བོད་ཆེན་པོའི༼༡༽སྲིད་ལུགས་དང་འབྲེལ་བའི་རྒྱལ་རབས་དེབ་ཐེར་དཀར་བོ༼༢༽ཞེས་བྱ་བ་བཞུགས་སོ།།

     ༼སངས་རྒྱས་འདས་རྗེས་ཀྱི་ལོ་ཆིག་སྟོང་གཅིག་བརྒྱ་དགུ་བཅུ་གོ་བཞི་པ་ལྕགས་ཕོ༽ ཁྱིའི་ལོ་ལ་བབས་ཏེ། བཙན་པོ་མྱེས་ཁྲི་སྲོང་རྩན་གྱི་སྤུར ༼ཕོ་བྲང་༽ ཕྱིང་བའི་རང་ཁང་ན་མཁྱུད་ཅིང་བཞུགས ༼༢༣༨༽ ཏེ། བཙན་པོ་དཔོན་ཁྲི་མང་སློན་མང་རྩན་མེར་ཀེ ༼༢༣༩༽ ན་བཞུགས་པར་ལོ་གཅིག༼འདས་རྗེས་ཀྱི་ལོ་ཆིག་སྟོང་གཅིག་བརྒྱ་དགུ་བཅུ་གོ་ལྔ་ལྕགས་མོ༽ ཕག ༼༢༤༠༽ གི་ལོ་ལ་བབས་ཏེ། བཙན་པོ ༼མང་སྲོང་མང་བཙན་༽ ཉེན་ཀར ༼༢༤༡༽ ན་བཞུགས་ཤིང་། ༼ཕོ་བྲང་༽ ཕྱིང་ར་བཙན་པོ་མྱེས་ཁྲི་སྲོང་རྩན་གྱི་མདང་བཏང་བར ༼༢༤༢༽ ལོ་གཅིག༼ཅེས་བྱུང་༽ ༼དཀྱུས༽ འདིར་ཀོང་ཇོ་བོད་ཡུལ་དུ་གཤེགས་བྱ་བ་དེ་རྒྱ་ནག་ནས་ལམ་དུ་ཞུགས་པའི་དོན་དུ་སྣང་གི བོད་དུ་སླེབས་པ་ལ་མི་བརྩི་བར་འདུག་ཀོང་ཇོ་བོད་དུ་ཕེབས་པའི་ལོ་དེ་རྒྱལ་རབས ༼ང༽ པ་ལ་གསལ་བར་འདས་རྗེས་ཀྱི་ལོ་ཆིག་སྟོང་གཅིག་བརྒྱ་བརྒྱད་ཅུ་གྱ་ལྔ་ལ་ལྕགས་གླང་ཡིན། གླང་དེ་ནས་བརྩིས་པའི་ལོ་དགུ་པ་ལ་སྲོང་བཙན་འདས། ལོ་གསུམ་ཀོང་ཇོ་དང་ལྷན་དུ་བཤོས་སོ། །ཞེས་བྲིས་པས་ཀོང་ཇོ་ལམ་དུ་ཞུགས་ནས་རྒྱལ་པོ་དང་མ་མཇལ་བར་ལོ་དྲུག་སོང་བར་སྣང ༼༢༤༣༽། དེས་ན་ཡོངས་གྲགས་ཀྱི་ལོ་རྒྱུས་སུ། མགར་གྱིས་གཡོ་བྱས་ནས། ཀོང་ཇོ་རྗེ་ལ་མཇལ་དུ་མ་བཅུག་པར་ཡུན་རིང་འགོར་ཚུལ་བྲིས་པ་དེ་ཡང་རྒྱུ་མཚན་ཅན་དུ་འདུག་སྙམ། ཕྱིང་བ་བྱ་བ་ནི་གནམ་རིའི་སྐབས་སུ་སྨོས་པའི་མཁར་ཕྱིང་བ་སྟག་རྩེ་དེ་ཡིན་པར་འདུག མཁྱུད་པ་ནི་སྦས་པའི་དོན་ཏེ། ཁྱི་ལོ་ལ་མེས་པོའི་སྐུ་སྤུར་གསང་རྒྱ་བྱས་ནས་བཞག་ཅིང་། ལོ་དེའི་རྗེས་མར་མདང་བཏང་བའོ། །ཀོང་ཇོ་བརྫངས་ནས་ལོ་དགུ་ན་བཙན་པོ་འདས་ཚུལ་དང་འདི་གཉིས་སྦྱར་ཚེ། དོན་ལ་བྱ་ལོར་འདས་ཤིང་ཁྱི་ལོའི་མཇུག་ཏུ་གསང་བརྟོལ་བར་བརྟེན། རྒྱའི་རྒྱལ་རབས་ལ་ལྕགས་ཁྱི་ལོར་གྲོངས་ཞེས་བྲིས་སམ་སྙམ་སྟེ་དཔྱད ༼༢༤༤༽ པར་འཚལ། མདང་བྱ་བ་ནི་འདས་མཆོད་དེ་གནའ་ལུགས་ཤིག་ཡིན་ཞིང་། འབྲོག་ཁམས་ནས་བྱོན་ཚེ་འཕྲང་ཁ་བེར་ཆུང ༼༢༤༥༽ ཕའི་མདང་གཏོང་སར་སླེབས་སོགས་སྔོན་གྱི་ལོ་རྒྱུས་འགའ་རེ་ན་ཡང་སྣང་། རྩིས་ཐང་ཆེ་བ་ལ་མདང་ཆེ་བ་ཞེས་ཡུལ་འགའ་ཞིག་གི་ཕལ་སྐད་ལ་ཡང་ཟེར་མདངས་ཀྱི་མཆོད་པ་དེ་ཅི་འདྲ་ཞིག་ཡོད་ཚུལ་མི་ཤེས་ཀྱང་། རྙིང་མའི ༼༢༤༦༽ ཆོ་ག་འགའ་རེ་ན་མདང་སྐང་བྱ་བ་ཞིག་འདུག་པ་དེ་ལ། མར་མེ་དང་། ཁྲག་དང་གཏོར་མ་རྣམས་རིམ་གྱིས་འབུལ་བར་འདུག་པས། ཕལ་ཆེར་དེ་འདྲ་ཞིག་མིན་ནམ་སྙམ། བལ་པོ་ཡུ་སྣ་ཀུག་ཏི་བཀུམ། ན་རི་ད་བ་རྒྱལ་ཕོར་བཅུག