སྟོན་པ་ཚད་མའི་སྐྱེས་བུར་སྒྲུབ་ཚུལ་གྱི་རིགས་ལམ་སྐོར་ལ་དཔྱད་ཞིབ་ལམ་ཙམ་བྱས་པ།

དང་པོ། ཐོག་མའི་གླེང་བསྡུས།
     ཡངས་ཤིང་རྒྱ་ཆེ་བའི་འཛམ་གླིང་གི་གོ་ལ་འདིའི་ཐོག་སྲོག་འཚོ་གནང་བའི་ང་ཚོ་མི་ཡིན་ནོ་ཅོག་ལ།ཆོས་ལུགས་སམ་གྲུབ་མཐའ་གང་ཞིག་ལ་སྐྱབས་འཚོལ་རེ་བཅོལ་ཡོད་མེད་ཀྱི་སྡོམ་ཚིག་སྤྱིར་བཏང་བ་ཞིག་བརྒྱབ་ཚེ།བརྒྱ་ཆའི་དགུ་བཅུ་གོ་དགུ་ཆོས་ལུགས་འདྲ་མིན་གང་ཞིག་གིས་བཀོད་འདོམས་དང་སྟངས་འཛིན་འོག ལྟ་སྤྱོད་ཡུལ་གོམས་ཀྱིས་མཚོན་པའི་སྤྱི་བྱེའི་འཚོ་གནས་སོགས་ལ་འབད་སྒྲུབ་བྱེད་བཞིན་ཡོད་པ་ནི་སྤོབས་པ་གཟེངས་སུ་བཏེགས་ནས་བཤད་ཆོགདེ་ལྟའི་ཆོས་ལུགས་ཀྱི་གྲལ་རིམ་ནང་ཆོས་ལུགས་པ་དཀྱུས་མ་དག་མ་ཐེ་བའི་ཕྲ་ཞིབ་ཀྱི་རྣམ་དཔྱོད་མཐོ་བ་བྱིངས་ཀྱིས་རང་རང་གི་ལུགས་ཀྱི་སྟོན་པ་དང༌། གྲུབ་མཐའི་གནད་དོན་ཁག་གཏན་ཚིགས་ཡང་དག་དང་ལྟར་སྣང་སྟེ། གང་ལྟར་རྒྱུ་མཚན་ཞིག་གི་སྒོ་ནས་གཏན་ལ་འབེབས་ཀྱིན་ཡོད་པ་སྨོས་ཅི་དགོས།དེ་ཕྱིར། རང་རེའི་ནང་བསྟན་ཆོས་ལུགས་པ་ལྟ་བུར་མཚོན་ན། རྒྱ་གར་གྱི་ཚད་ཐུབ་མཁས་གྲུབ་སྤྱི་དང༌།ལྷག་པར་ཀླུ་སྒྲུབ་ཡབ་སྲས་དང་རིགས་པའི་དབང་ཕྱུག་སོགས་ཀྱིས་སྟོན་པ་ཚད་མར་སྒྲུབ་པའི་དྲང་བདེན་ངེས་དོན་གྱི་རིགས་པའི་རྣམ་གྲངས་ཆེས་མང་པོ་ཞིག་གསུངས་ཡོད་པ་སུས་ཀྱང་བསྙོན་དུ་མེད། ཕྱོགས་མཚུངས་བོད་རང་གི་སྔོན་བྱོན་མཁས་གྲུབ་དག་གིས་ཀྱང་འཕགས་ཡུལ་མཁས་པའི་གསུང་དེ་དག་གཞིར་བཟུང་ཐོག་མི་གསལ་བ་གསལ་བ་དང༌། མ་ཚང་བ་ཚང་བ། ཡན་ལག་ཁ་སྐོང་བ་སོགས་ཀྱིས་འཐུས་སྒོ་ཇེ་ཚང་དུ་བཏང་བའི་དཔྱད་གཏམ་དང་ཡིག་འཇོག་སྤེལ་གནང་མཛད་པའང་གྲངས་ཀྱིས་མི་ལང༌། དེ་ལྟ་ནའང་དེང་ཆར་རང་རེའི་བོད་མིའི་སྤྱི་ཡོངས་ཀྱི་བབ་ལ་གཞིགས་ཚེ་ནང་དོན་རིག་པའི་གཞུང་ཆེན་ཁག་ལ་སྦྱངས་བརྩོན་དོ་སྣང་བྱེད་པ་ནི་ཆེས་ཉུང་ཞིང༌། སྲོལ་རྒྱུན་ནང་བསྟན་