༢༠༢༡ལོའི་བོད་ཀྱི་རྩོམ་རིག་གི་སྡིངས་ཆ་ལ་འཁྱུག་ཙམ་བལྟ་བ།

  
        གོ་ལ་ཧྲིལ་པོ་ཏོག་གསར་ནད་དུག་གིས་ཟང་ཟིང་དུ་བཟོས་ཤིང་། མི་དང་མིའི་དབར་དང་རྒྱལ་ཁབ་དང་རྒྱལ་ཁབ་ཀྱི་དབར་ལ་ཕན་ཚུན་དོགས་པ་འཛིན་པའི་བློ་དེས་ལག་འཇུ་ཡི་ཚབ་ཏུ་དཔུང་ཐུག་རྒྱག་པ་དང་། ཚོགས་འདུ་ཆེ་མ་ཆུང་གསུམ་དྲ་ལམ་དུ་འཚོགས་དགོས་པ། ཐ་ན་སློབ་གྲྭ་ཆུང་འབྲིང་གི་སློབ་ཁྲིད་དག་ཀྱང་དྲ་ལམ་ཐད་གཏོང་གི་རྣམ་པས་འཚོགས་པ་སོགས་མིའི་རིགས་ལ་སྔར་བྱུང་མ་མྱོང་བའི་འཇིག་ཉེན་ནམ་ཉམས་སད་ཐེངས་ཤིག་སློང་ཐུབ་ཡོད་པ་དེས་རང་བྱུང་ཚན་རིག་གི་སྒོ་འཕར་ཡངས་པོར་འབྱེད་པ་ལ་འགྲན་བསླངས་པ་དེ་བཞིན། འཛམ་གླིང་གི་རྒྱལ་ཁབ་སོ་སོའི་ཚན་རིག་པ་དང་མཆེད་མཁས་པ་དག་གིས་བློ་ཡུལ་ལས་འདས་པའི་དུས་ཚོད་ཐུང་ཐུང་ཞིག་གི་ནང་དུ་ཏོག་གསར་ནད་དུག་གི་འགོག་ཁབ་གསར་གཏོད་བྱས་པ་དང་། གང་ལ་གང་འཚམས་དང་དེ་ལ་དེ་བསྟུན་གྱི་བྱེད་ཐབས་སྣ་ཚོགས་བཏོན་པ་ཡིས་རྩ་བའི་ཆ་ནས་མིའི་རིགས་ནད་ཡམས་ཀྱི་འཇིགས་པ་དེ་ལས་ཐར་ཞིང་རྣམ་པར་རྒྱལ་ཡོད་ཅེས་བརྗོད་ཆོག་པ་རེད།  
        ཡིན་ནའང་མིའི་རིགས་ཀྱི་ཚེ་སྲོག་དང་རང་བྱུང་ཁམས་རྨེག་མེད་བཟོ་བའི་འཇིག་ཉེན་གང་ཞིག་ཡིན་ཡང་དུས་ཀྱི་རླུང་འཚུབ་འཇགས་རྗེས་སུ་ལོ་རྒྱུས་ཀྱི་མེ་ལོང་ལས་མངོན་ཡོང་བ་ནི་བདེན་དགེ་མཛེས་གསུམ་གྱི་དཔལ་ལ་ཡོད་ཚད་བློས་གཏོང་ཐུབ་མཁན་གྱི་དཔའ་བོའི་སྣང་བརྙན་རེ་རེ་ཡིན་ཞིང་། ལོ་རྒྱུས་ཀྱི་བྱུང་བ་དེ་དག་གིས་ང་ཚོ་ལ་ཕ་མེས་ཀྱི་དཔའ་སྤོབས་དང་མིའི་རིགས་ཀྱི་བློ་སྟོབས་དེ་སྟོན་ཐུབ་ཡོད་པར་མ་ཟད། དེ་དག