བོད་མི་ཉག་གི་ཡུལ་སྐད་ལ་དཔྱད་པ།

     དེ་ལ་མི་ཉག་གི་ཡུལ་སྐད་དང་ཡི་གེའི་སྐོར་བཤད་པར་དོན་ཚན་ལྔ་རུ་དབྱེ་ཆོག་སྟེ།
དང་པོ། མི་ཉག་གི་སྐད་དང་ཞང་ཞུང་སྐད་གཉིས་ཀྱི་གཤིབ་བསྡུར།
     དེ་བ་བཞི་སྟེ། དང་པོར་གྲངས་ཀ་བརྗོད་པའི་མིང་ལ་བཞི་དང་དྲུག བདུན་བཅས་མ་གཏོགས་གྲངས་ཀའི་མཇུག་ཏུ་ལི་བརྗོད་མ་བརྗོད་ཙམ་ལས་ཚང་མ་འདྲ་བ་སྟེ། གཅིག་ལ་ཏིག  གཉིས་ལ་ནེ། གསུམ་ལ་སུམ། ལྔ་ལ་ང། བདུན་ལ་སྣི། དགུ་ལ་འགུ  ལྔ་བརྒྱ་ལ་ང་ར། བརྒྱ་ལ་ར་འབོད་པ་ལྟར་རོ།། འདི་ལྟར་བརྗོད་ཚེ།  མི་ཉག་གི་སྐད་མཁྱེན་པ་ཁ་ཅིག་གིས། མི་ཉག་གི་སྐད་དུ་བདུན་ལ་ཉིས་ལི་ཞེས་བརྗོད་པ་མིན་ནམ་ཞེ་ན། དེ་ཡང་བདེན་དེ། ཁོང་ཚོའི་གནའ་སྒྲུང་ཞིག་ཏུ་སྔར་རྨ་བྱ་བྱ་བརྒྱའི་རྒྱལ་པོ་ཡིན་ཚེ། ཁོང་གིས་བྱ་ཚོགས་ཀྱི་གཟུགས་ཆེ་ཆུང་ལ་གཞིགས་ཏེ་བྱེའུ་ཕྲུག་སྐྱེ་བའི་འཆར་གཞི་འཐེན་ཅིང་། བྱེའུ་མཐེབ་བོང་གཟུགས་ཆུང་བས་བྱེའུ་ཕྲུག་ནེ་ལི་སྐྱེ་ཆོག་པ་དང་། བྱ་ནེ་ལེ་གཟུགས་ཅུང་ཆེ་བས་བྱེའུ་ཕྲུག་སྣི་ལི་སྐྱེ་དགོས་པར་བཤད་ཀྱང་། ཁོང་གཉིས་ཀྱིས་གཟབ་ནན་སྒོས་མ་ཉན་པའི་དབང་གིས་ནོར་ཏེ། གོ་ལྡོག་སོང་བའི་སྒྲུང་སོགས་བཤད་རྒྱུ་ཡོད་ཅིང་། གནའ་མི་རྒན་པོ་ཚོས་བདུན་ལ་སྣི་ལི་ཞེས་འབོད་སྲོལ་ཡང་ཡོད་ཅེས་གསུངས་པར་བསྟེན་འདིར་དེ་ལྟར་བྲིས་པ་ཡིན། གཉིས་པར་ཆོས་ཅན་བརྗོད་པའི་མིང་ཁ་ཤས་ཀྱི་འདྲ་སའི་སྐོར།  