"ཐང་ག་སྒྱུ་རྩལ་འགྲེམ་སྟོན"ཧྥ་རན་སིའི་ཕ་རི་སིར་འགྲེམ་མགོ་བརྩམས།

     སྤྱི་ཟླ11པའི་ཚེས10ཉིན། མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་དང་ཀྲུང་གོ་རྒྱལ་སྤྱིའི་རིག་གནས་ཁྱབ་སྤེལ་ལྟེ་གནས་ཀྱིས་གཙོ་གཉེར་བྱེད་པའི"ཐང་ག་སྒྱུ་རྩལ་འགྲེམ་སྟོན"ཧྥ་རན་སིའི་ཕ་རི་སི་མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་སྤྱི་ཁྱབ་པུའུ་རུ་འགྲེམ་སྟོན་བྱེད་འགོ་ཚུགས་པ་རེད།
     མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱི་དཔོན་པོ་དང་ཁོངས་ཞུགས་རྒྱལ་ཁབ་ཁག་གི་སློབ་གསོ་ཚན་རིག་རིག་གནས་རྩ་འཛུགས་སུ་བཅའ་སྡོད་བྱེད་མཁན་ཕྱི་འབྲེལ་དཔོན་པོ། ཧྥ་རན་སིའི་འབྲེལ་ཡོད་དཔོན་པོ་དང་སྒྱུ་རྩལ་ལས་རིགས་ཀྱི་མི་སྣ། དེ་བཞིན་ཧྥ་རན་སི་རུ་ཡོད་པའི་ཀྲུང་གོ་བ་དང་ཕྱི་སྡོད་ཀྲུང་གོ་བའི་འཐུས་ཚབ་སོགས་མི300ལྷག་འགོ་ཚུགས་པའི་མཛད་སྒོར་ཞུགས་པ་རེད།
     ལུང་ཡུས་ཞང་གིས་འགོ་ཚུགས་པའི་མཛད་སྒོའི་ཐོག་གསུངས་པའི་སྨོན་ཚིག་ནང་དུ་ཐང་ག་ནི་ཀྲུང་གོའི་བོད་རིགས་ཀྱིས་ལོ་ངོ་སྟོང་ལྷག་རིང་རྒྱུན་འཛིན་བྱས་པའི་རི་མོའི་སྒྱུ་རྩལ་ཞིག་ཡིན་ལ། བོད་ཀྱི་རིག་གནས་ཀྱི་འདྲེན་བྱེད་དངོས་པོ་ཞིག་ཀྱང་རེད། ཐེངས་འདིར་འགྲེམ་སྟོན་བྱས་པའི་རེབ་གོང་ཐང་ག20ནི་བོད་བརྒྱུད་ནང་བསྟན་སྒྱུ་རྩལ་གྱི་དཔེ་མཚོན་ཐང་ག་ཡིན་པ་དང་། སྤྱི་ལོ་དུས་རབས13པར་བྱུང་བ་རེད། 2009ལོར་རེབ་གོང་ཐང་ག་ནི་མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱིས་མིའི་རིགས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་བརྩམས་ཆོས་ཀྱི་མིང་ཐོར་བཀོད་པ་རེད། བློ་བཟང་བསྟན་པ་ནི་རེབ་གོང་སྒྱུ་རྩལ་གྱི་མཚོན་བྱེད་རང་བཞིན་ལྡན་པའི་རྒྱུན་འཛིན་པ་ཞིག་ཡིན་ཞིང་། ཁོང་གིས"ལྷ་རིས་པའི་ཁྱིམ་རྒྱུད"ཀྱི་རྒྱུན་འཛིན་པ་མི་རབས14ཡིན་པའི་ངོས་ནས་ཐོག་མཐའ་བར་གསུམ་དུ་ཐང་གའི་སྒྱུ་རྩལ་རྒྱུན་འཛིན་དང་། སྲུང་སྐྱོང་། དར་སྤེལ་བཅས་ལ་གཞོལ་བ་རེད། འདི་ནི་ཀྲུང་གོའི་བོད་རིགས་ལྷ་རིས་པ་ཞིག་གིས་འཛམ་གླིང་གི་རིག་གནས་ལ་བཞག་པའི་ཤུལ་བཞག་ཡིན་པ་དང་། མཉམ་འབྲེལ་བྱས་པ་ནི་འཛམ་གླིང་ཡོངས་ཀྱི་མིའི་རིགས་ཀྱི་སེམས་པའི་ཚོར་ཤེས་རེད་ཅེས་གསུངས་པ་རེད།
     ངོ་སྤྲོད་བྱས་པར་གཞིགས་ན། “རི་མོ་འབྲི་རྩལ་མཉམ་འདུས”ནི་ལོ་མང་པོའི་རིང་སྔ་གཞུག་ཏུ་དེང་རབས་ཀྲུང་གོའི་སྒྱུ་རྩལ་པ་ཕུལ་བྱུང160ལྷག་སྒྲིག་འཛུགས་བྱས་ནས་གཅིག་རྗེས་གཅིག་མཐུད་ཀྱིས་མཉམ་འབྲེལ་རྒྱལ་ཚོགས་དང་ཨ་རི། ཨུ་རུ་སུ། ཐེ་ལན། རྒྱ་གར། སི་ཕེན། པ་རེན་སོགས་རྒྱལ་སྤྱིའི་རྩ་འཛུགས་དང་རྒྱལ་ཁབ་སོགས་སུ་ལེགས་འགྲུབ་ངང་གཉེར་ཡོད་པ་རེད།