འབར་ཁམས་ཀྱི་གནའ་བོའི་རྡོ་མཁར།

   འབར་ཁམས་ནི་རྔ་བ་བོད་རིགས་ཆའང་རིགས་རང་སྐྱོང་ཁུལ་གྱི་ལྟེ་གནས་སུ་ཡོད། ས་རྒྱ་ལ་སྤྱི་ལེ་གྲུ་བཞི་མ་༦༦༣༣ཡོད་པ་དང་།   འབར་ཁམས་གྱི་ལོ་རྒྱུས་ཡུན་རིང་ཞིང་། རྫོང་ཁོངས་སུ་ལྷ་ཤུགས་གནའ་ཤུལ་དང་མཁོ་ནོ་གནའ་ཤུལ་ལ་བརྟག་ཞིབ་བྱས་པ་ལྟར་ན་འབར་ཁམས་ཀྱི་ལོ་རྒྱུས་ནི་གནའ་རབས་རྡོ་ཆས་གསར་བའི་དུས་རབས་སུ་ཁུངས་འདེད་བྱེད་ཐུབ། འབར་ཁམས་རྫོང་གི་གྲོང་མི་མང་ཆེ་བ་ནི་རྒྱལ་རོང་བ་ཡིན་ལ། ༢༠༠༦ལོར་བསྡོམས་རྩིས་བྱས་པས་མི་གྲངས་ཁྲི༥.༥ཙམ་ཡོད་ལ་དེའི་ནང་བོད་རིགས་ཁྲི༤ཙམ་ཡོད་པས་བརྒྱ་ཆ༧༡.༩༡ཟིན། རྒྱལ་རོང་ཞེས་པ་ནི་རྒྱལ་མོ་ཚ་བ་རོང་གི་བསྡུས་མིང་ཡིན།

   ལོ་རྒྱུས་ཐོག་རྡོ་མཁར་འཛུགས་སྐྲུན་བྱས་པའི་དུས་རབས་དང་འཛུགས་གནས། དབྱིབས། མཐོ་ཚད། ཐོབ་ཐང་སོགས་མི་འདྲ་བས་སོ་སོ་ལ་རང་རང་གི་སྤྱོད་སྒོ་དང་མཚོན་དོན་ཡོད་དེ། ལ་ལ་ནི་དམག་བརྡ་གཏོང་བྱེད་དང་ལ་ལ་ནི་གཡུལ་ས་དང་། ཉེན་གཡོལ་ཁང་། མཐའ་མཚམས་ཀྱི་རྟགས། ཆོས་སྒྲུབ་ས།   བང་མཛོད་སོགས་ཡིན་པ་མ་ཟད། ད་དུང་རྒྱལ་པོའི་དབང་ཆ་དང་གོ་གནས་མཚོན་རྟགས་ཀྱང་ཡིན། ང་ཚོས་དཔྱད་པ་ལྟར་ན་འབར་ཁམས་ཀྱི་ཁོངས་སུ་ད་ལྟ་རྡོ་མཁར༦༡དང་མཁར་ཁྱིམ༧༦༠ཡོད། དེའི་ནང་དུ་རྡོ་མཁར་ཟུར་བརྒྱད་ཅན༣དང་ཟུར་དྲུག་ཅན༢ ཟུར་ལྔ་ཅན་མཁར༢ཡོད་ལ་གཞན་རྣམས་ཟུར་བཞི་ཅན་ཡིན། དེ་དག་ལོ་ངོ་བརྒྱ་ཕྲག་ཁ་ཤས་འདས་ཀྱང་སྤུས་ཀ་ལེགས་ཤིང་རྒྱ་ཁྱོན་ཆེ་བའི་རྒྱལ་པོའི་མཁར་དང་རྡོ་མཁར་སོགས་ད་ལྟའང་ཡོད་པ་མ་ཟད། དེའི་ནང་དུ་ཟུར་ལྔ་ཅན་དང་། བརྗིད་རྔམ་ཆེ་ཞིང་ལྟ་ན་སྡུག་པའི་ཟུར་བརྒྱད་ཅན་དང་། གས་སྐྱོན་ཡོད་པའི་ཟུར་དྲུག་ཅན་གྱི་རྡོ་མཁར་སོགས་ཡོད། དེ་མིན་ད་ལྟ་བེད་སྤྱོད་བཞིན་པའི་མཁར་ཁྱིམ་མང་པོ་ཡོད། གཞན་ཡང་རྡོ་མཁར་གྱི་རྩིག་ངོས་ལ་ལྟ་ན་སྡུག་པའི་རི་མོ་ཁྱད་པར་ཅན་ལྡན།  