་ཡི་གེའི་གཟུགས་སུ་འགོད་པའི་བློ་གྲོས་ཅན་དག་གི་ཤེས་རབ་ཀྱང་མངོན་ཐུབ་ཡོད་པ་དེས་ནད་ཡམས་ཀྱིས་ཀུན་ནས་གཙེས་པའི་མི་ལོ་རེ་གཉིས་པོ་འདི་ཡང་འཛམ་གླིང་དམག་ཆེན་གཉིས་ཀྱི་རྗེས་སུ་བྱུང་བའི་འཛམ་གླིང་རང་བཞིན་གྱི་དོན་བྱ་གལ་ཆེན་ཞིག་སྟེ། སྨྱུག་ཐོགས་པ་དག་ལ་མཚོན་ན་ལོ་རྒྱུས་ཀྱི་སྒྲུང་རྩོམ་མམ་དཔའ་བོའི་སྙན་ཚིག་རྩོམ་པ་ལ་རྒྱུ་ཆ་ཕུན་སུམ་ཚོགས་པ་ཞིག་གནང་ཡོད་པ་རེད།  
         སྐབས་སུ་བབས་པ་བོད་ཀྱི་རྩོམ་རིག་གི་སྡིངས་ཆ་ལས2021ལོའི་གནས་བབ་སྐོར་ལ་ཕྱིར་མིག་ཅིག་བལྟས་ན། བོད་རང་ལ་ལོ་རྒྱུས་ཀྱི་སྒྲུང་རྩོམ་མམ་དཔའ་བོའི་སྙན་ཚིག་བྲིས་པ་ད་དུང་མིག་གི་མཐོང་ཡུལ་དུ་མ་གྱུར་པས་ཀྱང་། གནོད་ཐེབས་ས་ཁུལ་དག་ལ་གདུང་སེམས་མཉམ་སྐྱེ་ཡི་སེམས་ངོ་མཚོན་པའི་སྙན་ཚིག་དང་། བོད་སྐད་བརྙན་ཐུང་དང་རི་མོ་སོགས་མང་པོ་ཞིག་བརྩམས་གནང་མཛད་ཡོད་པ་དེས་བོད་སྐད་ཡིག་གི་ཐུན་མོང་མ་ཡིན་པའི་ཟུར་ཁ་ཞིག་མཚོན་ཡོད། ཡིན་ནའང་ལོ་འཁོར་མོའི་ཤུགས་རྐྱེན་གྱི་ངོས་ནས་བརྗོད་ན་དགའ་སྐྱོ་གཉིས་ལྡན་གྱི་དོན་བྱ་མང་པོ་ཞིག་གིས་ང་ཚོ་ལ་མངར་སྐྱུར་འདྲེས་མའི་འགལ་འདུའི་སེམས་ཁམས་ཤིག་བསླངས་ཡོང་བ་ནི། དཔེར་ན་རྩོམ་རིག་ལོ་ཙཱ་ཁོ་ནའི་སྟེང་ནས་བརྗོད་ནའང་འཛམ་གླིང་རྩོམ་རིག་གི་དཔེ་དེབ་མང་པོ་བོད་ཡིག་ཏུ་པར་དུ་བསྐྲུན་པ་དང་། སྨྱན་སྦྱོར་གསར་པའི་ལམ་ཁ་ནས་འཕྲིན་སྟེགས་མང་པོ་གསར་འབྱེད་ཀྱིས་བོད་ཀྱི་རྩོམ་རིག་སྐོར་ལ་ཕྱར་བ་གྲུ་འདེགས་ཀྱི་ལས་དོན་རླབས་པོ་ཆེ་མང་པོ་ཞིག་བསྒྲུབས་པ་ཧ་ཅང་དགའ་འོས་ནའང་། དེ་ལ་སྐུ་ཞབས་མེ་ལྕེ་ལགས་ཀྱིས«ང་ཚོས་རང་གི་རྩེད་ར་འཆུགས་མི་རུང»ཞེས་པའི་རྩོམ་དུ“རྒྱ་ཡིག་སོགས་སུ་བསྒྱུར་བའི་རྩོམ་དེ་དག་ལས་ལ་ཤས་ནི་ལོ་ཙཱ་བས་རང་མོས་སྒོས་བསྒྱུར་བ་ཡིན་པ་དང་། ལ་ཤས་ནི་རྩོམ་པ་པོ་ཁོ་རང་གིས།‘ཨ་ཁུ་ལོ་ལོ། ངའི་རྩོམ་འདི་སྒྱུར་རོགས་གནང’ཞེས་གཞན་ལ་སྐུལ་ཅིང་ཞུ་བ་འཐེན་ནས་ལོ་ཙཱ་བྱས་པ་ཡིན་འདུག”ཅེས་བརྗོད་པ་ལྟར། བོད་རང་གི་རྩོམ་རིག་ལོ་ཙཱའི་བགྱི་བ་དེ་རུལ་སུངས་ཀྱི་ངོ་བོ་རུ་འབྱམས་པ་ནས་ལོ་ཙཱ་བ“གླ་པ”དག་བྱུང་ཞིང་།  རྩོམ་པ་པོ་གྲགས་ཅན་དག་གི་རྩོམ་ཡིག་ཕར་བསྒྱུར་བའི་གྲངས་ཀ་ཤིན་ཏུ་ཉུང་ལ་སྒྲུང་རྩོམ་བསྒྱུར་བའི་གྲངས་དེ་ལས་ཀྱང་ཉུང་། དེར་མ་ཟད། ཉེ་བའི་ལོ་འདི་དག་གི་རིང་ལ་བོད་རྒྱ་སྐད་གཉིས་ཕན་ཚུན་ལ་རྩོམ་པ་པོ་རང་ཉིད་དང་ལོ་ཙཱ་བ་རང་ཉིད་བྱས་ཏེ་བརྩམས་ཆོས་ཀྱི་འགབ་ཏུ་རང་གི་མིང་ཡིག་ཐེངས་གཉིས་ལ་འབྲི་བ་དེས་ཀློག་པ་པོ་རྣམས་བཞད་གད་ཤོར་དུ་བཅུག་ཡོད། སྣང་ཚུལ་དེའི་རིགས་གཅིག་ཏུ་ན་རང་གི་ལས་ཐོབ་སོགས་ཀྱི་ཆེད་དུ་རྩོམ་རིག་ཅེས་པ་ཀླད་རྒྱབ་ཏུ་དོར་བ་དང་། གཉིས་སུ་བོད་ཀྱི་རྩོམ་རིག་ཅེས་པ་ནི་རང་གི་དགའ་ཁ་འཁྱེར་ཕྱོགས་ལྟར་གང་འདོད་དུ་བརྩམ་ཆོག་ལ། ཅི་འདོད་དུ་བསྒྱུར་ཆོག་པའི་རྩེད་མོ་ཞིག་ཏུ་བསམས་ཡོད་ནའང་། བོད་ཀྱི་རྩོམ་རིག་གི་མ་འོངས་མདུན་ལྗོངས་དེ་འཛམ་གླིང་ཅན་དུ་འགྲོ་བའི་དོན་དུ་ང་ཚོས་སྔོན་བྱོན་མེས་པོ་དག་གིས་ལོ་ཙཱ་བ་ལ“འཇིག་རྟེན་མིག”ཅེས་བླ་རུ་བཀུར་ཞིང་། ཕྱི་ཡིག་བོད་རང་སྐད་དུ་བསྒྱུར་བ་རང་གི་ལས་ཀ་གཙོ་བོ་ཞིག་ཏུ་ལྟ་བའི་སྲོལ་རྒྱུན་དེ་ཉམས་པ་སོར་ཆུད་དང་། མི་ཉམས་