བོད་གནའ་རབས་ཀྱི་ས་མིང་ལ་རྒྱལ་རབས་རིམ་བྱོན་གྱིས་སྒྲ་ལོག་གིས་དོན་འགྱུར་བྱུང་བ་མདོ་ཙམ་ཞུ།

      སྤྱིར་གངས་རི་ར་བའི་ས་འཛིན་གྱི་ཐོག་མའི་བདག་པོ་བོད་པའི་ཞིང་ཁམས་འདི་ལ་གནའ་སྔ་མོ་ནས་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཅེས་འབོད་པ་དང་འདིར་ནང་གསེས་སུ་བཀར་ན། སྤུ་རངས་མང་ཡུལ་ཟངས་དཀར་སྐོར། ལི་ཡུལ་ཤ་སྤལ་ཏི་སེ་སྐོར། ཞང་ཞུང་ཁྲི་ལྡེ་སྟོད་སྨད་སྐོར། འདི་ལ་མངའ་རིས་སྐོར་གསུམ་འབོད། གཡས་རུ་གཡོན་རུ་དབུས་རུ་གསུམ། གུང་རུ་བཞི་དང་བཅས་བ་ལ། བར་གྱི་དབུས་གཙང་རུ་བཞི་འབོད། མདོ་ཁམས་སྨར་ཁམས་ཙོང་ཁའི་ཁམས། ཟལ་མོ་སྒང་དང་ཚ་བ་སྒང་། སྤོ་པོ་སྒང་དང་དམར་རྫ་སྒང་། སྨར་ཁམས་མི་ཉག་རབ་སྒང་ལ། སྨད་ཀྱི་མདོ་ཁམས་སྒང་དྲུག་འབོད། དེ་ལྟར་གངས་རི་ར་བའི་ཤར་ལྷོ་ནུབ་བྱང་གི་མཐའ་འཁོར་གྱི་ས་མིང་དང་སྤུར་རྒྱལ་བོད་བཙན་པོའི་རྒྱལ་ཕྲན་རྒྱལ་བློན་ཚོའི་མིང་གི་འབོད་ལུགས་ལ་རིམ་པ་ལྟར་མདོ་ཙམ་ཞུ་བ་འདི་ལྟར།

གཅིག བོད་ཤར་ཕྱོགས་མཐའ་ཁུལ་གྱི་ས་མིང་།