གནས་བརྟན་སྡེ་བའི་ལུགས་ཀྱི་སྟོན་པའི་འཁྲུངས་འདས་ཀྱི་ལོ་ཚིགས་རྩི་སྟངས་ལ་དཔྱད་པ།

      སྟོན་པའི་འཁྲུངས་འདས་ཀྱི་ལོ་ཚིགས་བརྩི་ཚུལ་ལ“བོད་དུ་རྩི་ཚུལ་མི་འདྲ་བ་ཉི་ཤུ་རྩ་གཅིག་ཙམ་ཡོད་པ་དང་། རྒྱ་ནག་ལ་ཡང་བཤད་ཚུལ་མི་འདྲ་བ་གསུམ་ཡོད་པ①”སོགས་འཛམ་གླིང་ཟླུམ་པོ་འདིར་བཞེད་པ་མི་མཐུན་པ་གང་མང་ཞིག་ཡོད། དེང་སང་འཛམ་གླིང་གི་ཡོངས་ཁྱབ་ནས་གནས་བརྟན་སྡེ་བའི་ལུགས་སྟེ། བོད་དུ་ཁ་ཆེ་པཎ་ཆེན་གྱི་ལུགས་སུ་གྲགས་པ་དེ་ཚད་མར་འཛིན་བཞིན་ཡོད། ལྟ་ཚུལ་དེ་གཞིར་བཟུང་ནས་སྤྱི་ལོ1955ལོར་སངས་རྒྱས་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་འཁོར་བའི་རྗེས་དྲན་གྱི་ཚོགས་འདུ་འཚོགས་པས་དེ་ནས་ཡར་འདེད་བྱས་ན་ལོ་ཉིས་སྟོང་ལྔ་བརྒྱ་ནི་མེ་སྦྲུལ་ལོ་སྟེ་སྤྱི་ལོ་སྔོན་གྱི544ཡིན་པ་ལ་རྩོད་པ་མེད། ཡིན་ཡང་། དེ་ལ་ལས་འདས་ལོ་དང་བོར་བརྩི་ཞིང་། ལ་ལས་མྱ་ངན་ལས་འདས་པའི་ལོ་དང་བོར་བཞེད་པས་མྱ་ངན་ལས་འདས་པ་དང་། འཁྲུངས་པའི་ལོ་ལ་ཉོག་དྲ་བཟོས་པ་འདི་ལྟར།
1  དུང་དཀར་བློ་བཟང་འཕྲིན་ལས་དང་དར་མདོའི་བཀྲ་ཤིས་དབང་འདུས་གཉིས་ཀྱིས་བསྒྲིགས་པའི《བོད་ཀྱི་རིག་གནས་དང་ལོ་རྒྱུས་ཀྱི་རེའུ་མིག་ངོ་མཚར་ཀུན་སྣང》ཞེས་པར“སྤྱི་ལོ་གོང་གི644ལོ་སྟེ་མེ་བྱ་ལ་འཁྲུངས་ནས་སྤྱི་ལོ་གོང་གི544ལོ་སྟེ་མེ་སྦྲུལ་ལ་སྐུ་གཤེགས②”པར་བཞེད།
2 མཁས་དབང་བསམ་འགྲུབ་རྒྱ་མཚོའི《སྐར་རྩིས་ཀུན་འདུས་ནོར་བུར》“སྤྱི་ལོ་སྔོན་གྱི644མེ་བྱ། གནས་བརྟན་པའི་ལུགས་ལ་སྟོན་པའི་སྐུ་བལྟམས། བུ་སྟོན་ཆོས་འབྱུང་དུ་ཉན་ཐོས་སཻནྡྷབའི་ལུགས་ཞེས་བརྗོད། དེང་སྐབས་འཛམ་གླིང་དུ་ལུགས་འདི་གཙོ་བོར་བྱེད་པར་སྣང་། ལུགས་འདི་རྣམས་ལ་སངས་རྒྱས་ནམ་བྱོན་པའི་ལོ་ཚིགས་མི་མཐུན་ཡང་།  དགུང་ལོ་ཉེར་དགུ་ཁབ་ཏུ་བཞུགས། དེ་ནས་ལོ་དྲུག་དཀའ་བ་སྤྱད། བརྒྱད་ཅུ་གྱ་གཅིག་ལ་མྱ་ངན་ལས་འདས་པ་རྣམས་ཕལ་ཆེར་མཐུན་ནོ③”གསུངས།
3 ཀྲིག་ལང་གིས་བྲིས་པའི《ད་ལོ་སྟོན་པའི་འདས་ལོ2539རེད》(རྒྱ་ཡིག)ཅེས་པར“ད་ལོ་སྟོན་པའི་འདས་ལོ2539ཡིན་པ་ནི་ལྷོ་རྒྱུད་ནང་བསྟན་གྱི་རྒྱུ་ཆ་ལྟར་ཡིན། སིང་ག་ལའི་སྟོན་པ་མྱ་ངན་ལས་འདས་པའི་ལོ་ནི་སྤྱི་ལོ་སྔོན་གྱི543ཡིན་ལ་ནང་བསྟན་མཁས་པ་དག་གིས་མྱ་ངན་ལས་འདས་པའི་ཕྱི་ལོ་སྟོན་པའི་འདས་ལོ་བརྩིས་པ་ཡིན། དེ་ལྟར་ན544+1995=2539ཡིན④”ཞེས་འཁོད་འདུག(རྒྱ་ཡིག་ལས་སྨྱུག་ཐོགས་པས་བསྒྱུར)
4 མཁས་དབང་ཚེ་ཏན་ཞབས་དྲུང་གི《བསྟན་རྩིས་ཀུན་བཏུས》ལས། “མེ་སྦྲུལ། སྤྱི་ལོ་སྔོན་གྱི643གནས་བརྟན་སྡེ་བ་ལྟར་ན་སྟོན་པ་སྐུ་འཁྲུངས།⑤” ཞེས་དང་།“མེ་འབྲུག སྤྱི་ལོ་སྔོན་གྱི545－ལོ་དགུང་ཐའི་ཚེས་བརྒྱད་ལ་སྟོན་པ་འདས⑥”ཞེས་དང་། ”(གནས་བརྟན་སྡེ་བའི་ལུགས)མེ་སྦྲུལ། སྤྱི་ལོ་སྔོན544－གནས་བརྟན་སྡེ་བའི་ལུགས་ཀྱི་འདས་ལོ་འདི་ནས་ཚུགས”གསུངས།
5 མཁས་དབང་དགེ་འདུན་ཆོས་འཕེལ་གྱི《རྒྱལ་ཁམས་བསྐོར་བའི་གཏམ་རྒྱུད་གསེར་གྱི་ཐང་མ》ལས།“ད་ལྟ་རབ་བྱུང་བཅུ་དྲུག་པའི་ཤིང་སྤྲེལ་འདི་བར་སྟོན་པ་འདས་ནས་ལོ་ཉིས་སྟོང་བཞི་བརྒྱ་གྱ་དྲུག་སོང་། མྱ་ངན་ལས་འདས་པའི་ལོ་དེ་རྒྱ་རྩིས་ཀྱི་མེ་སྦྲུལ་ཡིན⑦”ཁ་ཆེ་པཎ་ཆེན་བསོད་སྙོམས་པ་ཆེན་པོ་བོད་དུ་བྱོན་པའི་ཁྱི་ལོའི་ཤིང་བྱི་དེ། གནས་བརྟན་སྡེ་བའི་ལུགས་ཀྱི་སྟོན་པ་འདས་ནས་ལོ་སྟོང་དང་བདུན་བརྒྱ་ཞེ་བརྒྱད་པ་ཡིན་ལ། དེ་དུས་ཁོང་གིས་སོལ་ནག་ཐང་བོ་ཆེར(འཕྱོངས་རྒྱས)བརྩིས་པ་ན་སངས་རྒྱས་འདས་ནས་ཆིག་སྟོང་བདུན་བརྒྱ་ལྔ་བཅུ་སོང་ཞེས་བཤད་པ་ཡང་། སིང་ག་ལ་བའི་ལོ་དེ་དང་བརྩི་བའི་དབང་གིས་ལོ་གཉིས་མ་མཐུན་པ་ཙམ་ལས། གཅིག་ཏུ་བབ་པས་ཁོང་གིས་ཀྱང་དོན་ལ་ལོ་ཚིགས་དེ་རང་ལ་བརྟེན་པར་གསལ་ལོ། །⑧”ཞེས་གསུངས།