རིག་པའི་གནད་དོན་ཁག་ལ་དུས་རབས་དང་མཐུན་པའི་དཔྱད་གཏམ་སྤེལ་བ་ནི་དེ་བས་ཀྱང་སྲིད་མཐའ་ཙམ་དུ་གནས་པ་མྱོང་བས་གྲུབ།གནས་ཚུལ་འདིའི་འོག་ནས་ད་དུང་སློབ་དཔོན་གྱི་གོ་གནས་འཛིན་པ་འགས། རང་གིས་འཆད་པའི་བརྟུལ་ཞུགས་ལས་དཔྱད་གཏམ་དང་ཡིག་འཇོག་སྤེལ་བ་དགག་བྱར་འཛིན་པར་མ་ཟད། གཞན་དང་གཞན་ལའང་དཔྱད་རྩོམ་མཛད་པར་དམའ་འབེབས་དང་སྔོན་འགོག་གནང་བ་ནི་རྩོམ་རིགས་དང་རྒྱལ་བསྟན་འཕེལ་རྒྱས་སུ་འགྲོ་བའི་འགལ་རྐྱེན་སྔ་ན་མེད་པ་ཞིག་སྟེ། དཔེར་ན། དེང་སང་རྒྱལ་ཁབ་ཕྱི་ནང་གི་སློབ་གྲྭ་ཆེ་འབྲིང་སོ་སོའི་ནང་རྒྱུ་སྤུས་དག་ཚད་ལ་མ་ལྟོས་པར་དཔྱད་བརྗོད་རྩོམ་ཡིག་དང་གཙོར་འབྲེལ་གྱི་སྣ་མང་རྩོམ་ཡིག་གང་ཅི་སྤེལ་བ་ནི་སློབ་གྲྭ་དེ་དང་དེ་འཕེལ་རྒྱས་ཀྱི་རྣམ་པར་ངོས་འཛིན་གནང་བཞིན་པ་དང༌།དེ་མཚུངས་རང་ཅག་གིས་འདས་པའི་དུས་རབས་གང་ཞིག་གི་ནང༌། རྒྱལ་བསྟན་དར་བ་དང་རྩོམ་རིགས་འཕེལ་རྒྱས་སུ་སོང་ཡོད་མེད་དཔག་བྱེད་ཀྱི་དན་རྟགས་གཙོ་བོ་ནི། སྐབས་དེ་དང་དེར་ཆོས་པའི་གྲངས་ཀ་ཙམ་ལ་མི་ལྟ་བར་གཏན་འབེབས་ཀྱི་ཡིག་འཇོག་གནང་བའི་མཁས་དབང་བྱོན་མ་བྱོན་ལ་ཐུག་འདུགདེ་ཡང༌། ད་ལྟ་ང་ཚོའི་མིག་མཐོང་ལག་ཟིན་དུ་ཡོད་པའི་གསུང་རྩོམ་བྲག་རི་ལ་འགྲན་པ་དག་གིས་ཚོད་དཔག་བྱེད་ཀྱིན་ཡོད། གླིང་ཆེན་འདིའི་ཕྱོགས་སྣེ་ཡོངས་ནས་བཤད་ན། ཚན་རིག་རིག་གནས་སོགས་དབྱར་དུས་ཀྱི་ཤ་མོ་བརྡོལ་བ་བཞིན་གཅིག་རྗེས་གཅིག་གིས་མ་ཆོད་པར་འཕེལ་རྒྱས་བླ་ལྷག་ཏུ་འགྲོ་བཞིན་པའི་དུས་འདིར། མི་རིགས་གཞན་གྱི་རིག་གནས་དང་རྩོམ་རིགས་འཕེལ་ཚད་ལ་བལྟས་ན་རང་རེའི་བོད་ཀྱི་རྩོམ་རིགས་རིག་གནས་ཀྱི་འཕེལ་ཁའི་གོམ་འགྲོས་ཆེས་དལ་ཞིང༌། ལྡབ་འགྱུར་གྱིས་རྗེས་ལུས་མུན་པའི་ཁུག་པར་ལྷུང་བ་ཆེས་ཤིན་ཏུ་གསལ། དེར་བརྟེན། རྩོམ་རིགས་དང་རིག་གནས་དར་རྒུད་ཀྱི་རང་བཞིན་ནི། ང་ཚོ་འགྲོ་བ་མིའི་སྙིང་སྟོབས་དང་རྣམ་དཔྱོད་ཀྱི་ནུས་ཤུགས་བེད་སྤྱོད་གཏོང་ཕྱོགས་ཀྱི་དཀྱོགས་མཚམས་ལས་བྱུང་བ་ཞིག་ཡིན་པས་རང་ཅག་བོད་མི་ཡོངས་ཀྱིས། སོ་ནམ་བྱེད་ཚུལ་སོ་ནམ་གྲོང་པར་དཔེ་བལྟས། ཞེས་པ་ལྟར་དམིགས་རྒྱ་དང་སྙིང་སྟོབས་ཆེར་བསྐྱེད་ཀྱིས་རང་རེའི་བོད་ཀྱི་ཐུན་མོང་མ་ཡིན་པའི་རྩོམ་རིགས་རིག་གནས་འདི་ཉིད། འཛམ་གླིང་གི་རྩོམ་རིགས་རིག་གནས་སྤྱི་འགྲོས་ཅན་ཞིག་ཏུ་བསྒྱུར་རྒྱུ་ནི་རྩམ་གཟན་བོད་མིའི་རིགས་སུ་གཏོགས་པ་ཚུན་ལའང་འོས་འགན་ཡོད་པ་ཞིག་ཡིན།
     སྤྱི་འགྲོས་རང་བཞིན་ཅན་གྱི་གནས་བབ་དེར་བསྒྱུར་བཀོད་ཀྱི་ཐབས་ཚུལ་དུ་མ་ཞིག་ཡོད་པ་ལས་གལ་ཆེ་བའི་གཙོ་རྒྱུ་ཞིག་ནི། མེས་པོ་དམ་པའི་ཁྱད་ནོར་རྒྱུན་སྲོལ་རིག་གནས་འདི་འབྲེལ་གྱི་བབ་ལུགས་ལ་བློ་དྲང་གཟུར་གནས་ཀྱིས་རྒྱུས་ལོན་དང་ཞིབ་འཇུག་གཏིང་ཟབ་བྱས་ནས་དུས་བསྟུན་བླང་དོར་གྱི་རིགས་ཅི་མངའ་སྦ་གསང་མེད་པར་འཆད་པ་དང་དཔྱད་བརྗོད་སྤེལ་བ་ལས་གཞན་མེད། བོད་ཀྱི་སྲོལ་རྒྱུན་རིག་གནས་ལ་དབྱེ་ཞིབ་བྱེད་ཚེ། བོད་རིག་པའི་ཚོགས་ཆེན་ཞིག་གི་སྟེང༌། པཎ་ཆཻན་རིན་པོ་ཆེས་གསུངས་དོན། བོད་རིག་པར་ཞིབ་འཇུག་བྱེད་ཚེ་ངེས་པར་དུ་ནང་དོན་རིག་པ་གཞི་ལ་འཛིན་དགོས།ཞེས་བོད་རིག་པར་རྒྱུས་ལོན་མངའ་བའི་གསུང་རིན་ཐང་ཅན་བསྩལ་བ་འདི། བོད་རིག་པར་ཞིབ་འཇུག་གནང་མཁན་ཚང་མའི་སེམས་ལ་ཉར་དགོས།ནང་ཆོས་ལ་དབྱེ་ཞིབ་གཏིང་ཟབ་ཅིག་བྱེད་སྐབས་ངེས་པར་དུ་དེའི་འབྱུང་ཁུངས་དང་བརྒྱུད་རིམ་ལ་བརྟག་ཞིབ་བྱེད་རྒྱུ་སྔོན་དུ་འགྲོ་གལ་ཆེ་བ་ལྟ་བུར་མཐོང་སྟབས། དེ་འབྲེལ་གྱི་དགོས་དམིགས་སེམས་ཕུགས་སུ་བཅངས་ཏེ་ནང་དོན་རིག་པའི་འབྱུང་ཁུངས་ཀྱི་དབང་དུ་བྱས་ནས་སྟོན་པ་ཚད་མའི་སྐྱེས་བུར་སྒྲུབ་ཚུལ་གྱི་སྐོར་ལ་དཔྱད་ཞིབ་ལམ་ཙམ་བྱེད་རྒྱུ་དེ་རྩོམ་ཡིག་འདིའི་བརྗོད་གནད་ཡིན།
གཉིས་པ། སྟོན་པའི་བྱུང་རིམ་རོབ་བསྡུས།
     འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ་སྟོན་པ་བཅོམ་ལྡན་འདས་ནི་རྒྱ་གར་གྱི་ཤཱཀྱའི་རིགས་སུ་ཡབ་ཟས་གཙང་དང་ཡུམ་སྒྱུ་མ་ལྷ་མཛེས་གཉིས་ཀྱི་སྲས་སུ་སྤྱི་ལོ་སྔོན་གྱི་ལོ624ལོར་སྐུ་འཁྲུངས་ནས545 ལོར་མྱ་ངན་ལས་འདས༼གནས་བརྟན་སྡེ་བའི་ལུགས་ལྟར་བཀོད་པ་ཡིན། ད་དུང་བཤད་ཚུལ་མང༽ཤིང༌།དེ་ཡང་ཐུབ་པའི་དབང་པོའི་ཐུན་མོང་དང་ཐུན་མོང་མ་ཡིན་པའི་རྣམ་པར་ཐར་པ་མཐའ་དག་ནི་བརྗོད་ཡུལ་ལས་འདས་མོད་ཀྱང༌།སྐབས་འདིར་སྣང་ཚུལ་ཐུན་མོང་བ་གཞིར་བཟུང་སྟེ་སྟོན་པའི་བྱུང་རིམ་རོབ་ཙམ་ཐོག་མར་ཞུ་རྒྱུར།རང་ཅག་གི་འདྲེན་མཆོག་དམ་པ་འདིའི་སྐྱེ་བ་སྔོན་མར་དགའ་ལྡན་ཡིད་དགའ་ཆོས་འཛིན་དུ་ལྷའི་བུ་དམ་པ་ཏོག་དཀར་ཞེས་བྱང་སེམས་སྐྱེ་བ་གཅིག་ཐོགས་པར་གནས་ཤིང་དག་པའི་འཁོར་ཚོགས་རྗེ་བཙུན་བྱམས་པ་སོགས་གདུལ་བྱ་གྲངས་མེད་པར་ཆོས་སྟོན་གྱིན་བཞུགས་པ་ལ།འཛམ་བུ་གླིང་བ་རྣམས་གདུལ་བའི་དུས་ལ་བབས་པར་མཁྱེན་ནས་གཟིགས་པ་ལྔ་སྟེ། ཡུལ་དང༌། རིགས། དུས། བུད་མེད། རུས་སོགས་ལ་གཟིགས་ནས་རྗེ་བཙུན་བྱམས་པ་རང་གི་རྒྱལ་ཚབ་ཏུ་མངའ་གསོལ་གནང་སྟེ།ཡུམ་སྒྱུ་འཕྲུལ་ལྷ་མོའི་ལྷུམས་སུ་ཞུགས། དེ་ཚེ་ས་ཆེན་པོ་རྣམ་པ་དྲུག་ཏུ་གཡོས་ཏེ། འཇིག་རྟེན་གྱི་ཁམས་ཐམས་ཅད་འོད་ཀྱིས་ཁྱབ། ཡུམ་སྒྱུ་འཕྲུལ་ལྷ་མོའི་རྨི་ལམ་དུའང་གླང་པོ་ཆེ་མཆོག་ཅིག་ཡུམ་ཉིད་ཀྱི་གློ་གཡས་ནས་ཞུགས་པ་སོགས་རྨིས། དེ་ནས་ཡུམ་གྱི་ལྷུམས་སུ་ཟླ་བ་བཅུར་བཞུགས་ནས་སྐུ་འཁྲུངས་པའི་དུས་སུ། ཡུམ་གྱི་གློ་གཡས་པ་ལས་སྐུ་འཁྲུངས་མ་ཐག་ཕྱོགས་བཞིར་གོམ་པ་བདུན་བདུན་སྤོས་ནས།  