ང་ལ་ངུ། སེམས་ངན་ལ་མུ་ཁྲི། མི་ལ་མི་སྣིལ། ཐོད་པ་ལ་ཀ་པ་ལི། ཕོ་མོ་ལ་ཇེ་ཟ། ཆུ་ལ་ཅུ། འབྲུ་རིགས་ལ་ཙེ་ཅུ། ཡོད་པ་ལ་ཅི། མེད་པ་ལ་མྱི་ཅི། གཡག་ལ་འབྲོང་། བུ་ཆུང་ཆུང་གི་མཚན་མ་ལ་མ་ཙོ། ཞྭ་ལ་ལུམ། ས་ལ་སླ་འམ་རྩ། ཕུང་པོ་ལ་སྐུ་ཕུང་། རྐུན་མ་ལ་རྐུ་མི། མིག་ལ་དམིག ལྕེ་ལ་རི། རླུང་ལ་ལི། འཇིག་རྟེན་ལ་ཅི་ཏེན། གཅན་གཟན་ལ་བདུད། ཆང་ལ་ཡུ། ཟླ་བ་ལ་སླ་ནི། ནམ་མཁའ་ལ་མུ་ཞེས་སོགས་དང་། གཞན་འཁྲུལ་བ་ལ་མུ་ནོ་དང་། ཐལ་ཆེ་བར་ཐ་ཅེ། དགའ་ལ་འགུ་ཞེས་པ་སོགས་གཅིག་མཚུངས་ཡིན་ནོ།། གསུམ་པར་ཞང་ཞུང་སྐད་ཀྱི་ཁྱད་ཆོས་བཞིན། མིང་རྐྱང་གི་མགོར་ཏི་ཡིག་ཡོད་པ་སྟེ། དཔེར་ན།  ཞང་ཞུང་སྐད་དུ་བྱང་ལ་ཏི་བྱང་། ལོ་ལ་ཏི་ལོ། ཕྱི་ལ་ཏི་ཕྱི། ཕྱེད་ལ་ཏི་ཕྱེད་སོགས་ཡོད་པ་ཇི་བཞིན། མི་ཉག་གི་སྐད་ལའང་། སྐྱུར་ལ་ཏི་སྐྱུར་དང་། ཁ་ལ་ཏི་ཁ། ནད་ན་བ་ལ་ཏི་ངས།  འཁྱགས་མོ་ཏི་ཀོས། ཡར་འཇོག་པ་ལ་ཏི་ཅི། ཚ་མོ་ལ་ཏི་རྫབ་ཞེས་པ་སོགས་ལྟ་བུའི་ཁྱད་ཆོས་སྲུང་འཛིན་བྱས་ཡོད། བཞི་པར་ཞང་ཞུང་སྐད་དུ། དྡྷི་ཙ་ཧྲི་ཙ་ཙ་མེ་སོགས་བུ་མོ་དང་བུ་ཚ། ན་ཆུང་བཅས་ཀྱི་ཙ་དང་། ཙུ་ཙ་ཟེར་བ་བཅས་ཆུང་ཆུང་གི་དོན་ལ་འཇུག་པ་ཇི་བཞིན་དུ་མི་ཉག་གི་ཙ་ཡིག་ཀྱང་ཆུང་ཆུང་གི་དོན་ལ་འཇུག་སྟེ། དཔེར་ན། བྱིས་པ་ཆུང་ཆུང་ལ་པུ་ཚེ་ཙུ་ཙ་དང་།  བུ་མོ་ཆུང་ཆུང་ལ་མི་ཟ་ཙུ་ཙ། ལོ་ན་ཆུང་ཆུང་ལ་ཀེས་ཙུ་ཙ། རིན་གོང་ཆུང་ཆུང་ལ་གོང་ཙུ་ཙ་ཞེས་པ་སོགས་ལྟར་རོ།།
གཉིས་པ། མི་ཉག་གི་སྐད་དང་རྒྱལ་རོང་གི་སྐད་བར་གྱི་གཤིབ་བསྡུར།