      དེ་དག་ཐམས་ཅད་ལ་དྲི་མ་ཅུང་ཟད་རེ་ཡོད་དེ། ལུགས་དང་བོ་ལྟར་ན། སྤྱི་ལོ544སྟེ་ འདས་ལོ་དང་མྱ་ངན་ལས་འདས་པའི་ལོ་གཉིས་གཅིག་ཏུ་འཁྲུལ་ཡོད་ལ། གལ་ཏེ་ལོ་དེར་སྟོན་པ་མྱ་ངན་ལས་འདས་ན། དེ་ནས་མར་དེད་པའི་སྤྱི་ལོ1955ལོར་སྟོན་པ་མྱ་ངན་ལས་འདས་ནས་ལོ་ཉིས་སྟོང་བཞི་བརྒྱ་གོ་དགུ་ལས་སོང་མེད་དེ་སྤྱི་ལོ་སྔོན་གྱི544ལོ་དེར་སྟོན་པ་མྱ་ངན་ལས་འདས་ནས་ལོ་གཅིག་མ་འཁོར་བའི་ཕྱིར། ཁྱབ་སྟེ། འདས་ལོ་དང་བོ་ཡིན་ན་མྱ་ངན་ལས་འདས་ནས་ལོ་གཅིག་འཁོར་དགོས་པའི་ཕྱིར། དེ་བས544ལོ་དེ་འདས་ལོ་དང་བོ་ཡིན་ན་མྱ་ངན་ལས་འདས་པའི་ལོ545སྟེ་མེ་འབྲུག་ཡིན་དགོས་ལ་དེ་ནས་ཡར་དེད་པའི་ལོ་གྱ་གཅིག་པ་ནི་སྤྱི་ལོ་སྔོན་གྱི645མེ་སྤྲེལ་ལོར་སྟོན་པ་འཁྲུངས་དགོས་པ་ལས་སྤྱི་ལོ་སྔོན་གྱི644ག་ལ་ཡིན། འདི་ནི་གནམ་ལོ་དང་འདས་ལོ་གཅིག་ཏུ་བསྲེས་པའི་སྐྱོན་ཡིན་ནོ། །
      ལུགས་གཉིས་པ་ལ་ཡང་སྐྱོན་སོ་ན་གནས་ཏེ་ལུགས་གཉིས་པ་འདི་ནི་གཞན་གྱི་བཤད་ཡམས་བཀོད་པ་ཙམ་ལས་ཁོང་གིས་བརྟག་ཅིང་དཔྱད་ནས་བཀོད་པ་མ་ཡིན་ཏེ། ཁོང་ནི་གནམ་ལོ་དང་འདས་ལོ་ལ་འཁྲུལ་བའི་མཁས་པ་ཞིག་མིན་ཏེ། གནམ་ལོ་དང་འདས་ལོ་ལ་ཁྱད་མ་ཕྱེས་ན་རྩིས་གཞུང་ལ་འཇུག་ཐབས་མེད་པས་སོ། །
      ལུགས་གསུམ་པ་ལས་སྟོན་པ་མྱ་ངན་ལས་འདས་པའི་ཕྱི་ལོ་སྟོན་པའི་འདས་ལོར་བརྩི་བ་དང་། སྤྱི་ལོ་སྔོན་གྱི544ལོར་འདས་ལོ་ཚུགས་པར་བཤད་པ་དོན་ལ་གནས་པ་ཡིན་ཀྱང་། སྟོན་པ་མྱ་ངན་ལས་འདས་པའི་ལོ543ལ་བཤད་པ་ནི་ནོར་ཞིང་ནང་འགལ་དུ་གྱུར་པ་སྟེ། ལོ་དེ་སྟོན་པའི་འདས་ལོ་གཉིས་པ་ཡིན་པ་ལས་མྱ་ངན་ལས་འདས་པའི་ལོ་ག་ལ་ཡིན་ཏེ།  འདས་ལོ544ཡིན་ན་དེ་སྔོན་གྱི་ལོ་སྟོན་པ་མྱ་ངན་ལས་འདས་པའི་ལོ་ཡིན་པས་དེ་ནི545ཡིན་དགོས་ཏེ། སྤྱི་ལོ་སྔོན་གྱི་ལོ་ལུགས་ལྡོག་གིས་བརྩི་དགོས་པས545དང་དེའི་ཕྱི་ལོ544ཡིན་ལ་དེའི་ཕྱི་ལོ543ཡིན་པས་སོ། །
      ལུགས་བཞི་བ་མཁས་དབང་ཚེ་ཏན་ཞབས་དྲུང་གིས་མེ་སྦྲེལ་ལ་འཁྲུངས་ཤིང་མེ་འབྲུག་ལ་མྱ་ངན་ལས་འདས། མེ་སྦྲུལ་ལ་འདས་ལོ་ཚིགས་པར་གསུངས་པ་ལ་སྐྱོན་གྱི་དྲི་མས་དབེན་ན་ཡང། མེ་སྦྲུལ་སྤྱི་ལོ་སྔོན་གྱི643གནས་བརྟན་སྡེ་བའི་ལུགས་ཀྱི་སྟོན་པ་འཁྲུངས་ཞེས་པ་ལ་སྐྱོན་ཞུགས་ཏེ643ལོར་འཁྲུངས་ནས་མེ་འབྲུག་ལོར་མྱ་ངན་ལས་འདས་པ་ཡིན་ན། གྱ་གཅིག་ལ་ད་དུང་ལོ་གཉིས་མ་ལོངས་པས་ད་དུང་ལོ་གཉིས་སྔ་སྣུར་མི་བྱེད་ག་མེད་ཡིན་ལ། དེ་ལྟར་ན་སྤྱི་ལོ་སྔོན་གྱི645ཡིན་དགོས་པ་ལས643ག་ལ་ཡིན། འདི་ནི་ཡིག་སྐྱོན་ཡིན་ཏེ་མེ་སྦྲུལ་ཡིན་ན་སྤྱི་ལོ་སྔོན་གྱི645ཡིན་དགོས་ལ། 643ནི་ས་ཁྱི་ཡིན་པ་ལས་མེ་སྦྲུལ་མིན་པས་པཎ་ཌི་ཏའི་ཐུགས་མཉམ་མ་བཞག་པའི་སྐྱོན་ནོ། །
      ལུགས་ལྔ་བ་མཁས་དབང་དགེ་འདུན་ཆོས་འཕེལ་གྱི་བཞེད་པ་དེ་ལ་སྐྱོན་གསུམ་ཡོད་དེ། ཁ་ཆེ་པཎ་ཆེན་བོད་དུ་བྱོན་པའི་ལོ1204ཡིན་ཞིང། དེ་ལྟར་ན1204+544=1748ཡིན་པས་སྟོན་པ་འདས་ནས་ལོ་སྟོང་དང་བདུན་བརྒྱ་ཞེ་བརྒྱད་པ་ཡིན་པ་སྨོས་མེད་ཡིན་ནའང་སྟོན་པ་མྱ་ངན་ལས་འདས་པའི་ལོ་མེ་སྦྲུལ་ཏེ། སྤྱི་ལོ་སྔོན་གྱི544ཡིན་ན་དེའི་ཕྱི་ལོ་སྟོན་པ་མྱ་ངན་ལས་འདས་པའི་ལོ་དང་བོ་ཡིན་པས་ཁ་ཆེ་པཎ་ཆེན་བོད་དུ་བྱོན་པའི་ལོ1204ལོར་སྟོན་པ་མྱ་ངན་ལས་འདས་ནས་ལོ1747མ་གཏོགས་སོང་མེད་པས། མྱ་ངན་ལས་འདས་པའི་གནམ་ལོ་འདས་ལོ་གཉིས་གཅིག་ཏུ་བསྲེས་པའི་སྐྱོན་ཡོད།
      ལྷག་པར་ཁ་ཆེའི་པཎ་ཆེན་གྱི་ལུགས་དེ་གནས་བརྟན་སྡེ་བའི་ལུགས་དང་ལོ་གཉིས་ཀྱིས་མ་མཐུན་པར་བཤད་པ་ལ་ཡང་སྐྱོན་ཡོད་དེ། ཁ་ཆེའི་པཎ་ཆེན་གྱིས་འདས་ལོ་བརྩི་བའི་ལོ་དེ་ཁོང་བོད་དུ་ཕེབས་པའི་ལོ་གསུམ་པ་སྟེ། སྤྱི་ལོ1207ཡིན་པས་དེ་ལྟར་ན1204+544=1748ཡིན་པས་དེང་གི་རྩི་ཚུལ་དང་ཡོངས་སུ་མཐུན་ནོ། །
      ཡང་རབ་བྱུང་བཅུ་དྲུག་པའི་ཤིང་སྤྲེལ་ལོར་སྟོན་པ་འདས་ནས་ལོ་ཉིས་སྟོང་བཞི་བརྒྱ་གྱ་དྲུག་སོང་ཞེས་པ་ཡང་མི་འཐད་དེ། ཤིང་སྤྲེལ་དེ1944ལོ་ཡིན་ལ། དེའི་སྟེང་འདས་ལོ་བསྣན་པའི་ལོ་ནི1944+544=2488ཡིན་པས་ཉིས་སྟོང་བཞི་བརྒྱ་གྱ་བརྒྱད་ཡིན་པ་ལས་གྱ་དྲུག་ལ་ལོ་གཉིས་ཉུང་བའི་སྐྱོན་ཡོད་དོ། །དེ་ནི་འདས་ལོ་རྩི་བའི་ལོ་དང་བོད་དུ་བྱོན་པའི་ལོ་གཉིས་གཅིག་ཏུ་བསམ་ནས་འཁྲུལ་བར་སྣང་ངོ་། །
      དེ་དག་ཀུན་གྱི་བརྩི་གཞི་ནི་སྤྱི་ལོ་སྔོན་གྱི544ཡིན་ལ། ལ་ལས་ལོ་དེ་སངས་རྒྱས་མྱ་ངན་ལས་འདས་པའི་ལོ་དང་བོར་བརྩིས་ནས་དེའི་སྔ་ལོ་མྱ་ངན་ལས་འདས་པའི་ལོར་བརྩིས་ཤིང་། ལ་ལས་མྱ་ངན་ལས་འདས་པའི་ལོ་དང་འདས་ལོ་གཉིས་གཅིག་ཏུ་བརྩིས་པས་གོང་གི་ཉོག་དྲ་དེ་བྱུང་བར་མངོན། སྟོན་པའི་འདས་ལོ་བརྩི་དུས་སྟོན་པ་མྱ་ངན་ལས་འདས་ནས་ལོ་དུ་སོང་བརྩི་བ་ཡིན་པས་སྟོན་པ་མྱ་ངན་ལས་འདས་པའི་ཕྱི་ལོ་མྱ་ངན་ལས་འདས་ནས་ལོ་གཅིག་སོང་བ་ཡིན་པས་འདས་ལོ་དང་བོ་ཡིན་པ་ལས་མྱ་ངན་ལས་འདས་པའི་ལོ་དེ་འདས་ལོ་དང་བོ་མིན་ཏེ། འདས་ལོ་ཞེས་པའང་མྱ་ངན་ལས་འདས་པའི་ལོ་ཞེས་པ་མ་ཡིན་པས་སོ། །མཁས་དབང་དགེ་འདུན་ཆོས་འཕེལ་གྱི་གསུང་ལས། “སྤྱིར་སྔོན་གྱི་ཉན་ཐོས་སྡེ་བས། ཟླ་བ་རེ་རེ་དང་ཞག་རེ་རེ་བཞིན་སྟོན་པ་མྱ་ངན་ལས་འདས་ནས་དུ་སོང་བརྩི་བར་གྲགས⑨”ཞེས་གསུངས་པ་དེས་ཀྱང་གསལ་བོར་ཤེས་པས། མཁས་དབང་ཚེ་ཏན་ཞབས་དྲུང་གིས། “མེ་སྦྲུལ་ལ་འཁྲུངས། དགུང་ལོ་གྱ་གཅིག་པ་མེ་འབྲུག་ལ་འདས། འདིའི་ལུགས་ཀྱི་སྟོན་པའི་འདས་ལོ་མེ་འབྲུག་དེའི་ཕྱི་ལོ་ནས་བརྩི་དགོས⑩”ཞེས་བཞེད་པ་ལྟར་གཟུང་དགོས་ཏེ། 