གོང་སྤེལ་སྒོས་བོད་ཡིག་སྐད་རིགས་གཞན་ལ་བསྒྱུར་བའི་ལས་ཀ་སྐད་རིགས་གཞན་གཙོ་རྒྱུགས་ཡིན་པའི་ལོ་ཙཱ་བར་བཅོལ་ན་ནི། མི་རིགས་ཕན་ཚུན་གྱི་ཡག་སྣང་ལྟ་བ་དང་འཇིག་རྟེན་ལྟ་ཚུལ་སོགས་ཆུ་ལ་ཆུ་བཞག་པ་ལྟར་ཐོན་པའི་དགེ་བ་རྒྱ་ཆེ་བར་འདོད།   
        ཡང་སྨྱན་སྦྱོར་གསར་པའི་ལམ་གྱི་བོད་ཡིག་འཕྲིན་སྟེགས་དག་ལ་མཚོན་ནའང་། ཉེ་བའི་ལོ་འདི་དག་གི་རིང་ལ«བོད་ཀྱི་རྩོམ་རིག་སྒྱུ་རྩལ»སོགས་བོད་ཡིག་དུས་དེབ་ཆེ་གྲས་རྣམས་ཀྱིས་ཀྱང་དུས་དེབ་དེ་གའི་མིང་ཐོག་ནས་འཕྲིན་སྟེགས་བཟོས་པ་ལ་ནི་ཧ་ཅང་གུས་པར་བྱ་བའི་གནས་ཡིན་ནའང་། སྟེང་གི་བཀོད་པའི་འགྱུར་ལྡོག་དང་ཁེ་ཚོང་གིས་བསྐྱེད་པའི་འདུ་ཤེས་དེས་ད་ལྟ་འཕྲིན་སྟེགས་མང་པོ་ཞིག་རྒྱ་བོད་ཡིག་མཉམ་བསྲེས་ཀྱི་འཕྲིན་སྟེགས་རྣམས་སུ་གྱུར་དང་འགྱུར་བཞིན་ཡོད། སྤྱིར་ན་རྒྱ་བོད་ཡིག་རིགས་གཉིས་ནི་ང་ཚོས་རྒྱུན་སྤྱོད་ཀྱི་ཡི་གེ་ཡིན་པ་དེས་འགལ་བ་ཆེར་མེད་ནའང་། ཀློག་པ་པོའི་ཁྱབ་ཁོངས་དང་འཕྲིན་སྟེགས་རང་གི་འགན་བབ་ཀྱི་ལས་ཀ་ལྟར་བཤད་ན། རྒྱ་ཡིག་གི་འཕྲིན་སྟེགས་རྣམས་སུ་དབྱིན་ཡིག་དང་ཉི་ཧོང་གི་ཡི་གེ་སོགས་བསྲེས་ན་མི་མཛེས་པ་ནང་བཞིན་བོད་ཡིག་གི་འཕྲིན་སྟེགས་རྣམས་སུ་རྒྱ་ཡིག་གི་རྩོམ་སོགས་འཇོག་པ་དེ་ལའང་ཆེད་ལས་དང་གཅིག་གྱུར་མིན་པའི་སྐྱོན་ཞིག་མཐོང་ཡོང་བ་མ་ཟད། རྗེས་སོར་བོད་ཡིག་གི་དུས་དེབ་དང་ཚགས་པར་སོགས་ཀྱང་ཡིག་རིགས་མང་པོ་མཉམ་བསྲེས་ཀྱི་དེབ་ཚགས་རྣམས་སུ་འགྱུར་རྒྱུའི་ལྟས་མི་ལེགས་པ་ཞིག་མངོན་ཡོད་པ་རེད། འདི་ལ་སྒེར་གཉེར་འཕྲིན་སྟེགས་མང་པོ་ཞིག་གི་འགན་