བོད་ཀྱི་དམངས་སྲོལ་ལས་ལབ་ཙེའི་བྱུང་འཕེལ་སྐོར་རགས་ཙམ་གླེང་བ

  ལབ་ཙེའི་སྲོལ་འདིའི་བྱུང་ཚུལ་ཐད། ད་སྔ་བརྗོད་སྲོལ་མི་མཐུན་པ་འགའ་མཆིས་ཏེ། ལ་ལས་འདི་ཉིད་ཞང་སྐད་ཡིན་ཞིང་ལམ་རྟགས་ལས་འགྱུར་བར་བཤད་པ་དང༌། ལ་ལས་གཡུལ་དུ་ཤི་པའི་དཔའ་བོའི་རིགས་ལ་མྱ་ངན་དང་རྗེས་དྲན་གྱི་ཚུལ་དུ་མདའ་གྲི་མདུང་གསུམ་བཙུགས་ཏེ་དར་བར་བཤད་པ་དང༌། ཡང་ལ་ལས་སྔོན་རྒྱ་གར་གྱི་ཕྱི་རོལ་བའི་མཆོད་སྲོལ་ཞིག་ལས་དར་བ་དང༌། ད་དུང་རེ་འགས་ས་ཐོ་ལས་འགྱུར་བར་བཤད་པ་སོགས་སྣ་ཚོགས་མཆིས་མོད། ང་ཚོའི་ད་ལྟ་ལབ་ཙེ་བསྟོད་པའི་དགོས་པ་དང་དེའི་བསྟོད་ཚུལ། དེ་ལས་འཕྲོས་པའི་གནའ་བོའི་མི་རིགས་ཀྱི་འདུ་ཤེས་སོགས་ལ་ཞིབ་ཏུ་དཔགས་ན་དེ་ནི་ཆེས་གནའ་བོའི་དུས་སུ་གནམ་ས་བར་སྣང་དང་བཅས་པར་ལྷས་ཁྱབ་ནས་ཡོད་པ་དང༌། གང་དུ་ལྷ་ཡོད་པར་ངོས་འཛིན་པའི་དུས་དེ་ཙམ་ནས་རིམ་བཞིན་དར་བ་ཞིག་ཡིན་པར་གདོན་མི་ཟ་སྟེ། ཐུན་མིན་གྱི་འཚོ་བའི་ཁོར་ཡུག་ནང་གནས་པའི་རང་ཅག་གི་མེས་པོ་གོང་མ་རྣམས་ཀྱིས་འཇིག་རྟེན་ཁམས་ཀྱི་རང་བྱུང་གི་སྣང་ཚུལ་དང་འཚེ་བ་སྣ་ཚོགས་ཏེ་ཉི་ཟླའི་འཆར་ནུབ་དང༌། སའི་གཡོ་འགུལ། གློག་འགྱུ་ཐོག་རྒྱག སྐྱེ་རྒ་ན་འཆི་སོགས་ལ་ཁ་ལོ་བསྒྱུར་མཁན་གྱི་བདག་པོ་ཞིག་ཡོད་པར་སྙམ་སྟེ། རང་བྱུང་ལས་འདས་པའི་སྟོབས་ཤུགས་དེ་ལ་གསོལ་མཆོད་རྙེད་བཀུར་བྱས་ན་རང་ཉིད་ཀྱི་སྐྱབས་གནས་དཔུང་རོགས་སུ་འོང་བར་བསམ་པ་དང༌། དེ་དག་ལ་འཚེ་བའི་ལས་བྱས་ཚེ་བགེགས་བར་སྣ་ཚོགས་ཡོང་ངེས་པའི་འདུ་ཤེས་བཅངས་ཡོད། མཁས་པ་ལྡེའུས་མཛད་པའི་《རྒྱ་བོད་ཀྱི་ཆོས་འབྱུང་རྒྱས་པ》ཡི་ནང་གསལ་སྟོད་ལྷ་རབས་སམ་ཡོ་ག་ལྷ་གྱེས་ཅན་གྱི་གཞུང་ལས་ལུང་དྲངས་པ་ལྟར་ན། “དང་པོ་བསྐལ་བ་བར་བསྐལ་སྲེད་པ་མ་སྲིད་ཙམ་ན། ཕྱ་ཡེ་མཁྱེན་ཆེན་པོ་བྱ་བ་