བོད་རིགས་ཀྱིས་སྤྱོད་གོ་ཆེས་ཆེ་བའི་ཟས་སྣོད་ཅ་ནེ།

  གནའ་ནས་ད་ལྟའི་བར་དུ་བོད་རིགས་རང་གི་སྲོལ་རྒྱུན་ལྟར་དུ་མི་ཕལ་ཆེ་བའི་སྤྱོད་གོ་ཆེས་ཆེ་བའི་ཟས་སྣོད་ནི་རང་ཉིད་ཀྱི་ལག་ནང་གི་ཅ་ནེ་ཡིན་ལ།  ཇ་དང་ཆང་སོགས་འཐུང་བའམ་རྩམ་པ་ཟ་ན་ཡང་ཅ་ནེ་ནི་བོད་མིའི་ལག་ནང་གི་མེད་དུ་མི་རུང་བའི་ཟས་སྣོད་ཡིན་ཏེ།  ཅ་ནེ་བཟོ་བའི་རྒྱུ་ཆ་ལ་ཤིང་སྟག་པ་དང་ཡང་ན་གཞན་པའི་ཤིང་སྣ་མང་པོ་ལས་ཤིང་རྐོས་བྱས་ནས་གྲུབ་པ་དང་།  སྤུས་ལེགས་ཤིང་རྒྱུ་སྲ་བ་དང་།  སྤྱིར་བཏང་དུ་གས་ཆག་མི་ཤོར་ཞིང་།  ཞིབ་འཇམ་ལྡན་པར་མ་ཟད།  ཕྱི་ནང་གསེར་དངུལ་ཟངས་གསུམ་སོགས་ཀྱིས་བརྒྱན་ཏེ་སྟེང་ལ་བཀྲ་ཤིས་རྟགས་བརྒྱད་དང་།  གཡུ་འབྲུག་སྔོན་མོ་ལ་སོགས་ཀྱི་རི་མོས་སྤྲས་ཤིང་།  ཧ་ཅང་མཛེས་སྣང་སྟེར། 

  དེ་ཡང་ཅ་ནེ་བཟོ་བའི་བརྒྱུད་རིམ་ལ་ལྔ་ཡོད་དེ།  དང་བོ་རྒྱུ་ཆ་བདམས་པ།  གཉིས་པ་རླུང་སྐམས་བྱེད་པ།  གསུམ་པ་དབྱིབས་བཟོ།  བཞི་བ་འཇམ་རྡར་བྱེད་པ།  ལྔ་བ་ཚོས་དབྱུག་པ་བཅས་ཡིན།  ཅ་ནེ་ལ་ཡང་ཆེ་ཆུང་སྣ་ཚོགས་ཡོད་པ་ལ་དེ་རེ་རེ་ཡིས་སྤྱོད་སྒོ་ཡང་མི་འདྲ་ཞིང་ནང་དུ་ཟས་རིགས་ལ་སོགས་ཉར་ན་དྲི་མི་ཡལ་བར་ཁ་ལ་ཞིམ་པ་དང་།  ཡུལ་ཕྱོགས་གང་དུ་འགྲོ་ན་ཡང་ཁྱེར་བདེ་ཞིང་དུག་འགོག་ལ་སོགས་ཀྱི་ཁྱད་ཆོས་ལྡན།