འདི་སྐད་དུ། འདི་ནི་ཤར་ཕྱོགས་ཡིན་ཏེ། མྱ་ངན་ལས་འདས་པའི་ཐོག་མར་འགྲོ་བར་བྱའོ།། འདི་ནི་ལྷོ་ཕྱོགས་ཡིན་ཏེ། འགྲོ་བ་ཐམས་ཅད་ཀྱི་ཡོན་གནས་སུ་འགྱུར་བར་བྱའོ། ། འདི་ནི་ནུབ་ཕྱོགས་ཡིན་ཏེ།ངའི་སྐྱེ་བའི་ཐ་མ་ཡིན་ནོ། །འདི་ནི་བྱང་ཕྱོགས་ཡིན་ཏེ། སྲིད་པའི་མཚོ་ལས་བརྒལ་བར་བྱའོ།།ཞེས་དམ་བཅའི་ཤིས་ཚིག་ཆེད་དུ་སྒྲོག་པར་མཛད། བྱང་ཆུབ་སེམས་དཔའ་འཁྲུངས་པའི་ཉིན་དེར། ཕྱོགས་བཞིའི་རྒྱལ་པོ་ཆེན་པོ་བཞི་ལ་བུ་བཞི་དང༌།བཟང་ལྡན་སོགས་ཤཱཀྱའི་བུ་ལྔ་བརྒྱ། གྲགས་འཛིན་མ་སོགས་ཤཱཀྱའི་བུ་མོ་ལྔ་བརྒྱ། འདུན་པ་སོགས་བྲན་ལྔ་བརྒྱ།བྲན་གྱི་བུ་མོ་ལྔ་བརྒྱ་སོགས་བཙས། གཞན་ཡང་གཏེར་ཁ་ལྔ་བརྒྱའི་ཁ་ཕྱེ། ཉེ་བའི་རྒྱལ་ཕྲན་རྣམས་ཀྱིས་ཀྱང་དཔྱ་ཁྲལ་ཕུལ་བར་བརྟེན། ཡབ་ཟས་གཙང་གི་ཐུགས་ལ་གཞོན་ནུ་བཙས་པས་དོན་ཐམས་ཅད་རང་འགྲུབ་ཏུ་སོང་ན་གཞོན་ནུའི་མཚན་ལ་དོན་ཀུན་གྲུབ་པ་ཞེས་གསོལ། སྐྱེ་དགུའི་བདག་མོ་སོགས་མ་མ་སུམ་ཅུ་སོ་གཉིས་ལ་གཏད་ནས་བསྐྱེད་བསྲིང་དུ་བཅུག རྒྱལ་བུ་ཅུང་ཟད་ནར་སོན་པ་ན། ཡུལ་གྱི་གོམས་སྲོལ་ལྟར་ཤཱཀྱའི་གཞོན་ནུ་ལྔ་བརྒྱ་དང་ལྷན་དུ་ཡི་གེ་དང་རྩིས་བསླབ་པའི་གྲལ་དུ་ཞུགས། དེའི་ཚེ་བྱང་ཆུབ་སེམས་དཔས་འཇིག་རྟེན་དུ་མ་གྲགས་པའི་ཡི་གེ་དང་རྩིས་ཀྱི་རྣམ་གྲངས་མཐའ་ཡས་པ་ཞིག་བསྟན་པས་ཐམས་ཅད་ངོ་མཚར་བའི་གནས་ལ་བཀོད། སྐབས་དེར་སློབ་དཔོན་གྱིས། སེམས་ཅན་དག་པ་ངོ་མཚར་ཆེ། །བསྟནབཅོས་ཀུན་ལ་བསླབ་གྱུར་ཅིང༌།།འཇིག་རྟེན་འཇིག་རྟེན་རྗེས་བསྙེག་ཕྱིར། ། ཡི་གཻའི་གྲལ་ནི་བྱོན་པར་གྱུར། །ཅེས་ཀྱང་ཆེད་བསྔགས་མཛད།དེའི་རྗེས་ཤཱཀྱ་བ་རྣམས་ཀྱིས་རྒྱལ་པོའི་གདུང་རྒྱུད་མི་ཆད་པའི་སླད་གཞོན་ནུ་ལ་ཁྱིམ་ཐབ་འཛིན་པར་གསོལ་བ་ན།བྱང་ཆུབ་སེམས་དཔས་ཀྱང་སྔོན་གྱི་སངས་རྒྱས་རྣམས་དང་མཛད་པ་མཐུན་པར་བྱ་བའི་ཕྱིར་རེ་ཞིག་ཞལ་གྱིས་བཞེས་ཏེ། གཞོན་ནུ་གཞན་དང་གཞན་དག་ལ་ཆེད་དུ་ཡི་གེ་དང༌། རྩིས། མཆོང། རྐྱལ། བང༌། སྟོབས་འགྱེད་པ་སོགས་སྒྱུ་རྩལ་འགྲན་ནས་ཟིལ་གྱིས་མནན་པ་དང་ཆབས་ཅིགསྐྱོན་ལྔ་སྤངས་ཤིང་ཡོན་ཏན་བརྒྱད་དང་ལྡན་པའི་གྲགས་འཛིན་མ་དང་ས་འཚོ་མ་བཅས་ཁབ་ཏུ་བཞེས།དེ་ལྟར་འདོད་ཡོན་ལ་ཅི་དགར་རོལ་བའི་ཚེ་སིལ་སྙན་གྱི་སྒྲ་དག་ལས། སྔོན་གྱི་ཐུགས་བསྐྱེད་ཚུལ་དང༌།ཁྱིམ་ལས་ངེས་པར་འབྱུང་དགོས་པ་སོགས་རང་བྱུང་དུ་གྲགས་པས་བྱང་ཆུབ་སེམས་དཔའི་ཐུགས་རྒྱུད་བསྐུལ་ཏེ་རབ་ཏུ་བྱུང་བ་ལ་མངོན་པར་ཕྱོགས། དེ་ནས་བྱང་ཆུབ་སེམས་དཔའ་སྐྱེད་ཚལ་དུ་གཟིགས་བསྐོར་དུ་ཕེབས་ཕྱིར་ཕོ་བྲང་གི་ཕྱི་རུ་གཤེགས་པའི་ཚེ། རྒ་ཤི་ན་གསུམ་དང་བཙུན་པའི་གཟུགས་རྣམས་རིམ་བཞིན་གཟིགས་པས་ཐུགས་སྐྱོ་སྟེ། རྒ་དང་ན་དང་འཆི་འགྱུར་བ།།གལ་ཏེ་འདི་གསུམ་ཡོད་མིན་ན། །བདག་ཀྱང་ཤིན་ཏུ་ཡིད་འོང་བའི། །ཡུལ་རྣམས་ལ་ནི་དགའ་བར་བྱེད།།ཅེས་སོགས་གསུངས་ནས་ཕྱིར་ཕོ་བྲང་དུ་ལོག ཡབ་ཀྱི་དྲུང་དུ་ཕེབས་ནས་རབ་ཏུ་བྱུང་བར་གསོལ་ཚེ།ཡབ་ཀྱིས་ཀྱང་ལན་གསུམ་གྱི་བར་བཟློག་ཀྱང་བཤོལ་བར་མ་ནུས་ཏེ་མཐར་གནང་མོད། ཐབས་ཀྱིས་འགོག་པར་བསྐུལ་བ་བཞིན་བཙུན་མོ་དང་བློན་འཁོར་སོགས་ཀྱིས་ཕོ་བྲང་རིམ་པ་བདུན་དུ་བསྐོར་ཞིང༌།ཉིན་མཚན་རེས་མོས་སུ་སྲུང་བཞིན་པའི་སྐབས། སྨོན་ལམ་གྱི་མཐུ་དུས་སུ་སྨིན་སྟབས། མཚན་མོར་ཐམས་ཅད་གཉིད་དུ་ཡུར་ཚེ་འདུན་པ་ལས་རྟ་མཆོག་བསྔགས་ལྡན་བླངས་ཏེ། ཤཱཀྱའི་ཡུལ་ནས་དཔག་ཚད་བཅུ་གཉིས་ཀྱི་སར་ཕེབས་ནས་འདུན་པ་ཕྱིར་བཏང༌། མཆོད་རྟེན་རྣམ་དག་གི་དྲུང་དུ་རང་བྱུང་གིས་བསྙེན་པར་རྫོགས། དེ་ནས་བྱང་ཆུབ་སེམས་དཔས་ལོ་དྲུག་གི་ཡུན་ལ་དཀའ་སྤྱོད་མཛད་རྗེས་བྱང་ཆུབ་ཤིང་དྲུང་དུ་ཕེབས་ཏེ། བདག་གི་ལུས་འདི་ཞིག་ཀྱང་རུང༌། སྐམ་ཡང་རུང་བྱང་ཆུུབ་མངོན་དུ་མ་བྱས་པར་སྟན་འདི་ལས་ལྡང་བར་མི་བྱ།ཞེས་ཡིད་དམ་མཛད་ནས་ཐུགས་དམ་ལ་མཉམ་པར་བཞག