༄༅།།འབའ་ཡུལ་གྱི་ཤ་སྦྲང་ཚོ་དྲུག་བཤད་པ།

མཚོ་ལྷོ་ཁུལ་འབའ་ཡུལ་གྱི་ཚོ་ཆེན་ལྔ་ཡིས་ནང་གསེས་ཤ་སྦྲང་ཚོ་དྲག་གི་རིགས་རུས་མཆེད་ཁུངས་ནི། ཤ་སྦྲང་གི་ལོ་རྒྱུས་ལྟར་ན་བཙན་པའི་གདུང་རྒྱུད་མངའ་བདག་འོད་སྲུངས་ཀྱི་རིགས་རུས་ལས་མངའ་རིས་ཀྱི་ལ་དྭགས་རྒྱལ་བོར་གྲགས་པ་ཅན་དེ་ལ་སྲས་དགྲ་འཇོམས་ནོར་བུ་དབང་ཕྱུག་ཅེས་པ་ཞིག་ཡོད་པ་སྒྱུ་མ་མཁན་གྱིས་སྤྲུལ་བའི་རྟ་བསྐྱོན་ཏེ་ལྷོ་མོན་གྱི་ཆར་གཏོགས་པའི་ས་ཆ་ཞིག་ཏུ་བསྐྱུར་བ་རིམ་གྱིས་མདོ་སྨད་དུ་མཆེད་པའི་མི་རྒྱུད་དུ་འདོད་པ་དང་། ཁ་ཅིག་གིས་སྤུར་རྒྱལ་བཙན་པོའི་དུས་ནས་བྱུང་བའི་བོད་དམག་གི་ཤུལ་ཡིན་ཟེར་བ་སོགས་ཀྱི་བཤད་ཚུལ་མཆིས་ན་ཡང་། རིགས་རུས་མཆེད་ཁུངས་དངོས་ནི་ས་སྐྱ་བ་ཡིན་ཏེ། རྗེ་བཤད་སྒྲུབ་རྒྱ་མཚོས་བྱ་ཁྱུང་ཨ་ར་པ་ཙཱའི་སྒྲུབ་ཁང་གི་དཀར་ཆག་ལས། ས་སྐྱ་ནས་མཆེད་པའི་རིགས་རེབ་གོང་ཤ་སྦྲང་དུ་འཁྲུངས་བར་ཀུན་གཟིགས་འཇམ་པའི་དབྱངས་ཨབྷྱའི་ཞབས་ཀྱིས་བཞེད་ཅེས་དང་། ཡོངས་སུ་གྲགས་པའི་གནའ་མིའི་ངག་རྒྱུན་ལྟར་ན་ཡང་། ཤ་སྦྲང་ཚོ་དྲུག་གི་མཆེད་ཁུངས་ས་སྐྱ་པ་ཡིན་ཞིང་རུས་ནི་ལྡོང་ཡིན་པར་སྨྲ།
རིགས་རུས་དེ་ལས་མཆེད་པའི་ཤ་སྦྲང་དུ་གྲགས་པའི་ཚོ་བ་འདི་ལ་དཔག་བསམ་གྱི་ཤིང་ལྟར་ཡལ་ག་དང་ལོ་མའི་ཚུལ་དུ་ཚོ་ཆེན་དང་ཚོ་ཆུང་མང་དུ་གྱེས་པ་ལས་ཡོངས་སུ་གྲགས་པའི་ཤ་སྦྲང་ཚོ་དྲུག་གི་འདྲེན་ཚུལ་ལ་འགའ་ཡོད་དེ། ལྔ་རྒྱ་ཕྱིས་རྒྱ་ཏོག་ལྟ་གསུམ། འབའ་རྒུ་རུ་རྒན་གྱ་གསུམ། གཡུ་རལ་སྟོང་ཆས་ཆུ་སྐྱ་གསུམ། སེ་རྒྱ་བད་ཁོ་ཇང་བཟའ་གསུམ། ཤ་སྦྲང་ནི་གུ་ཨག་ཀྱ་གསུམ། ཁོ་རྒྱ་ཁོ་ནག་ཁོ་སེར་གསུམ། ཞེས་དང་། ལྔ་ཕྱི་ཏོག་གསུམ། སེ་བད་ཇང་གསུམ། ཁོ་རྒྱ་ཁོ་ནག་ཁོ་སར་གསུམ། ཧྲོང་བོ་ནག་བཟའ་ཨག་ཀྱ་གསུམ། ཆུ་སྐྱ། ཤ་སྦྲང་སོགས་ཀྱི་འདྲེན་ཚུལ་འདུག་མོད། ད་ལྟ་ཕལ་ཆེར་གྱིས་བགྲང་གྱིན་པ་ནི་ལྔ་རྒྱ་ཕྱིས་རྒྱ་ཏོག་ལྟ་གསུམ། ཤ་སྦྲང་སུ་རུག་དཔའ་མཆོག་གསུམ། ཆུ་སྐྱ་ནི་གུ་ཨག་ཀྱ་གསུམ། སེ་རྒྱ་བད་ཁོ་ཇང་བཟའ་གསུམ། ཁོ་རྒྱ་ཁོ་ནག་ཁོ་སེར་གསུམ། ཧྲོང་བོ་ནག་བཟའ་བན་རྒྱ་གསུམ། ཅེས་བགྲང་ཚུལ་ཕྱི་མ་འདི་ཀུན་གྱིས་ཚད་མར་འཛིན་ནོ། སྤྱི་ལོ་མ་ཚུགས་པའི་སྔོན་ལ་འབའ་ཡུལ་འདི། འཇང་ངམ་སྤྱང་དུ་འབོད་པའི་བོད་མིས་བཟུང་། སྤྱི་ལོ་སུམ་བརྒྱ་ཡས་མས་ཙམ་ནས་འ་ཞ་རྒྱལ་རབས་ཀྱིས་བཟུང་བ་དེ་ནས་རིམ་བཞིན་རྒྱ་བོད་ཧོར་གསུམ་གྱིས་རིམ་པར་བཟུང་། ངག་རྒྱུན་དུ་གྲགས་པ་ལྟར་ན་དུས་སྐབས་མ་ངེས་པ་ཞིག་ལ་རྒྱ་ཆུ་བུར་མིག་ཟེར་བ་ཞིག་གིས་ཡང་བཟུང་བར་གྲགས།
དེའི་རྗེས་ཆིན་གོང་མས་སྤྱི་ལོ ( ༡༧༦༨ ) ལོ་ནས་བཟུང་འབའ་ཆུའི་ལྷོ་རྒྱུད་ཆིང་ཝང་རྡོ་རྗེ་ཕ་ལམ་དང་། འབའ་ཉིན་ནས་བཟུང་ཚྭ་གྭན་ནོ་མིན་ཧྭན་གཉིས་ལ་སོ་སོར་དབང་བར་བྱས་ལ། ཆིན་རྒྱལ་རབས་ཀྱི་མཇུག་ཙམ་དུ་རེབ་གོང་ནས་རིམ་བཞིན་ཤ་སྦྲང་སོགས་བོད་སྡེ་མང་པོས་འབའ་ཡི་སྟག་རྒན་ཤི་སོང་ཞེས་ཆུ་ལོག་བརྡོལ་པ་བཞིན་འབའ་ཡུལ་དུ་གནས་སྤོར་ཏེ་གཞིས་ཆགས།