འཛིན་པ་སློབ་མ་སོགས་ཡིན་པ་དེས་ཁོ་ཚོའི་མིག་ཁའི་འཚོ་ཚིས་ཀྱི་དགོས་མཁོ་དང་ཡང་ན་བཀླག་གྲངས་ཙམ་པོ་ཞིག་ལ་དམིགས་ཏེ་ཡིག་རིགས་སྣ་ཚོགས་མཉམ་བསྲེས་ཀྱི་གཞི་ས་ཞིག་བཟུང་བ་ལ་ནི་གནས་ལུགས་མང་པོ་བཤད་དགོས་པའི་རྒྱུ་མཚན་ཆེར་མེད་ནའང་། བོད་ཡིག་ཚགས་དེབ་ཀྱི་རྩོམ་སྒྲིག་ཁང་དང་སྨྱན་སྦྱོར་ལས་ཁུངས་མང་པོ་ཞིག་གིས་མི་སྒེར་བ་དེ་དག་ལ་རྗེས་ཟློས་ཀྱིས་འཕྲིན་སྟེགས་རྣམས་སུ་བོད་རྒྱ་ཡིག་མཉམ་བསྲེས་ཀྱི་རྩོམ་ཡིག་སོགས་སྤེལ་བའི་ལས་ཀ་དེ་དག་ནི་མདོར་དེད་ན་མི་རིགས་སྐད་ཡིག་གི་རང་སྐྱོང་སྲོལ་ཡིག་རྣམས་དང་ཡང་འགལ་ཡོད་པ་འདི་དག་གིས་མ་འོངས་པ་ན་བོད་ཀྱི་ལོ་ཙཱ་བ་དང་འཕྲིན་སྟེགས་དོ་དམ་པ་དག་གིས་བོད་སྐད་བོད་ཡིག་འཕེལ་རྒྱས་ཀྱི་ཕྱོགས་ལ་ནུས་ཤུགས་འདོན་རྒྱུ་དེ་ཁ་ཚ་དགོས་གཏུགས་སུ་གྱུར་པའི་དོན་བྱ་ཡག་པོ་ཞིག་ཏུ་བསམ་དགོས་སོ། ། (གཞན་དེང་གི་ལོ་ཙཱ་བ་མང་པོ་ཞིག་གིས་འཕྲུལ་ཆས་ལོ་ཙཱ་ལ་སྐྱབས་བཅོལ་བའི་གནས་ཚུལ་ཤིན་ཏུ་ཛ་དྲག་ཡིན་ནའང་འདིར་སྐབས་སུ་མ་བབས་པས་བསྐྱུངས་ཡོད) ༡ འཛམ་གླིང་རྩོམ་རིག་གྲགས་ཅན་བོད་འགྱུར་དཔེ་ཚོགས། ༢ རྩོམ་པ་པོ་བཀྲས་གླིང་དབང་རྡོར། ༣ བོད་ཀྱི་རྩོམ་རིག་བྱ་དགའ། ༤ «སྦྲང་ཆར་རྩོམ་རིག་བྱ་དགའི་བརྩམས་ཆོས་ཕྱོགས་བསྒྲིགས» ༥ «བརྩེ་དུང་གི་གཏམ་རྒྱུད» ༦ «འཇམ། —Mགྲོང་ཚོའི་རྣམ་བཤད» ༧ «འདི་ན་ཡང་དྲག་ཏུ་མཆོང་ལྡིང་བྱེད་བཞིན་པའི་སྙིང་གསོན་པོ་ཞིག་འདུག»གི་པར་གཞིའི་སྐོར་གྱི་གླེང་མོལ། ༨ ནོ་བྷེལ་རྩོམ་རིག་བྱ་དགའ། ༩ སོག་ཡིག་གི་སྒྲུང་རིང«སྨན་པ་གྲྭ་ཚང»  ༡༠ “ནོར་ནོར”རིས་དེབ།