བོད་ཤོག་བཟོ་སྟངས།

    ཞར་བྱུང་ཤོག་བུ་སྦག་འདོན་བྱེད་པའི་གདམས་ངག་ནི། བག་ཆུ་སླ་བཙོས་དྭངས་མ་བོང་ཆེ་བར་བྱ། དེ་ལ་དར་བ་མ་བཏགས་པ་བག་ཆུའི་བཞི་ཆ་ཙམ་བཏང༌། སྤྱིན་ཆུའི་དྭངས་མ་ཅུང་ཟད་བཏང༌། དེ་རྣམས་བསྲེས་ལ་དྲོ་འཇམ་ལ་བག་འདོན་བྱ་དགོས་ཏེ། ཧ་ཅང་ཚ་ཆེ་ན་ཤོག་བུ་འཚིག གྲང་ན་བག་ཆུ་མི་འགོ་བས་ཤོག་བུ་སྲ་འཐིང་མི་འོང༌།དེ་བས་ཚ་དྲོད་རན་པར་བྱ། རྫས་དེ་རྣམས་ཀྱི་ཡོན་ཏན་ནི། དར་བས་དཀར་ལ་དྭངས་པ་འབྱུང་བག་ཆུ་སྲ་ལ་འབོལ་བ་འབྱུང༌། སྤྱིན་ཆུས་མཁྲེགས་ཤིང་མདངས་ལྡན་འོང་ཞིང་ཡི་གེ་མི་འབྱམས་པ་འོང༌། ཤིན་ཏུ་དཀར་པོ་འདོད་ན་ཀ་རག་བརྡར་བའི་ཁུ་བ་ཅུང་ཟད་བཏང་བས་ཤིན་ཏུ་ལེགས་པ་འབྱུང་སྟེ་མང་ན་ལྗིད་ཆེ་བར་འོང༌། བག་ཆུ་མང་ཆེ་ན་ཤོག་བུ་འཚིག་ཅིང་ཐིག་མི་ལེན་པ་འོང༌། སྤྱིན་ཆུ་གར་ཆེ་ན་ཤོག་བུ་གྱོང་ཞིང་སྣག་མི་ལེན་པ་འོང༌། དེས་ན་གོང་ལྟར་ཚོད་ཟིན་པར་བྱའོ།།