དེ་ཡང་ས་ག་ཟླ་བའི་ཚེས་བཅུ་བཞིའི་སྲོད་ལ་བདུད་དཔུང་ཟིལ་གྱིས་མནན། གུང་ལ་མཉམ་པར་བཞག་ཚེ་སྦྱོར་མཐོང་སྒོམ་གསུམ་མངོན་དུ་བྱས་ནས་ཚེས་བཅོ་ལྔའི་སྐྱ་རེངས་ཤར་བ་ཙམ་ན་མི་སློབ་ལམ་སྟེ་རྣམ་མཁྱེན་རྒྱལ་བའི་གོ་འཕང་ཐོབ། ཉིན་དེར་སྲས་སྒྲ་གཅན་འཛིན་དང༌། བདུད་རྩི་ཟས་ཀྱི་བུ་ཀུན་དགའ་བོ་ཡང་བཙས། ས་ཆེན་པོ་རྣམ་པ་དྲུག་ཏུ་གཡོས་ཤིང་ཕྱོགས་ཐམས་ཅད་སྣང་བས་ཁྱབ། དེ་ནས་བཅོམ་ལྡན་འདས་ཀྱི་དགོངས་པར་རང་ཉིད་ཀྱིས་རྙེད་པའི་ཟབ་མོ་སྟོང་པ་ཉིད་ནི་ཆེས་རྟོགས་པར་དཀའ་ཞིང་སེམས་ཅན་རྣམས་ལེ་ལོ་ཆེ་སྟབས། ཆོས་སྟོན་པ་ལས་ཐུགས་ལོག་ནས་བདུན་ཕྲག་བདུན་འདས་པ་ན། མི་མཇེད་ཀྱི་བདག་པོ་ཚངས་པས་ཆོས་གསུང་བར་གསོལ་བ་བཏབ་པར་བརྟེན། བཅོམ་ལྡན་འདས་ཡུལ་ཝཱ་རཱ་ཎ་སཱིར་ཕེབས་ཏེ་ཐོག་མར་ལྔ་སྡེ་བཟང་པོ་དང༌། ལྷ་བརྒྱད་ཁྲི་ལ་བདེན་བཞིའི་ཆོས་འཁོར་བསྐོར། དེ་རྗེས་བྱ་རྒོད་ཕུང་པོའི་རིར་ཆེད་དུ་བྱ་བ་ཐེག་ཆེན་རིགས་ཅན་གྱི་དབང་དུ་བྱས་ནས་བཀའ་བར་བ་མཚན་ཉིད་མེད་པའི་ཆོས་འཁོར་དང༌།ཡངས་པ་ཅན་དུ་རིགས་ཅན་གསུམ་གྱི་དབང་དུ་བྱས་ནས་ལེགས་པར་ཕྱེ་བའི་ཆོས་འཁོར་བསྐོར། འདི་རྣམས་རྗེ་ཙོང་ཁ་པས།མཛད་པ་ཀུན་ལས་གསུང་གི་ནི། །མཛད་པ་མཆོག་ཡིན་དེ་ཡང་ནི། །ཞེས་གསུངས་པ་ལྟར། སངས་རྒྱས་ཀྱི་མཛད་པ་ཀུན་ལས་མཆོག་ཏུ་གྱུར་པའི་གསུང་གི་མཛད་པའི་གྲས་ཡིན། རང་རེའི་ལོ་རྒྱུས་ཐོག་འཁོར་ལོ་དང་པོ་བདེན་བཞིའི་ཆོས་འཁོར་དང༌། འཁོར་ལོ་གཉིས་པ་མཚན་ཉིད་མེད་པའི་ཆོས་འཁོར། འཁོར་ལོ་གསུམ་པ་ལེགས་ཕྱེས་ཆོས་འཁོར་ཞེས་གྲགས།
     དེ་ལྟར་སྟོན་པ་ཐུགས་རྗེ་ཅན་གྱིས་གང་གསུངས་པ་རྣམས་ཚུར་བསྡུས་ན་ཆོས་ཕུང་བརྒྱད་ཁྲི་བཞི་སྟོང་དུ་འདུས་ཤིང་། ད་ཆ་བོད་སྐད་དུ་ཉུང་ཤས་ཤིག་འགྱུར་བ་གླེགས་བམ་བརྒྱ་ཙམ་ཡོད་པར་བཀའ་འགྱུར་ཞེས་བཏགས་པ་དེ་ཡིན། སྟོན་པ་བཅོམ་ལྡན་འདས་ཀྱིས་སྐུ་དངོས་ཀྱི་གདུལ་བྱ་རྣམས་ཡོངས་སུ་རྫོགས་པ་ན། རྒྱལ་བའི་བསྟན་པ་དང་འཁོར་རྣམ་བཞི་སོགས་གནས་བརྟན་འོད་སྲུང་ཆེན་པོར་གཏད་ནས་ཡུལ་རྩྭ་མཆོག་གྲོང་ནས་སྐུ་ལྷག་མ་མེད་པར་མྱ་ངན་ལས་འདས། སྟོན་པ་ཐུགས