒྱུ་ཡོད་པ་དེ། མིང་འདོགས་ཚུལ་གྱི་ཁྱད་པར་ཙམ་ལས། དེའི་དགོས་པ་དང་དོན་ཕྱོགས་མཚུངས་སུ་མཐོང་ངོ༌། དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་འཕྲུལ་དུ་གྲགས་པའི་སྤྲུལ་པའི་རྒྱལ་པོ་ལྷ་ཐོ་ཐོ་རི་གཉན་བཙན་དེ་ཉིད་དགུང་ལོ་དྲུག་ཅུ་བཞེངས་པའི་སྐབས། གསེར་གྱི་མཆོད་རྟེན་མུ་དྲའི་ཕྱག་རྒྱ་སོགས་ནམ་མཁའ་ནས་བབ་པའམ། ཡང་ན་ལོ་ཙཱ་བ་ལི་ཐེ་སེས་ཕུལ་བ་གང་ལྟར་ཡང་སྐབས་དེར་བོད་དུ་ནང་པ་སངས་རྒྱས་པའི་མཆོད་རྟེན་ཐོག་མར་བྱུང་བ་མངོན། ཆོས་རྒྱལ་སྲོང་བཙན་སྒམ་པོའི་དུས་སུ་དམ་པའི་ཆོས་ཀྱི་སྲོལ་རྒྱ་ཆེར་གཏོད། ལྷ་ས་དམར་པོ་རིའི་སྟེང་དུ་མཆོད་རྟེན་དཀར་པོ་དང༌། མཐའ་འདུལ་དང་ཡང་འདུལ་གྱི་ལྷ་ཁང་བརྒྱ་རྩ་བརྒྱད་ཀྱི་ཐོག་མ་ཁྲ་འབྲུག་བྱམས་པ་མི་འགྱུར་གྱི་གཙུག་ལག་ཁང་དུ་ལྷ་ཁང་མ་བཞེངས་སྔོན་ཀླུ་གདུག་པ་ཅན་སྦྲུལ་མགོ་ལྔ་དང་ལྡན་པ་ཞིག་བསྒྲལ་བའི་དོན་དུ་མཆོད་རྟེན་རྩེ་ལྔ་པ་བཞེངས། འོ་ཐང་མཚོའི་ཀླུའི་ཕོ་བྲང་གི་ལྷོ་ནུབ་ཏུ་ཙན་དན་གྱི་རུན་སྲང་ཡོད་པར་མཆོད་རྟེན་ཀེ་རུ་བརྩིགས། ར་ས་འཕྲུལ་སྣང་གཙུག་ལག་ཁང་དུ་མཛད་པ་བཅུ་གཉིས་དང་ཁྲོ་བོ་རྨེ་བརྩེགས་ཀྱི་རྒྱབ་ན་ཆོས་ཀྱི་རྒྱལ་པོ་རང་ཉིད་ཀྱི་ཕྱག་བཟོ་མཆོད་རྟེན་བརྒྱད་སོགས་བོད་ཁམས་ཀུན་ཏུ་མཆོད་རྟེན་མང་པོ་བཞེངས། ཁྲི་སྲོང་ལྡེའུ་བཙན་གྱི་དུས་སུ། སློབ་དཔོན་པདྨ་འབྱུང་གནས་བསམ་ཡས་སུ་ཐོག་མར་གདན་དྲངས་པའི་དུས་སུ་ཟུར་མཁར་རྡོའི་མཆོད་རྟེན་ནམ་ངོ་མཚར་རྡོའི་མཆོད་རྟེན་ལྔ་དང༌། བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་ཕྱོགས་བཞི་རུ་སྣ་ནམ་རྒྱལ་ཚ་ལྷ་སྣང་དང༌། མཆིམས་རྡོ་རྗེ་སྤྲེལ་ཆུང་སོགས་ཀྱིས་ལས་དཔོན་བྱས་ཏེ་མཆོད་རྟེན་དཀར་པོ་བྱང་ཆུབ་ཆེན་པོ་ཉན་ཐོས་ཀྱི་ལུགས་དང༌། མཆོད་རྟེན་དམར་པོ་ཆོས་ཀྱི་འཁོར་ལོ་པདྨས་བརྒྱན་པ་བྱང་ཆུབ་སེམས་དཔའི་ལུགས།མཆོད་རྟེན་ནག་པོ་དེ་བཞིན་གཤེགས་པའི་སྐུ་གདུང་གིས་བརྒྱན་པ་སངས་རྒྱས་ཀྱི་ལུགས།མཆོད་རྟེན་སྔོན་པོ་དཔལ་ལྷ་ལས་བབས་པ་དེ་བཞིན་གཤེགས་པའི་ལུགས་སྒོ་མང་བཅུ་དྲུག་གིས་བརྒྱན་པ་དང༌།མཆོད་རྟེན་འོད་འབར་བ་དང༌།ཕྱི་ལྕགས་རིའི་སྟེང་དུ་སངས་རྒྱས་ཀྱི་རིང་བསྲེལ་རེ་བཞུགས་པའི་མཆོད་རྟེན་བརྒྱ་རྩ་བརྒྱད་སོགས་བཞེངས།ཁྲི་གཙུག་ལྡེ་བཙན་རལ་བ་ཅན་གྱི་དུས་སུ་བཙན་པོའི་ཐུགས་དམ་གྱི་རྟེན་དུ་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས་པའི་ཡང་ཕུད་ཀྱི་ཡེར་པར་མཆོད་རྟེན་བཞེངས་པ་དང༌།དེའི་གཙང་ཁང་དགུ་ཐོག་གི་ཡང་རྩེའི་རྒྱ་ཕིབས་རླུང་གིས་བསྐྱོད་པ་ན་མཁའ་ལ་གདུགས་ལྟར་དུ་འཁོར་བ་དེ་ལྕགས་ཐག་གིས་ཟུར་བཞི་ནས་མཆོད་རྟེན་ཆེན་པོ་བཞིའི་ངོས་སུ་བཏགས།ལྷ་ལུང་དཔལ་རྡོར་གྱིས་ཡེར་པ་ལྷ་རི་སྙིང་པོར་ས་དཔྱད་མཛད་དེ་མཆོད་རྟེན་ཆེན་མོ་བཞེངས་པ་དང༌།ལོ་ཙཱ་བ་སྐ་ཅོག་ཞང་གསུམ་མྱ་མན་ལས་འདས་པའི་སྐུ་གདུང་གི་མཆོད་རྟེན་ཧས་པོ་རིར་བརྩིགས་པ་སོགས།མཆོད་རྟེན་མང་དུ་བཞེངས་པ་ཡིན་ལ།མདོར་ན་དེ་ཡན་ཆད་བསྟན་པ་སྔ་དར་གྱི་དུས་སུ་བོད་དུ་གཙུག་ལག་ཁང་སྟོང་རྩ་བརྒྱད་བཞེངས་པ་གསུངས་ལ་གཙུག་ལག་ཁང་རེའི་ནང་དུ་སྐུ་གསུང་ཐུགས་ཀྱི་རྟེན་རེ་མི་བཞུགས་མི་སྲིད་མོད།མཆོད་རྟེན་བགྲངས་ལས་འདས་པ་ཞིག་བཞེངས་མྱོང་བ་ནི་རིག་པས་དཔྱད་ན་ཤེས་པར་འགྱུར་རོ།

  གླང་དར་གྱིས་བསྟན་པ་བསྣུབས་ནས་བོད་དབུས་སུ་རྟེན་གསུམ་གྱི་བཟོ་རྒྱུན་ཕལ་ཆེར་ཆད་པའི་སྐབས།བླ་ཆེན་དགོངས་པ་རབ་གསལ་གྱིས་མདོ་སྨད་རི་བོ་ཏན་ཏིག་ཏུ་ལྷ་ཁང་དང་མཆོད་རྟེན་མང་པོ་བཞེངས།ཚོན་རྩི་ཡང་ཡུལ་དེར་བྱུང༌།བཟོ་