གཟན་བདག་མེད་ཀྱི་སྙན་རྩོམ《ལྗང་ཁུ》།

ལྗང་ཁུ།
གཟན་བདག་མེད། (དཀར་མཛེས)

སྒེའུ་ཁུང་ཆུང་ཆུང་ཞིག་གི་ནང་དུ་བརྩིགས་པའི་སྤྲིན་དང་ནམ་མཁའ་དག
ཕྱི་གསལ་ནང་གསལ་གྱི་མི་ཡི་གམ་དུ་བཞུར་བའི་ཆུ་དང་གཙང་བོར་འདྲེས་ཤིང
བརྩེ་བ་རྨས་མ་དག་གི་གཏམ་རྒྱུད་ལ་དོད་འདུག
མཚན་མོར་བཏབ་པའི་མེ་ཏོག་དང་འདྲ་བའི་སྨག་ནག་གིས
ཁྱོད་ཀྱི་མཐོང་ལམ་བསྒྲིབས་བྱུང
རྨི་ལམ་དང་དྲན་པ་ལྗང་ཁུ་བཞིན་ཁྱོད་ཀྱི་སྙིང་ཁོང་ལ་ལྷུང་སོང

རླུང་བུ་ལྡོམ་པོ་ཞིག་ངའི་སྣང་བ་དང་འགྲིལ་གྱིན
རང་ཉིད་ལས་བཏོན་པའི་གྲིབ་ནག་མཐའ་དག
ཕྱེད་ཀ་ཆག་པའི་མེ་ལོང་ནང་དུ་ཉི་རྡུལ་བཞིན་དུ་འཆར
གཏམ་རྒྱུད་ལས་སྐྱེས་པའི་དགའ་སྐྱོ་ཆགས་སྡང་ལ་ང་རྒྱལ་སྐྱེས་པས
ཉོན་མོངས་ཀྱི་མེ་ཏོག་ཁྱོད་ཀྱི་སྙིང་ལ་བཙུགས་ཏེ་སྡིག་སྒྲིབ་ལ་ལྷན་པ་རྒྱག

སྐར་མ་ལྗང་ཁུ་ཞིག་སེམས་ནང་གི་ནམ་མཁའ་ལ་འཆར་ཀ
མུན་པའི་མདངས་ལ་འདྲེས་པའི་གླུ་གཞས་ཤིག་མཚན་མོར་དཀྲོལ་ཡང
དེ་དུས་ཟླ་བ་ཡལ་ཟིན་པས་ཅི་ཡང་རྙེད་མ་བྱུང
མུན་ནག་ཏུ་གྲགས་པའི་གླུ་གཞས་དེ་ངའི་ཡིན་ལ་ཁྱོད་ལའང་ཡོད
འོན་ཀྱང   རླུང་གི་སྣེ་མོ་ལ་འཇུས་ཏེ་ཕྱོགས་སོ་སོར་འཐོར་སོང

རྒྱང་རིང་དེ་སྨྲེང་གླུས་མཚམས་སྦྱོར་བྱེད་བཞིན་བྱེད་བཞིན
དཀར་ཁུང་དུ་འཚུབས་པའི་སྤྲིན་དང་སྨུག་པ་དག
མི་ཞིག་གི་ཕྲག་དོག་ཀྱི་རླངས་པ་ལས་སྐྱེས་ཤིང་ཆོས་ཉིད་ཀྱིས་གྲུབ་པའི་མ་རིག་པའོ
ས་རྡུལ་གྱིས་བྲིས་པའི་སེམས་དང་སྡུག་བསྔལ་དག་དམྱལ་བའི་རབ་ཀ་ལ་ལྷུང་ཞིང
ལོ་ངོ་མང་པོ་ལ་མ་རིག་པ་དེར་འགྱུར་ངེས

2016.2.14ནུབ་མོར།