བྱ་བའི་ཚིག་འདི་གཉིས་ཡ་མཚན་ཆེ་སྟེ། ཛིཥྞུཀཱིརྟིཾ་བཀུམ། ན་ར་དེ་བ་རྒྱལ་པོར་བཅུག་བྱ་བ་ཟུར་ཆག་གམ་སྙམ་སྟེ། ཛ་དང་ཡ་གཉིས་ནི་རྒྱ་སྐད་ལ་སྒྲ་ཤིན་ཏུ་འདྲ་བས། ཡ་མཱ་རི་ལ་ཛ་མཱ་རི་དང་། ཡོ་གི་ལ་ཛོ་གི་སོགས་སུ་འབོད་པ་ལྟ་བུ་ཡིན། དེ་ཡང་འཇམ་དཔལ་རྩ་རྒྱུད ༼༢༤༧༽ ཀྱི་རྒྱ་དཔེར། བལ་པོའི་རྒྱལ་པོ་རྣམས་ཀྱི་མིང་མཐར་ཆགས་སུ་དྲངས་པའི་མཇུག་ཏུ། ཛིཥྞུཧྱནྟེ།ཤསྟྲཱ སསྤཱཏ་བིངྷྭསྟནེ་པ་ལཱདྷི་པ་ཏི་སྟ་དཞེས། ཛིཥྞུ་ཉིད་ནི། མཐའ་མ་སྟེ། དེ་དུས་བལ་ཡུལ་བདག་པོ་ནི། །མཚོན་ཆ་འབབ་པས་རྣམ་པར་འཛོམས། །ཞེས་རྒྱལ་པོ་མཐའ་མ་ཛིཥྞུ་ཡིན་ཚུལ་དང་། དེ་མཚོན་གྱིས་གསོད་པར་གསུངས་པས་སོ། །དེས་ན་ཀོང་ཇོ་བོད་དུ་རྫངས་པའི་ལོ་དེ་རང་ལ་བལ་ཡུལ་འབངས་སུ་བཅུག་གམ་སྙམ་སྟེ། དེ་ནས་བགྲང་བའི་ལོ་བརྒྱད་ཀྱི་རྗེས་སུ། གོང་མའི་ཕོ་ཉ་ཝང་ཞོན་ཙེ་རྒྱ་གར་དུ་སླེབས་དུས། བལ་ཡུལ་བོད་ཀྱི་འོག་ཏུ་ཡོད་ཚུལ་རྒྱལ་རབས ༼ང་༽ ལ་གསལ་བ་བཞིན་ནོ། །འདིར་ལོ་གཅིག་ཅེས་བྲིས་པ་རྣམས་ནི། བྱུང་བ་དེ་དག་གི་ཡུན་ལ་ལོ་གཅིག་སོང་བྱ་བའི་དོན་ནོ། །
      ཤོག་དྲིལ༼ཁ༽ བཙན་པོ་སྲོང་བཙན་སྒམ་པོའི་རིང་ལ། ཡབ་འབངས་ཀྱིས་ནི་འཁུས། ཡུམ་འབངས་ནི་ངོ་ལོག གཉེན་ཞང་ཞུང་། མཛོ་སུམ་པ། ཉ་ག ཉི་དྭགས་པོ། ཀོང་པོ༼༢༤༨༽། མྱང་པོ ༼༢༤༩༽ ཀུན་ཀྱང་ངོ་ལོག ཡབ་གནམ་རི་སློན་བཙན་ལ་དུག་བོར་ཏེ་བཀྲོངས་སོ། །སྲས་སྲོང་བཙན་སྐུ་གཞོན་ནུ་ལས་གཟོད་སྐྱེས་ཏེ། ཐོག་མར་དུག་ལས་བྱེད་མཁན་གྱི་དུག་པ་རྣམས་དབས་བཅད་དོ༼༢༥༠༽། །དེའི་འོག་ཏུ ༼རྩེང་སྐུའི་བུ༽ མྱང་མང་བོ་རྗེ་ཞང་སྣང ༼༢༥༡༽ གིས། སུམ་པ་མཐའ་དག་དམག་བྱེད་མ་དགོས་པར་སྒྱུའི་སྒོ་ནས། ཁྱིམ་གྲངས་མ་ཤོར་བར་འབངས་རྣལ་མར་བཀུག་གོ། དེའི་འོག་ཏུ་བཙན་པོས་ཞབས་ཀྱིས་བཙུགས་ཏེ། དམག་མ་བྱུང་མ་དྲངས་པར། རྒྱ་དང་ཨ་ཞ་དཔྱའ་བཅད་དོ། ༼ཨ་ཞ་དེ་སོག་རིགས། དིང་སང་ཨུ་རུ་སིའི་ཁོངས་སུ་ཡོད༼༢༥༢༽ །༽ ཐོག་མ་དེ་ནས་བཟུང་ཨ་ཞ་འབངས་སུ་མངའ་འོ། །དེའི་འོག་ཏུ། བཙན་པོ་སྲོང་བཙན་དང་། མང་པོ་རྗེ་ཞང་སྣང་གི་བར་དུ། ཁྱུང་པོ་སྤུང་སད་ཟུ་ཙེས་ཕྲ་མ་བཅུག་སྟེ། བཙན་པོའི་ཞལ་སྔར་ཞང་སྣང་གློ་བ་མི་རིངས་པ་ལ། རིངས་ཞེས་གསོལ་ཏོ། །ཞང་སྣང་ལ་ཡང་། བཙན་པོ་མི་བཀྱོན་པ་ལ། བཀྱོན་ཞེས་སྨྲས་སོ། །ཞང་སྣང་གི་སེམས་ལ། ཁྱུང་པོ་སྤུང་སད་བདག་གི་སྙིང་གྲོགས་ཡིན་པས། ཟེར་བ་བདེན་སྙམ་ནས། བཙན་པོའི་བཀའ་བྱུང་ཡང་། མིན་ཞེས་མདུན་དུ་མ་ཕྱིན་པར། མཁར་སྤུར་བ་ལ་བསྡད་པས། བཙན་པོའི་ཐུགས་ལ། ཞང་སྣང་གློ་བ་རིངས་པ་བདེན་ཡང་དག་གོ་དགོངས་ནས། ཞང་སྣང་གི་བྲན་ལ་བཅོལ་ཏེ། ཞང་སྣང་བསླུས་ནས་བརླག་གོ མཁར་སྤུར་བ་ཡང་བཤིག་གོ དེ་ནས་ཁྱུང་པོ་སྤུང་སད་ཟུ་ཙེས་བཙན་པོ་ལ་གློ་བ་ཉེ་བར་བྱས་ཏེ། ལར་བཙན་པོའི་བློན་པོའི་ནང་ན་ཟུ་ཙེ་ལས་གློ་བ་ཉེ་བ་སྔོན་ཆད་མ་བྱུང་ངོ་། །ཟུ་ཙེ་མཛངས་ཞེ་ན་མཛངས། དཔའ་ཞེ་ན་དཔའ་འོ། །མྱི་གཅིག་ཚོགས། དགུ་ཚོགས་ན། སྤུང་སད་ཟུ་ཙེ་ཞེས་སྨྲའོ། །༼འདིར་ཤོག་དྲིལ་ག་ལས་དྲངས་ན།༽ སྤུང་སད་ཟུ་ཙེའི་མཛངས་ཀྱི་ཚད་ནི། རྩིས་གྲྭ་གསུམ་ཞལ་ལྕེ་གྲྭ་བཞི་ཡང་རྣ་བས་མཉན་ཞིང་གཅོད། མིག་མང་གྲྭ་གཅིག་ཀྱང་དེའི་ཞར་ལ་རྩེ་ན་རྒྱལ༼༢༥༣༽། བྱ་ཕུག་རོན་ཁྱུ་གཅིག་འཕུར་བ་མཐོང་ནས། གཅིག་གཉིས་གསུམ་བཞི་ལྔ་དྲུག་ཅེས་བགྲང་། བྱ་ཁྱུ་དེ་སླར་འཕུར་ཚེ་ཡང་བགྲང་བར། བྱ་གཅིག་མ་ཚང་འདུག་པས། ཁྲས་བསད་པ་འདྲ་ལྟོས་ཤིག་སྨྲས་པར། བལྟས་པ་ན་བྱ་གཅིག་ཁྲས་བཀུམ་འདུག་སྐད། སྤུང་ཟད་ཟུ་ཙེ། ཚོར་ཆེ་ལ་དཀུ་ཆེ༼༢༥༤༽། ༼གཡོ་ཆེ་བའི་དོན།༽ སྙིང་མཛངས། མྱི་གཅིག་ཚོགས་དགུ་ཚོགས་ན། ཟུ་ཙེ་ལྟ་བུ་ག་ལ་ཡང་མེད་དོ། །༼ཁ༽ ༼གོང་གི་འཕྲོས།༽ དེའི་འོག་ཏུ་ཁྱུང་པོ་སྤུང་སད་ཟུ་ཙེ་རྒས་ཏེ། ཉི་མ་འདེར་གནང་བའི་སྐབས་ཤིག ཟུ་ཙེས་བཙན་པོའི་སྤྱན་སྔར་གསོལ་བ། སྔོན་བཙན་པོ་ཡབ་གནམ་རིའི་རིང་ལ། བདག་གིས་གཙང་བོད་འབངས་སུ་བཀུག་ལ། འོན་ཀྱང་གཙང་ཡུལ་འདི། ཡབ་ཀྱིས་སྤྱན་གྱིས་མ་གཟིགས། ཞབས་ཀྱིས་མ་བཅགས་ན། བཙན་པོ་སྲས་ཀྱིས་སྤྱན་གྱིས་གཟིགས། ཞབས་ཀྱིས་བཅགས་ཏེ། བདག་གི་སྡུམ་པ ༼༢༥༥༽ ཁྲི་བོམས་སུ་དགྱེས་སྐྱེམས་སྟོན་མོ་གསོལ་བར་ཅི་གནང་། ཞེས་གསོལ་པར། བཙན་པོས་ཀྱང་ཟུ་ཙེས་གསོལ་བ་བཞིན་གནང་སྟེ། བློན་པོ་མགར་ཡུལ་བཟུང་ཕོ་བྲང་ཁྲི་བོམས་སུ་སྔོན་དུ་བཏང་བར། མགར་གྱིས་བརྟགས་པས། ༼བཙན་པོ་བཀྲོངས་པའི་༽ སྒྱུ་བཤམས་པར་ཤེས་ནས། ཡུལ་བཟུང་སླར་བྲོས་ཏེ་བཙན་པའི་སྙན་དུ་གསོལ་ཏོ། །ཡུལ་བཟུང་གིས་ཚོར་ཏེ་སླར་བྲོས་པ། ཟུ་ཙེས་ཚོར་ནས། བུ་ངག་རེ་ཁྱུང་ལ། བདག་གི་མགོ་བཙན་པོ་ལ་ཕུལ་ཞིག་ཅེས་སྨྲས་ནས། རང་ཉིད་ལྕེབས་ཏེ་བཀུམ་མོ། །དེ་ནས་ངག་རེ་ཁྱུང་གིས། ཕའི་མགོ་བཅད་ནས་ཁྱེར་ཏེ། བཙན་པོའི་ཕྱག་ཏུ་ཕུལ་ནས། བདག་གི་ཕ་རྒན་པོས་རྗེ་ལ་གློ་བ་རིངས་ཏེ་སྒྱུ་བཤམས་པ། ཡུལ་བཟུང་གིས་ཀྱང་ཚོར་ནས་བཙན་པོའི་ཞལ་སྔར་གསོལ་དུ་བྲོས། བདག་རང་གིས་ཕ་བཀུམ་ནས་མགོ་བཅད་དེ་འདིར་མཆིས་ན། སྲིད་བརླག་པར་མི་མཛད་པར་ཇི་གནང་ཞེས་གསོལ ༼༢༥༦༽ བས། བཙན་པོས་ཀྱང་ངག་རེ་ཁྱུང་གིས་གསོལ་བ་བཞིན་གནང་སྟེ། ཁོའི་བྲན་གྱི་ཡུལ་དག་སྔོན་བཞིན་དུ་བཞག་གོ། །རྒྱལ་པོ་འདིའི་རིང་ལ། ཞང་ཞུང་ལྟ་བུ་གཉེན་མཛད་ནས་ཀྱང་བཏུལ་ཏོ། །ཐབས་ཀྱིས་ཀྱང་རྒལ་ཏེ། ཞང་ཞུང་བདག་མཛད་དུ། ༼རྒྱལ་བོའི་སྲིང་མོ་༽ བཙན་མོ་སད་མ་ཀར་ལིག་མི་རྒྱ་ལ་ཆབ་སྲིད་ལ་གཤེགས ༼༢༥༧༽ སོ། །༼འདི་བག་མར་བཏང་བ་ཡིན་འདུག་ཅིང་ལིག་མི་རྒྱ་ནི་ཞང་ཞུང་གི་རྒྱལ་པོར་མངོན། ༽ བཙན་མོ་ནིལིག་མི་རྒྱའི་སོ་ནམ་དང་བུ་སྲིང་མི་མཛད་ཅིང་ལོགས་ཤིག་ན་བཞུགས་པར༼༢༥༨༽། བཙན་པོ་དྲལ་གྱི་སྙམ་དུ་གསན་ཏེ། ༼དྲལ་ནི་མིང་པོ་ལ་ཟེར།༽ བཙན་མོ་དེ་ལྟར་ལོག་པར་མཛད་ན། ཆབ་སྲིད་ཀྱི་དཀྲུགས་མར་འགྱུར་བས། དེ་ལྟར་མ་མཛད་པར། ལིག་མི་རྒྱའི་སོ་ནམ་དང་བུ་སྲིད་བཟུང་ཞིག་ཅེས། སྤུག་གྱིམ་བཙན་རྨང་ཆུང་ལ་བཀའ་བསྩལ་ཏེ། ༼ཕོ་ཉ་བཏང་སྟེ། རྨང་ཆུང་། ༽ མཁར་ཁྱུང་ལུང ༼༢༥༩༽ དུ་མཆིས་ན། བཙན་མོ་མི་བཞུགས་ཏེ། ཆབ་ཉ་ལ་རོལ ༼༢༦༠༽ ཞིང་། ༼རོལ་བ་ནི་རྩེད་མོ་རྩེ་བའི་དོན་ནོ།༽ མཚོ་མ་པང ༼༢༦༡༽ དུ་གཤེགས་འདུག་ནས། རྨང་ཆུང་མ་པང་དུ་སོང་སྟེ། བཙན་མོའི་ཞལ་སྔར་ཕྱག་བགྱིས་ཚེ། བཙན་མོའི་ཞལ་ནས། བཙན་པོ་དྲལ་གྱི་ཐུགས་བདེའམ་མི་བདེ། ཞེས་དྲི་བ་མཛད་པར། ཐུགས་བདེ་ཞེས་གསོལ་ཏོ། །༼ཐུགས་བདེ་བྱ་བ་འདི་ཡི་གེ་རྙིང་བ་མང་པོ་ན་འདུག་སྟེ་སྐུ་ཁམས་བཟང་བྱ་བའི་དོན་དུ་སྣང་།༽ རྨང་ཆུང་གློ་བ་བདེའམ ༼༢༦༢༽ མི་བདེ་ཞེས་སྨྲས་ན། གློ་བ་བདེ་ཞེས་གསོལ་ཏོ། །དེར་བཙན་མོས། རྨང་ཆུང ༼ཁྱོད་ནི༽ བཙན་པོ་དྲལ་གྱི་ཞལ་སྔ་ནས་དང་འདྲ་བས། མགྲོན་གྱི་ཕྱག་ལན་ལོངས་ཤིག་ཅེས། ཕྱག་ལན་བསྩལ་ནས༼༢༦༣༽། བཙན་མོས་མགུར་བླངས་པ༼༢༦༤༽། ཡུལ་གྱི་ནི་སྐལ་ཕོག་པ། །ཁྱུང་ལུང་ནི་རྡུལ་མཁར་ཞིག ༼སོགས་སོ།༽ མགུར་བླངས་པའི་རྗེས་སུ། རྨང་ཆུང་མཆི་ཕྱག་བགྱིས་པ་ལས། བཙན་མོའི་ཞལ་ནས། བཙན་པོ་དྲལ་ལ། བཀའ་ལན་ཡི་གེར་གསོལ་བ་ཅང་མ་མཆིས་སོ། །བཙན་པོ་ཞལ་སྔ་ནས་ཐུགས་བདེ་ཞིང་བཞུགས་པ་གློ་བ་དགའ་འོ། །བཙན་པོས་བཀའ་སྩལ་བ་ནི། རྔོ་ཅི་ཐོགས་ཀྱིས་འཚལ་ཞིང་མཆིས་སོ། །༼ཅི་ནུས་སུ་བགྱིད་ལགས་སོ་བྱ་བའི་དོན་ནོ། །༽ བཙན་པོའི་ཕྱག་ཏུ་འདི་ཕུལ་ཅིག་ཅེས་ཞུ་གཡག ༼ཞུ་རྟེན༽ གཅིག་ཕྱག་རྒྱས་བཏབ་ནས་བསྐུར་ཏོ༼༢༦༥༽། །རྨང་ཆུང་སླར་བཙན་པོའི་སྤྱན་སྔར་མཆིས་ནས། བཙན་མོས་བཀའ་ལན་ཡི་གེར་གསོལ་བ་ནི་ཅང་མ་མཆིས། མགུར་བླངས་པའི་ཚིག་ནིའདི་ཞེས་མཆི། ཕྱག་རྒྱས་བཏབ་སྟེ་བསྐུར་བ་ནི་འདི་ལགས་ཞེས་གསོལ་བ་ལས། བཙན་པོས་རྒྱ་ཕྱེས་ནས་གཟིགས་ན། གཡུ་རྙིང་བཟང་པོ་སུམ་ཅུ་ཙམ་ཞིག་བྱུང་སྟེ། བཙན་པོས་དགོངས་དགོངས་ནས། ཡུ་བུས་ལིག་མི་རྒྱ་ལ་རྒོལ་ཕོད་ན་ནི་གཡུ་ཐོགས་ཤིག རྒོལ་མ་ཕོད་ན་ནི་བུད་མེད་དང་འདྲ་བས་ཞུ་གྱོན་ཟེར་བ་ལྟ་ཞེས་བཀའ་བསྩལ༼༢༦༦༽ ནས། རྗེ་བློན་ཀུན་བློང་བློང་དེ། ༼བྲེལ་བ་བྱེད་པའི་དོན།༽ལིག་མི་རྒྱའི་སྲིད་བརླག་གོ རྒྱལ་བོ་འདིའི་རིང་ལ། ཞང་ཞུང་གི་རྒྱལ་པོ་ལིག་མི་རྒྱའི་སྲིད་བརླག་སྟེ། ཞང་ཞུང་ཐམས་ཅད་འབངས་སུ་བཀུག་གོ དེའི་རྗེས་སུ་བཙན་པོ་རྗེས་འབངས་རྣམས་ཀྱིས་དགྱེས་སྐྱེམས་སྟོན་མོ་གསོལ་བའི་ཚེ། བཙན་པོ་ཁྲི་སྲོང་བཙན་གྱིས་མགུར་བླངས་པ༼༢༦༧༽།
      ཀྱེ། རྗེ་ཡི་ནི་མཚན་ལ་འདྲི། །ཁྲི་ཡི་ནི་སྲོང་བཙན་ཞིག ། བློན་གྱི་ནི་མྱིང་པ་འདི། །སྟོང་བཙན་ནི་ཡུལ་བཟུང་ཞིག ། ༼ཅེས་པ་ནས༽ ཡུ་བུ་ནི་རྗེ་དང་བློན། །ཡར་མོ་ནི་ཆུ་ཐུང་གི། །མདོ་ནས་ནི་རྩང་དུ་སྲིང་། །ཡར་མོ་ནི་ཞེང་ཆུང་གི། །ལྷོ་ནས་ནི་བྱང་དུ་བསྐྱེད། །ཡུ་བུ་ནི་རྗེ་དང་བློན། །རྗེ་ཡི་ནིའབངས་མ་བཏང་། །འབངས་ཀྱིས་ནི་རྗེ་མ་བཏང་། ༼སོགས་སོ། །མཚན་ལ་འདྲི་བྱ་བ་ནི། མཚན་གང་ཞེ་ན་བྱའོ། །ཚིག་ཕྱི་མའི་དོན་ནི། སྔོན་ཡུལ་ཡར་མོ་ཙམ་ལས་མེད་པ་ལ། ད་ནི་རྒྱལ་ཁམས་འདི་ཙམ་དུ་རྒྱ་བསྐྱེད་བྱ་བའི་དོན་ནོ། །༽
      དེའི་ལན་དུ་མགར་གྱིས། དོན་དེ་དང་མཚུངས་པའི་གླུ་བླངས་སོ༼༢༦༨༽། །བླ་ན་རྗེ་སྒམ་པས་ཁྲི་སྲོང་བཙན། འོག་ན་བློན་མཛངས་པ་སྟོང་བཙན་ཡུལ་བཟུང་རྗེ། མངའ་ཐང་ཆེན་པོ་རྐྱེན་དུ། ཇི་དང་ཇིར་ལྡན་ཏེ། ཕྱིའི་ཆབ་སྲིད་ནི་ཕྱོགས་བཞིར་བསྐྱེད། ནང་གི་ཁབ་སོ ༼༢༦༩༽ ནི་མི་ཉམས་པར་ལྷུན་སྡུག་འབངས་མགོ་ནག་པོ་ཡང་མཐོ་དམན་ནི་སྙམས༼༢༧༠༽། དཔྱའ་སྒྱུ་ནི་བསྐྱུངས༼༢༧༡༽། དལ་དུ་ནི་མཆིས༼༢༧༢༽། སྟོན་དཔྱིད་ནི་བསྐྱལ༼༢༧༣༽། མཛངས་པ་ནི་བསྟོད། དཔའ་བོ་ནི་བཀུར། ཆོས་བཟང་སྲིད་མཐོ་སྟེ། མི་ཡོངས་ཀྱིས་སྐྱིད་དོ། །བོད་ལ་སྔ་ན་ཡི་གེ་མེད་པ་ལ། བཙན་པོ་འདིའི་ཚེ་བྱུང ༼༢༧༤༽ ནས། བོད་ཀྱི་གཙུག་ལག་བཀའ་ཁྲིམས་ཆེན་པོ་དང་། བློན་པོའི་རིམ་པ་དང་། ཆེ་ཆུང་གཉིས་ཀྱི་དབང་ཐང་དང་། ལེགས་པའི་བྱ་དགའ། ཉེས་པའི་ཆད་པ། ཞིང་འབྲོག་གི་ཐུལ་ཀ ༼༢༧༥༽ དང་དོར་ཀ ༼༢༧༦༽ བྲེ་ཕུལ༼༢༧༧༽ དང་སྲང་ལ་སོགས་པ། བོད་ཀྱི་ཆོས་གཞུང་བཟང་པོ་ཀུན། བཙན་པོ་ཁྲི་སྲོང་བཙན་གྱི་རིང་ལ་བྱུང་ངོ་། །མི་ཡོངས་ཀྱིས་བཀའ་དྲིན་ཚོར་བས། སྲོང་བཙན་སྒམ་པོ་ཞེས་མཚན་གསོལ་ཏོ། །༼ཞེས་པའོ། །༽ ༼དཀྱུས༽ དེ་ལྟར་བྱུང་བ་ཆེན་པོའི་མཛད་སྒོ་རེའི་སྐབས་སུ་རྗེ་བློན་རྣམས་མགུར་རེ་བཞེངས་པའི་ལུགས་སྲོལ་ཡོད་པ་འདི་ལ་བསམ་ན། རྗེའི་མགུར་ལྷ༼༢༧༨༽ བྱ་བ་སོགས་ཀྱང་། བཙན་པོའི་མགུར་བཞེས་པ་ལ་མཐུན་འགྱུར་མཛད་པའི་ལྷ་དག་ལ་ཟེར་རམ་སྙམ། དེས་ན་གོང་གི་འདི་ནི་སྐུ་ཚེའི་སྟོད་ཀྱི་རྣམ་ཐར་དུམ་བུ་ཞིག་ཏུ་སྣང་ལ། ལར་རྒྱལ་པོ་འདིའི་ཕྱག་རྗེས་གཙོ་བོ་གསུམ་ནི། བོད་ཀྱི་ཡུལ་གྲུ་རྒྱལ་ཁབ་ཆེན་པོའི་ས་ཁྱོན་དུ་བསྐྱེད་པ་དང། སྔོན་ཆད་མེད་པའི་ཡི་གེའི་སྲོལ་ཕྱེས་པ་དང་། ཐུབ་པའི་བསྟན་པ་རིན་པོ་ཆེ་ཐོག་མར་སྤེལ་བ་འདི་རྣམས་ཡིན་ནོ། །