《དུང་དཀར་ཚིག་མཛོད》ལས། མེ་འབྲུག་ལ་འཁྲུངས། “སྤྱི་ལོ་གོང་གི545གནས་བརྟན་སྡེ་བ་རྣམས་ཀྱིས་སྟོན་པ་སངས་རྒྱས་ལོ་འདིར་སྐུ་འཁྲུངས་པར་བཞེད། འདི་དེང་སང་རྒྱ་གར་གྱིས་ནང་བ་སངས་རྒྱས་པ་མང་ཆེ་བའི་རང་ལུགས་ཡིན་ཀྱང་། སྲས་དགྲ་གཅན་འཛིན་འཁྲུངས་པའི་ཟླ་འཛིན་དང་བསྡུར་དགོས⑾”ཞེས་ཁོང་གི་ལུགས་སྔ་མ་ཡོ་བསྲངས་བྱས་པ་ཤིན་ཏུ་ལེགས་སོ། །
      མདོར་ན། སྟོན་པ་མེ་སྦྲུལ་ཏེ་སྤྱི་ལོ་སྔོན་གྱི625ལོར་སྐུ་འཁྲུངས། དགུང་ལོ་གྱ་གཅིག་པ་མེ་འབྲུག་སྟེ་སྤྱི་ལོ་སྔོན་གྱི545ལོར་མྱ་ངན་ལས་འདས། དེའི་ཕྱི་ལོ་མེ་སྦྲུལ་ཏེ་སྤྱི་ལོ་སྔོན་གྱི544འདས་ལོ་ཚུགས་པ་ནི་རྨ་མེད་པ་ཡིན་པས། དེ་བས་མྱ་ངན་ལས་འདས་པའི་ལོ་དེ་ནི་གནམ་ལོ་ཡིན་ལ། དེའི་ཕྱི་ལོ་ནི་འདས་ལོ་ཡིན་པ་དེ་གསལ་བོར་ཤེས་དགོས། གོང་དུ་བཤད་པ་དག་གི་འཁྲུལ་གཞི་ཡང་གནམ་ལོ་དང་འདས་ལོ་གཉིས་གཅིག་ཏུ་བསྲེས་པའི་རྐྱེན་ཡིན་པས་དེ་གཉིས་ཀྱི་ཁྱད་པར་ནི་གཏན་ནས་ནོར་མི་ཉན་ནོ། །
      དེ་བས་ང་ཚོས་སྟོན་པའི་འདས་ལོ་བརྩི་དུས་འདི་ལྟར་བརྩི་དགོས་ཏེ544+ད་ལྟའི་སྤྱི་ལོ=སྟོན་པའི་འདས་ལོ་ཡིན་ཏེ། དཔེར་ན། 544+1955=4500སྟེ་ལོ་དེར་རྒྱ་གར་ནས་སྟོན་པ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་སོང་བའི་ཚོགས་འདུ་འཚོགས་པ་ཡིན་པས་གནད་འདི་ཀུན་གྱིས་ཐུགས་ལ་ཉོག་དྲ་ཅི་ཡང་མི་འབྱུང་ངོ་། །

《བོད་ལྗོངས་སློབ་གྲྭ་ཆེན་མོའི་རིག་གཞུང་དུས་དེབ》2010ལོའི་དེབ་གསུམ་པར་སྤེལ།

མཆན།
