ཆུ་ཕུད་ལེན་པའི་སྲོལ།

  བོད་མིར་ལོ་གསར་ཚེས་གཅིག་གི་ཞོགས་པ་ངེས་པར་དུ་ཆུ་ཕུད་ལེན་པའི་སྲོལ་ཞིག་ཡོད།  དེ་ཡང་ཞོགས་པ་བྱ་སྐད་དང་པོ་གྲགས་པ་ཙམ་ལ།  ཁྱིམ་ཚང་གཞན་གྱི་སྔོན་ལ་ཆུ་ཕུད་ཐོབ་པའི་ཆེད།  བུད་མེད་གཙོ་བདག་གཅིག་གིས་རྒྱབ་ཏུ་ཆུ་བན་དང་ལག་ཏུ་ཆང་ཕུད་ཕྱེ་མར་བསང་དང་བཅས་པ་ཁུར་ནས།  ཆུ་ཕུད་ལེན་པར་འགྲོ་གི་ཡོད།  དེ་ནས་ཆུ་ལེན་སར་འབྱོར་རྗེས།  ཐོག་མར་ཆུའི་ལྷ་མོ་གསོལ་བ།  ཞེས་བསང་བཏང་ནས་ཇ་ཕུད་ཆང་ཕུད་འབུལ་བ་དང་སྦྲགས་སྨོན་ལམ་འདེབས་པ་དང་།  དེ་ནས་ཆུ་ཕུད་བླངས་ཏེ་ཕྱིར་ལྟས་སོགས་གང་ཡང་མེད་པར་ཐད་ཀར་རང་ཁྱིམ་དུ་ལོག་པ་དང་།  ཤོད་སྲོལ་ལ་ཕྱིར་བལྟས་ན།  ལོ་གསར་པའི་ཆུ་ཕུད་ཀྱི“གཡང”ཕྱི་ལ་ཤོར་གྱི་ཡོད་སྐད་འདུག  དེ་ནས་ནང་དུ་འབྱོར་བའི་རྗེས།  སྔོན་ལ་ཆུ་དེ་ནས་ཡོན་ཆབ་འབུལ་བ་དང་།  དེ་ནས་འཕྲོས་རྣམས་ཆུ་ཟངས་ནང་བཤུག་སྟེ་ཕུད་ཀྱི་དང་པོར་བརྩི་བ་མ་ཟད།  ཆུ་ཕུད་དེར་ཆང་སྐོལ་བསྐོལ་ནས་ཁྱིམ་མི་ཚང་མར་སྒྲོན་ཏེ།  ལོ་གསར་དངོས་སུ་འགོ་ཚུགས་པའི་རྟེན་འབྲེལ་མཚོན་པར་བྱེད་ཀྱི་ཡོད།