     དེ་ཡང་བཙན་ལྷ་ངག་དབང་ཚུལ་ཁྲིམས་ལགས་ཀྱིས་བྲིས་པའི་རྒྱལ་རོང་ཡུལ་སྐད་སྐོར་རགས་ཙམ་གླེང་བ་ཞེས་པར་རྒྱལ་རོང་སྐད་ཀྱི་ཁྱད་ཆོས་བརྗོད་སྐབས། རྒྱལ་རོང་གི་སྐད་ལ་རྣ་ལ་དེ་ར་ན་དང་། སྣ་ལ་དེ་ས་ན། སྐྲ་ལ་ས་ཀ་ར། མཁྲིས་པ་ལ་དེ་མ་ཁ་རི་ས་ཞེས་བརྗོད་པ་ལྟ་བུ་འདི་དག་སོ་སོར་འཕྲལ་ནས་བརྗོད་པ་མིན་པར་ཚེག་བར་གཅིག་གི་ནང་དུ་སྔོན་འཇུག་དང་རྗེས་འཇུག  མགོ་ཅན་དང་འདོགས་ཅན་སོགས་ཀྱི་སྒྲ་ཟུར་ཙམ་ཐོན་པ་ཞིག་ཡིན། ཞེས་གསུངས་པ་བཞིན། མི་ཉག་གི་སྐད་ལའང་། དེའི་ཁྱད་ཆོས་ད་དུང་ཡོད་པ་དཔེར་ན། མིག་ལ་མི་གི་དང་། བསྒྲིལ་ལ་བ་གི་རིལ། བརྐོ་ལ་རྐོ། བརྡུང་ལ་བི་རྡ་སི། གསན་ལ་ཁེ་སེ་ང་ཞེས་བརྗོད་པ་ལྟ་བུ། ཡང་རྒྱལ་རོང་གི་སྐད་ལ། ཤིང་ལ་དེ་ཤིང་དང་། མི་ལ་དེ་མི། ཆུ་ལ་དེ་ཆུ་ཟེར་བ་ལྟར། མི་ཉག་གི་སྐད་ལའང་སྐྱུར་ལ་ཏི་སྐྱུར། ཁ་མོ་ལ་ཏི་ཁ་སོགས་ཀྱི་ཁྱད་ཆོས་ཡོད་པ་ནི་གོང་དུ་བཤད་ཟིན་ལ། ཉན་ཤུལ་མཁྱེན་རབ་འོད་གསལ་སོགས་ཀྱིས། མིང་གི་ཐོག་མའི་དེ་སྒྲ་ནི་རྒྱལ་རོང་དང་བརྡ་རྙིང་གི་སྐད་ཀྱི་ཁྱད་ཆོས་ཤིག་ཡིན་ཞིང་། རྩ་བའི་བཤད་པའི་དེ་སྒྲའི་གཞི་འཛིན་སའང་ཡིན། ཞེས་གསུངས། དེ་མིན། ཆོས་དང་ཆོས་ཅན་བརྗོད་པའི་ཐ་སྙད་ཀྱང་མང་པོ་ཞིག་ལ་འདྲ་ས་ཡོད་རུང་། འདིར་དཔེ་མཚོན་ཙམ་ཞིག་དྲངས་ན། དཔེར་ན། ཞྭ་ལ་དྭ་དང་། ཆུ་ལ་ཅུ། ཨ་ཅེ་ལ་ཨ་ར། ཨ་ནེ་ལ་ཨ་ནེ། ང་ཚོ་ལ་ཡུ་ནི། ཁྱོད་ལ་ན། ཨ་མ་ལ་ཨ་མི། ཨ་ཞང་ལ་ཨ་འོ། ནས་ལ་ཧྲ། འོ་མ་ལ་ལི། ཆུར་བ་ལ་ཆུ་བ། ཨ་རག་ལ་ཨ་རག ཚྭ་ལ་ཚུ། གནམ་ལ་མི། ལྡེ་མིག་ལ་གེ། ཞི་ལ་ལ་ལིའམ་ལི་ལི། ཁྱི་ལ་ཁི། སེངྒེ་ལ་སེངྒེ། རྡོ་ལ་རྒྱོ། དམར་པོ་ལ་ནིས་སམ་ནིས་ནིས། ལྕགས་ལ་ཤེ། དཀར་པོ་ལ་ཁྲི། གྲངས་ཀ་བརྗོད་པའི་སྐབས་ལྔ་དང་བདུན། དགུ  