ཛམ་ཐང་ཞེས་པའི་ས་མིང་འབྲི་ཚུལ་གླེང་བ།

       དེ་ཡང་ཉེ་བའི་ལོ་ཁ་ཤས་ནས་བཟུང་སྟེ། རང་ས་གནས་ཀྱི་ས་མིང་འབྲི་ཚུལ་ལ་རྩོད་པ་བྱུང་ནས་གཅིག་གྱུར་གྱི་ས་མིང་འབྲི་ཚུལ་ཞིག་གཏན་ནས་བྱུང་གིན་མི་འདུག ཁ་ཤས་ཀྱིས་འཛམ་ཐང་ཞེས་འབྲི་དགོས་ཏེ་བླ་མ་ག་གེ་མོས་འདི་ལྟར་གཏན་ལ་ཕབ་པ་ཡིན་ཟེར། ཁ་ཤས་ཀྱིས་ཛམ་ཐང་ཞེས་འདི་ལྟར་འབྲི་དགོས་ཏེ་ངེད་ཀྱི་དགོན་པས་འདི་ལྟར་བྲིས་འདུག་ཟེར། མདོར་ན། ངེད་དང་གན་ཞེས་ཆགས་སྡང་གི་གཏམ་སྨྲ་བ་ལས་འདི་དང་འདི་ཞེས་གནས་ལུགས་སྨྲ་བ་ནི་ཤིན་ཏུ་དཀོན་པའི་ཚོད་དུ་འདུག ངས་ཀྱང་འདི་དང་འདི་ཞེས་གླེང་ན་ཁ་ཤས་ཀྱིས་དགོན་པའི་ཆགས་སྡང་གིས་བསླུས་འདུག་ཟེར་ངེས། འོན་ཀྱང་། རང་ངོས་ནས་ནི་དྲང་པོ་དང་བདེན་པ་སྨྲ་བའི་བརྟུལ་ཞུགས་བཟུང་པ་ཡིན་ནོ། །ས་གནས་ཆུང་ཆུང་ཞིག་ལ་ཟབ་མོའི་ལྟ་གྲུབ་དང་རྒྱ་ཆེ་བའི་རིག་གཞུང་གླེང་རྒྱུ་མེད་པར་ས་མིང་ཙམ་དང་ཞྭ་དམར་སེར་ཙམ་གྱི་དོན་དུ་སྐད་འབོད་ཤུགས་ཆེར་བྱས་ན་གཞན་གྱི་འཕྱ་སྨོད་ཀྱི་ཡུལ་དང་དགོས་པ་ཤིན་ཏུ་ཆུང་མོད། འོན་ཀྱང་། རྫུན་གྱིས་བདེན་པའི་མགོ་སྨད་དུས་བདེན་པའི་མགོ་བོ་མཐོ་བར་སེམས་ནས་བདེན་གཏམ་ཆུང་ཆུང་ཞིག་སྤེལ་བར་འདོད་པ་དེ་ཡིན། རང་ས་གནས་ཀྱི་ལོ་རྒྱུས་སོགས་ཀྱིས་མཚོན་པའི་རིག་གནས་གང་ཞིག་ཡིན་རུང་དཔལ་འབྱོར་ཤུགས་ཆེ་བ་ཙམ་གྱིས་བདེན་ཁ་མི་བྱིན་པར་གང་ཞིག་གནས་ལུགས་དང་ལྡན་ན་དེ་ཉིད་གཙིགས་སུ་འཛིན་རྒྱུ་ནི་ཤིན་ཏུ་གལ་ཆེ་བར་སེམས།
གཅིག ཛམ་ཐང་ཞེས་པའི་མིང་འདི་བྱུང་ཚུལ།