རྒྱལ་པོའི་རྡོ་མཁར།

   འབར་ཁམས་ལ་སྔར་རྒྱལ་ཁག་བཞི་ཟེར་བའི་རྒྱུ་མཚན་ནི་འབར་ཁམས་ས་ཁུལ་ལ་སྔར་རྒྱལ་རོང་རྒྱལ་ཁག་བཅོ་བརྒྱད་ནང་གི་མཆོག་རྩེ་རྒྱལ་པོ་དང་རྫོང་འགག་རྒྱལ་པོ། དམ་པ་རྒྱལ་པོ། སོ་མང་རྒྱལ་པོ་བཅས་རྒྱལ་ཁག་བཞི་ཡོད་པ་ཡིན།    རྒྱལ་པོའི་ཕོ་བྲང་རྡོ་མཁར་བཟོ་སྐབས་རང་རང་གི་མངའ་ཁོངས་ནས་རྡོ་བཟོ་ལག་རྩལ་ཆེས་ལེགས་པོ་ཡོད་པ་ལ་བཀའ་བཏང་ནས་སྐྲུན་དུ་འཇུག་པ་མ་ཟད། རྒྱལ་པོ་གཞན་པའི་མངའ་འོག་གི་བཟོ་མཁས་པ་གདན་དྲངས་ཏེ་སྐྲུན་པ་ཡིན་པ་དང་། རྡོ་མཁར་བཟོ་སྐབས་མི་ཤུགས་དང་དངོས་ཤུགས་འབོར་ཆེན། དུས་ཡུན་རིང་པོ་བཅས་སོང་ཡོད་པས། རྒྱལ་པོའི་ཕོ་བྲང་དང་རྡོ་མཁར་གྱི་བཟོ་སྐྲུན་རྒྱ་ཁྱོན་ཆེ་ཞིང་བཟོ་སྐྲུན་སྤུས་ཀ་ལེགས་པ་མ་ཟད། རྒྱལ་རོང་བོད་དམངས་རྡོ་མཁར་བཟོ་བའི་ལག་རྩལ་ཆེས་མཐོ་བའི་ཆུ་ཚད་མཚོན་ཐུབ།

མཆོག་རྩེ་རྒྱལ་པོའི་རྡོ་མཁར་།

   མཆོག་རྩེ་རྒྱལ་པོའི་རྡོ་མཁར་ནི་འབར་ཁམས་རྫོང་མཁར་དང་བར་ཐག་སྤྱི་ལེ་བདུན་ཡོད་པའི་ཤར་ཕྱོགས་ཀྱི་མཆོག་རྩེ་གྲོང་བརྡལ་གྱི་སའི་སོ་གྲོང་སྡེར་ཡོད་ལ།    མཆོག་རྩེའི་རྒྱལ་རབས་དང་པོ་ནི་སྤྱི་ལོ༡༢༨༦ལོར་སྲིད་དབང་འཛིན་འགོ་བཟུང་བའི་རྒྱལ་པོ་སྟག་འབུམ་ཡིན་པ་དང་། དེ་ནས་བཅིངས་འགྲོལ་མ་གཏོང་བར་དུ་རྒྱལ་རྒྱུད་ཁྱོན་བསྡོམས་བཅུ་བདུན་སོང་། རྒྱལ་པོ་སྟག་འབུམ་ནི་སོ་མང་རྒྱལ་རབས་གསུམ་པའི་རྒྱལ་པོ་རྒྱལ་སྩ་བན་ཐར་གྱི་བུ་གསུམ་ལས་ཆུང་བ་ཡིན།    མཆོག་རྩེ་རྒྱལ་རབས་གསུམ་པའི་རྒྱལ་པོ་ནམ་མཁའ་འབུམ་གྱིས(༡༤༠༡ལོ་ནས༡༤༤༧）སྲིད་དབང་བཟུང་དུས། རྒྱལ་པོས་རྗེ་ཙོང་ཁ་པའི་དངོས་སློབ་ཚ་ཁོ་ངག་དབང་གྲགས་པར་རོགས་བྱས་ནས་མཆོག་རྩེ་རྡོ་མཁར་ཡི་ལྷོ་ཕྱོགས་སུ་ཚ་ཁོ་དགོན་པ་བཏབ། མཆོག་རྩེ་རྒྱལ་རབས་ལྔ་བའི་རྒྱལ་པོ་རྒྱ་གར་འབུམ(༡༥༡༢ལོ་ནས༡༥༧༡）གྱིས་སྲིད་དབང་འཛིན་དུས།   རྒྱལ་པོས་ཁུ་འཇོ་བླ་མ་ནོར་བུ་ལ་རོགས་བྱས་ནས་མཆོག་རྩེ་རྡོ་མཁར་འགྲམ་དུ་སའི་སོ་དགོན་པ་བཏབ་པ་དང་རྗེས་སུ་དགོན་པ་ནང་དུ་བླ་མ་ནོར་བུའི་སྐུ་གདུང་བཞེངས་ཡོད། མཆོག་རྩེ་རྒྱལ་རྒྱུད་ཀྱི་ནང་དུ་རྒྱལ་མོ་གཉིས་ཡོད་ལ་དེ་ནི་རྒྱལ་རབས་བཅུ་གཅིག་པ་རྒྱལ་མོ་གཡུང་དྲུང་ལྷ་མོ(༡༨༡༨ལོ་ནས༡༨༤༣）དང་རྒྱལ་རབས་བཅུ་གསུམ་པ་རྒྱལ་མོ་རིན་ཆེན་ལྷ་མོ(༡༨༧༣ལོ་ནས༡༨༩༡）གཉིས་ཡིན། མཆོག་རྩེ་རྒྱལ་རབས་བཅོ་ལྔ་བའི་རྒྱལ་པོ་མཁྱེན་རབ་དམ་པ་རྒྱ་མཚོ་ནི(༡༨༩༤ལོ་ནས༡༩༡༠）དགེ་ལུགས་པའི་བླ་མ་ཡིན་པས་རྒྱལ་རྒྱུད་མེད་པས། ༡༩