ཉི་ཤུ་སོགས་ཀྱི་གཞུག་ཏུ་ལི་ཡིག་ཡོད་མེད་ཙམ་ལས་གཅིག་མཚུངས་ཡིན་ཞིང་། རྒྱལ་རོང་སྐད་ཀྱི་གྲངས་ཀ་ལའང་གཅིག་ལ་དི་ལི་དང་། གཉིས་ལ་ནི་ལི། གསུམ་ལ་གསུམ་ལི། བཞི་ལ་རི་ལི་སོགས་ཡོད་དོ།། སྤྱིར་ཡུལ་སྐད་དེ་གཉིས་ལ་སྔོན་གྱི་ཁྱད་ཆོས་མང་པོ་ད་དུང་མ་ཉམས་པར་ཡོད་ཀྱང་། དཔལ་འབྱོར་དང་། འགྲིམ་འགྲུལ། ཆ་འཕྲིན་སོགས་ཀྱི་དབང་གིས་མི་འདྲ་བའི་ཆའང་མི་ཉུང་བ་ཞིག་འདུག་གོ།
གསུམ་པ། མི་ཉག་གི་སྐད་དང་གནའ་བོའི་བརྡ་རྙིང་བར་གྱི་གཤིབ་བསྡུར།
     རང་བྱུང་དང་པོའི་ཚིགས་ཁ་མའི་དུས་སུ་བྱུང་བའི་རྔོག་ལེགས་པའི་ཤེས་རབ་ཀྱིས། ཨ་ཕ་ཁོ་ནི་ཇ་ཆང་ཤ། གཅིག་པུ་ཟ་འཛུ་དེ་ལ་ཧེ། ཉེ་ཝ་ཚོ་ནི་ཏིག་ག་རེ། ཐོབ་ཙམ་ཞུ་ཞེས་བྱ་བ་ཡིན། ཞེས་པའི་ནང་གི་འཛུ་དང་ཧེ། ཉེ་ཝ་ཟེར་བ་སོགས་མི་ཉག་གི་ཡུལ་སྐད་དུ་ད་དུང་མ་ཉམས་པར།  ཟ་བ་དང་། མགོ་འཁོར་བ། ཉེ་འབྲེལ་སོགས་ཀྱི་དོན་ཡིན་ཞིང་། གཞན་སྔོན་གྱི་བརྡ་རྙིང་དག་ལ་འཚལ་མ་འཚལ་ཞེས་པའང་ཟ་མ་ཟ་བའི་དོན་ཡིན་ཞིང་། འདི་གའི་མི་ཉག་བས་ཀྱང་འཛུ་བ་འཛུ་ཞེས་པ་ཟ་མ་ཟ་ཞེས་སྔོན་གྱི་འཛུ་བ་གཉིས་ནི་ཟ་མའི་དོན་དང་། གཞུག་གི་འཛུ་ནི་ཟ་ཞེས་པའི་དོན་ནོ།། གཞན་ཁམས་བྲག་འགོ་རྫོང་གི་དགེ་རྒན་ཆོས་བཞིན་སོགས་ཀྱིས་དེང་གི་ཞེ་ཚིག་དག་ནི་མ་གཞི་སྔོན་གྱི་བརྡ་རྙིང་སྟེ་ལྷག་པར་ཏུ་ཞང་ཞུང་སོགས་ཀྱི་སྐད་ཀྱིས་གྲུབ་པ་ཡིན་ཞེས་གསུངས་བཞིན་འདུག་ན། འདི་ན་མི་ཉག་གི་སྐད་ཞེ་ཚིག་ཏུ་གྲུབ་པའང་ཡོད་དེ། དཔེར་ན། མགོ་ལ་དབུ་ཞེས་པ་དང་། བསད་པ་ལ་དཀྲོངས། འཐུང་བ་ལ་མཆོད། ལུས་ཕུང་་ལ་སྐུ་ཕུང་ཞེས་པ། གཞན་ཡར་ལ་བཞེངས་ཟེར་བར་ཏི་བཞེངས་དང་།  