①དུང་དཀར་བློ་བཟང་འཕྲིན་ལས་དང་དར་མདོའི་བཀྲ་ཤིས་དབང་འདུས། 《བོད་ཀྱི་རིག་གནས་དང་ལོ་རྒྱུས་ཀྱི་རེའུ་མིག་ངོ་མཚར་ཀུན་སྣང》སི་ཁྲོན་མི་རིགས་དཔེ་སྐྲུན་ཁང་། ཤ 19
②དུང་དཀར་བློ་བཟང་འཕྲིན་ལས་དང་དར་མདོའི་བཀྲ་ཤིས་དབང་འདུས། 《བོད་ཀྱི་རིག་གནས་དང་ལོ་རྒྱུས་ཀྱི་རེའུ་མིག་ངོ་མཚར་ཀུན་སྣང》སི་ཁྲོན་མི་རིགས་དཔེ་སྐྲུན་ཁང་། ཤ 16
③བསམ་འགྲུབ་རྒྱ་མཚོ། 《སྐར་རྩིས་ཀུན་འདུས་མེ་ལོང》ཀྲུང་གོའི་བོད་རིག་པ་དཔེ་སྐྲུན་ཁང་།  ཤ 15
④周亮《今年是佛历二五三九年》《认识佛教》广东佛教双月刊印赠 P 187
⑤ཚེ་ཏན་ཞབས་དྲུང་།《བསྟན་རྩིས་ཀུན་བཏུས》《ཚེ་ཏན་ཞབས་དྲུང་འཇིགས་མེད་རིག་པའི་བློ་གྲོས་ཀྱི་གསུང་འབུམ》 མི་རིགས་དཔེ་སྐྲུན་ཁང་། ཤ 43
⑥ཚེ་ཏན་ཞབས་དྲུང་།《བསྟན་རྩིས་ཀུན་བཏུས》《ཚེ་ཏན་ཞབས་དྲུང་འཇིགས་མེད་རིག་པའི་བློ་གྲོས་ཀྱི་གསུང་འབུམ》 མི་རིགས་དཔེ་སྐྲུན་ཁང་། ཤ 43
⑦དགེ་འདུན་ཆོས་འཕེལ། 《རྒྱལ་ཁམས་བསྐོར་བའི་གཏམ་རྒྱུད་གསེར་གྱི་ཐང་མ》《དགེ་འདུན་ཆོས་འཕེལ་གྱི་གསུང་རྩོམ་ཕྱོགས་བསྒྲིགས》པོད་གཉིས་པ། བོད་ལྗོངས་དཔེ་རྙིང་དཔེ་སྐྲུན་ཁང་། ཤ 35
⑧དགེ་འདུན་ཆོས་འཕེལ། 《རྒྱལ་ཁམས་བསྐོར་བའི་གཏམ་རྒྱུད་གསེར་གྱི་ཐང་མ》《དགེ་འདུན་ཆོས་འཕེལ་གྱི་གསུང་རྩོམ་ཕྱོགས་བསྒྲིགས》པོད་གཉིས་པ། བོད་ལྗོངས་དཔེ་རྙིང་དཔེ་སྐྲུན་ཁང་། ཤ 36
⑨དགེ་འདུན་ཆོས་འཕེལ། 《རྒྱལ་ཁམས་བསྐོར་བའི་གཏམ་རྒྱུད་གསེར་གྱི་ཐང་མ》《དགེ་འདུན་ཆོས་འཕེལ་གྱི་གསུང་རྩོམ་ཕྱོགས་བསྒྲིགས》བོད་ལྗོངས་དཔེ་རྙིང་དཔེ་སྐྲུན་ཁང་། ཤ 36
⑩ཚེ་ཏན་ཞབས་དྲུང་།《བསྟན་རྩིས་ཀུན་བཏུས》《ཚེ་ཏན་ཞབས་དྲུང་འཇིགས་མེད་རིག་པའི་བློ་གྲོས་ཀྱི་གསུང་འབུམ》 པོད་བདུན་པ། མི་རིགས་དཔེ་སྐྲུན་ཁང་། ཤ 14
⑾དུང་དཀར་བློ་བཟང་འཕྲིན་ལས།《དུང་དཀར་ཚིག་མཛོད》ཀྲུང་གོའི་བོད་རིག་པ་དཔེ་སྐྲུན་ཁང་། ཤ 285