ནོར་བུ་ཆ་བདུན་མཚམས་སྦྱོར་མདོར་བསྡུས།

ནོར་བུ་ཆ་བདུན།

            ནོར་བུ་ཆ་བདུན་གྱི་མཚོན་བྱ་ནི་ནོར་གཡང་ཡིན་ཞིང༌། བདུན་ནི། རྒྱལ་པོའི་རྣ་ཆ་དང༌། བཙུན་མོའི་རྣ་ཆ། བློན་པོའི་རྣ་ཆ། བསེ་རུའི་རྭ། བྱུ་རུའི་སྡོང་པོ། གླང་ཆེན་གྱི་མཆེ་བ། ནོར་བུ་མིག་གསུམ་པ་བཅས་སུ་བགྲངས་ཀྱང༌། དེ་དག་རི་མོ་ལ་བཀོད་ན་མི་མཛེས་པས་ལྷའི་ནོར་བུ་འབར་བ་དང༌། མིའི་ནོར་བུ་མིག་གསུམ། ཀླུའི་ནོར་བུ་མིག་གཅིག་བཅས་ནོར་བུ་རིགས་གསུམ་དགའ་འཁྱིལ་ལམ། ཡང་ན་གོང་དུ་ལྷའི་ནོར་བུ་མེ་འབར་བ། གཡས་མིའི་ནོར་བུ། གཡོན་ཀླུའི་ནོར་བུ་བཅས་བརྩེགས་མར་འབྲི། ཁ་དོག་སྣ་ཚོགས་འབྱུང་བར་མཚོན་དོན་ལ་འགྱུར་བ་མེད་དོ།།