མར་ལ་བཞུགས་ལ་བོ་བཞུགས། ཟ་མ་གསོལ་བར་གསོལ་བ་འོ་གསོལ། རྟ་ལ་ཞོན་པར་ཆིབས་པ་ཁོ་ཅིབས་སོགས་ཡོད་ཅིང་། གཞན་དཔེར་ན། སྨན་ལ་རྩི་དང་། བསང་བ་ལ་བརྩངས་པ། རིན་ཆེན་ལ་རིན་ཅེན། དཀོན་མཆོག་ལ་དཀོན་ཅོག དགག་སྒྲའི་མི་ལ་མྱི། རྩ་ལག་ལ་གཉེན། དཔང་བོ་ལ་གཉའ་བོ། དྲིས་པ་ལ་རྨས་པ། སྟེར་བ་་ལ་སྟབ། རྒྱས་པ་ལ་བརྟ་རྒྱ། བསམ་པ་ལ་མནོ་པ། འདི་ལ་འོ་ནི། སྨྲ་བ་ལ་གཏི། སོ་རྙིལ་ལ་རྣིལ། མི་ནད་ལ་མི་ངས། ང་ཚོ་ལ་ཡུ་ནི། སོམས་ཤིག་ལ་ཐོམས། བོར་ལ་འོར་བ། ཉེ་འཁོར་ལ་གལ་ཡོ། ཤེས་པ་ལ་འཁུམས། མེ་བཙའ་ལ་མོག་ཟ། རྡོ་ལ་རྒྱོ་སོགས་ཡོད་ལ། ཕག་པ་རུམ་ཞེས་པ་དེ་དེང་སང་ང་ཚོས་ཞིས་ཟེར་བཞིན་ཡོད་ཀྱང་། ཕག་པ་ལ་འབོད་སྐབས་རུམ་རུམ་ཞེས་འབོད་བཞིན་ཡོད་པར་གཞིགས་ན་སྔོན་ཆད་ཕག་པ་ལ་རུམ་ཞེས་པ་མཚོན་ནོ་སྙམ། སྤྱིར་མི་ཉག་གི་སྐད་དང་བོད་ཀྱི་བརྡ་རྙིང་བར་འདྲ་ས་ཤིན་ཏུ་མང་པོ་ཞིག་ཡོད་འོས་ཀྱང་། ང་ཚོར་བརྡ་རྙིང་གི་ཐད་ལ་སྦྱངས་བ་དམན་པས། སྐབས་འདིར་ནི་སྐྱོགས་སྟོན་ལོ་ཙཱ་བ་རིན་ཆེན་བཀྲ་ཤིས་ཀྱིས་བོད་རབ་བྱུང་བརྒྱད་པ་གདོང་ངན་ཞེས་པ་མེ་སྤྲེལ(སྤྱི་ལོ1136)ལོར་བརྩམས་པའི《བརྡ་གསར་རྙིང་གི་རྣམ་གཞག་ལི་ཤིའི་གུར་ཁང》ཞེས་པའི་དེབ་གཅིག་གི་ནང་གི་ཐ་སྙད་དག་དང་གཤིབ་བསྡུར་བྱས་པ་ཙམ་ལས་རྒྱས་པར་དཔེ་ཆ་གཞན་ནས་རྒྱུས་ལོན་བྱ་མ་ནུས་ཕྱིན། ཕྱིས་འབྱུང་གཞོན་ནུ་རྣམས་ཀྱིས་དེའི་སྐོར་ལ་སྔོག་འདོན་མང་ཙམ་གནང་བར་འཚལ།
བཞི་བ། མི་ཉག་གི་སྐད་དང་ཁམས་ཀྱི་འབྲོག་པའི་སྐད་བར་གྱི་གཤིབ་བསྡུར།