       སྤྱིར་ཛཾ་ཐང་ངམ་ཛམ་ཐང་ཞེས་པའི་མིང་འདི་ནི་གནས་རི་ཛམ་བྷ་ལའི་མདུན་ཐང་ན་ཡོད་པའི་ཆ་ནས་དེ་ལྟར་དུ་ཐོགས་པ་ཡིན་ལ། ཇོ་ནང་པར་བཀའ་དྲིན་གྱི་ཁུར་རབ་ཏུ་ལྕི་བའི་དྲུང་རཏྣ་ཤྲཱི་མཆོག་གནས་འདིར་ཞབས་ཀྱིས་མ་བཅག་པའི་སྔོན་དུ་གནས་འདི་ལ་འཛི་ཀ་ཟེར་བ་ལས་ཛམ་ཐང་ཟེར་མིན་ནི་དོགས་པའི་གནས་ཤིག་ཡིན། ཡིན་ཡང་། གནས་འདིར་ཐོག་མར་བོན་དགོན་དར་བ་ཡིན་ཞིང་། བོན་པོ་ལ་ཡང་ཛམ་བྷ་ལའི་སྒྲུབ་ཐབས་སོགས་བཞུགས་པས་དྲུང་རཏྣ་ཤྲཱི་གནས་འདིར་མ་བྱོན་པའི་སྔོན་ནས་གནས་རི་ཛམ་བྷ་ལའི་མིང་གིས་བཏགས་ན་ཡང་རུང་སྙམ། འོན་ཀྱང་། ཤེས་དགོས་པ་ཞིག་ལ་བོན་གྱི་དབང་དུ་བྱས་ན༼འཛམ་བྷ་ལ༽ཞེས་མིང་འདི་ལྟར་འབྲི་དགོས་པ་ལས་བན་དེའི་བྲིས་པ་ལྟར་གྱི་ཛམ་བྷ་ལ་ཞེས་འདི་ལྟར་མི་འབྲི། ཇོ་ནང་ཀུན་མཁྱེན་རྟོན་པ་བཞི་ལྡན་ལགས་ཀྱི་ལུང་བསྟན་ལྟར་ན་ཡང་གནས་རི་ཛམ་བྷ་ལའི་མིང་གིས་བཏགས་པ་གསལ་བར་ངེས་ཏེ། ལུང་བསྟན་ལས།        ཞེས་ལུང་བསྟན་པ་ལྟར་ན་གནོད་སྦྱིན་གཏེར་བདག་སྟེ་ཛམ་བྷ་ལའི་གནས་རིའི་མིང་གིས་བཏགས་པ་ནི་བསྙོན་དུ་མེད། རེད་དེ། ཁ་ཤས་ཀྱིས་གནས་རིའི་མིང་གིས་བཏགས་ན་ཡང་། ཛམ་བྷ་ལའི་མིང་གི་ཛམ་ཞེས་པ་འ་འཛམ་ལ་བྱས་ཏེ་འཛམ་ཐང་ཞེས་འདི་ལྟར་འབྲི་དགོས་པར་བཤད་མཁན་འདུག་མོད། ཤིན་ཏུ་མ་བརྟགས་པ་སྟེ། བོན་གྱི་དབང་དུ་བྱས་ན་ཛམ་བྷ་ལའི་མིང་གི་ཛམ་ཞེས་པ་འ་འཛམ་ལ་བྱེད་དགོས་པ་ལས་བན་དེའི་དབང་དུ་བྱས་ན་ཛམ་བྷ་ལའི་མིང་གི་ཛམ་ཞེས་པ་འ་སྔོན་འཇུག་མེད་པ་འདི་ཁོ་ན་འབྲི་དགོས་པ་སྔོན་གྱི་བཀའ་བསྟན་འགྱུར་དང་ཆོས་འབྱུང་གཏེར་ཆོས་ཁག་ན་ཤིན་ཏུ་གསལ། དེས་ན་ཛམ་བྷ་ལ་ཞེས་པའི་ཛམ་ནི་ཛམ་སྔོན་འཇུག་མེད་པ་ལ་བྱས་ཏེ་དེའི་ཐང་ན་གནས་ཡོད་པའི་ཆ་ནས་ཛམ་ཐང་ཞེས་འདི་ལྟར་འབྲི་དགོས།