  ཤོག་རྒྱུ་བཟང་ངན་དང་ཤོག་ལས་བཟང་ངན་གྱིས་ཤོག་བུ་སྣ་ཚོགས་འོང་སྟེ་དེ་ནི་ཤོག་བཟོའི་ཚུལ་ལས་ཤེས་སོ།། དབུར་རྡོའི་ཁྱད་པར་ནི། དུང་གིས་དབུར་ན་འཇམ་པོར་འོང་སྟེ་ཤོག་བུ་ཅུང་ཟད་སྔོན་པོར་འགྲོ། རྡོ་ཡིས་དབུར་ན་ཤོག་བུ་ཚིག་ནས་འོང༌། མཆོང་གིས་དབུར་ན་རི་མོ་དོད། ལྕགས་སོགས་ཀྱིས་དབུར་ན་གཡའ་འོང༌། དེས་ན་གཟི་སེར་ཁྲས་དབུར་ན་མདོག་ལེགས་ཤིང་འཇམ་ཤོག་བུ་འབོལ་བར་འོང་བས་དེ་བཟང་ཞེས་སྔར་གྱི་འབྲི་མཁན་དག་གི་ཉམས་མྱོང་དུ་བཤད། དེ་ལྟར་མ་རྙེད་ན་རྭ་སོགས་ཀྱིས་རུང་ཙམ་དང༌། མ་ན་ཧོ་སོགས་རིན་ཆེན་མཁྲེགས་འཇམ་རྣམས་བཟང་ངོ༌། །བརྡར་གདན་ཤིང་ལེབ་དྲི་མེད་འཇམ་བརྟན་ངོས་སུ། ལག་བརྡར་རམ་གནམ་དབུར་གྱིས་ཁྱབ་པར་དལ་དབུར་བྱས་ན་ལེགས། ཐིག་ནི་སེར་བོ་འདོད་ན་སྐྱེར་ཤུན། ལྗང་གུར་དབྱར་གྱི་གྲེས་སྔོན་ལྗང་སེར་སྟོན་ཁའི་གྲེས་རྩེ་སེར་བོར་སོང་བའི་ཁུ་བ།དམར་བོ་ཆུ་རྩ་བཟང་བོ་ཚ་ལས་ཁ་བསྒྱུར་བ། དེ་རྣམས་ནང་དུ་བྱང་བུལ་ལེགས་པ་ཅུང་ཟད་བཏང་ལ། ཉི་མར་ཡུན་རིང་འདུལ་བ་གནད་ཡིན་ནོ།། དམར་སེར་འདོད་ན་ཆུ་རྩ་ཉག་གཅིག་མཚལ་གྱིས་ཐིག་བཏབ་ན་དམར་ཀྱང་ཡི་གེ་མདོག་ལེགས་པོ་མི་འོང༌། སྔོན་པོ་ཚོན་རམས་དྭངས་མ། དཀར་བོ་དུང་ཐལ་རུལ་བཅུག་པ། ནག་པོ་ཞ་ཉེའི་གཡའ་ཐིག ཐིག་ཕྲ་འདོད་གྲི་རྩེ། སྦོམ་འདོད་སྨྱུག་ཁ་ཟུམ། སྦོམ་ཕྲ་རན་འདོད་ཇི་ཙམ་འདོད་པའི་སྙུག་ཤག་གིས་བྱ། ཡི་གེ་ཤིན་ཏུ་ལེགས་པོར་འབྲི་ན་ཐིག་ཕྲ་བ་བྱ་སྟེ་དེས་ཡིག་གཟུགས་མི་སྒྲིབ་པའི་ཕྱིར་རོ།། ཡི་གེ་འབྲིང་ཙམ་འབྲི་ཤེས་ན་ཐིག་སྦོམ་ཕྲ་རན་པར་བྱ། ཡིག་མགོ་འདྲོངས་ཤིང་ཡིག་མིག་དང་ཐིག་མདངས་སྤེལ་བའི་གནད་ཡོད། ཡིག་རིས་ཐ་མ་ཙམ་ལས་འབྲི་མི་ཤེས་ན་ཐིག་སྦོམ་པར་བྱ་སྟེ། ཡི་གེ་དང་ཐིག་གཉིས་མཚན་སྤེལ་དུ་སོང་ནས་ལེགས། མདོག་ཐོན་པའི་གནད་ཡོད་ཅེས་བཤད། ཡི་གེ་ཆེན་པོ་ཡིན་ན་དྲུག་ཐིག་གམ་བརྒྱད་ཐིག་བཏབ། འབྲིང་ཙམ་ལ་བཞི་ཐིག་གམ་སུམ་ཐིག ཡིག་ཆུང་ལ་ཉིས་ཐིག་གམ་རྐྱང་ཐིག་གོ ། དེ་ལྟར་འདེབས་ན་མགོ་ཐིག་ཅུང་སྦོམ་ལ་ཡན་ལག་གི་ཐིག་རྣམས་ཤིན་ཏུ་ཕྲ་བར་བྱའོ།། ཞེས་ཐིག་གི་ཉམས་མྱོང་ཅན་དག་གཅེས་པ་ཡིན། ཕྱི་ལ་ཁལ་གཅིག་ནང་ལ་དྲུག་བརྡར་བ་ཞལ་ཤེས་དམ་པ་ཡིན། ངར་ཆུང་ཐད་ཀར་བརྡར་བས་རྣོ་ཁ་མྱུར་དུ་ལེན། དར་ཆེན་བསྐོར་ཞིང་བརྡར་བས་སོ་ཁ་འགུག་མི་འགྱུར། དེ་ལྟར་བརྗོད་པ་སྨྱུག་གྲིའི་ཉམས་མྱོང་ངོ༌།།  སྨྱུག་གུའི་ཁྱད་པར་ནི། སྦུ་གུ་ཆུང་ཞིང་བཏེགས་ན་ལྕི། རྩི་འཇམ་པོས་མནན་ན་འདྲེད་པའི་སྨྱུག་མ་ནི་སྨྱུ་གུའི་རྒྱུར་བཟང༌། སྨྱུག་སྲ་བའི་རིགས་ཆུས་རླན་དཀའ་བས་ལེགས། སྣུམ་བྱུག་སྟེ་དུད་ཁའམ་མེ་ཉིར་བསྲེ་བྱུག་བྱས་པས་སྲ་བ་འོང༌། དེའི་རྩེར་སོར་གསུམ་གཞལ་བའི་སར། གྲི་ཁམ་གཉིས་བཞོག་ནས། སུམ་གཉིས་རྫིང་ཤག སུམ་ཆ་ཡུ་བ་འདྲ་ན་བཟང༌། རྒྱུག་ཡིག་འབྲི་ན་སྔ་ཟུར་རིང༌། ཚིག་བྲིས་ན་འབྲི་མཉམ་པོར་བཅད། ཟླུམ་བྲིས་འབྲི་ན་ཉིས་ཆོད་བྱ། མགྱོགས་པར་འབྲི་ན་གས་ཆེན་དང༌། ལེགས་པར་འབྲི་ན་གས་ཆུང་བྱ། སྨྱུག་ཁ་ཆིག་ཆོད་བྱས་གྱུར་ན། ཡི་གེ་ལེགས་པའི་གནད་གཅིག་ཡོད། སྨྱུག་ཁ་ཉིས་ཆོད་བྱས་གྱུར་ན། སྨྱུག་ཁ་སྲ་བའི་གནད་གཅིག་ཡོད་ཅེས་བཤད།

 《བཟོ་གནས་ཉེར་མཁོའི་ཟ་མ་ཏོག་བཞུགས་སོ》ལས་བཤུས།