     གཅིག་ནི་གྲངས་ཀའི་གཉིས་དང་། གསུམ།  ལྔ།  དགུ་སོགས་ཀྱི་རྗེས་སུ་ལི་ཡིག་བཀོད་མ་བཀོད་ཙམ་ལས་སྒྲ་ཧ་ཅང་ཉེ་ལ། གཉིས་ནི་སངས་རྒྱས་ཆོས་ལུགས་ཀྱི་ཐ་སྙད་ཕལ་ཆེར་ཚང་མ་གཅིག་འདྲ་ཡིན་ཏེ། དཔེར་ན། གདུགས་དང་རྒྱལ་མཚན། ཌ་རུ། དྲིལ་བུ། སིལ་སྙན། ཆོས་གོས།  གཟན་ཤམ། ཏིང་ཕོར། བུམ་པ།  མཎྜལ། བ་དན། ཀ་འཕན།  རྐང་གླིང་།  རྒྱ་གླིང་། དུང་ཆེན་སོགས་ལྟ་བུ། གསུམ་ནི་དམག་གི་གོ་ཆའི་རིགས་ཀྱི་མིང་ཡང་གཅིག་གྱུར་ཡིན་པ། དཔེར་ན།  ཁྲབ་རྨོག་འཁོར་གསུམ་དང་མདའ་གྲི་མདུང་ཕུབ་སོགས་ལྟ་བུ་དང་། བཞི་ནི་ལས་གནས་ཀྱི་ཐ་སྙད་ཕལ་ཆེར་གཅིག་འདྲ་ཡིན་པ། དཔེར་ན།  འབྲོག་པ་དང་རོང་པ། བླ་མ། མཁན་པོ། དགེ་བཤེས། དགེ་རྒན། དགེ་ཕྲུག གྲྭ་པ། དགེ་བསྐོས། ཕྱག་མཛོད། གཉེར་པ། ཚོང་པ། མག་པ།  ཤིང་བཟོ། རྡོ་བཟོ། མགར་བ། ཇག་པ། རྐུན་མ་སོགས་ལྟ་བུ། ལྔ་ནི་རྒྱན་གོས་ཀྱི་ཐ་སྙད་ལའང་འདྲ་ས་ཧ་ཅང་མང་སྟེ། དཔེར་ན།  སྐེ་རྒྱན། ཤེལ་སྒོ། ཕྲེང་བ། བྱུ་རུ(བཅུ་རུ་ཞེས་ཁམས་ཕྱོགས་ཀྱི་ས་ཆ་ལ་ལས་བ་ཡ་བཏགས་ལ་བཅའ་ཞེས་འདོན་སྲོལ་གནའ་བོའི་འདོན་སྟངས་ཁྱད་པར་བ་ཞིག་ཏུ་འདོད)གཡུ། གཟི། ཕྲུག་ལྭ། ལྭ་བ། མུ་ཏིག  མུ་མེན། མཆོང་། པདྨ་ར་ག རྡོ་རྗེ་ཕ་ལམ། ཚ་རུ་སོགས་གཅིག་འདྲ་ཡིན་ལ། རྩག་པར་ཏག་གྭ་ཞེས་འབོད་པ་དེའང་ཨ་མདོའི་ཕྱོགས་ཀྱི་འབོད་སྟངས་དང་ཧ་ཅང་ཐག་ཉེ་པོ་འདུག་སྙམ་གྱི་ཡོད། ད་དུང་ལྕགས་རིགས་ལས་ཟངས་དང་། རག  ཧ་ཡང་། ཞ་ཉེ། བཤའ་བཅས་སོགས་ཀྱང་ཇི་མ་ཇི་བཞིན་དུ་འདུག གཞན་སྨན་རྫས་རིགས་ཀྱི་མིང་ཡང་ཕལ་ཆེར་གཅིག་མཚུངས་ཡིན་ཏེ། དཔེར་ན། གླ་རྩི་དང་། དོམ་མཁྲིས། དབྱར་རྩྭ་དགུན་འབུ། རི་རྟ། བྱ་རྒོད་སུག་པ། ཏང་ཀུན། སྲོ་ལོ་དཀར་པོ། སྲོ་ལོ་དམར་པོ། ཅོང་ཞི་སོགས་གཅིག་མཚུངས་ཡིན་པ་ལྟར་རོ།། ཆོས་བརྗོད་ཀྱི་མིང་ལའང་འདྲ་ས་མང་པོ་ཡོད་དེ། རྒྱས་སྤྲོས་ལ་དགའ་བའི་དོན་གྱི་སྟོང་སྐ་ཚ་ཞེས་པ་དང་། བྱ་ཚིག་ལ་གཟུགས་འགྱུར་བའི་བྱ་ཚིགས་གི་ཁྱད་ཆོས་ཡོད་པ་སྟེ། དཔེར་ན། ཟ་མ་ཟ་ཞེས་པའི་ཟའི་དོན་གྱི་འཛི་ནི་ད་ལྟ་བ་དང་། འཛོ་ནི་འདས་པ། ཛོས་ནི་སྐུལ་ཚིག་ཡིན་པ་ལྟར་རོ།། ད་དུང་བྱེད་སྒྲ་ཕལ་ཆེར་འ་ཡིས་མཚོན་པ་དཔེར་ན། ང་ཡི་ཞྭ་ཟེར་བར་ངི་འ་ཏྭ། ཁྱོད་ཀྱི་ལྷམ་ཟེར་བར་ན་འ་ཟོམ་པ་ཟེར་བ་ལྟ་བུ་དང་། བྱེད་སྒྲ་ཕལ་ཆེར་འིས་དང་ཡིས་ཡིས་མཚོན་ཡོད་དེ། དཔེར་ན། ངས་ཟ་མ་ཟ་ཟེར་བར་ངས་འཛི་བ་འཛི་དང་། ཁྱོད་ཀྱིས་ཟ་མ་ཟོ་ཟེར་བར་ན་ཡིས་འཛི་བ་ཛོས་ཞེས་པ་ལྟར་དང་། ལ་སྒྲ་ལ་ལེ་སྒྲ་སྦྱོར་སྲོལ་ཡོད་དེ། དཔེར་ན། ང་ལ་སྦྱིན་རོགས་ཟེར་བར་ངི་ལེ་ཐུག་ཁ་ཞེས་དང་། ཁྱོད་ལ་སྟེར་ཟེར་བར་ན་ལེ་ཐོབ་སྟབ་ཅེས་པ་ལྟར་རོ།། ལྷག་བཅས་ཀྱི་སྒྲ་ལ་ཙི་ཀི་སྤྱོད་སྲོལ་ཡོད་དེ། དཔེར་ན། ཡར་ལངས་ཏེ་སོང་ཟེར་བར་ཏི་རེ་ཙི་ཀི་རི་ཀ་ཧོ། གོས་ཕུད་དེ་ཉལ་ཟེར་བར་གོས་ན་གྱི་ཙི་ཀི་ཁུས་ཞེས་པ་ལྟར་རོ།། དེ་མིན་བརྩོན་འགྲུས་བྱེད་པའི་དོན་གྱི་ཨུ་རུ་མུ་རུ་དང་ཐབས་ཟད་འུ་ཐུག་ཅེས་པའི་དོན་གྱི་ཨུར་ཐུག་སོགས་མཚུངས་པ་དང་། ཁྱད་གཞི་གང་ཞིག་གི་ཁྱད་ཆོས་བརྗོད་པའི་སྐབས་སུ་ཁྱད་གཞི་སྔོན་དུ་བཀོད་ཅིང་། ཁྱད་ཆོས་རྗེས་སུ་བརྗོད་པ། དཔེར་ན། སྦྲ་ནག་པོ་ལ་སྦྲ་ནག་ཐིང་ཐིང་དང་། གུར་དཀར་པོ་ལ་གུར་ཁྲི་ཁྲི། སྤང་ལྗང་ཁུ་ལ་པང་ལྗང་ཁུ་འབོད་པ་སོགས་ལྟ་བུ། ད་དུང་ཚིག་ཕྲད་ཁ་ཅིག་སྟེ། གང་ལྟར་ཅེས་པའི་དོན་གྱི་ནམ་པེ་དང་། མ་གཏོགས་ཞེས་པའི་དོན་གྱི་མ་གཏོགས་དང་མི་ཟི། ཕལ་ཆེར་ཟེར་བའི་དོན་གྱི་ཧ་ལམ་དང་། བར་ཁྱད་མེད་པའི་དོན་གྱི་ཨ་ཏོ། ས་ཐག་ཧ་ཅང་རིང་བའི་དོན་གྱི་ས་ཡིག་ལ་ས་ལྷ་སར་ཡར་ལ་སོང་ཟེར་བར་ས་ལྷ་སར་ཏི་ཧི་དང་། ས་ཁྲིན་ཏུའུ་ལ་མར་སོང་ཟེར་བར་ས་ཁྲིན་ཏུའུ་ནི་ཧི་ཟེར་བ་སོགས་གཅིག་མཚུངས་ཡིན། ད་རུང་གཤེ་གཤེ་གཏོང་བའི་དོན་ལ་འཇུག་པའི་དབའ་ཡིག་དེ་དེང་སང་འབྲོག་པ་ཚོས་ཁྱི་ཟུག་པའི་དོན་ལས་སྤྱོད་བཞིན་མེད་རུང་། མི་ཉག་གི་སྐད་དུ་མི་ག་གེ་མོས་གཤེ་གཤེ་བཏང་ཞེས་པར་མི་ག་གེ་མོས་དབའ་ཞེས་ཟེར་སྲོལ་ཡོད་དོ།།
     གཞན《བརྐོས་རིས་ལས་མི་ཉག་གི་ནང་ཆོས་སྒྱུ་རྩལ་གྱིས་ཡོན་རྒྱལ་རབས་སྐབས་ནང་ལོག་གི་བོད་བརྒྱུད་ནང་བསྟན་སྒྱུུ་རྩལ་ལ་བཞག་པའི་ཤུགས་རྐྱེན་ལ་ལྟ་བ》ཞེས་པའི་རྩོམ་ཡིག་ནང་རྩོམ་པ་པོ་ཤོང་བེན་པིན(熊文彬)གྱིས་གསུང་དོན། ཞིབ་འཇུག་ལྟར་ན། མི་ཉག་རྒྱལ་ཁམས་འཛུགས་པའི་ལྡོང་བྱང་པ་བྱང་དུ་མ་བསྐྱོད་སྔོན་བོད་པ་ཡིན་པས་མ་ཚད། དེའི་སྐད་རིགས་ཀྱང་བོད་ཀྱི་ཨ་མདོའི་སྐད་ཀྱི་ཆ་ཤས་ཤིག་ཡིན། ཞེས་གསུངས་ཡོད་ལ། ལྷག་པར་དུ་གྲངས་གནས་གཉིས་ཡན་གྱི་གྲངས་ཡོད་ཚད་ཀྱི་འབོད་སྟངས་ཇི་མ་ཇི་བཞིན་ཡིན་པ་དང་། གཞས་དང་གཏམ་དཔེ། བསང་མཆོད། གཏམ་བཤད་སོགས་ཚང་མ་ད་ལྟའི་བོད་སྤྱི་འགྲོས་ཀྱི་སྐད་དང་གཅིག་འདྲ་ཡིན་ནོ།།