གཉིས། སྔོན་གྱི་མཁས་དབང་དག་གི་ཛམ་ཐང་འབྲི་ཚུལ།        དཔེར་ན། ཀོང་སྤྲུལ་ཡོན་ཏན་རྒྱ་མཚོ༼1813-1899༽ནི་གནས་འདིར་ཕེབས་མྱོང་ཞིང་ཛམ་ཐང་ཆོས་རྗེ་སྐུ་འཕྲེང་བརྒྱད་པ་སོགས་བླ་ཆེན་མང་པོས་ཆོས་ཞུས་མྱོང་བའི་ཛམ་ཐང་དང་ཛམ་ཐང་འདིའི་བླ་ཆེན་ཁག་དང་འབྲེལ་བ་དམ་ཟབ་བྱུང་བའི་སྐྱེས་ཆེན་དེས་ཀྱང་རང་རྣམ་དང་གསུང་ཆོས་ཁག་ན་ཛམ་ཐང་ཞེས་འདི་ལྟར་བྲིས་འདུག ཏཱའི་སི་ཏུ་དགུ་བ་པདྨ་ཉིན་བྱེད་དབང་པོ༼1774-1843༽ཡང་ཛམ་ཐང་སྒར་བ་ཆོས་རྗེ་སྐུ་འཕྲེང་བདུན་པ་སོགས་ཀྱིས་བླ་མར་བསྟེན་མྱོང་བ་དེས་ཀྱང་གསུང་ཆོས་ཁག་ཏུ་ཛམ་ཐང་ཞེས་ཁོ་བོས་བྲིས་པ་ལྟར་བྲིས་འདུག དེ་ལྟར་དུ་ཛམ་ཐང་འདིར་ཞབས་ཀྱིས་བཅགས་ཏེ་ཆོས་ཀྱིས་མཛད་འཕྲིན་སྐྱོང་བའི་རྫ་དཔལ་སྤྲུལ་འཇིགས་མེད་དབང་པོས༼1808-1887༽ཀྱང་ཁོ་བོས་བཤད་པ་ལྟར་གྱི་ཛམ་ཐང་ཞེས་འདི་ལྟར་བྲིས་འདུག་པ་དང་འཇུ་མི་ཕམ་སོགས་རང་ས་གནས་དང་འབྲེལ་བ་ཡོད་པའི་སྐྱེས་ཆེན་མང་པོས་ཛམ་ཐང་ཞེས་འདི་ལྟར་བྲིས་འདུག་པ་ལ་དཔགས་ན་བླ་མ་བློས་གྲགས་མ་བྱོན་པའི་སྔར་རྩོད་མེད་ཡོངས་གྲགས་སུ་ཛམ་ཐང་ཞེས་འདི་ལྟར་བྲིས་པ་ཡིན་ངེས་སུ་འདུག་གོ །ཡང་ཁ་ཤས་ཀྱིས་ཛམ་ཐང་དཔར་མ་ན་འཛམ་ཐང་འདི་ལྟར་བྲིས་འདུག་ཅེས་སྨྲ་མཁན་མང་ན་ཡང་། ད་ལྟའི་ཛམ་ཐང་དཔར་མ་ནི་ཉེ་བའི་ལོ་ཁ་ཤས་སྔོན་དུ་བླ་མ་ག་གེ་མོའི་སྐུ་རིང་ལ་གསར་དུ་བསྒྱུར་བཅོས་མང་པོར་བྱས་པ་ནི་རྒན་པ་དག་ན་ངག་ན་གྲགས་ཤིང་གྲུབ་པ་ལྟར་ཡིན་པས་ཛམ་ཐང་དཔར་མ་གང་ཞིག་ཏུ་ཡང་ཛམ་ཐང་འབྲི་ཚུལ་ནི་ཇི་ལྟར་བྱས་ཀྱང་ཡིད་ཆེས་རྙེད་པར་དཀའ་བའོ། །དེའི་ཕྱིར། ཛམ་ཐང་དཔར་མའི་རྗེ་བཙུན་ཏཱ་ར་ནཱ་ཐ་སོགས་མཁས་པ་མང་པོའི་གསུང་ལ་ཛམ་ཐང་ཞེས་འབྲི་ཚུལ་འདི་བསྒྱུར་བཅོས་མང་པོ་བྱས་འདུག