གཅིག་སྲིད་པ་ཕྱ་ཡིས་བསྐོར་ཏེ་བྱུང༌། དེ་ལས་ཁོ་མ་འབྲོ་རྗེའི་ལེགས་པའི་སྡེ་དྲུག་ཅེས་པ་གཅིག་སྲིད། དེའི་ཞལ་གྱི་ངད་སྤྱན་གྱི་སྒྲོལ་མ། དབུ་སྐྲ་ཕྱར་ཕྱོར་ཙམ་གཅིག་གནས་པ་སྟེ། གནམ་ས་ཆ་མ་ཕྱེད་ཀྱི་བར་དུ་ཕུ་བཏབ་པས། གནམ་ས་ཆ་ཕྱེད་དེ་གནམ་རིམ་པ་བཅུ་གསུམ་ནི་ཁང་རིམ་ཁང་དུ་ཡས་ཕུབ། ས་རིམ་པ་བཅུ་གསུམ་ནི་གདན་རིམ་གདན་དུ་མས་བཏིངས་”ཞེས་གནམ་ས་གའུ་ཁ་སྦྱོར་ལྟ་བུའི་གནམ་སའི་ནང་རིམ་པར་སྲིད་པའི་ལྷ་རབས་མཆེད་བཞི་འཁྲུངས་པ་དྲངས་ཐོག དེ་བཞི་ལྷ་ཡུལ་དང་མི་ཡུལ་གང་དུ་སྡོད་པར་ཤོ་བཏབ་པས། རྒྱ་ལ་འབྲོང་ནམ་འོ་དེ་གུང་རྒྱལ་གཉིས་ཕམ་སྟེ། འོ་དེ་གུང་རྒྱལ་ནམ་མཁའ་འཕྲུལ་ཙམ་ན་བཞུགས་དུས་གནམ་གྱི་ཐང་ང་དགུ་དང་བཤོས་པའི་སྲས་དགུ་བརྒྱ་ཅོ་གཅིག་འཁྲུངས་སོ། ཆར་བབས་པའི་གྲངས་ལས་མང་བའི་ལྷ་བྲན་ཀུན་གྱི་ཡབ་མཛད་ཟེར། བར་སྣང་ལ་བཞུགས་དུས་བར་གྱི་ཐང་ང་དགུ་དང་བཤོས་པའི་སྲས་རི་རབ་གྱི་རྡུལ་ཕྲན་བས་མང་བའི་ལྷ་བྲན་ཀུན་གྱི་ཡབ་མཛད། ས་འོག་ལ་གཤེགས་པའི་ཚེ་མི་མངས་ཀྱི་ལྷར་གཤེགས། ལྷ་དགུའི་ཡབ་ལགས་སོ་ཞེས་པ་ལྟར་སྐབས་དེ་དུས་ནས་གནམ་ས་བར་སྣང་ཀུན་ཏུ་མི་ལས་འདས་པ། རང་བྱུང་ལས་འདས་པའི་སྟོབས་ཤུགས་མངའ་བའི་ལྷ་ཡོད་པར་འདོད་པའི་བསམ་ཚུལ་ལྷག་གེར་མཚོན་ཞིང༌། དེའི་ཚེ་ན་གནའ་རབས་ཀྱི་མི་ཚོས་དེ་དུས་ཀྱི་རྒྱུ་མཚན་བརྗོད་པར་དཀའ་བའི་རང་བྱུང་གི་སྣང་ཚུལ་ལ་སྐྲག་སྣང་དང་བཅས་པའི་སྒོ་ནས་དད་པ་སྐྱེས་ཤིང༌། དེ་དག་སྤྱི་ཚོགས་འཕེལ་བའི་ལོ་རྒྱུས་ཁྲོད་མིའི་རིགས་ཀྱི་གདོད་མའི་འདུ་ཤེས་ཀྱིས་མུ་མཐུད་རྟོག་བཟོ་བྱས་པ་ལས་རིམ་བཞིན་མིའི་སྤྱོད་ལམ་དང་གཤིས་ཀ་ལྡན་པའི་ལྷའི་རྣམ་པར་གྲུབ་ཡོད། རང་བྱུང་གི་སྣང་ཚུལ་ལ་ཁ་ལོ་བསྒྱུར་བའི་ལྷ་དེ་དག་རང་ཉིད་གནས་སའི་ཉེ་འཁོར་གྱི་འཇིགས་ཡེར་བའི་རི་ཚོགས་སམ་ཡང་ན་དེ་དག་ལས་ཆེས་མཐོ་ཤོས་ཀྱི་རི་རྩེར་གནས་པར་སྙམ་སྟེ། དེ་ལ་སྐབས་དེའི་རང་ཕྱོགས་སྲུང་བྱེད་ཀྱི་མཚོན་ཆ་གཙོ་གྲས་མདའ་གྲི་མདུང་གསུམ་གྱིས་མཚོན་པའི་མཚོན་ཆ་དབུལ་ཏེ་མཆོད་གསོལ་རྙེད་བཀུར་བྱས་ན་རང་ཉིད་འཇིགས་སྐྲག་སྣ་ཚོགས་ལས་སྒྲོལ་བའི་གྲོགས་བྱེད་པར་འདོད་པའི་གདོད་མའི་འདུ་ཤེས་ཀྱི་མྱུ་གུས་ཀུན་ནས་དྲངས་ཏེ་ད་ལྟའི་ལབ་ཙེའི་སྲོལ་འདི་ཆགས་པ་ཡིན་ནོ།། དེ་ཡང་ལབ་ཙེ་ལ་མདའ་མདུང་གྲི་གསུམ་གྱི་མཚོན་ཆ་འབུལ་བ་ནི་སྐབས་དེའི་མིའི་རིགས་ཀྱི་རང་ཕྱོགས་སྲུང་བྱེད་ཀྱི་མཚོན་ཆ་གཙོ་བོ་དེ་དག་ཡིན་པ་དང༌། གདོད་མའི་མི་རྣམས་ཀྱི་འདུ་ཤེས་སུ་མདའ་གྲི་མདུང་གསུམ་བཀོལ་ན་ད་གཟོད་རང་ཉིད་རང་བྱུང་གི་འཚེ་བ་སྣ་ཚོགས་ལས་སྐྱོབ་པར་ཡིད་ཆེས་ཟབ་མོ་ཡོད་པས་ལབ་ཙེར་མདའ་གྲི་མདུང་གསུམ་ཕུལ་བའི་སྲོལ་ཆགས་པ་ཡིན་མོད། བར་སྐབས་སུ་ཡུལ་ལུང་གི་ས་ཆའི་ཁྱད་དམ། རང་ཉིད་ཀྱི་འབྱོར་མཁོས། ཐོན་སྐྱེད་ངལ་རྩོལ་གྱི་བྲེལ་ཟིང་སོགས་ཀྱི་རྐྱེན་གྱིས་མདའ་གྲི་མདུང་གསུམ་གྱི་ཚབ་ཏུ་ཤིང་སྐྱེ་ལེགས་ཀྱི་རྩེ་མོ་བཅད་དེ་འབུལ་བ་ནས་བཟུང༌། ལབ་ཙེ་ལ་མདའ་དང་ཤིང་རྩི་བསྟོད་པའི་སྲོལ་རིགས་གཉིས་ཆགས་ཤིང༌། མདའ་བསྟོད་ནི་ཤིང་སྐྱེ་ལེགས་ཕྲ་ལ་རིང་བ། ཤུན་པ་གཙང་མར་བཤུས་པའི་གསོམ་ཤིང་ལ་མདའ་སྒྲོ་མདའ་ཤིང་གི་རིང་ཐུང་དང་སྦོམ་ཕྲ་ལྟར་བཟོ་བ་མ་ཟད། དེའི་སྟེང་ཚོན་བྱུགས་ཚུལ་ཡང་འཇིག་རྟེན་ཆགས་ལུགས་ལྟར་ཉི་ཟླ་དང་ནམ་མཁའ། ས་ཆུ་སོགས་གོ་རིམ་མ་ནོར་བར་བྱས་རྗེས། གཏན་འཁེལ་བྱས་པའི་ཉིན་གང་ཡིན་པ་དེར་ཡུལ་ཚོ་སྤྱིའམ། ཚོ་ཁག་གཅིག་ཡང་ན་སྡེ་བ་ཡོངས་ཀྱིས་མདའ་རར་མདའ་བསྟོད་པ་ཡིན། དུས་ཕྱིས་ཀྱི་ནང་བསྟན་ཆོས་ལུགས་ཀྱི་ཤུགས་རྐྱེན་གྱིས་མདའ་སྒྲོའི་སྟེང་བཀྲ་ཤིས་རྟགས