      འདིར་བོད་ཡིག་བྱུང་ཚུལ་གྱི་རྒྱལ་རབས་དང་འགྲེལ་བར་ཅུང་ཟད་དཔྱད་ན། དེ་ཡང་རྗེ་བུ་སྟོན་སོགས་ཀྱིས། ན་ག་རའི་ཡི་གེ་ལ་དཔེ་བྱས་ནས་ཐུ་མིས་མཛད་པར་བཞེད༼༢༧༩༽། ༼རཉྫ་མདོག་ལྡན་བྱ་བ་ཟུར་ཆག་པའི་༽ ལཉྫ་དང་ཝརྟུ༼འཁྱིལ་བ་༽ གཉིས་ལ་དཔེ་མཛད་ནས་དབུ་ཅན་དང་དབུ་མེད་མཛད་དོ་ཞེས་མཁས་པ་གཞན་དག་གིས་གསུངས༼༢༨༠༽། བོན་རྣམས་ཀྱི་ལྟར་ན། སྲོང་བཙན་གྱི་གོང་དུ་བོན་ཆོས་དེ་ཙམ་དར་བས་ཡི་གེ་མེད་ཟེར་བ་མི་བདེན་ཞིང་། དེ་ཡང་སྟག་གཟིག་གི་སྤུངས་ཡིག་བྱ་བ་ཞང་ཞུང་གི་ཡིག་རྒན་དུ་བསྒྱུར། དེ་སྨན་བྲག་ཏུ་འགྱུར། དེ་རིམ་གྱིས་དབུ་ཅན་དང་འབྲུ་མར་འགྱུར་སོགས་ཟེར། གང་ལྟར་ཡང་ཐུ་མི་དེ་རྒྱ་གར་ན་གུཔྟའི་རྒྱལ་རྒྱུད ༼༢༨༡༽ དག་གིས་སྲིད་སྐྱོང་པའི་སྐབས་སུ་བྱོན་པ་ཡིན་ཞིང་། ཤིན་ཏུ་ངོ་མཚར་བ་ནི། ཐུ་མི་དང་དུས་མཉམ་པའི་རྒྱ་གར་གྱི་རྒྱལ་པོ་ཧཪྵ་དང་། ཀུ་མ་ར་གུབྟ༼གཞོན་ནུ་སྦས་པ་དང་།༽ སུརྱ་ཝརྨན༼ཉི་མའི་གོ་ཆ།༽ སོགས་ཀྱི་དུས་སུ་བྱུང་བའི་ཟངས་ཀྱི་གླེགས་བུ ༼༢༨༢༽ ལ་སོགས་པ་ད་ལྟའི་བར་རྒྱ་གར་གྱི་ཡུལ་སོ་སོར་ཡོད་པ་དག་ལ། ཡི་གེ་བཀོད་པ་རྣམས་བོད་ཡིག་དང་ཧ་ཅང་འདྲ་ཆེ་ཞིང་། ཅུང་ཟད་རྒྱང་ནས་བལྟས་ཚེ་ལག་མི་མཁས་པ་ཞིག་གིས་བོད་ཡིག་བྲིས་སམ་སྙམ་པ་འཆར། ཡིག་འབྲུ་ཕལ་ཆེར་མ་བསླབ་ཀྱང་ཐོར་རེ་བ་ཞིག་ཀློག་ཐུབ་པར་འདུག དཔེ་མཚོན་ཙམ་བཀོད་ན། གཞོན་ནུ་སྦས་པའི་ཟངས་ཀྱི་གླེགས་བུ་ལ་འདི་ལྟར་སྣང་།

      ལྷ་ཆེན་པོ་ལ་ཕྱག་འཚལ་ལོ། དཔལ་ཟླ་བ་སྦས་བའི་རྣམ་པར་རྒྱལ་བའི་རྒྱལ་སྲིད་ལོ་བཅུ་བའི་སྨིན་དྲུག་གི་ཟླ་བ་ལ།
      དེས་ན་བོད་ཡིག་གང་ལ་དཔེར་བཅད་པའི་ཕྱི་མོ་དེ་ཡང་གུབ་པྟའི་ཡི་གེ་འདི་ཡིན་སྙམ༼༢༨༣༽། དེར་མ་ཟད་རྙིང་མའི་གཏེར་ཡིག ༼༢༨༤༽ གི་གྲས་ཀྱི་བརྡ་ཡིག ༼༢༨༥༽ དེ་དག་ཀྱང་གུཔྟའི་ཡི་གེ་ལ་ཤིན་ཏུ་འདྲ་བ་མང་། གཞན་ཡང་ཞིབ་ཏུ་བརྟག་ཚེ། དབུ་ཅན་དབུ་མེད་གཉིས་ཀྱང་ཐོག་མ་ཞིག་ནས་མཉམ་དུ་མཛད་པ་མིན་པར། དབུ་ཅན་འདི་ཀ་རང་མགྱོགས་པར་བྲིས་པ་ལས་དབུ་མེད་རང་བཞིན་གྱིས་བྱུང་བ་ལྟར་མངོན་ཏེ། སྔོན་གྱི་ཡིག་རྙིང་མང་བོ་དང་། ད་ལྟ་ཡང་འབྲུག་ཡུལ ༼༢༨༦༽ ན་དར་སྲོལ་ཆེ་བའི་ལྷོ་ཡིག་ཏུ་གྲགས་པའི་གཟུགས་རྣམས་ལ་བལྟས་ན། དབུ་ཅན་དབུ་མེད་དུ་འགྱུར་ཚུལ་མངོན་སུམ་དུ་མཐོང་བ་ལྟར་འདུག་སྟེ།

དཔེར་ན།