གསུམ། མིང་འདི་མ་བཀོལ་བའི་གནོད་སྐྱོན་གླེང་བ།
       མིང་འདི་ནི་ཇོ་ནང་ཀུན་མཁྱེན་རྟོན་པ་བཞི་ལྡན་གྱིས་བསྩལ་བ་ཡིན་རྐྱེན་རིན་ཐང་དང་ལོ་རྒྱུས་གཉིས་ཆར་གྱིས་ཕྱུག་པ་ཡིན་ལ། ལོ་རྒྱུས་ཀྱི་ཆ་ནས་བཤད་ན་ཕལ་ཆེར་ལོ་ངོ་དྲུག་བརྒྱ་ཡར་མར་གྱི་ལོ་རྒྱུས་ལྡན་ལ། ནམ་ཞིག་ལོ་རྒྱུས་ཀྱི་གསེང་ནས་ཇོ་ནང་ཀུན་མཁྱེན་གྱིས་ལུང་བསྟན་པའི་གནོད་སྦྱིན་གཏེར་བདག་མིང་གི་དགོན་པ་དེ་བཙལ་སྐབས་ཛམ་ཐང་ཞེས་པའི་མིང་འདི་ལ་བརྟེན་ནས་འཚོལ་དགོས། དེ་མིན་འཛམ་ཐང་ཞེས་འདི་ལྟར་བྲིས་པ་རྒྱུན་ཆགས་སུ་གྱུར་ཏེ་ཛམ་ཐང་ཞེས་འདི་ལྟར་འབྲི་ཚུལ་དེ་ཉམས་པ་དང་ཤུལ་ཙམ་ཡང་མེད་པར་གྱུར་སོང་ན། རིན་ཐང་ལྡན་པའི་ལོ་རྒྱུས་ཤིག་རྨེག་མེད་དུ་བཟོས་སོང་བ་རེད། བླ་མ་ག་གེ་མོས་འཛམ་ཐང་ཞེས་འདི་ལྟར་འབྲི་དགོས་རྐྱེན་ང་ལ་ནམ་ཞིག་གནས་འདི་འཛམ་བུ་གླིང་གི་ཐང་ལྟ་བུར་འགྱུར་བའི་རྟེན་འབྲེལ་ཡོད་ཅེས་རྟེན་འབྲེལ་གྱི་མིང་འདོག་མཛད་པའི་ཞོར་དུ་ལོ་རྒྱུས་ཤིག་རྩ་མེད་དུ་གཏོང་བཞིན་པའི་ཐུགས་བསམ་མ་བཞེས་པ་འདྲ། འདི་ལྟར་འབྲི་དགོས་ཏེ་བླ་མའི་མཛད་པ་ཡིན་ཞེ་ན། ལོས་ཡིན་ཏེ་བླ་མའི་མཛད་པ་བསྐྱང་དགོས། རེད་དེ། ཛམ་ཐང་ཞེས་འདི་ལྟར་འབྲི་ཚུལ་བཙན་ཐབས་ཀྱིས་ནོར་བ་དང་འཁྲུལ་བ་བཟོས་ཏེ། འཛམ་ཐང་ཞེས་འདི་ལྟར་བྲིས་ན་དགེ་མཚན་ལྡན་ཞེས་རྫུན་གྱིས་འཁོར་ལོ་བསྐོར་ན་དེ་ཡང་མ་ལེགས་སོ། །དེས་ན་བླ་མའི་མཛད་པ་བླ་མའི་མཛད་པའི་སར་བཞག དངོས་ཡོད་ཀྱི་ལོ་རྒྱུས་དངོས་ཡོད་སར་བཞག་ནས་གླེང་ན་ཤིན་ཏུ་ལེགས་པ་འདྲ།