་རྗེ་ཅན་དེ་ལྟར་སྐུ་ཞི་བར་གཤེགས་ཟིན་ནའང་ད་དུང་ཁོང་གི་ཕྲིན་ལས་ཀྱི་འཇུག་པ་འཁོར་བ་མ་སྟོང་གི་བར་གནས་པར་གསུངས་པ་ལས།མི་ལོ་ཉིས་སྟོང་ལྔ་བརྒྱ་ལྷག་འགོར་བའི་ད་ལྟའི་ཆར་གནས་བཞིན་ཡོད་པ་འུ་ཅག་གི་ཆུ་བུར་མིག་ལ་མངོན་སུམ་དུ་སྣང་བ་འདི་ཡིན། ཉེ་ཆར་དུས་རབས་ཉེར་གཅིག་པ་འདིའི་ནང་སྔར་གྱི་ཁྱབ་ཁོངས་ལས་བརྒལ་ཏེ་ནུབ་ཕྱོགས་པས་མཚོན་ཡུལ་གྲུ་མང་པོ་ཞིག་ལ་རྒྱལ་བའི་བསྟན་པ་གསར་དུ་དར་བཞིན་མཆིས། ལྷག་པརྋགོང་ས་སྐྱབས་མགོན་ཆེན་པོ་འདིའི་སྐུ་ཚེ་གང་བོར་རང་དོན་བོར་ནས་གཞན་དོན་འབའ་ཞིག་བསྐྱངས་པའི་བྱམས་དང་བརྩེ་བའི་སྙིང་སྟོབས་དང༌། བཅོམ་ལྡན་འདས་ཀྱིས་འགྲོ་བའི་བདེ་རྩ་ཁོ་ནར་དམིགས་ཏེ་ཆོས་ཕུང་ཇི་སྙེད་ཅིག་བཀའ་བསྩལ་བའི་སྙིང་པོ་རྟེན་འབྱུང་གི་ལྟ་བའི་རྣམ་གཞག་སོགས་ཀྱིས་ཡིད་འཕྲོག་སྟེ་དཔྱད་བརྗོད་ཀྱི་རྩོམ་ཡིག་སྤེལ་གནང་མཛད་པའི་ཚན་རིག་པ་དང་མཁས་དབང་གྲགས་ཅན་ཆེས་མང་པོ་རྒྱལ་ཁབ་ཕྱི་ནང་གང་སར་ཐོན་དང་འཐོན་བཞིན་པ་དེས། ང་ཚོ་ལ་སྤོབས་པ་སྐྱེ་འོས་པ་ཞིག་ཡིན་པར་མ་ཟད། ང་ཚོས་ཀྱང་གོ་སྐབས་འདི་དམ་བཟུང་གིས་རིག་གསར་ཚན་རིག་འཕེལ་ཕྱོགས་ཀྱི་འགྲོས་དང་བསྟུན་ཅི་ཐུབ་ཀྱིས་རྒྱལ་བའི་བསྟན་པ་སྔར་གྱི་ཁྱབ་ཁོངས་ལས་ཁྱབ་ཇེ་ཆེ་དང་ཡུན་རིང་བརྟན་གནས་ཀྱི་ཐབས་སུ་འབད་དགོས་པ་ལས་མཁྲེགས་བཟུང་དང་ཨུ་ཚུགས་བྱས་ནས་བསྡད་ན་དགོས་དུས་ཕན་ཐོགས་ཕྲ།
     དེར་བརྟེན། སྟོན་པ་མཆོག་གི་དངོས་བྱུང་ལོ་རྒྱུས་དང༌། གཞི་ལམ་འབྲས་གསུམ་གྱི་རྣམ་གཞག་རྒྱུ་མཚན་ཅི་ཞིག་གིས་སྟོན་པ་ཚད་མའི་སྐྱེས་བུར་སྨྲ་བའི་ཚུལ་སོགས་ལ་ཞིབ་འཇུག་གཏིང་ལོན་བྱ་རྒྱུ་ནི། སངས་རྒྱས་ཀྱི་བསྟན་པ་ཡུལ་གྲུ་གཞན་དང་གཞན་ལ་དར་བཞིན་པ་དང༌། འཛམ་གླིང་ཞི་བདེ་དང་ལྷིང་འཇགས་ལ་ཕྱོགས་པའི་དུས་རབས་ཀྱི་ཁུག་མཚམས་འདིར་འུ་ཅག་ལ་འཁྲི་བའི་ལས་འགན་ཉག་གཅིག་ཡིན་པར་སེམས།