      འདི་འདྲར་འདུག་ཅིང་། ཡི་གེ་གཞན་རྣམས་ནི་འགྱུར་ཚུལ་གོ་སླ། དེ་ཡང་སྔ་མོའི་ཡི་གེ་ཕལ་ཆེར་ལ། རྩེག་མ་རྣམས་སྟེང་འོག་ཐད་ཀར་མེད་ཀྱང་། ཅུང་ཟད་སྔ་ཕྱིའི་ཚུལ་དུ་ཡོད་པ་རྒྱ་གར་གྱི་ཡི་གེ་བཞིན་དུ་སྣང་ཞིང་། དབུ་མེད་ལ་ནི་ད་དུང་ཡང ༼ ༽ ༼ ༽ སོགས་ས་དང་ར་གཉིས་མདུན་དུ་བྲི་སྲོལ་ཡོད་པ་དེ་ཡིན་ལ། དེའི་ཕྱིར་ས་དང་པ་གཉིས་མཉམ་དུ་སྦྲེལ་བ་ལས། དབུ་མེད་ཀྱི་སྤ་ཡིག་ཡ་ཡིག་འདྲ་བ་ཞིག་བྱུང་དོན་ཡང་དེར་འདུག་ཅིང་། དོན་ལ ༼ ༽ ཡིག་འདིའི་ཕྱེད་སྔ་མ ༼ ༽ ཡིག་དང་ཕྱེད་ཕྱི་མ ༼ ༽ ཡིག་ཏུ་སྣང་།
      གཞན་ཡང་ཡིག་མགོའི་དང་ཀྱོག་འདི་ཡང་ཨོ་ཡིག་གི་གཟུགས་རིམ་གྱིས་འགྱུར་བར་ཤེས་ཏེ། རྒྱ་དཔེ་རྣམས་ཀྱི་ལྡེབ་དང་པོ་ལ་ཨོཾ་ཡིག་རེ་འབྲི་སྲོལ་འདུག་ཅིང་།རྒྱ་ཡིག་གི་ཨོཾ་གྱི་གཟུགས་ནི་ད་ལྟའི་བར ༼ ༽ འདི་འདྲར་སྣང་ལ། རང་རེའི་དཔེ་རྙིང་འགའ་རེའི་དབུ་ལ་ཡང་དང་ཀྱོག ༼ ༽ འདི་འདྲ་འདུག རྙིང་མའི་གཏེར་ཆོས་དག་གི་དབུ་ལ༼ ༽ འདི་བྱུང་བ་དེ་ཡང་ཨོཾ་དུ་འདུག་སྙམ། གཏེར་ཚེག་བྱ་བ་དེ་ལ་ཡང་། འབྲི་གུང་དཔལ་འཛིན་གྱིས། སྒྲ་མདོ་དང་འགལ་ཞེས་དགག་པ་མཛད་མོད། དེ་སྒྲ་མདོའི་རྣམ་བཅད་དུ་མི་འདུག་གི་བོད་ཡིག་རྙིང་པ་རིགས་ལ་རྐང་པའི་མཐར་ཚེག་དྲག་གཉིས་རེ་དང་། འགའ་རེ་ལ་ཚིག་རེ་རེ་བཞིན་ཚེག་དྲག་གཉིས་རེའི་བར་དུ་བཙུད་པ་སོགས་ལྷ་སའི་རྡོ་རིང་ལ་ཡང་འདུག་པས། དོན་ལ་བོད་ཡིག་རྙིང་བའི་སྲོལ་དུ་སྣང་ལ། ཚེག་སྟེང་འོག་གཉིས་མཉམ་དུ་སྦྲེལ་བ་ལས་དབུ་མེད་ཀྱི་བར་ཚེག་ནར་མོ་དེ་བྱུང་བར་འདུག དེས་ན་བོད་ཡིག་གི་སྲོལ་གསར་དུ་ཕྱེས་ནས་བཟུང་། ད་བར་ལོ་ཆིག་སྟོང་སུམ་བརྒྱ་ཙམ་སོང་ཟིན་མོད། དེའི་བར་ལ་བོད་ཀྱི་བརྡ་དང་ཡིག་གཟུགས་གཉིས་ཀ་ཆེས་མི་འདྲ་བ་ཞིག་ནི་མ་འགྱུར་བས། ད་ལྟ་ཡང་རྒྱལ་བོའི་དུས་ཀྱི་རྡོ་རིང་སོགས་ལ་བལྟས་ཚེ་ཚིག་དོན་རགས་ཙམ་རེ་གོ་ཐུབ་པ་ནི། བོད་མི་ཡི་གེ་བྱང་བ་ཀུན་ལ་ཡོད། རྒྱ་གར་ན་ལོ་ཆིག་སྟོང་སྔོན་གྱི་གུཔྟའི་ཡི་གེ་དང་། དེང་སང་གི་ཡི་གེ་གཉིས་ཤིན་ཏུ་མི་འདྲ་བར་འགྱུར་ནས་སྣང་། ལྷག་པར་ཡང་རྗེ་རིན་པོ་ཆེའི་སྐུ་དུས་ཙམ་ནས་བཟུང་དཔེ་རྣམས་དཔར་འདེབས་བྱེད་པའི་སྲོལ་དེ་དར་ཁྱབ་ཆེ་བར་གྱུར ༼༢༨༧༽ ཅིང་། དེང་སང་ཤིང་དཔར་འབོར་ཆེན་བོད་ཡུལ་ན་ཡོད་པ་འདི་ཙམ་ས་སྟེང་གཞན་གང་དུའང་མེད་པར་གྲགས། དཔར་ལས་བྱེད་མགོ་ཚུགས་པ་ནས་བཟུང་ཡིག་གཟུགས་དང་དག་ཆ་སོགས་ཀྱང་ཕལ་ཆེར་སྲོལ་ལུགས་གཅིག་ལས་ཅུང་ཟད་ཀྱང་མ་འགྱུར་བར་གནས་པ་ཙམ་བྱུང་། དེས་ན་ད་དུང་ཡང་རང་རེ་རྣམས་ཇི་སྲིད་བསྟན་བཅོས་ཀྱི་ཐ་སྙད་དང་བོད་སྐད་ལ་ཆ་འཇོག་བྱེད་པ་དེ་སྲིད་དུ་བོད་ཡུལ་ཡོངས་རྫོགས་ཀྱི་སྐད་རིགས་ཀྱང་གཅིག་ཏུ་གནས་པ་ཡིན་ཞིང་། དཔེར་ན་ཆོས་སྐད་དུ་བྲིས་པའི་གླེགས་བམ་ཞིག་མངའ་རིས་ནས་ཨ་མདོའི་བར་འཁྱེར་ཡང་། ཐམས་ཅད་ཀྱིས་རྟོགས་ཤིང་གོ་ཐུབ་པ་ཡིན། དེ་མིན་དེང་སང་མི་འགའ་ཞིག་གིས། དབུས་ཀྱི་ཕལ་སྐད། བླ་དྭགས་ཀྱི་ཕལ་སྐད་སོགས་སྣང་བར་གང་དྲན་གྱི་སྐད་མཛོད་དང་གླེགས་བམ་སྡེབ་པ་འདི་རིགས། རྒྱ་ལ་དར་སྲོལ་ཆེ་རུ་སོང་ན། ཡུལ་སོ་སོའི་ཕལ་སྐད་མི་འདྲ་བའི་རྐྱེན་གྱིས། བོད་ཀྱི་སྤྱི་སྐད་ཡང་དུམ་བུར་ཆད་དེ། ནམ་ཞིག་ན་ཡུལ་སོ་སོའི་སྐད་དང་ཡི་གེ་ཕན་ཚུན་བརྡ་མི་འཕྲོད་པ་ཞིག་འོང་ངེས་ལ། སྐད་དང་ཡི་གེ་སོ་སོར་གྱེས་པས། བསམ་འཁྱེར་དང་སྤྱོད་ལམ་སོགས་ཀྱང་ཐ་དད་དུ་སོང་སྟེ། མཐར་བོད་ཀྱི་རིགས་དང་རྒྱལ་ཁམས་རྩ་བ་ཉིད་ནས་སིལ་བུར་འཐོར་བའི་རྐྱེན་དུ་འགྲོ་བ་ལགས། གལ་ཏེ་ཕལ་སྐད་གསར་བ་དེ་འདྲ་ཞིག་བོད་ཡུལ་ཀུན་ཏུ་དར་བའི་དབང་དུ་བྱས་ན་ཡང་། རང་ཅག་གི་ཆོས་སྐད་དུ་བྲིས་པའི་མདོ་རྒྱུད་རིག་གནས་ཀྱི་གཙུག་ལག་རྒྱ་མཚོ་ལྟ་བུ་འདི་ཀུན་རིམ་གྱིས་སུས་ཀྱང་མི་གོ་བའི་གླེགས་བམ་གྱི་ཕུང་བོ་ཙམ་དུ་འགྲོ་ངེས་པས། སྲོལ་ངན་འདི་འདྲའི་ཕྱོགས་ལ་ཐམས་ཅད་ཀྱིས་བག་ཟོན་དགོས་པ་ལགས།
     དེ་ལྟར་བོད་ཀྱི་ཡི་གེ་ནི་གུཔྟའི་ཡི་གེ་ལ་དཔེ་བཅད་ནས། ཐུ་མིས་གསར་བཟོ་མཛད་པར་སྣང་ལ། ལར་ཆོས་དང་འབྲེལ་བའི་བོད་ཀྱི་སྲོལ་ལུགས་གང་ཡིན་དག་ལ། རྒྱ་གར་ན་དེ་དང་དེའི་ཐོག་མའི་ཕྱི་མོ་འདི་ཡིན་ནོ་སྙམ་པ་རེ་རྙེད་རྒྱུ་ཡོད་ཅིང་། དཔེར་ན་ལྷ་སའི་གཙུག་ལག་ཁང་བཞེངས་ཚེ་ཡང་། ཟུར་བཞི་གཡུང་དྲུང་གི་རིས་དང་། ཀྭ་བ་རྣམས་ཕུར་བུའི་དབྱིབས་སུ་མཛད་ཅེས་གྲགས་པ་ལྟར་ཡིན་ལ། རྒྱ་གར་ན་སྔོན་གྱི་དགོན་གནས་ཞིག་རལ་དུ་སོང་བ་དག་མཇལ་བའི་ཚེ་ཡང་། ཟུར་བཞི་གཡུང་དྲུང་གི་རིས་དང་། ཀ་བ་ཕུར་བའི་དབྱིབས་སུ་བྱས་པ་སོགས་རྒྱན་དང་བཀོད་པ་ཐམས་ཅད་འདྲ་བར་མ་ཟད། ཐ་ན་ཀྭ་བ་དེ་དག་གི་ཆེ་ཆུང་གི་ཚད་ཀྱང་། རང་རེའི་ཇོ་ཁང་གི་ཀ་བ་འདི་རྣམས་དང་ཕན་ཚུན་གཅིག་གི་ཤུལ་དུ་གཅིག་འཛུགས་ནུས་པ་ཙམ་དུ་འདྲ་བར་སྣང་། དེས་ན་ལྷ་སའི་གཙུག་ལག་ཁང་འདི་ཡང་བི་ཀྲ་མ་ཤི་ལའི་ལྷ་ཁང་ལ་དཔེ་བྱས་ནས་བཞེངས་སོ ༼༢༨༨༽ ཞེས། དཔའ་བོ་གཙུག་ཕྲེང ༼༢༨༩༽ སོགས་ཀྱིས་གསུངས་པ་བདེན་པར་སེམས།
མདོར་ན་ཆོས་ཀྱི་རྒྱལ་བོ་ཆེན་པོ་འདིས་ནི།
ཚེ་གཅིག་ཡུན་ལ་ཕན་པའི་མི་ཆོས་དང་། །
དོན་གཉིས་འབྲས་བུ་སྩོལ་བའི་ལྷ་ཆོས་ཏེ། །
དུས་གསུམ་ཀུན་ཏུ་བདེ་དགའི་དཔལ་སྦྱིན་པའི། །
སྡེ་བཞིའི་ནོར་གྱིས་བོད་ཁམས་ཕྱུག་པར་མཛད། །ཞེས་ཀྱང་སྨྲའོ།